Read Western Krahn Nu̍-dɛ̍ᵻ 27 Bible Online

Nu̍-dɛ̍ᵻ 27 - Western Krahn bible

Nu̍-dɛ̍ᵻ 27

¹Ti̍ ɛ̍ dbǎ-a i̍ wɛ̀ à iě-a Etele bloa̍ kɛ̍n mu̍-ɛ, wɛ̀ u̍h sà Pɔɔ ke gbɛ̍n-nyɔ̍ duuh kwlǎ dě chape Juleɔ we̍. Bloa̍ Joi-a fledlǔ-a klu̍gbòu̍-a due bo.

²Nɛ̀ niɔ̍ mɛɛ̍ sɔ dǒ Adlamitiɔm wlɔ̀ di̍i̍ ɛ̍ mu̍ Esea bloa̍ kɛ̍n dǒ mɛɛ̍-a du̍a̍gbà nɛ-a dǒ jbǒ wɔ̍i̍n-ɛ kɛ̍n. Wɛ̀ à gbǎ dě ɛ̍ di̍i̍ iě à sà du̍a̍. Nɛ̀ à ke Awleslakɔ na, Mɛsedonia jǔ bo, nɛ̀ ɔ̍ sɔ dǒ Tɛsolonaika.

³Sɔ̀n sɛ̀n-aɛ, iě à nyni̍ dǒ Saidɔn. Jɛ Juleɔ nmɔ gblɛ̍n-ɛ dǒ Pɔɔ we̍, ɛ̍ kɔn ɔ̍ sà ɔ̍ sɔ̍n kɛ̍n ɔ̍ iě ɔ̍ ba̍ᵻ we̍ i̍ na, wɛ̀ ɔ̍ ja dɛ̍ i̍ pɔ̀n-ɛ, u̍h iě ɛ̍ ɔ̍ nyǐ.

⁴À sɔ-a doǒ-ɛ nɛ̀ à ke poɔ bǐi-e we̍ i̍, ɛ̍ kɔn à jii dě Saiplɔ-a fɔ̌ ɛ̀ mu̍-a à poɔ i̍ kaɛn-ɛ we̍.

⁵Wɛ̀ à chɛ̍n jbǒ kɛ̍n dě Selesia ke Panfelia bloa̍-a di̍na̍ we̍, iě à sǐ dǒ Mawla i̍ dě Lesia fɔɔ.

⁶Dǒ chape jě-e mɛɛ̍ ɛ̍ sɔ dǒ Ɛlesandlea wlɔ̀ di̍i̍, nɛ̀ ɛ̍ mu̍ Etele. Wɛ̀ ɔ̍ po̍ àɔ̀ dě ɛ̍ di̍i̍.

⁷Jɛ nɛ̀ à mɛɛ̍-a tlɛ̀n-ɛ, sɔ ɛ̍ jě-e àɔ̀ tìh kaa̍. Ɛ̍ kɔn ɛ̍ dǔ-i àɔ̀ wǐh dɔu wɛ̀ à dǔ dǒ Naida nyni̍-ɛ. Nɛ̀ poɔ-ɔ wɔ̌n à iě mu̍, ɛ̍ kɔn à jii dě Kli-a fɔ̌ ɛ̀ mu̍-a à poɔ i̍ kaɛn-ɛ we̍ dǒ blǔh-a kɔ̍lu̍h Saomɔni-a blaɛjlǐh.

⁸Nɛ̀ à se̍ gbuǔh we̍ i̍ ti̍ɛ̍ɛn, à blě tìh jě-ɛ wɛ̀ à nyni̍ dǒ tà due u̍h-a dǎɛ-o Mɛɛ̍ᵻá Kɛ̍n i̍ Pe̍ɛ La̍-a, ɛ̍ kɔǎn-ɛ Lasia wlɔ̀ we̍ i̍.

⁹Dǒ à wlè wlè-e, sɔ nɛ̀ ɛ̍ nu̍ kanɛa dɛ wɛ̀ niɔ̍ mɛɛ̍ iě na. Dɛ̍nu̍ɛ, nɛ̀ Juu nyɔ̍-a jlǔh po̍ ti̍ sì wɛ̀. Wɛ̀ Pɔɔ tù u̍h slɛ̌n,

¹⁰ɔ̍ la̍a̍, “Nyɔ̍ klaaᵻ, ǐn juo ɛ̍-ɛ à mɛɛ̍ gba̍-a la̍ dɛ̍-a kɔ̌-ɛ ke dɛ̍ᵻá mǎ-a dɔu-a mu̍ dě ɛ̍ di̍i̍ nɛ. Ɛ̍ se̍ blewi̍h ke mɛɛ̍ nɛ due o, jɛ à feɛ-a mu̍ dě ɛ̍ di̍i̍ i̍ tè ke o.”

¹¹Jɛ nɛ̀ dɛ̍ bli̍a nyɔ̍ ke mɛɛ̍ kɔn nyɔ̍-a bla̍-a bo chape-a po̍-e we̍ dounᵻ ɛ̍ sìì Pɔɔ naɛ.

¹²U̍h la̍ dǒ mɛɛ̍-a kɛ̍n i̍ pe̍ɛ la̍ se̍ tà chɛ̀ nyɔ̍ iě wìla̍ wlè-e. Ɛ̍ kɔn u̍h-a dɔu la̍ nɛ̀ u̍h mu̍ pò u̍h bɛ̌ɛ dǒ Fɔni nyni̍-ɛɛ, u̍h iě-o nyni̍. Ɛ̀ nu̍-a mɛɛ̍-a kɛ̍n i̍ pe̍ɛ la̍ jɛ nɛ-a Kli ɛ̀ bǐi-a dě jlǔh-a gbǎ la̍ i̍-ɛ bo, wɛ̀ u̍h iě-o wìla̍ wlè-e.

¹³Dɛ̍ laa̍ poɔ ɛ̀ sɔ-a dě di̍na̍ we̍ ɛ̀ ji̍-a jlɛjlɛ-ɛ, sɔ u̍h jajeɛ̍ dɛ̍ u̍h dǎ-aɛ, ɛ̍ mu̍ nɛ de. Wɛ̀ u̍h sà du̍a̍, u̍h-a na-ɛ Kli-a gbuǔh wɔ̍i̍n.

¹⁴Ɛ̍ se̍-o wlè wɛ̀ poɔ u̍h-a dǎɛ-a Di̍na̍i̍ Tìlèè-ɛ, iě ɛ̍ gbèdue chɛn-e. Nɛ̀ ɛ̍ sɔ-ɛ dě tbǒ-a chɛ̀ kɛ̍n.

¹⁵Wɛ̀ ɛ̍ sàɛ̀ mɛɛ̍-a dlǔ wìè-e. Sɔ ɛ̍ se̍ dě poɔ we̍ i̍ bǐi-ɛ bɛ̌ɛ dɛ, iě à sà ɛ̍ sɔ̍nᵻ pùn i̍ wɛ̀ poɔ-a gba̍ ɛ̍.

¹⁶Tbǒ juwɛ u̍h-a dǎɛ-a Kaɔda-a, ti̍ à jii-a dě ɛ̍ kwe̍na̍ i̍ fɔ̌ we̍-ɛ, dě-e nɛ kmɔ̌ wɛɛ wɛ̀ à nu̍ nɛnɛ̌ iě à mɛɛ̍-a tò se̍ mǎ. Jɛ nɛ̀ kǎ à jě tìh sǔh.

¹⁷Wɛ̀ u̍h chlì ɛ̍, iě u̍h po̍ ɛ̍ dǒ mɛɛ̍ kɛ̍n. Wɛ̀ u̍h jaɛ mɛɛ̍-a chɛ̀ dbǔ wèa̍ gba̍i̍ngba̍i̍n ɛ̍-ɛ je̍e wa̍. Nɛ̀ u̍h-a ple̍ faɔn u̍h-u je̍e penɔ̍ɔ̍ gbo̍ i̍ jǎ dě Lebia nyɔ̍-a gbuǔh-a fɔ̌ we̍. Ɛ̍ kɔn u̍h sà mɛɛ̍ na-ɛ jliɛ̍ ja̍i̍ wɛ̀ ɛ̍ chɛ̀ iě na.

¹⁸Sɔ dɛ̍ tìlèè-a nu̍-a la̍ à sèkěsèkě nu̍-ɛɛ, sɔ̀n sɛ̀n-aɛ, iě u̍h tè blewi̍h diih sɔ̀n i̍ po̍-ɛ gbɔ̀.

¹⁹Ɛ̀ po̍-a wǐh ta̍a̍n-ɛ, wɛ̀ u̍h-a chɛ̀ dǔ mɛɛ̍-a dbo̍ nui dɛ̍ᵻ, iě u̍h po̍ i̍h sɔ̀n i̍.

²⁰Dɛ̍ laa̍ jlǔh ke chǔhtlɛ̀n se̍-a fa̍n dǒ wǐh dɔu di̍i̍ iě tìlèè-a kma-a i̍ ke̍ ma̍u̍-ɛ, sɔ à se̍-e wlùh po̍ dɛ à iě pǔh.

²¹Jɛ dɛ̍ nyɔ̍ laa̍ u̍h-a mɔ̌ wǐh nu̍-a dlǔ tɛn-ɛ wɛ̀-ɛ, wɛ̀ Pɔɔ nyna i̍ dě u̍h nynɛ̌ iě ɔ̍ la̍a̍, “Mɔ̀ɔ̍ la ǎn slɛ̌ ǐn po̍-a pò mɔ̀ mui ɛ̍ we̍ de-ɛ, nɛ̀ à se̍ Kli sɔ mu̍ de. Nɛ̀ à mu̍ dɛ̍ᵻá kɔ̌-ɛ ke i̍h-a mǎ-a wɔ̍i̍n wlǔh de.

²²Jɛ kaka la̍ ǐn gbɛ̍n mɔ̀-a bu̍hᵻ i̍, mɔ̀ bɛ̌ wlì i̍, dɛ̍nu̍ɛ, mɔ̀-a nyɔ̍ se̍ mɛ̌ mu̍. Mɛɛ̍ nɛ due bo ɛ̀ mu̍ kɔ̌ sǔh.

²³Nyɔsoa ǐn gbaɛ gbǔh ǎn sà-a wɛɛ-ɛ, ɔ̍ ǐnchɔ̀ bo ɛ̀ ji̍ dǒ ǐn we̍ wìe̍,

²⁴iě ɛ̍ la̍a̍, ‘Bɔ̌ faɔn ple̍-ɛ, Pɔɔ, ìn kɔn ìè dǒ Bloa̍ Joi jǔ sàwi̍h sì-i. Nyɔ̍ ke ìn nɛ-a nɔ̌ mɛɛ̍ di̍i̍-ɛ, dě ìn kwa̍a̍ bo Nyɔsoa po̍ u̍h.’

²⁵Nɛ̀ɛ̍, ǎn chɛ̀-ɛ nyɔ̍, mɔ̀ bɛ̌ wlì i̍, ǐn gbaɛ Nyɔsoa wlùh, ka ɔ̍ dǎ-aɛ, kǎ ɛ̍ mu̍ nɛ.

²⁶Jɛ dǒ tbǒ due kɛ̍n bo à mu̍ gbuǔh tba̍-ɛ o.”

²⁷À poɔ-a jii wǐh-a pùè jɔ̌ nyìɛ̍ wlù à gbǎ-a dě di̍i̍-ɛ, wɛ̀ ɛ̍ chɛ̍n-ɛ àɔ̀ jbǒ u̍h-a dǎɛ-a Edlia-a kɛ̍n. Ɛ̍ nu̍-a la̍ tòloo-ɛ, sɔ bli̍a nyɔ̍ jajeɛ̍ à kɔǎn-ɛ gbuǔh i̍ wɛ̀ de.

²⁸Wɛ̀ u̍h dbee nǐ iě ɛ̍ di̍i̍ tɛn-ɛ nu̍ gbɛna-a kwela sɔɔ̌n. U̍h klɛɛn-a dě nya̍ wɛɛ-ɛ, wɛ̀ u̍h dbee ɛ̍ dɛ, iě ɛ̍ di̍i̍ tɛn-ɛ nu̍ gbɛna-a pùè jɔ̌ m̀m̌.

²⁹Nɛ̀ faɔn bo u̍h-a ple̍ à mɛɛ̍ je̍e sɔɔ̌ᵻ i̍ jǎ. Ɛ̍ kɔn u̍h po̍ ɛ̍ du̍a̍ nɛ-a nyìɛ̍ dě ɛ̍ de̍e̍-ɛ sɔ̀n, wɛ̀ u̍h-a ba̍le sɔ̀n iě à sɛ̀n-ɛ.

³⁰Wɛ̀ bli̍a nyɔ̍ po̍ tò dǒ niɔ̍ i̍ ka nyɔ̍-a mu̍ mɛɛ̍-a nya̍ du̍a̍ po̍ la̍-ɛ. Jɛ nɛ̀ u̍h nyna dě gblàa̍ di̍i̍ i̍ u̍h iě ple̍.

³¹Iě Pɔɔ la̍a̍ dě chape ke ɔ̍ fledlǔ we̍, “Pò mɔ̀ gbɛ̀n bli̍a nyɔ̍ la ja̍ wɛ̀ u̍h iě nɔ̌ mɛɛ̍ di̍i̍ sɔ-ɛ, nɛ̀ mɔ̀-a nyɔ̍ se̍-o tàn mu̍ o.”

³²Dbǔᵻ ìh gbɛ̍n-a tò i̍-ɛ, wɛ̀ fledlǔ chɛ̍n i̍h, iě tò mu̍.

³³Ɛ̍ nu̍ sɔ̀n wɔ̍i̍n wɛ̀ Pɔɔ gbɛ̍n-ɛ nyɔ̍ kli̍hgbɛ̍ wɔ̍i̍n u̍h iě dɛ̍ wɔ̍n tɛ̀n. Ɔ̍ la̍a̍, “Wǐh-a pùè jɔ̌ nyìɛ̍ bo mɔ̀ kui wlùh wɛ̀, mɔ̀ɔ̍ se̍-a niɛ̍ nǎ.

³⁴Ǐn gbɛ̍n mɔ̀-a bu̍hᵻ i̍, mɔ̀ tɛ̀n dɛ̍ wɔ̍n wɛ̀ mɔ̀ iě gbǐh jě. Dɛ̍nu̍ɛ, mǐ nɛ-a dǒ mɔ̀ dlǔ-ɛ, i̍h-a due-a chɛ̀ bo ɛ̀ se̍ mǎ mu̍.”

³⁵Ɔ̍ wɔ̀-a wlu-ɛɛ, wɛ̀ ɔ̍ dǔ blèe̍ dǒ u̍h jlǐhwai iě ɔ̍ po̍ Nyɔsoa tlɔ̌, wɛ̀ ɔ̍ chɛɛn ɛ̍ i̍. Sɔ ɔ̍ di̍ ɛ̍ la̍-ɛ sǔh.

³⁶Sɔ ɛ̍ kui u̍h kli̍hgbɛ̍ wlùh iě u̍h dǔ dɛ̍ di̍-ɛ ke.

³⁷À kli̍hgbɛ̍ nɛ-a dě mɛɛ̍-a chɛ̀ di̍i̍-ɛ, à nu̍ kmɛ sɔɔ̌n kwela mɛ̀sɔɔ̌n jɔ̌ mɛ̀o̍ (276).

³⁸U̍h dbo̍-a wɛ̀-ɛ, wɛ̀ u̍h po̍ kwǐ kɛnɛ̌ sie-a i̍-ɛ niɔ̍, mɛɛ̍ iě kwa̍ fěle.

³⁹Sɔ̀n sɛ̀n-aɛ, nɛ̀ bli̍a nyɔ̍ se̍ dě tlu̍h kɛ̍n i̍ juo, jɛ nɛ̀ u̍h-a jě nǐ-a du̍ kɔ̍lu̍h wloo dǒ gbuǔh wɔ̍i̍n. U̍h la̍ nɛ̀ dǒ u̍h-a mu̍ we̍ fɔ̀n u̍h iě mɛɛ̍ kɔ̍-ɛ.

⁴⁰Wɛ̀ u̍h chɛ̍n du̍a̍-a dbǔᵻ iě i̍h pa̍ nǐ wlù. Nɛ̀ kǎ u̍h-a pɔ̀ni mɛɛ̍ wìè-e po̍ tipɛ̌nᵻá dbǔᵻ ke. Wɛ̀ u̍h dǔ poɔ jliɛ̍ nɛ-a dě mɛɛ̍ jǔ ka-ɛ ja̍i̍, wɛ̀ poɔ iě u̍h nya̍ gba̍. Sɔ u̍h tù dlǔ u̍h-a mu̍ la̍ gbuǔh wlì sǔh.

⁴¹Jɛ mɛɛ̍ du̍ penɔ̍ɔ̍ gbo̍ we̍, iě ɛ̍ kwlǐ tè blǔh. Wɛ̀ ɛ̍ dlǔ sè gba̍i̍ngba̍i̍n, iě jbǒ-a je̍ɔ̍ dǒ-a wa̍-ɛ ɛ̍ gbɔ̀ i̍ flɛ̀ɛ̌nflɛ̀ɛ̌n.

⁴²Sɔ fledlǔ chɛ̍n ɛ̍ di̍i̍chì u̍h iě gbɛ̍n-nyɔ̍ kli̍hgbɛ̍ dbǎ, wɛ̀ pò u̍h-a nyɔ̍ dle ɔ̍ jǎ tlu̍h-ɛ, ɔ̍-ɔ je̍e kwlǎ gbǎ.

⁴³Jɛ u̍h-a chape se̍ pɔ̀n Pɔɔ iě mɛ̌, ɛ̍ kɔn ɔ̍ po̍ u̍h bɔ̌ i̍. Wɛ̀ ɔ̍ po̍ nyɔ̍ ùh juo-a dle-ɛɛ slǔh u̍h iě dě mɛɛ̍ di̍i̍ i̍ wa̍n sàǐtòò, u̍h iě tlu̍h jǎ.

⁴⁴Juh sie-a dǒ de̍-ɛ, dǒ tu̍ᵻ pɔ̌ᵻ kɛ̍n ke mɛɛ̍-a fɔ̌ᵻ sɔ-a ɛ̍ pùn i̍-ɛ kɛ̍n bo u̍h dle-e iě u̍h jǎ tlu̍h ke. Kǎ à kli̍hgbɛ̍ à nu̍ tlu̍h jǎ-a pɛlɛpɛ.