Read Western Krahn Nu̍-dɛ̍ᵻ 22 Bible Online

Nu̍-dɛ̍ᵻ 22 - Western Krahn bible

Nu̍-dɛ̍ᵻ 22

¹Ɔ̍ la̍a̍, “De̍di̍i̍ᵻ ke baaᵻ, mɔ̀ po̍ nɔ̌ ǐn we̍ dounᵻ iě ǎn chɛ̀ tìh dlǔ i̍ sà.”

²Ti̍ u̍h wɔ̌n-a Iblu wlu̍ dě ɔ̍ wɔ̍ɔ̍n-ɛ, iě u̍h dǔ klìi̍ nɛ-ɛ chɛ̀ɛ̌chɛ̀. Wɛ̀ Pɔɔ la̍a̍,

³“Mɔ̍ la, mɔ̍ Juu jǔ. Dǒ Tasɔ bo ǐn wlǔh-i dě Selesia bloa̍ kɛ̍n. Wɛ̀ u̍h dǔ ǐn da̍a Juluslɛn wlɔ̀ di̍i̍ ja-a, iě ǐn cheǎn-ɛ Kamediɔ dɛ̍ sɔ̀n. Wɛ̀ u̍h toe ǐn à baaᵻá telě nɛkɛ̌n nɛkɛ̌n. Ka mɔ̀ kli̍hgbɛ̍ nu̍-a Nyɔsoa we̍ fòè-ɛ sèàn-ɛ, kǎ ǐn nu̍ Nyɔsoa we̍ fòè-ɛ ke tɛin.

⁴Nɛ̀ nyɔ̍ ùh-a gba̍-a Joi-a Wìè-ɛ, ǎn jě-e u̍h klě iě u̍h-a mɛ̌. Ɛ̍ tìh ǎn gbɛ̍n jɔ̍gbauᵻ ke nynɔ̌gbaɔᵻ, iě ǎn po̍ u̍h kasoo.

⁵Slaǎ sà nyɔ̍-a dlǔtu ke taɔ klaaᵻ kli̍hgbɛ̍ bo ùh nu̍ ǎn sàànsi̍i̍h dǒ ɛ̍ nɔ̀ɔ̍ we̍. Dě u̍h we̍ ǎn sà chlǐh-dɛ̍ᵻ iě ǎn gba̍ i̍h u̍h ba̍ᵻ nɛ-a Damaɛkɔ wlɔ̀ di̍i̍-ɛ we̍, wɛ̀ iě nyɔ̍ nɛ-a deě-ɛ gbɛ̍n, iě u̍h jɔɔdbǔᵻ sa̍n-ɛ wɛ̀ iě u̍h dǒ Juluslɛn wlɔ̀ di̍i̍ gba̍ u̍h iě kàn gbɛ̍n-ɛ.

⁶“Ti̍ ǎn mu̍-a Damaɛkɔ-ɛ, nɛ̀ jlǔh-a gbǎ la̍ gbàɔ̀. Ǎn kɔǎɛn la̍ wlɔ̀ i̍ sǔh, kli-a ka-a nɛ̀ wɔ̍n ku̍ fààn nape̍ sɔ dě ja̍u̍n we̍ ɛ̍ fa̍n ǐn de̍e̍ i̍.

⁷Wɛ̀ ǐn kà i̍ dǒ bloɔ̍. Dǒ ǐn wɔ̌n-ɛ wlu̍ ɛ̍ wlu dě ǐn we̍, ɛ̍ la̍a̍, ‘Sɔɔ, Sɔɔ, dɛ̍nu̍ àn jě-e ǐn klě ɛ?’

⁸Wɛ̀ na̍a̍, ‘Nyɔ̍ bo ɛ?’ Wɛ̀ ɔ̍ la̍a̍, ‘Mɔ̍ Jusu ɔ̀ sɔ-a dǒ Naaslɔɛ àn jě-ea klě-ɛ, mɔ̍ bo.’

⁹Nyɔ̍ ùh ke ǐn ke à na-aɛ, u̍h jě fààn nape̍ laa̍, jɛ wlu̍ jɛ wlu-a dě ǐn we̍-ɛ, u̍h se̍ ɛ̍ wɔ̌n.

¹⁰Wɛ̀ na̍a̍, ‘Joi, ka iě nu̍ ɛ?’ Iě ɔ̍ la̍a̍, ‘Sɔ-ɔ ìè Damaɛkɔ mu̍, dɛ̍ kli̍hgbɛ̍ ìn kɔn ìè-a nu̍-ɛ, dě nyɔ̍ nɛ ɔ̍ iě ɛ̍ ìn wlùh sèàɛ̍.’

¹¹Fààn nape̍ ɛ̀ sǐ-a dě ǐn jlǐh i̍-ɛ, sɔ ɛ̍ dɔ̌-ɛ m. Wɛ̀ ǐn ba̍ᵻ gbɛ̍n ǎn sɔ̍n i̍ iě u̍h gba̍ ǐn Damaɛkɔ.

¹²“Nɛ̀ jɔ̍gbau due ɔ̍ nynɛ̌ bo Ɛlenaea, ɔ̍ fòè Nyɔsoa dɛ we̍ iě ɔ̍ tè-o telě kli̍hgbɛ̍ i̍. Juu nyɔ̍ kli̍hgbɛ̍-a jě ɔ̍ dɛ̍ɛ̍ dǒ Damaɛkɔ.

¹³Ɔ̍ bo ɔ̀ ji̍ iě ɔ̍ nyna ǐn dlǔ, wɛ̀ ɔ̍ la̍a̍, ‘De̍di̍i̍ Sɔɔ, jě i̍ dode̍.’ Dǒ ǎn jlǐh nyna i̍h pɔ̀ni, iě ǐn jě ɔ̍.

¹⁴Ɔ̍ la̍a̍, ‘À baaᵻá Nyɔsoa tba̍ ìn chèɛ̀ ìè ɔ̍ wlùh juo, ìè ɔ̍ Pòi̍ju ɔ̀ slɛ̌-a i̍-ɛ jě, wɛ̀ ìè wlu̍-a mu̍-a dě ɔ̍ wɔ̍ɔ̍n sɔ-ɛ wɔ̌n.

¹⁵Dɛ̍nu̍ɛ, àn mu̍ ɔ̍ sàànsi̍i̍h nu̍, wɛ̀ dɛ̍ᵻ ìn wɔ̌n-a iě ìn jě-aɛ, wɛ̀ ìè i̍h nyɔ̍ kli̍hgbɛ̍ wlùh sèàɛ̍.

¹⁶Dɛ̍ àn fuo ke̍ gbɔ̀ɔ ɛ? Sɔ bloɔ̍ ìè nǐ dlǔ po̍ kaka àn gblɛ̍n sɔ̀ɛ̀n iě nǐ tɔ̀ùnwe̍ mu̍ dǒ ɔ̍ nynɛ̌ i̍ dǎ-a we̍.’

¹⁷“Wɛ̀ ǐn mu̍ dǒ de̍ Juluslɛn. Ǐn nɛ dǒ ba̍le la̍ dě Nyɔsoa-a slaǎ sà gbò sɔ̀n iě ǐn ja se̍ mɔ̌ ja̍.

¹⁸Dǒ ǐn jě-e Joi wɛ̀ ɔ̍ la̍a̍ dě ǐn we̍, ‘Tèwe ìè da̍a Juluslɛn sɔ suei̍, dɛ̍nu̍ɛ, ǎn tìh àn mu̍-a bla̍ da̍a-ɛ, u̍h se̍ i̍h tìh dǎɛ mu̍.’

¹⁹Wɛ̀ na̍a̍, ‘Joi, nyɔ̍ la u̍h juo i̍h te̍kle̍e̍ mɔ̍ bo ɔ̀ ple̍ wɛɛ sà gbòᵻ sɔ̀n i̍, iě ǎn gbɛ̍n àn wlùh gbaɛ nyɔ̍ ǎn bla̍ u̍h, iě ǎn po̍ u̍h kasoo i̍.

²⁰Ti̍ àn sàànsi̍i̍h Slifɛn iě-a dbǎ-ɛɛ, nɛ̀ dǒ ǐn nɛ iě ǐn wɔ̌ɛn ɛ̍ we̍. Nyɔ̍ ùh-a dbǎ-a ɔ̍-ɛ, mɔ̍ bo ɔ̀ blě u̍h-a plɛ̀i̍ᵻ kwa̍.’

²¹Wɛ̀ Joi la̍a̍, ‘Mu̍, dɛ̍nu̍ɛ, ǎn mu̍ ìn tà tɔ̀ɔ̀n dbo̍ dě ùh se̍-a Juu nyɔ̍-ɛ we̍.’ ”

²²U̍h dbǎ ku̍ te̍e̍ wɛ̀ Pɔɔ bla̍ wlu̍ la. Wɛ̀ sòu̍u̍n iě u̍h wǐ, u̍h la̍a̍, “Mɔ̀ dbǎ ɔ̍, ɔ̍ se̍ i̍ blaɛ ɔ̍ iě kmɔ̌ nɛ.”

²³U̍h-a wǐi-a i̍-ɛ, nɛ̀ kǎ u̍h-a fùna u̍h-a plɛ̀i̍ᵻ i̍, iě u̍h-a po̍ blǔh ja̍i̍.

²⁴Wɛ̀ fledlǔ-a klaa laa̍ ɔ̍ po̍ ɔ̍ fledlǔ slǔh u̍h iě Pɔɔ dě bàɛ̍klè gba̍. Ɔ̍ la̍ nɛ̀ u̍h bla̍ ɔ̍, wɛ̀ u̍h iě dɛ̍ kɔn tìh u̍h-a po̍-a ɔ̍ slɛ̀ we̍ i̍-ɛ juo.

²⁵Jɛ ti̍ u̍h sa̍n-a Pɔɔ wɛ̀ u̍h iě-a ɔ̍ bla̍-ɛ, wɛ̀ ɔ̍ la̍a̍ dě chape nyna-a doǒ i̍-ɛ we̍, “Telě la̍ pò tìh se̍ Wloma jǔ kɛ̀n sà-ɛ, nɛ̀ u̍h bla̍ ɔ̍ ke sǔh ae?”

²⁶Chape wɔ̌n-a ɔ̍ wlu̍-ɛ, iě ɔ̍ mu̍ dě u̍h-a nyɔ̍ klaa we̍, ɔ̍ la̍a̍, “Ka àn nu̍ ɛ̍ nu̍ sɔɛn ɛ? Jɔ̍gbau la nàà à iě-a bla̍-ɛ Wloma jǔ bo wa.”

²⁷Iě ɔ̍ chɛ̀ mu̍ dě Pɔɔ we̍. Wɛ̀ ɔ̍ tèle ɔ̍ i̍, ɔ̍ la̍a̍, “Sèàɛ̍ ǐn wlùh, mɔ̀ Wloma jǔ ae?” Wɛ̀ Pɔɔ la̍a̍, “I̍i̍n, mɔ̍ Wloma jǔ.”

²⁸Fledlǔ-a klaa la̍a̍, “Pò ìn nu̍ dihwi̍h wɛ̀ ìè blǔh la ɛ̍ jǔ nu̍-ɛ i̍ pɔ̀n-ɛ, nɛ̀ àn pɛ̌ɛ wlǐ dɔu sasǎ, ɛ̍ bo ǐn nu̍.” Pɔɔ la̍a̍, “Jɛ mɔ̍ɔ-ɛ, mɔ̍ ɛ̍ wlǔh-i jǔ.”

²⁹Sɔ nyɔ̍ ùh-a ji̍-a ɔ̍ i̍ tèle la̍ de-ɛ, u̍h chlìì de̍ kleǐn. Iě fledlǔ-a klaa-a chɛ̀ gbǎ faɔn, dɛ̍nu̍ɛ, ɔ̍ wɔ̀ Pɔɔ jɔɔ sa̍n-ɛɛ sasǎ wɛ̀ ka ɔ̍ nu̍-a Wloma jǔ-ɛ, iě ɔ̍ dǔ-o dɛ̍ i̍ juo-ɛ.

³⁰Jɛ nɛ̀ fledlǔ-a klaa-a pɔ̀n ɔ̍ iě dɛ̍ kɔn tìh Juu nyɔ̍-a po̍-a Pɔɔ tìh dlǔ gbe̍i̍n-ɛ juo. Sɔ̀n sɛ̀n-aɛ, iě ɔ̍ sà Pɔɔ jɔɔ bu̍hᵻ i̍, wɛ̀ ɔ̍ po̍ nyɔ̍ slǔh u̍h iě Nyɔsoa-a slaǎ sà nyɔ̍ klaaᵻ ke taɔ klaaᵻ kli̍hgbɛ̍ i̍ gbòe. Wɛ̀ ɔ̍ gba̍ Pɔɔ iě ɔ̍ nyna-ɛ ɔ̍ i̍ dǒ u̍h jǔ.