Read Western Krahn Nu̍-dɛ̍ᵻ 18 Bible Online

Nu̍-dɛ̍ᵻ 18 - Western Krahn bible

Nu̍-dɛ̍ᵻ 18

¹Ɛ̍ sì-a i̍-ɛ, wɛ̀ Pɔɔ sɔ dǒ Atɛn ɔ̍ mu̍ dǒ Kɔwlɛn wlɔ̀ di̍i̍.

²Dě ɔ̍ jɛɛ Juu jǔ due, ɔ̍ nynɛ̌ bo Akwela. Ɔ̍ sɔ dě Pɔntɔ fɔɔ. Nɛ̀ ɔ̍ ke ɔ̍ nynɔ̌ Plisela sɔ Etele bloa̍ kɛ̍n delebla, dɛ̍nu̍ɛ, Bloa̍ Joi Kladiɔ nu̍ Juu nyɔ̍ kli̍hgbɛ̍ i̍ iě u̍h sɔ dě Wlom wlɔ̀ di̍i̍. Pɔɔ mu̍ u̍h jě la̍-a.

³Wɛ̀ ɔ̍ tè dǒ u̍h we̍ i̍, iě ɔ̍ ke u̍h-a tba̍ wɛ̀ɛ̀ sɔ̍n wlù-a jlii̍, dɛ̍nu̍ɛ, dbo̍ tu̍ laa̍ bo ɔ̍ jěe dɛ̍ i̍ ke se̍e̍.

⁴Wlè-wǐh kli̍hgbɛ̍ Pɔɔ-a bla̍ gbòɛ̀ dě wɛɛ sà gbò sɔ̀n ɔ̍ iě Juu ke Klii nyɔ̍-a dlǔ jli̍.

⁵Ti̍ Sale ke Timote sɔ-a Mɛsedonia fɔɔ u̍h sǐ-a wlɔ̀ i̍-ɛ, sɔ Nyɔsoa-a tìh bla̍-a bo Pɔɔ tè-o jua̍i̍ wɛ̀ sǔh. Ɔ̍ sèàɛ̍ Juu nyɔ̍ wlùh te̍gbe̍i̍n ka Jusu bo ɔ̀ nu̍-a Nyɔsoa-a Chèɛ̀ Tba̍ju-ɛ.

⁶Jɛ u̍h faɛn ɔ̍ dɛ, iě u̍h-a chlèe ɔ̍. Wɛ̀ ɔ̍ gbàbo ɔ̍ jlii̍ i̍, ɛ̍ nu̍ u̍h-a tìh kwa̍ i̍ sà-a. Iě ɔ̍ la̍a̍ dě u̍h we̍, “Pò mɔ̀ gbɔ̀lɔ-ɛ, nɛ̀ ɛ̍ se̍ ǎn tìh o. Mɔ̀-a nymɔ̍-a tìh tè dǒ mɔ̀-a chɛ̀ dlǔ i̍. Ɛ̍ tìh-ɛ, sɔ da̍a sèàn blǐ-ɛ, ǎn mu̍ dě ùh se̍-a Juu nyɔ̍-ɛ we̍ o.”

⁷Wɛ̀ Pɔɔ sɔ dǒ u̍h we̍, iě ɔ̍ mu̍ dě Teseɔ Jɔslu ɔ̀ nu̍-a Nyɔsoa wɛɛ sà nyɔ̍-ɛ blǐ gbò. Ɔ̍ gbò-a chɛ̀ ke wɛɛ sà gbò nyna-ɛ wɔ̍n.

⁸Klepɔ ɔ̀ nu̍-a wɛɛ sà gbò-a dlǔtu-ɛ, ɔ̍ ke ɔ̍ chɛ̌ kli̍hgbɛ̍ gbaɛ Joi wlùh, ɛ̍ ke Kɔwlɛn nyɔ̍ dɔu duuh ke. U̍h wɔ̌n-a Pɔɔ-a wlu̍-ɛ, iě u̍h gbaɛ ɛ̍ wlùh, wɛ̀ u̍h po̍ nǐ dlǔ.

⁹Wɛ̀ Pɔɔ ja se̍ mɔ̌ ja̍ dǒ maɔ̍ weɛ̍ due di̍i̍. Joi la̍a̍ dě ɔ̍ we̍, “Bɔ̌ faɔn ple̍-ɛ, gba̍ wlu-ɛ dluwe̍ i̍, bɔ̌ se̍a̍-a.

¹⁰Dɛ̍nu̍ɛ, ǐn nɛ ìn kɛ̍n. Ka ǐn blě-a nyɔ̍ dɔu da̍a wlɔ̀ la di̍i̍-ɛ, nɛ̀ nyɔ̍ se̍ ìn dɛ̍ sɔ̀n pùn nu̍-ɛ bɛ̌ɛ.”

¹¹Iě Pɔɔ sì-o sɔ̀n due gbɔ̀tìlè ɔ̍ po̍ nyɔ̍gbei nǎ dě Nyɔsoa-a wlu̍ di̍i̍.

¹²Ti̍ Kadio nu̍-a Wloma nyɔ̍-a kɔ̀mla̍ dě Akaia fɔɔ-ɛ, dǒ Juu nyɔ̍ gbǎ-ɛ tàdùè iě u̍h gbɛ̍n Pɔɔ, wɛ̀ u̍h gba̍ ɔ̍ koti̍-i.

¹³U̍h la̍a̍, “Jɔ̍gbau la ìh se̍-a dě telě di̍i̍ nɛ-ɛ, i̍h bo ɔ̍ nɛ̌ nyɔ̍gbei de̍e̍ u̍h iě laǎn Nyɔsoa wɛɛ sà-a nu̍.”

¹⁴Pɔɔ-a ji̍ la̍ wlu la̍ sǔh, wɛ̀ Kadio la̍a̍ dě u̍h we̍, “Mɔ̀ɔ̍ Juu nyɔ̍, pò ɛ̍ tù dɛ̍ sɔ̀n gbàù nyɔ̍ iě nu̍-ɛ, nɛ̀ ǎn mu̍ kà dbǎ iě dě mɔ̀ we̍ dounᵻ po̍.

¹⁵Jɛ ka ɛ̍ tù-a wlu̍ ke, nynɛ̌ ke, mɔ̀-a chɛ̀-a telě tìh-i tòlo-ɛɛ, nɛ̀ mɔ̀-a chɛ̀ po̍ i̍h wlu̍ kɛ̍n. Ǐn se̍ ìh kaɛn la i̍h-a taɔ nu̍ mu̍.”

¹⁶Iě ɔ̍ po̍ u̍h sɔ̀n dě ɔ̍ koti̍-i.

¹⁷Wɛ̀ u̍h kli̍hgbɛ̍ gbɛ̍n wɛɛ sà gbò-a wlu̍ i̍ kɔn nyɔ̍ Sɔtɛni, iě u̍h bla̍ ɔ̍ dǒ koti̍ gbò jǔ. Jɛ ɛ̍ se̍ Kadio-a beɛ mlǎ-a chɛ̀ i̍ tǐhlɔ.

¹⁸Pɔɔ wlè dǒ de̍di̍i̍ᵻ nɛ-a dě Kɔwlɛn wlɔ̀-ɛ we̍, iě ɔ̍ dǔ Siwlia fɔɔ mu̍-ɛ dě blǎgbè di̍i̍. Ɔ̍ ke Plisela ke Akwela mu̍. Jɛ u̍h wɔ̌an mu̍-u tìh-ɛ, Pɔɔ gbla̍n dlǔ dǒ Sɛnklia wlɔ̀ di̍i̍. Dɛ̍nu̍ɛ, ɔ̍ po̍ wlu̍ tɔ̀ma̍a̍ dě Nyɔsoa we̍, wɛ̀ u̍h dǔ blǎgbè di̍i̍ gbǎ-a.

¹⁹U̍h nyni̍-a Ɛfɛsɔ-ɛ, dǒ Pɔɔ si̍e̍ Plisela ke Akwela. Wɛ̀ ɔ̍ mu̍ dě Juu nyɔ̍-a wɛɛ sà gbò sɔ̀n, iě ɔ̍ ke u̍h-a sà wɔ̍ɔ̍n i̍.

²⁰Wɛ̀ u̍h sèàɛ̍ ɔ̍ wlùh ɔ̍ iě dǒ u̍h we̍ wlè ke̍ wɛ-ɛ, jɛ ɔ̍ se̍ ɛ̍-ɛ wɔ̌ɛn.

²¹Ɛ̍ kɔn ɔ̍ po̍ wlu̍ tɔ̀ma̍a̍ iě ɔ̍ dǔ mu̍-ɛ, ɔ̍ la̍a̍, “Pò Nyɔsoa wɔ̌n-ɛ, nɛ̀ ǎn mu̍ de̍ka ji̍.” Wɛ̀ ɔ̍ gbǎ blǎgbè di̍i̍ ɔ̍ sɔ Ɛfɛsɔ.

²²Ti̍ ɔ̍ kɔ̍-a gbuǔh dǒ Sɛsewlia-ɛ, wɛ̀ ɔ̍ mu̍ iě ɔ̍ sà chɔchi̍h nɛ-a doǒ-ɛ nyinɔ̍ i̍, wɛ̀ ɔ̍ dǔ dǒ Antiɔ mu̍-ɛ.

²³Ɔ̍ nu̍-a ti̍ gbɔ̍ dǒ Antiɔ-ɛ, iě ɔ̍ sɔ-o. Wɛ̀ ɔ̍ ple̍ Kelesea ke Flejia bloa̍ kli̍hgbɛ̍ we̍, ɔ̍ po̍ kòà nɛ-a deě-ɛ gbǐh ku̍u̍.

²⁴Dǒ-o bo Juu jǔ due ji̍-i dǒ Ɛfɛsɔ, ɔ̍ nynɛ̌ bo Apolo. Ɔ̍ sɔ dǒ Ɛlesandlea wlɔ̀ di̍i̍. Ɔ̍ chɛn wɔ̍i̍n iě Nyɔsoa-a wlu̍-a tɔɔ wɛ̀ kwlǎ dě ɔ̍ di̍i̍.

²⁵Ka Joi-a Wìè dɛ nu̍-a nɛ-ɛɛ, ɛ̍ bo ɔ̍ cheǎn. Sɔ nɛ̀ ɔ̍ wlu-ɛ nɛ gbǐh kɛ̍n, iě ɔ̍ nyɔ̍ nǎ po̍-ɛ nu̍ tìh-a taǐn dǒ Jusu dɛ we̍. Jɛ nɛ̀ Chɔɔn-a nyɔ̍ nǐ dlǔ po̍ dɛ due gbài̍ ɔ̍ juo.

²⁶Ɔ̍ bo ɔ̀ wlu gbài̍gbài̍ dě wɛɛ sà gbò sɔ̀n. Dǒ Plisela ke Akwela wɔ̌n-ɛ ɔ̍ wlu̍, iě u̍h gba̍ ɔ̍ gbò we̍. Wɛ̀ u̍h dǔ Nyɔsoa-a Wìè dɛ-a gbɔ̀ sòò i̍ sà-a chɛ̀ɛ̌chɛ̀ dě ɔ̍ we̍.

²⁷Sɔ Apolo-a pɔ̀n ɔ̍ iě dě Akaia fɔɔ mu̍. Wɛ̀ de̍di̍i̍ᵻ nɛ-a dǒ Ɛfɛsɔ-ɛ, iě u̍h po̍ ɔ̍ sɔ̍n we̍. Wɛ̀ u̍h chlǐh juh nɛ-a dě tà ɔ̍ mu̍-a we̍, u̍h iě ɔ̍ tìh i̍ gbɛ̍n nmɔ jii̍. Nyɔ̍ ùh blě-a wlùh gbaɛ-ɛ dě Nyɔsoa-a blɛ nɛ-ɛ di̍i̍-ɛ, ɔ̍ nyni̍-a dě u̍h we̍-ɛ, sɔ ɛ̍ gbǎ u̍h we̍ kaa̍.

²⁸Dɛ̍nu̍ɛ, ɔ̍ kankǎn sà Juu nyɔ̍-a wɔ̍n klèɛ̍-ɛ dě tòlo-ɛ di̍i̍ dǒ wlɔ̀gbàɛ̀. Ɔ̍ flɔn-ɛ ɛ̍ we̍i̍ dě Nyɔsoa-a wlu̍ di̍i̍ ka Jusu bo ɔ̀ nu̍-a Nyɔsoa-a Chèɛ̀ Tba̍ju-ɛ.