Read Western Krahn Nu̍-dɛ̍ᵻ 16 Bible Online

Nu̍-dɛ̍ᵻ 16 - Western Krahn bible

Nu̍-dɛ̍ᵻ 16

¹Pɔɔ mu̍ Dɛɛbi, dǒ ɔ̍ waɛn ɔ̍ mu̍ Lesla. Dǒ Jusu-a kòà due tǐn, u̍h-a dǎɛ ɔ̍ Timote. Ɔ̍ de̍ nu̍ Juu nynɔ̌ iě ɔ̍ nu̍ Nyɔsoa nyɔ̍. Jɛ ɔ̍ baa nu̍ Klii jǔ.

²De̍di̍i̍ᵻ kli̍hgbɛ̍ nɛ-a Lesla ke Akɔniɔ-ɛ, u̍h-a sà Timote-a tìh chɛ̀-ɛ kleǐn.

³Sɔ Pɔɔ-a pɔ̀n ɔ̍ gba̍-a i̍, ɛ̍ kɔn ɔ̍ po̍ ɔ̍ plɔ̀n. Dɛ̍nu̍ɛ, ka Timote baa nu̍-a Klii jǔ-ɛ, Juu nyɔ̍ kli̍hgbɛ̍ juo ɛ̍ dɛ̍ i̍ dě fɔ̌ laa̍ we̍.

⁴Wlɔ̀ᵻ u̍h-a jii-a di̍i̍ i̍ dǒ u̍h-a mu̍ la̍-ɛ, nɛ̀ kǎ u̍h-a sèàɛ̍ Nyɔsoa nyɔ̍ nɛ-a i̍h di̍i̍ i̍-ɛ wlùh. Wɛ̀ telě ìh Jusu-a gba̍tòà ke nyɔ̍ klaaᵻ po̍-a dě Juluslɛn wlɔ̀ di̍i̍-ɛ, u̍h iě ɛ̍ i̍ gbɛ̍n.

⁵Sɔ chɔchi̍h nyɔ̍-a dǔ ja̍i̍ dǒ wlùh gbaɛ we̍. Wɛ̀ ka sɔ̀n-a sɛ̀n-aɛ, iě i̍h-a gbǎ kɛ̍n.

⁶Pɔɔ bei jii Flejia ke Kelesea bloa̍ kɛ̍n, dɛ̍nu̍ɛ, Nyɔsoa-a Sùù se̍ pɔ̀n u̍h iě Nyɔsoa tìh bla̍ dě Esea fɔɔ.

⁷Ti̍ u̍h nyni̍-a Maisia dǒ tùna̍ i̍-ɛ, sɔ u̍h-a pɔ̀n tùna̍ tàn-a i̍ de u̍h iě dě Betenia fɔɔ mu̍. Jɛ Jusu-a Sùù se̍ ɛ̍-ɛ wɔ̌ɛn.

⁸Ɛ̍ kɔn u̍h jii Maisia iě u̍h mu̍ dǒ Tloa.

⁹Dǒ wlù weɛ̍ laa̍ di̍i̍ bo Pɔɔ ja-ɛ se̍ mɔ̌ ja̍. Nɛ̀ Mɛsedonia jǔ due nyna-ɛ ɔ̍ wɔ̍n iě ɔ̍ ba̍le ɔ̍. Ɔ̍ la̍a̍, “Ji̍ nɔ̌ àɔ̀ we̍ Mɛsedonia fɔɔ ìè àɔ̀ we̍ gbǎ.”

¹⁰Pɔɔ wɔ̀-a ja̍ laa̍ ja-aɛ, sɔ à tɛ̌n la̍ blewi̍h i̍ sǔh à iě Mɛsedonia mu̍. Dɛ̍nu̍ɛ, à juo ɛ̍-ɛ, Nyɔsoa bo ɔ̀ dǎ àɔ̀ à iě pɔ̀n chɛ̀-a tìh bla̍ dě nyɔ̍ laa̍ we̍.

¹¹À gbǎ blǎgbè di̍i̍ iě à sɔ dǒ Tloa, wɛ̀ à chɛ̍n nǐ kɛ̍n gbe̍i̍n à mu̍ Samotlei tbǒ kɛ̍n. Sɔ̀n sɛ̀n-aɛ, iě à mu̍ dǒ Nɛapole.

¹²Dǒ à sɔ-ɔ wɛ̀ à mu̍ dǒ Felepai, ɛ̀ nu̍-a Mɛsedonia fɔ̌-a sàǐtòò tùgbàwlɔ̀-ɛ. Wloma nyɔ̍ bo ùh kɔn-e wlu̍ i̍. Dǒ à sì wǐh gbɔ̍.

¹³Ɛ̍ nu̍-a wlè-weɛ̍-ɛ, wɛ̀ à sɔ dǒ wlɔ̀ à mu̍ dě nǐ klaa wɔ̍i̍n. À jajeɛ̍ dě nyɔ̍-a ba̍le-e Nyɔsoa de. Iě à tè-e i̍, wɛ̀ à wlu dě nynɔ̌gbaɔᵻ ùh ji̍-a dě tà-a chɛ̀-ɛ we̍.

¹⁴Nynɔ̌gbaɔᵻ ùh wɔ̌n-a à wlu̍ i̍ dě u̍h nynɛ̌-ɛ, u̍h-a due-a nynɛ̌ bo Ledia. Nǐnmɛ jlii̍ bo ìh nu̍ ɔ̍ naɛ ple̍-dɛ̍. Ɔ̍ sɔ dǒ Taɛtawla wlɔ̀ di̍i̍, iě ɔ̍ sà Nyɔsoa wɛɛ. Ɔ̍ kɔn wlùh bo Joi Nyɔsoa pɔ̀ni ɔ̍ iě Pɔɔ-a wlu̍ i̍ wɔ̌n.

¹⁵Wɛ̀ ɔ̍ ke ɔ̍ blǐ gbò nyɔ̍ kli̍hgbɛ̍ po̍ nǐ dlǔ, iě ɔ̍ dǎ àɔ̀, ɔ̍ la̍a̍, “Pò mɔ̀ juo ɛ̍ dǒ mɔ̀ pɔluh kɛ̍n ǐn gbaɛ Joi wlùh wɛ̀-ɛ, nɛ̀ mɔ̀ à mu̍ dě ǐn blǐ gbò mɔ̀ iě-e i̍ tè.” Iě ɔ̍ nɛ̌ à kɛ̍ɛ̍n à iě-e mu̍.

¹⁶Dǒ weɛ̍ due di̍i̍ nɛ̀ à mu̍ dě tà nyɔ̍-a ba̍le-a Nyɔsoa-ɛ, wɛ̀ kèi̍ nynɔ̌gbaɔ jǔ due jɛɛ àɔ̀ kɛ̍n, nɛ̀ jeědih nɛ dǒ ɔ̍ de̍e̍. Sɔ ɛ̍ nu̍ ɛ̍ iě ɔ̍ po̍ gbànwli. Sɔ nyɔ̍ ùh kɔn-a ɔ̍-ɛ, u̍h-a jě ɔ̍ gbànwli po̍-ɛ wlǐ dɔu we̍.

¹⁷Nynɔ̌gbaɔ jǔ laa̍ bo ɔ̀ wɔ̀ dǒ àɔ̀ ke Pɔɔ de̍e̍ iě ɔ̍ wǐi i̍. Ɔ̍ la̍a̍, “Nyɔ̍ la bo ùh nu̍ Sìì Nyɔ̍ Wɔ̍n Nyɔsoa-a pòi̍nynuu̍. Mɔ̀ iě pǔh tìh bo u̍h-a bla̍ dě mɔ̀ we̍.”

¹⁸Ɛ̍ bo nynɔ̌gbaɔ jǔ laa̍ ɔ̍ wɔ̀-ɛ dǒ àɔ̀ de̍e̍ dǒ wǐh dɔu di̍i̍. Sɔ ɛ̍ feǎn dǒ Pɔɔ wlì, wɛ̀ ɔ̍ fèàɛ̀ iě ɔ̍ la̍a̍ dě jeědih laa̍ we̍, “Ǎn sèàɛ̍ ìn wlùh dǒ Jusu Klai-a nynɛ̌ kɛ̍n, sɔ dǒ ɔ̍ de̍e̍.” Dǒ tàdùè laa̍ jeědih sɔ dǒ nynɔ̌gbaɔ jǔ laa̍ de̍e̍.

¹⁹Sɔ dɛ̍ ɔ̍ kɔn-nyɔ̍ iě-a wliɛ̍ i̍ jěe dɛ-ɛ, ɛ̍ se̍ nɛ. Ɛ̍ bo u̍h juo i̍ wɛ̀ u̍h gbɛ̍n Pɔɔ ke Sale. Iě u̍h blě u̍h i̍ klǎ-a u̍h gba̍ u̍h dě wlɔ̀gbàɛ̀, u̍h ke tùn blě nyɔ̍ iě jua̍i̍ jiěe.

²⁰Wɛ̀ u̍h gba̍ u̍h dě Wloma nyɔ̍-a kɔ̀mla̍ jǔ. U̍h la̍a̍, “Ùh la Juu nyɔ̍ bo, jɛ u̍h-a ja sàǎsà da̍a à we̍ wlɔ̀.

²¹Àɔ̀ Wloma nyɔ̍ ìh se̍-a à blǐ dɛ̍ᵻ, ìh-a wa̍-a à telě à-a nu̍-aɛ, i̍h bo u̍h-a poe à nyɔ̍ nǎ.”

²²Wɛ̀ nyɔ̍ kli̍hgbɛ̍ bla̍ gbɔ̀ iě u̍h wlǎ Pɔɔ ke Sale dlǔ i̍. Wɛ̀ kɔ̀mla̍ po̍ nyɔ̍ slǔh iě u̍h fɔǎɛ u̍h-a jlii̍ i̍, wɛ̀ ɔ̍ sà nyɔ̍ u̍h iě u̍h bla̍.

²³U̍h wɔ̀-a u̍h bla̍-a wɛ̀ dɛ̍blɔ-ɛ, iě u̍h po̍ u̍h kasoo. Wɛ̀ u̍h sèàɛ̍ kasoo gbò-a jlǐhɛ̍ tù nyɔ̍ wlùh ɔ̍ iě u̍h-a nɛnɛ̌ nu̍.

²⁴Ɔ̍ nɔ̀ɔ̍, ɔ̍ wɔ̌n-a wlu̍ la ke-ɛ, sɔ ɔ̍ po̍ Pɔɔ bei dě kasoo gbò-a di̍i̍-a di̍i̍ sǔh. Iě ɔ̍ po̍ u̍h gbèèɛ̀.

²⁵Ɛ̍ nu̍-a tòloo-ɛ, wɛ̀ Pɔɔ ke Sale-a ba̍le, iě u̍h-a ble̍ Nyɔsoa duǐh. Nɛ̀ kǎ gbɛ̍n-nyɔ̍ duuh-a po̍ dě u̍h we̍ dounᵻ.

²⁶Kli-a ka-a, nɛ̀ wlù poɔ klaa chɛn ja̍i̍ wɛ̀, iě ɛ̍ sèke kasoo gbò-a gbɔ̀lùh i̍. Dǒ kasoo gbò-a wɔ̍nᵻ kli̍hgbɛ̍ nyna iě i̍h pɔ̀ni. Wɛ̀ jɔɔ nɛ-a gbɛ̍n-nyɔ̍ kli̍hgbɛ̍ bu̍hᵻ i̍-ɛ chɛn.

²⁷Wɛ̀ kasoo gbò-a jlǐhɛ̍ tù nyɔ̍ wlǔh nyinɔ̍ i̍. Ɔ̍ nu̍-a ka-a, nɛ̀ kasoo gbò-a wɔ̍nᵻ kli̍hgbɛ̍ pɔ̀ni. Wɛ̀ ɔ̍ chlì ɔ̍ plàn chlɛ̀n ɔ̍ iě ɔ̍ chɛ̀ dbǎ, dɛ̍nu̍ɛ, ɔ̍ jajeɛ̍ gbɛ̍n-nyɔ̍ kli̍hgbɛ̍ ple̍ wɛ̀ de.

²⁸Wɛ̀ Pɔɔ plǎn, ɔ̍ la̍a̍, “Bɔ̌ àn chɛ̀ dɛ̍ pùn nu̍-ɛ, à nyɔ̍ se̍ tà mui.”

²⁹Iě kasoo jlǐhɛ̍ tù nyɔ̍ sèàɛ̍ nyɔ̍ wlùh u̍h iě nape̍ tba̍. Wɛ̀ ɔ̍ kèè dě gbò, iě ɔ̍ ku̍ blě tlɛ̍-ɛ wɛ̀ ɔ̍ chlìi i̍ dǒ Pɔɔ ke Sale jǔ.

³⁰Wɛ̀ ɔ̍ sǐ-i u̍h sɔ̀n, iě ɔ̍ la̍a̍, “Nyɔ̍ klaaᵻ, ka iě nu̍ wɛ̀ iě pǔh ɛ?”

³¹Wɛ̀ u̍h la̍a̍, “Gbaɛ Joi Jusu wlùh nɛ̀ àn mu̍ pǔh, ɛ̍ ke àn chɛ̌ kli̍hgbɛ̍ ke.”

³²Iě u̍h bla̍ Joi-a tìh dě ɔ̍ we̍, ɛ̍ ke nyɔ̍ kli̍hgbɛ̍ nɛ-a dě ɔ̍ blǐ gbò-ɛ ke.

³³Wɛ̀ kasoo jlǐhɛ̍ tù nyɔ̍ dle u̍h-a chìèᵻ dǒ tàdùè laa̍ maɔ̍. Wɛ̀ ɔ̍ ke ɔ̍ chɛ̌ kli̍hgbɛ̍ nyna-o iě u̍h po̍ nǐ dlǔ.

³⁴Iě ɔ̍ gba̍ Pɔɔ ke Sale dě ɔ̍ blǐ gbò, wɛ̀ ɔ̍ nyǐ u̍h di̍-dɛ̍. Sɔ ɛ̍ po̍ kasoo jlǐhɛ̍ tù nyɔ̍ ke ɔ̍ chɛ̌ kli̍hgbɛ̍ mɔna̍ kaa̍, dɛ̍nu̍ɛ, u̍h gbaɛ Nyɔsoa wlùh wɛ̀.

³⁵Sɔ̀n sɛ̀n-aɛ, wɛ̀ kɔ̀mla̍ dbo̍ fledlǔ dě kasoo jlǐhɛ̍ tù nyɔ̍ we̍, ɔ̍ la̍a̍, “Tǎli nyɔ̍ laa̍ i̍ u̍h iě mu̍.”

³⁶Wɛ̀ kasoo jlǐhɛ̍ tù nyɔ̍ sèàɛ̍ Pɔɔ wlùh, ɔ̍ la̍a̍, “Kɛɛ̍n dbo̍ wlu̍ iě mɔ̀ i̍ tǎli mɔ̀ iě mu̍. Ɛ̍ tìh-ɛ, mɔ̀ mu̍ mɔ̀-a dɛ̍ pɛlɛpɛ.”

³⁷Wɛ̀ Pɔɔ la̍a̍ dě fledlǔ laa̍ we̍, “À nu̍ Wloma nynuu̍, wɛ̀ tìh se̍ à gbɛ̍n iě u̍h bla̍ àɔ̀ dǒ gbaɛ̍we̍, wɛ̀ u̍h po̍ àɔ̀ kasoo. Jɛ à kasoo sà-a bo u̍h-a pɔ̀n dě kwile-e po̍-ɛ i̍. À se̍ wɔ̌n. U̍h-a chɛ̀-ɛ gbǎ ji̍ wɛ̀ u̍h iě àɔ̀ nɔ̌ kasoo sà.”

³⁸Wɛ̀ fledlǔ nynuu̍ gba̍ kunǎ laa̍ dě kɔ̀mla̍ we̍. U̍h wɔ̌n-a Pɔɔ ke Sale-a Wloma nynuu̍ nu̍ tìh-ɛ, sɔ ɛ̍ wa̍ u̍h dɛ̍ we̍.

³⁹Wɛ̀ u̍h ji̍ iě u̍h sèàɛ̍ tìh we̍ i̍ dě Pɔɔ bei we̍, iě u̍h dǔ u̍h dě kasoo sà-a. Wɛ̀ u̍h sèàɛ̍ u̍h wlùh u̍h iě dǒ wlɔ̀-a chɛ̀ sɔ.

⁴⁰Pɔɔ ke Sale sɔ-a dě kasoo-ɛ, iě u̍h mu̍ dě Ledia blǐ gbò. Dě u̍h ke de̍di̍i̍ᵻ gbèɛ̀ɛn, wɛ̀ u̍h bla̍ wlu̍ ɛ̀ iě-a u̍h gbǐh ku̍u̍ po̍-ɛ, iě u̍h dǔ mu̍-ɛ.