Read Western Krahn Nu̍-dɛ̍ᵻ 3 Bible Online

Nu̍-dɛ̍ᵻ 3 - Western Krahn bible

Nu̍-dɛ̍ᵻ 3

¹Dǒ weɛ̍ due di̍i̍ nɛ̀ Pitɛ ke Chɔɔn-a mu̍ dě Nyɔsoa-a slaǎ sà gbò sɔ̀n dǒ u̍h-a ba̍le ti̍ we̍, nɛ̀ jlǔh te̍le i̍ wɛ̀.

²Ɛ̍ wɔ̍n u̍h-a dǎɛ-a Pa̍la̍ Wɔ̍n Chɛ̀wɛ-ɛ, dǒ nyɔ̍gbei gba̍ jɔ̍gbau due ɔ̀ sà-a klɔ-ɛ dě ɔ̍ de̍ di̍i̍-ɛ. Nɛ̀ u̍h-a gba̍ ɔ̍ doǒ ka sɔ̀n-a sɛ̀n-a, ɔ̍ iě nyɔ̍ ùh-a pa̍-a dě gbò-a chɛ̀-ɛ wlǐ we̍ slɔ̀.

³Dǒ ɔ̍ jě-e Pitɛ ke Chɔɔn nɛ̀ u̍h-a ji̍ gbò pa̍ la̍. Wɛ̀ ɔ̍ slɔ̀ u̍h wlǐ we̍.

⁴Wɛ̀ Pitɛ ke Chɔɔn wlò jlǐh i̍ dě ɔ̍ we̍. Pitɛ la̍a̍, “Gbɛ̀n à ja̍.”

⁵Wɛ̀ ɔ̍ gbɛ̀n u̍h ja̍ sòo̍sòo̍. Sɔ ɔ̍ jajeɛ̍ u̍h-a ji̍ ɔ̍ dɛ̍ nyǐ la̍-a de.

⁶Wɛ̀ Pitɛ la̍a̍ dě ɔ̍ we̍, “Ǐn se̍ sebla̍ ke kòo̍ blě, jɛ dɛ̍ ǐn blě-a bo ǎn mu̍ ìn nyǐ. Jusu Klai ɔ̀ sɔ-a dǒ Naaslɔɛ-ɛ, ǎn sèàɛ̍ ìn wlùh ìè na dǒ ɔ̍ nynɛ̌ kɛ̍n.”

⁷Wɛ̀ Pitɛ gbɛ̍n ɔ̍ di̍na̍ sɔ̍n i̍, iě ɔ̍ dǔ ɔ̍ ja̍i̍. Dǒ jǔ laa̍ ɔ̍ bu̍hᵻ ke ɔ̍ klɔsɔɛ̍ᵻ nyna wɛ̀ i̍h sǐ-o dode̍.

⁸Pàǐè, wɛ̀ ɔ̍ wa̍n bloɔ̍, iě ɔ̍ nyna i̍. Sɔ ɔ̍ na la̍-ɛ sǔh. Wɛ̀ ɔ̍ ke u̍h pa̍ dě slaǎ sà gbò sɔ̀n. Nɛ̀ ɔ̍ na-ɛ, ɔ̍ plìn i̍ ja̍i̍-i, iě ɔ̍ tùi Nyɔsoa nynɛ̌ i̍.

⁹Nyɔ̍ kli̍hgbɛ̍ jě ɔ̍-ɛ, nɛ̀ ɔ̍ na-ɛ, iě ɔ̍ tùi Nyɔsoa nynɛ̌ i̍.

¹⁰U̍h gbɛ̀n-a ɔ̍ ja̍-a, iě u̍h juo ɔ̍ i̍. Nɛ̀ ɔ̀ tè-a i̍ dǒ slaǎ sà gbò-a Pa̍la̍ Wɔ̍n Chɛ̀wɛ we̍ wɛ̀ ɔ̍ slɔ̀-a wlǐ-ɛ, nɛ̀ ɔ̍-ɔ bo. Dɛ̍ ɛ̀ nɛ-a ɔ̍ pùn-ɛ, sɔ ɛ̍ wlǔh i̍ u̍h de̍e̍ iě ɛ̍ flɔn-ɛ u̍h wɔ̍n.

¹¹Nyɔ̍gbei jě-a jǔ laa̍ ɔ̍ pèle-a Pitɛ ke Chɔɔn we̍-ɛ, sɔ ɛ̍ flɔn-ɛ u̍h wɔ̍n. Wɛ̀ u̍h wlǎ dě u̍h we̍ dǒ Sɔlɔma-a Fùnǐ sɔ̀n.

¹²Dɛ̍ u̍h nu̍-a dǒ u̍h we̍ wlǎ-aɛ, ɛ̍ bo Pitɛ jě wɛ̀ ɔ̍ la̍a̍, “Mɔ̀ɔ̍ Eslɔɛ nyɔ̍, dɛ̍nu̍ ɛ̍ kèle mɔ̀ i̍ iě mɔ̀-a gbɛ̀n à ja̍ sòo̍sòo̍ ɛ? Jɔ̍gbau la mɔ̀ jajeɛ̍ à chɛ̀-ɛ gbǐh ke Nyɔsoa nyɔ̍ chɛ̀ nu̍-ɛ bo ɛ̀ na-ɛ ɔ̍ ae?

¹³Jɛ Eblaɛɛn ke Ase ke Jekɔ-a Nyɔsoa, ɔ̀ nu̍-a à baaᵻá Nyɔsoa-a, ɔ̍ bo ɔ̀ bɛ̌-ɛ ɔ̍ pòi̍ju Jusu-a nynɛ̌ i̍. Jusu mɔ̀ sà-a kwlǎ u̍h iě-a dbǎ, wɛ̀ Pale-a pɔ̀n-a ɔ̍ sɔ̍n kɛ̍n sà i̍ de iě mɔ̀ se̍-a wɔ̌n la̍ nɛ-ɛ, ɔ̍ bo.

¹⁴Ɔ̀ nu̍-a i̍ slɛ̌-nyɔ̍ ɔ̀ wɛ̀-a nɛi̍-ɛ, ɔ̍ bo mɔ̀ tba̍ chla iě mɔ̀ sèàɛ̍ Pale wlùh ɔ̍ iě nyɔ̍ gbe̍ja̍a̍ poe nyɔ̍ sɔ̍n kɛ̍n sà dǒ mɔ̀ we̍.

¹⁵Mɔ̀ɔ̍ bo ùh dbǎ ɔ̀ nɛ-ɛa nyɔ̍ kmɔ̌-ɛ. Jɛ Nyɔsoa sà ɔ̍-e. Àɔ̀ bo à nu̍ ɛ̍ sàànsi̍i̍h.

¹⁶Jɛ Jusu-a nynɛ̌ wlùh gbaɛ bo ɛ̀ nɛ kmɔ̌, iě jɔ̍gbau la mɔ̀ juo-a iě mɔ̀-a jě-a ka da̍a-ɛ, wɛ̀ ɔ̍ dalǔhᵻ sǐ-o dode̍. Wlùh gbaɛ ɛ̀ jii-a dě Jusu ja̍a̍-ɛ, ɛ̍ bo ɛ̀ nɛ kmɔ̌ iě jɔ̍gbau la ɔ̍ pǔh ka te̍kle̍e̍. Ɔ̍ bo mɔ̀ kli̍hgbɛ̍ mɔ̀-a jě-a ka da̍a.

¹⁷“Jɛ dɛ̍ ǐn juo-aɛ, ǐn de̍di̍i̍ᵻ, dɛ̍ sɔ̀n mɔ̀ ke mɔ̀-a wlu̍ kwa̍ blě nyɔ̍ nu̍-a Jusu pùn-ɛ, mɔ̀ se̍ ɛ̍ i̍ juo dɛbo.

¹⁸Jɛ ɛ̀ Nyɔsoa sà-a dě ɔ̍ tu̍owli po̍ nyɔ̍ kli̍hgbɛ̍ ja̍a̍ tɛin-ɛ, ɛ̍ gbǎ chɛ̀-ɛ wɛ̀. Ɔ̍ la̍ ɔ̍ Chèɛ̀ Tba̍ju-a mu̍ jua̍i̍ sàɛ̀.

¹⁹Ɛ̍ tìh-ɛ, mɔ̀ bǐi i̍, nɛ̀ mɔ̀ fèàɛ̀ dě Nyɔsoa we̍, nɛ̀ ɔ̍ mu̍-o mɔ̀-a gblɛ̍n sɔ̀ɛ̀n i̍ slǎn.

²⁰Nɛ̀ ɛ̍ mu̍ ti̍ kɔn wɛ̀ Joi iě feɛ i̍ jě-ɛ dbo̍. Ɔ̍ mu̍ Chèɛ̀ Tba̍ju Jusu dbo̍, ɔ̀ ɔ̍ klɛ̀ɛ̀n-a dǒ mɔ̀ we̍-ɛ.

²¹Jɛ ɔ̍ mu̍ dě ja̍i̍wlɔ̀ nɛ ke̍ te̍e̍ wɛ̀ dɛ̍ᵻ kli̍hgbɛ̍-a delee i̍ gbǎ ti̍ iě-o nyni̍. Ɛ̍ kɔn dela̍ bo Nyɔsoa po̍ tɛin se̍e̍ dě ɔ̍ tu̍owli po̍ nyɔ̍ ja̍a̍.

²²Dɛ̍nu̍ɛ, Mose la̍a̍, ‘Ka Joi Nyɔsoa nu̍-a ǐn ja̍i̍ dǔ-ɛ, kǎ ɔ̍ mu̍ mɔ̀-a chɛ̀-a nyɔ̍ ja̍i̍ dǔ-ɛ nu̍ dě mɔ̀ nynɛ̌. Jɛ nɛ̀ dɛ̍-o-dɛ̍ ɔ̍ mu̍-a mɔ̀ wlùh sèàɛ̍-ɛ, mɔ̀ nu̍ ɛ̍.

²³Nɛ̀ nyɔ̍-o-nyɔ̍ ɔ̀ se̍-a tu̍owli po̍ nyɔ̍ laa̍ ɔ̍ wlu̍ nu̍ mu̍-ɛ, nɛ̀ ɔ̍ mu̍-u gbɔ̀lɔ dě Nyɔsoa-a nyɔ̍ nynɛ̌ we̍.’

²⁴Nyɔsoa-a tu̍owli po̍ nyɔ̍ kli̍hgbɛ̍ ùh wlu-a sɔ dǒ Samio we̍ sǔh ìè nya̍ mu̍-ɛ, u̍h bla̍ wǐh la i̍h-a tìh kli̍hgbɛ̍.

²⁵Mɔ̀ɔ̍ bo ùh nu̍ Nyɔsoa-a tu̍owli po̍ nyɔ̍-a nynuu̍. Mɔ̀ɔ̍ kɔn ku̍o̍ bo ɔ̍ po̍-a dǒ mɔ̀ baaᵻ we̍. Ɔ̍ la̍a̍ dě Eblaɛɛn we̍, ‘Dě àn tloemlai ja̍a̍ bo ǎn mu̍ kmɔ̌ nyɔ̍ kli̍hgbɛ̍ pɔ̀ìě nyǐ-i.’

²⁶Ɛ̍ kɔn Nyɔsoa dǔ-a ɔ̍ pòi̍ju ja̍i̍-ɛ, iě ɔ̍ dbo̍ ɔ̍ nɔ̌ mɔ̀ we̍ sàǐtòò ɛ̍ iě mɔ̀-a pɔ̀ìě nu̍, ɔ̍ iě mɔ̀ fèàɛ̀, mɔ̀ iě kà kɔn gblɛ̍n i̍ tǎli.”