Read Western Krahn Nu̍-dɛ̍ᵻ 2 Bible Online

Nu̍-dɛ̍ᵻ 2 - Western Krahn bible

Nu̍-dɛ̍ᵻ 2

¹Ti̍ ɛ̍ nu̍-a klèᵻá sàì jua̍a̍-a peě-ɛ, wɛ̀ wlùh gbaɛ blě nyɔ̍ kli̍hgbɛ̍ gbǎ tàdùè dǒ weɛ̍ laa̍ di̍i̍.

²U̍h iě-a kèle-ɛ, nɛ̀ slɛ̀-a sɔ dě ja̍i̍ ka poɔ dɔu-a ji̍-ɛ. Wɛ̀ ɛ̍ jǐ dě gbò kɔn di̍i̍ u̍h tè-a i̍-ɛ.

³Dǒ u̍h jě-e dɛ̍ ɛ̍ wɔ̀ nɛ̍-a mɛɔ, iě ɛ̍ wɔ̀ u̍h kli̍hgbɛ̍ dlǔ dě gbò. Jɔ-ɛ, nɛ̀ ɔ̍ naɛ nɛ dǒ ɔ̍ pùn.

⁴Iě Nyɔsoa-a Sùù jǐi u̍h kli̍hgbɛ̍ i̍, sɔ u̍h-a po̍ la̍ wlu̍ diih sǔh, ìh Sùù po̍-a dě u̍h wɔ̍ɔ̍n-ɛ.

⁵Ɛ̍ ti̍ laa̍ nɛ̀ Juu-a Nyɔsoa nyɔ̍ ùh tǐn-a dǒ Juluslɛn-ɛ, bloa̍ kli̍hgbɛ̍ nɛ-a da̍a ja̍u̍n la sɔ̀n-ɛ bo u̍h sɔ kɛ̍n i̍.

⁶U̍h wɔ̌n-a wlu̍ la-ɛ, sɔ ɛ̍ gbe-e dě u̍h di̍i̍ i̍, wɛ̀ u̍h kli̍hgbɛ̍ gbǎ tàdùè. Dɛ̍nu̍ɛ, jɔ-ɛ nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n.

⁷Sɔ ɛ̍ wlǔh i̍ u̍h de̍e̍ iě ɛ̍ flɔn-ɛ u̍h wɔ̍n, wɛ̀ u̍h la̍a̍, “Na̍a̍, jɔ̍gbauᵻ la ùh-a wlu-aɛ, Kaladii nynuu̍ bo lě.

⁸Wɛ̀ ka ɛ̍ iě nu̍ wɛ̀ à jɔ-ɛ, nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n ɛ?

⁹À nyɔ̍ duuh sɔ Patia bloa̍ ke, Mɛdia bloa̍ ke, Ilam bloa̍ ke, Mɛsopotemia bloa̍ kɛ̍n. Duuh sɔ Judia bloa̍ ke, Kapadosia bloa̍ ke, Pɔntɔ bloa̍ ke, Esea bloa̍ kɛ̍n.

¹⁰Iě duuh sɔ Flejia bloa̍ ke, Panfelia bloa̍ ke, Iche bloa̍ ke, ɛ̍ ke Lebia-a fɔ̌ ɛ̀ kɔǎɛn-a Saiwlein wlɔ̀ i̍-ɛ ke. Iě à duuh sɔ dǒ Wlom wlɔ̀ di̍i̍.

¹¹Juu nyɔ̍ ke nyɔ̍ gbǎ-a Juu dɛ-ɛɛ ke, nɛ̀ juh sɔ-a Kli bloa̍ ke Awlebia bloa̍ kɛ̍n-ɛ, jɛ à jɔ-ɛ nɛ̀ ɔ̍ wɔ̌n ɔ̍ chɛ̀-a blǐ wlu̍ dě u̍h wɔ̍ɔ̍n. Nɛ̀ u̍h-a sà Nyɔsoa-a wɔ̍n ku̍ dbo̍ nu̍ tìh i̍.”

¹²Sɔ ɛ̍ wlǔh i̍ u̍h de̍e̍, iě ɛ̍ gbe-e dě u̍h di̍i̍ i̍. Iě u̍h la̍a̍, “Ɛ̀ la nɛ̀ ɛ̍ gbɔ̀-a nynɛ̌-ɛ wèè.”

¹³Jɛ nɛ̀ nyɔ̍ duuh-a nui u̍h jlii̍h kɛ̍n i̍, u̍h la̍a̍, “Nyɔ̍ la, nmɔ̍ bo ɛ̀ nu̍ u̍h.”

¹⁴Wɛ̀ Pitɛ ke gba̍tòà-a pùè jɔɛ̍ due sie-a dǒ de̍-ɛ nyna i̍. Wɛ̀ ɔ̍ wǐ dě nyɔ̍ tlùgbei̍ laa̍ we̍, ɔ̍ la̍a̍, “Ǐn pò Juu nyɔ̍ ke juh tǐn-a da̍a Juluslɛn wlɔ̀ la di̍i̍-ɛ, mɔ̀ po̍ nɔ̌ ǐn we̍ dounᵻ nmɔ jii̍ wɛ̀ dɛ̍ ɛ̀ nɛ-a sèàn-a, iě ɛ̍ gbɔ̀ sòò i̍ sà dě mɔ̀ we̍.

¹⁵Nyɔ̍ la ɛ̍ se̍ nmɔ̍ ɛ̀ se̍ u̍h nu̍, ka mɔ̀ dǎ-aɛ, ɛ̍ se̍ la̍a̍n nɛ. Mɔ̀ gbɛ̀n-e, sɔ̀n sɛ̀n-aɛ ɛ̍ se̍-o wlè ke̍. Jɛwɛ̀ jlǔh-a gbɛ̍n dǒ nyɔ̍ pùn i̍.

¹⁶Jɛ ɛ̀ la ɛ̀ nɛ-a sèàn-aɛ, ɛ̍ kɔn tìh bo Nyɔsoa-a tu̍owli po̍ nyɔ̍ Joɛ sà-a.

¹⁷‘Nyɔsoa la̍a̍, Ɛ̀ la bo ǎn mu̍ nu̍ dǒ bɔ̌ɛ-o wǐh di̍i̍. Ǎn mu̍ ǎn Sùù dǒ nyɔ̍ kli̍hgbɛ̍ kɛ̍n po̍. Wɛ̀ mɔ̀-a jɔ̍gbauᵻ ke nynɔ̌gbaɔᵻ nynuu̍ iě ǎn gbànwli po̍. Mɔ̀-a nynuu̍gbèè-a mu̍ Nyɔsoa kwlǎ jěe. Nɛ̀ mɔ̀-a nyɔ̍ klaaᵻá mu̍ Nyɔsoa ja̍ᵻ ja.

¹⁸I̍i̍n, jɔ̍gbauᵻ ke nynɔ̌gbaɔᵻ ùh nu̍-a ǎn pòi̍nynuu̍-a chɛ̀-ɛ, ǎn mu̍ ǎn Sùù dǒ u̍h kɛ̍n po̍ dǒ wǐh laa̍ di̍i̍, nɛ̀ u̍h-a mu̍ ǎn gbànwli po̍.

¹⁹Nɛ̀ ǎn mu̍ jbaɛdih po̍ nɔ̌ ja̍i̍wlɔ̀ nɔ̌ dlǔwèàì, wɛ̀ iě nyɔ̍ wɔ̍n flɔn-ɛ dɛ̍ᵻ nu̍ dě bloɔ̍ dě sɔ̀n. Nɛ̀ kǎ nymɔ̍ ke, nɛ̍ ke, daluh ku̍u̍ku̍-a mu̍ nɛ-ɛ nu̍ ke.

²⁰Nɛ̀ jlǔh-a mu̍ gbe, wɛ̀ chǔh iě slìi̍h nɛ ka nymɔ̍-ɛ sasǎ, wɛ̀ Joi-a wɔ̍n ku̍-ɛ ke tìh-a i̍ bɛ̌-ɛ weɛ̍ iě ji̍-ɛ dǔ.

²¹Jɛ nɛ̀ nyɔ̍ɔ ùh-a mu̍-a Joi-a nynɛ̌ i̍ dǎ-ɛ, nɛ̀ u̍h-a mu̍ pǔh.’

²²“Mɔ̀ɔ̍ Eslɔɛ nyɔ̍, mɔ̀ tba̍ dounᵻ i̍ wɛ̀ mɔ̀ iě wlu̍ la wɔ̌n. Jusu la ɔ̀ sɔ-a dǒ Naaslɔɛ wlɔ̀ di̍i̍-ɛ, ɔ̍ bo Nyɔsoa dbo̍ mɔ̀ we̍, iě ɔ̍ to ɔ̍ mɔ̀ i̍ dǒ jbaɛdih ke, nyɔ̍ wɔ̍n flɔn-ɛ dɛ̍ᵻ ke dɛ̍ᵻ klaaᵻ ɔ̍ nu̍-aɛ we̍. Nyɔsoa bo ɔ̀ jii dě ɔ̍ ja̍a̍ wɛ̀ ɔ̍ nu̍ ìh la nɔ̌ mɔ̀ nynɛ̌, mɔ̀-a jlǐhɛ̍ se̍ tà maɛ.

²³Jusu la ɔ̍ iě-a kwlǎ sà-ɛ dě mɔ̀ we̍-ɛ, dǒ Nyɔsoa-a di̍i̍chì ke ɔ̍ tɔɔ kɛ̍n bo ɛ̍ kɔ̍ i̍. Iě mɔ̀ nu̍ ɛ̍ wɛ̀ gblɛ̍n sɔ̀ɛ̀n nyɔ̍ kɔ̍ ɔ̍ dǒ gbàɛ̍ kɛ̍n i̍ tu̍ wlì iě u̍h dbǎ ɔ̍.

²⁴Jɛ Nyɔsoa sà ɔ̍-e. Ɔ̍ sèìe ɔ̍ dě mɛ̌ɛ-a nyɔ̍ i̍ poa-a gbɛɛ̍ di̍i̍. Dɛ̍nu̍ɛ, mɛ̌ɛ se̍ ɔ̍ i̍ gbɛ̍n-ɛ bɛ̌ɛ.

²⁵Ɛ̍ bo Depe bla̍ dǒ ɔ̍ pùn, ɔ̍ la̍a̍, ‘Ǎn jě Joi ma̍u̍ ma̍u̍ dǒ ǐn jlǐhwai. Ka ɔ̍ nɛ-a dǒ ǎn sɔ̍n chɛ̀ we̍-ɛ, nɛ̀ dɛ̍ se̍ ǐn tǔn-ɛ bɛ̌ɛ.

²⁶Ɛ̍ kɔn ǎn pɔluh pɛ̌n i̍, iě ǎn wɔ̍n-a po̍ nmɔ-ɔ slɛ̀. Ɛ̍ se̍-o siee, ǎn ku̍-a mu̍ wlì tè dɛ̍ blě ke.

²⁷Dɛ̍nu̍ɛ, ìn se̍ wɔ̌n mu̍ ǐn se̍ dě kàn nɛ̍ di̍i̍ sie mu̍. Nɛ̀ ìn se̍ wɔ̌n mu̍ àn we̍ fòè nyɔ̍ iě sɔ̀n.

²⁸Wìè ɛ̀ nyǐ-a nyɔ̍ feɛ-ɛ, mɔ̀ bo ɔ̀ nu̍ ɛ̍ wɛ̀ ǐn juo ɛ̍ ka. Nɛ̀ àn mu̍ ɛ̍ nu̍ wɛ̀ mɔna̍ iě ǐn i̍ jǐi dǒ ìn jlǐhwai.’

²⁹“Ǐn de̍di̍i̍ᵻ, ǎn mu̍ dě mɔ̀ di̍i̍ i̍ flɔn-ɛ ka à baa Depe ɔ̀ kàn-aɛ, ɔ̍ mɛ̌-aɛ wɛ̀ u̍h tè ɔ̍ i̍. Ɔ̍ gbàlɔ̍ nɛ ka da̍a à we̍ kmɔ̌ sèàn.

³⁰Jɛ ɔ̍ nu̍ Nyɔsoa-a tu̍owli po̍ nyɔ̍, sɔ ɔ̍ juo Nyɔsoa-a tɔ̀ma̍a̍ wlu̍. Ɔ̍ po̍ wlu̍ tɔ̀ma̍a̍ ka ɔ̍ mu̍-a Depe-a tloemlai-a due blǔh baa we̍i̍ nu̍ dǒ Depe wɔ̀ɔ̀-ɛ.

³¹Sɔ nɛ̀ dɛ̍ Nyɔsoa-a mu̍-a nu̍ dě nya̍-aɛ, Depe juo ɛ̍ i̍. Ɛ̍ kɔn ɔ̍ wlu dǒ Chèɛ̀ Tba̍ju-a mɛ̌ wlǔh-e dɛ we̍, ɔ̍ la̍a̍, ‘Ɔ̍ se̍ dě kàn nɛ̍ di̍i̍ sie, sɔ ɔ̍ kǔ se̍ sɔ̀n ke.’

³²Jusu-a taǐn laa̍ bo Nyɔsoa sà-e, wɛ̀ à kli̍hgbɛ̍ à nu̍ sàànsi̍i̍h dǒ ɛ̍ we̍.

³³Ɔ̍-ɔ bo Nyɔsoa dǔ-a ka ja̍i̍ wɛ̀ dǒ ɔ̍ di̍na̍ we̍, iě ɔ̍ jě Sùù kɔn wlu̍ Baa Nyɔsoa po̍-a tɔ̀ma̍a̍-ɛ. Sùù ɔ̍ po̍-a àɔ̀ kɛ̍n-ɛ, ɛ̍ kɔn nu̍-dɛ̍ᵻ bo mɔ̀-a wɔ̌n-a, iě mɔ̀-a jě-a sèàn.

³⁴Jɛ Depe se̍a dě ja̍i̍wlɔ̀ mu̍ wɛ̀ ɔ̍ la̍a̍, ‘Joi la̍a̍ dě ǎn Joi we̍, Tè i̍ da̍a ǎn di̍na̍ we̍ te̍e̍

³⁵iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

³⁶“Ɛ̍ tìh-ɛ, Eslɔɛ nyɔ̍ kli̍hgbɛ̍ kɔn u̍h iě ɛ̍ i̍ juo. Jusu ɔ̀ mɔ̀ kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍ bo Nyɔsoa nu̍-a ka Joi ke Chèɛ̀ Tba̍ju we̍ i̍ wɛ̀.”

³⁷Ti̍ nyɔ̍gbei wɔ̌n-a wlu̍ la-a, sɔ ɛ̍ tǔh u̍h i̍ kaa̍. Wɛ̀ u̍h la̍a̍ dě Pitɛ ke gba̍tòà juh sie-a dǒ de̍-ɛ we̍, “De̍di̍i̍ᵻ, nɛ̀ ka à iě nu̍ ɛ?”

³⁸Wɛ̀ Pitɛ la̍a̍ dě u̍h we̍, “Mɔ̀ bǐi i̍, wɛ̀ mɔ̀ iě nǐ dlǔ po̍ kli̍hgbɛ̍ dǒ Jusu Klai-a nynɛ̌ kɛ̍n. Nɛ̀ mɔ̀-a gblɛ̍n sɔ̀ɛ̀n-a tìh-a mu̍ i̍ tǎli-ɛ. Nɛ̀ mɔ̀-a mu̍ Nyɔsoa-a Sùù jě.

³⁹Dɛ̍nu̍ɛ, Nyɔsoa-a tɔ̀ma̍a̍ wlu̍ kɔn dǒ mɔ̀ ke mɔ̀-a nynuu̍ we̍, ɛ̍ ke nyɔ̍ kli̍hgbɛ̍ nɛ-a tà tɔ̀ɔ̀n-ɛ ke juh à Joi Nyɔsoa dǎ-a dǒ ɔ̍ chɛ̀ we̍-ɛ ke.”

⁴⁰Wɛ̀ Pitɛ bla̍ gbòɛ̀ diih dě u̍h we̍, iě ɔ̍ tù u̍h slɛ̌n, ɔ̍ la̍a̍, “Ǐn gbɛ̍n mɔ̀-a bu̍hᵻ, mɔ̀ sèìe mɔ̀-a chɛ̀ dě ti̍laa nyɔ̍-a tba̍ɛ kɛ̍n i̍ la di̍i̍ lě.”

⁴¹Nyɔ̍ ùh wɔ̌ɛn-a Pitɛ-a wlu̍-ɛ, u̍h bo ùh poe-ɛ nǐ dlǔ. Nyɔ̍ ùh gbǎ-a dě u̍h-a gbɔ̀ù di̍i̍ dǒ weɛ̍ laa̍ di̍i̍-ɛ, u̍h bɛ̌ɛ nyɔ̍-a wlǔ ta̍a̍n (3,000) nu̍-ɛ.

⁴²Wɛ̀ u̍h-a cheǎn-ɛ gba̍tòà dɛ̍ we̍ ma̍u̍, u̍h ke u̍h-a nɛ̍aɛ we̍. Nɛ̀ u̍h-a gbo̍a̍ɛ sɔ̍n jǔ iě u̍h-a ba̍le.

⁴³Wɛ̀ jbaɛdih dɔu ke nyɔ̍ wɔ̍n flɔn-ɛ dɛ̍ᵻ nui-ɛ dě Jusu-a gba̍tòà ja̍a̍. Sɔ ɛ̍ po̍ nyɔ̍ɔ faɔn.

⁴⁴Wlùh gbaɛ blě nyɔ̍ kli̍hgbɛ̍ u̍h-u sèàɛ̍ kɛ̍n, iě u̍h-a dɛ̍ nɛ due.

⁴⁵Jɔ-ɛ, nɛ̀ ɔ̍ ple̍ ɔ̍ kɔn-dɛ̍ᵻ ke ɔ̍ blewi̍h. Iě u̍h-a gblè i̍h, nɛ̀ jɛ jɔ nɛ-a gba̍ ka̍-a, ɛ̍ bo u̍h-a nyǐ ɔ̍.

⁴⁶Ka sɔ̀n-a sɛ̀n-a, kǎ u̍h-a gbèɛ̀ɛ̍n dě Nyɔsoa-a slaǎ sà gbò sɔ̀n. Nɛ̀ u̍h-a gbǎ tàdùè u̍h blǐ gbòᵻ i̍ iě u̍h-a di̍-i dɛ̍we̍ dǒ wlùh wlǎ we̍.

⁴⁷Wɛ̀ u̍h-a po̍ Nyɔsoa tìhwe̍, iě u̍h-a nu̍-dɛ̍-a po̍ nyɔ̍ kli̍hgbɛ̍ gbǐh. Nɛ̀ ka sɔ̀n-a sɛ̀n-a, kǎ Joi-a po̍ nyɔ̍ ùh pǔh-aɛ dě u̍h-a gbɔ̀ù di̍i̍.