Read Western Krahn Nu̍-dɛ̍ᵻ 14 Bible Online

Nu̍-dɛ̍ᵻ 14 - Western Krahn bible

Nu̍-dɛ̍ᵻ 14

¹Wɛ̀ Pɔɔ ke Banaba pa̍ dě Juu nyɔ̍-a wɛɛ sà gbò sɔ̀n dǒ Akɔniɔ. Iě u̍h bla̍ Nyɔsoa tìh, ɛ̀ u̍h-a nu̍-a se̍e̍-ɛ. Ka u̍h nu̍-a tìh bla̍ sɔɛn-ɛ, sɔ ɛ̍ fèàɛ̀ Juu nyɔ̍ ke ùh se̍-a Juu nyɔ̍-ɛ u̍h-a dɔu-a wlùh, iě u̍h blě wlùh gbaɛ-ɛ.

²Jɛ Juu juh se̍-a wlùh gbaɛ blě-ɛ, u̍h fèàɛ̀ ùh se̍-a Juu nyɔ̍-ɛ u̍h-a wlùh iě u̍h pa̍ u̍h sɔ̀n i̍ u̍h iě de̍di̍i̍ᵻ la faɛn.

³Dǒ Pɔɔ ke Banaba wlè, iě u̍h-a bla̍ Joi-a tìh gbài̍gbài̍. Wɛ̀ Joi tba̍ u̍h bu̍hᵻ de̍e̍ i̍ dǒ ɔ̍ blɛ nɛ tìh u̍h-a bla̍-aɛ we̍. Ɛ̍ kɔn ɔ̍ nu̍ ɛ̍ iě nyɔ̍ wɔ̍n flɔn-ɛ dɛ̍ᵻ ke jbaɛdih-a jii dě u̍h ja̍a̍.

⁴Nyɔ̍ nɛ-a dǒ tùgbàwlɔ̀ laa̍ di̍i̍-ɛ, u̍h gblè-e u̍h-a chɛ̀ i̍. Fɔ̌ tǐn Juu nyɔ̍ we̍, wɛ̀ duuh tǐn Jusu-a gba̍tòà we̍.

⁵Wɛ̀ Juu nyɔ̍ ke, ùh se̍-a Juu nyɔ̍-ɛ ke u̍h-a wlu̍ kwa̍ blě nyɔ̍ sɔ̌ u̍h iě gba̍tòà kà i̍ nu̍, u̍h iě u̍h sɔɔ̌ᵻ i̍ tbaɛ.

⁶Jɛ u̍h juo-ao dɛ̍ i̍-ɛ, iě u̍h gbǎ kwlǎ u̍h mu̍ Lesla ke Dɛɛbi. Laikɔniɔ nyɔ̍-a wlɔ̀ᵻ bo, ɛ̍ ke bloa̍ sì-a ɛ̍ de̍ i̍-ɛ ke.

⁷Dě u̍h bla̍-ɛ pɔ̀n chɛ̀-a tìh we̍i̍.

⁸Nɛ̀ jɔ̍gbau due nɛ dǒ Lesla, ɔ̍ klɔ-ɛ. Ɛ̍ sɔ dě ɔ̍ wlǔh la̍-a, sɔ ɔ̍-ɔ se̍a na.

⁹Nɛ̀ ɔ̍ tè i̍ ɔ̍ po̍ Pɔɔ-a wlu̍ dounᵻ we̍. Wɛ̀ Pɔɔ gbɛ̀n ɔ̍ ja̍ sòo̍sòo̍, sɔ ɔ̍ blě wlùh gbaɛ-ɛ, ɛ̍ iě ɔ̍ pǔh-i.

¹⁰Iě Pɔɔ plǎn, ɔ̍ la̍a̍, “Sɔ bloɔ̍ ìè i̍ nyna.” Wɛ̀ jɔ̍gbau wa̍n bloɔ̍ iě ɔ̍ na i̍.

¹¹Nyɔ̍ tlùgbei̍ jě-a dɛ̍ la-ɛ, iě u̍h-a wǐi i̍ dě u̍h-a Laikɔniɔ wlu̍ di̍i̍, u̍h la̍a̍, “À nyɔsoa diih jii dě nyi̍ɔ̍tu di̍i̍ wɛ̀ i̍h ji̍ nɔ̌ àɔ̀ we̍ bloɔ̍.”

¹²Wɛ̀ u̍h-a dǎɛ Banaba Siu, iě u̍h-a dǎɛ Pɔɔ Ɔmi, dɛ̍nu̍ɛ, ɔ̍ bo ɔ̀ nu̍ wlu-u nyɔ̍.

¹³U̍h-a nyɔsoa Siu ɛ̀ kɔn wɛɛ sà gbò nyna i̍ dǒ wlɔ̀ gbàì-ɛ, wɛ̀ ɛ̍ slaǎ sà nyɔ̍ ja bliᵻ gblɔ̀ᵻ ke fɔ̀ài̍n-a gbɛ̀ɛ̍ᵻ dǒ saǎn wɔ̍n we̍, u̍h iě slaǎ sà dǒ Pɔɔ ke Banaba we̍.

¹⁴Jɛ Pɔɔ ke Banaba ùh nu̍-a Jusu-a gba̍tòà-ɛ, sɔ u̍h wɔ̌n i̍h sǔh. Iě u̍h fɔǎɛ u̍h-a jlii̍ i̍ ɛ̍ iě ɛ̍ to ka ɛ̍ nyaɛ-a u̍h wɔ̍i̍n-ɛ, wɛ̀ u̍h kèè dě nyɔ̍ tlùgbei̍ laa̍ nynɛ̌. Iě u̍h-a plǎn-ɛ i̍, u̍h la̍a̍,

¹⁵“Dɛ̍nu̍ mɔ̀-a nu̍ dɛ̍ la ɛ? Àɔ̀ la ka mɔ̀ nu̍-a wlɔ̀ nyi̍ɔ̍-ɛ, kǎ à nɛ ke. À nɛ da̍a à iě pɔ̀n chɛ̀-a tìh bla̍ dě mɔ̀ we̍. À sèàɛ̍ mɔ̀ wlùh mɔ̀ iě pɔ̀ɔ̍pìe̍ dɛ̍ᵻ la kɛ̍n i̍ poe, wɛ̀ mɔ̀ iě dě kmɔ̌ nɛ Nyɔsoa we̍ i̍ bǐi. Nyɔsoa bo ɔ̀ nu̍ blǔh ke ja̍u̍n ke jbǒ, ɛ̍ ke dɛ̍ᵻ kli̍hgbɛ̍ nɛ-a dě i̍h di̍i̍-ɛ ke.

¹⁶Tɛin-ɛ, nɛ̀ ɔ̍ sà blǔh kli̍hgbɛ̍ sɔ̍n kɛ̍n dɛ̍ tba̍ dǒ u̍h wlì-ɛ, u̍h iě ɛ̍ nu̍.

¹⁷Jɛ dɛ̍ᵻ chɛ̀ ɔ̍ nu̍-a i̍-ɛ, i̍h bo ìh nu̍ ɔ̍ sàànsi̍i̍h dǒ mɔ̀ we̍. Ɔ̍ nyǐ mɔ̀ nǐ iě ɛ̍ dba̍, wɛ̀ mɔ̀-a di̍-dɛ̍ᵻá tlo dǒ ti̍-a taǐn di̍i̍. Ɔ̍ nyǐ mɔ̀ di̍-dɛ̍ᵻ iě ɔ̍ jǐi mɔna̍ dǒ mɔ̀ pɔluh kɛ̍n.”

¹⁸Wlu̍ dɔu la Pɔɔ ke Banaba bla̍-a dě u̍h we̍-ɛ, ɛ̍ bo ɛ̀ sà u̍h wìè-i. Jɛ u̍h-a pɔ̀n slaǎ sà-a i̍ de gbɔ̀gbɔ̀.

¹⁹Jɛ Juu nyɔ̍ duuh sɔ dǒ Antiɔ ke Akɔniɔ, wɛ̀ u̍h fèàɛ̀ nyɔ̍gbei-a wlùh, iě u̍h ke u̍h tǐn. Wɛ̀ u̍h tbaɛ Pɔɔ sɔɔ̌ᵻ i̍, sɔ u̍h jajeɛ̍ ɔ̍ mɛ̌ wɛ̀ de. Iě u̍h klǎ ɔ̍ i̍ u̍h sà ɔ̍ dǒ wlɔ̀.

²⁰Jɛ Jusu-a kòà mu̍-a dě ɔ̍ we̍-ɛ, wɛ̀ u̍h dlɛ̌ ɔ̍. Sɔ ɔ̍ sɔ bloɔ̍ sǔh, iě ɔ̍ mu̍ de̍ wlɔ̀. Sɔ̀n sɛ̀n-aɛ, iě ɔ̍ ke Banaba mu̍ dǒ Dɛɛbi.

²¹Pɔɔ ke Banaba bla̍ pɔ̀n chɛ̀-a tìh dǒ Dɛɛbi, wɛ̀ u̍h nu̍ nyɔ̍ dɔu Jusu-a kòà we̍i̍. Wɛ̀ u̍h mu̍ dǒ de̍ Lesla ke, Akɔniɔ ke, Antiɔ wlɔ̀ᵻ di̍i̍.

²²Wɛ̀ u̍h-a po̍ Jusu-a kòà nɛ-a deě-ɛ gbǐh ku̍u̍, iě u̍h-a fùka u̍h-a wlùh u̍h iě wlùh gbaɛ dɛ kɛ̍n sie. U̍h la̍a̍, “Dě jua̍i̍ sàɛ̀-ɛ dɔu di̍i̍ bo à mu̍ jii sasǎ wɛ̀ à iě dě Nyɔsoa-a kmɔ̌ wlu̍ i̍ kɔn-ɛ di̍i̍ nyni̍.”

²³Iě u̍h tba̍ nyɔ̍ klaaᵻ chèɛ̀ chɔchi̍h wlɔ̀ᵻ kli̍hgbɛ̍ di̍i̍ i̍. Nɛ̀ ba̍le-ɛ ke jlǔh po̍-ɛ bo u̍h-a nu̍ wɛ̀ u̍h-a po̍ u̍h dě Joi u̍h gbaɛ-a wlùh-ɛ kwa̍a̍.

²⁴Wɛ̀ u̍h jii Pesedia fɔɔ iě u̍h nyni̍ Panfelia fɔɔ.

²⁵Iě u̍h bla̍ Nyɔsoa tìh dǒ Pɛka, wɛ̀ u̍h dǔ dǒ Atalia mu̍-ɛ.

²⁶U̍h sɔ-a dǒ Atalia-ɛ, wɛ̀ u̍h gbǎ blǎgbè di̍i̍ u̍h mu̍ de̍ Antiɔ. Dǒ-o laa̍ bo u̍h poe u̍h dě Nyɔsoa kwa̍a̍ sàì, ɔ̍ blɛ iě u̍h we̍ nɛ dǒ dbo̍ u̍h wɔ̀-a ka i̍-ɛ we̍.

²⁷U̍h nyni̍-a Antiɔ-ɛ, iě u̍h po̍ chɔchi̍h kli̍hgbɛ̍ tàdùè. Dɛ̍ᵻ Nyɔsoa nu̍-a dě u̍h ja̍a̍-ɛ, iě u̍h po̍ i̍h-a kunǎ kli̍hgbɛ̍. Ɛ̍ ke ka ɔ̍ pɔ̀ni-a wìè wɛ̀ ke dǒ ùh se̍-a Juu nyɔ̍-ɛ we̍ u̍h iě-a ɔ̍ wlùh gbaɛ-ɛ.

²⁸Wɛ̀ u̍h sì ti̍ tɔ̀ɔ̀n dǒ Jusu-a kòà laa̍ we̍.