Read Western Krahn Nu̍-dɛ̍ᵻ 4 Bible Online

Nu̍-dɛ̍ᵻ 4 - Western Krahn bible

Nu̍-dɛ̍ᵻ 4

¹Pitɛ ke Chɔɔn nɛ dǒ nyɔ̍ laa̍ we̍ wlu la̍ sǔh wɛ̀ Nyɔsoa-a slaǎ sà nyɔ̍ ke, slaǎ sà gbò-a chape ke Sadiusii nyɔ̍ ji̍ dǒ u̍h we̍.

²Sɔ ɛ̍ feǎn dǒ u̍h wlì. Dɛ̍nu̍ɛ, Pitɛ bei-a po̍ nyɔ̍gbei nǎ iě u̍h-a bla̍ tìh ka Jusu wlǔh-aeɛ, nɛ̀ mɛ̌-nyɔ̍-a mu̍ la̍-e wlǔh dode̍.

³Wɛ̀ u̍h gbɛ̍n Pitɛ bei, jɛ nɛ̀ wlù-a wɔ̀ la̍-ɛ. Ɛ̍ kɔn u̍h po̍ u̍h kasoo wɛ̀ sɔ̀n iě sɛ̀n.

⁴Jɛ nyɔ̍ dɔu ùh wɔ̌n-a wlu̍ tu̍ la-ɛ, u̍h po̍ ɛ̍ tìh chɛ̀. Pò ìn slè wlùh gbaɛ blě nyɔ̍-ɛ, u̍h bɛ̌ɛ wlǔ m̀m̌ (5,000) nu̍-ɛ.

⁵Sɔ̀n sɛ̀n-aɛ, wɛ̀ Juu nyɔ̍-a wlu̍ kwa̍ blě nyɔ̍ ke nyɔ̍ klaaᵻ ke telě nǎ poe nyɔ̍ gbèɛ̀ɛn dǒ Juluslɛn wlɔ̀ di̍i̍.

⁶Iě u̍h dǎ slaǎ sà nyɔ̍ klaa Anna ke Kaifa ke Chɔɔn ke Ɛlesana. Ɛ̍ ke slaǎ sà nyɔ̍ klaa-a chɛ̌ duuh ke. Iě u̍h gbèɛ̀ɛn.

⁷Wɛ̀ u̍h ja Pitɛ ke Chɔɔn dǒ u̍h jǔ, iě u̍h-a tèle u̍h i̍. U̍h la̍a̍, “Gbǐh jɛwe̍ kɔn di̍i̍ àe̍e̍ nyɔ̍ kɔn nynɛ̌ kɛ̍n bo mɔ̀-a nui ìh la ɛ?”

⁸Sɔ Nyɔsoa-a Sùù jǐi Pitɛ i̍, iě ɔ̍ la̍a̍ dě u̍h we̍, “Mɔ̀ɔ̍ ùh nu̍-a nyɔ̍-a wlu̍ kwa̍ blě nyɔ̍ ke u̍h-a nyɔ̍ klaaᵻɛ́,

⁹dɛ̍ chɛ̀ la ɛ̀ nui-a dǒ klɔ-nyɔ̍ la we̍ wɛ̀ ɔ̍ pǔh-a ka-aɛ, pò ɛ̍ tù ɛ̍ tìh mɔ̀ iě ka à-a chlɛ̌ sèàn-a,

¹⁰nɛ̀ mɔ̀ juo ɛ̍, nɛ̀ Eslɔɛ nyɔ̍ kli̍hgbɛ̍ juo ɛ̍ ke, ka Jusu Klai ɔ̀ sɔ-a dǒ Naaslɔɛ-ɛ, ɔ̀ mɔ̀ kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo Nyɔsoa sà-e. Dǒ ɔ̍ nynɛ̌ kɛ̍n bo jɔ̍gbau nyna-a i̍ da̍a mɔ̀ jǔ-ɛ ɔ̍ pǔh-i.

¹¹Jusu la ɔ̍ kɔn tìh bo Nyɔsoa-a wlu̍ la̍a̍, ‘Sɔɔ̌ ɛ̀ mɔ̀ɔ̍ gbò po̍ nyɔ̍ tba̍-a chla de-ɛ, ɛ̍ bo ɛ̀ bɔ̌ɛ-a ka gbò-a sìtù nu̍-ɛ wɛ̀.’

¹²Pǔh-ɛ se̍ dě nyɔ̍ dɔɔ ja̍a̍ nɛ. Nynɛ̌ dɛɛ se̍ nɔ̌ ja̍u̍n la sɔ̀n nɛ nyɔ̍ iě tù wɛ̀ à iě i̍ pǔh-i.”

¹³Pitɛ ke Chɔɔn se̍ chlǐh-dɛ̍ juo. U̍h nu̍ plǒai nyɔ̍ iě u̍h wɛ̀ faɔn. Ɛ̍ bo taɔ pa̍ nyɔ̍ laa̍ u̍h jě sɔ ɛ̍ wlǔh i̍ u̍h de̍e̍. Iě u̍h juo-o dɛ̍ i̍ ka u̍h ke Jusu-a nɛ̍aɛ-a we̍-ɛ.

¹⁴Jɛ jɔ̍gbau Pitɛ ke Chɔɔn pǔh-iaɛ, nɛ̀ ɔ̍ nyna u̍h pùn u̍h-a gba̍ jlǐhɛ̍ u̍h-a jě ɔ̍. Sɔ dɛ̍ u̍h iě-a bla̍-ɛ, ɛ̍ se̍ nɛ.

¹⁵Wɛ̀ u̍h sèàɛ̍ Pitɛ bei wlùh u̍h iě u̍h kɛ̍n wlǔh wɛɛ. Sɔ u̍h-a sǔh-a pu̍e̍e la̍ tìh sǔh.

¹⁶U̍h la̍a̍, “Ka à mu̍ nyɔ̍ la u̍h-a tìh nu̍ ɛ? Dɛ̍nu̍ɛ, jbaɛdih kaɛn la ɛ̀ jii-a dě u̍h ja̍a̍-ɛ, Juluslɛn nyɔ̍ kli̍hgbɛ̍ jě ɛ̍-ɛ, sɔ nɛ̀ à se̍ ɛ̍-ɛ tòlo-ɛ bɛ̌ɛ.

¹⁷Jɛ ka à iě-a nu̍ wɛ̀ ɛ̍-ɛ je̍e-a i̍ sɛ̍ dě nya̍ dě nyɔ̍ nynɛ̌-ɛ, mɔ̀ à tù u̍h slɛ̌n u̍h-u je̍e dě nyɔ̍-o-nyɔ̍ we̍ wlu dɛ dǒ Jusu-a nynɛ̌ kɛ̍n.”

¹⁸Wɛ̀ u̍h dǎ-ɛ u̍h de̍ iě u̍h tè u̍h telě i̍, u̍h-u je̍e wlu àe̍e̍ u̍h-u je̍e nǎ po̍ dɛ dǒ Jusu-a nynɛ̌ kɛ̍n.

¹⁹Jɛ Pitɛ ke Chɔɔn la̍a̍, “Pò ɛ̍ slɛ̌ i̍ dě Nyɔsoa jlǐh à iě mɔ̀ dɛ̍ɛ̍ jě ɛ̍ iě ɔ̍ sìì-ɛ, mɔ̀-a chɛ̀ iě ɛ̍-ɛ sèàɛ̍.

²⁰Dɛ̍nu̍ɛ, dɛ̍ jɛ à wɔ̌n-a wɛ̀ à tba̍-a jlǐhɛ̍-ɛ, à se̍ ɛ̍-ɛ sà-a bɔ̌ mu̍ o.”

²¹Sɔ taɔ pa̍ nyɔ̍ po̍ u̍h faɔn di̍i̍ i̍ sǔh, wɛ̀ u̍h tǎli u̍h i̍. U̍h-u jě u̍h kàn gbɛ̍n ka̍. Dɛ̍nu̍ɛ, nɛ̀ nyɔ̍ kli̍hgbɛ̍-a po̍ Nyɔsoa tìhwe̍ dǒ ɛ̀ nɛ-aɛ we̍.

²²Jɔ̍gbau ɔ̀ kɔn pùn jbaɛdih poe-a wɛ̀ ɔ̍ pǔh-aɛ, ɔ̍ sɔ̀nᵻ sì kwela nyìɛ̍ kɛ̍n.

²³U̍h sà-a u̍h sɔ̍n kɛ̍n wɛ̀-ɛ, wɛ̀ Pitɛ ke Chɔɔn mu̍ dě de̍ u̍h ba̍ᵻ we̍. Wɛ̀ dɛ̍ᵻ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ bla̍-a dě u̍h we̍-ɛ, iě u̍h po̍ i̍h-a kunǎ kli̍hgbɛ̍.

²⁴Ti̍ u̍h wɔ̌n-a i̍h-ɛ, iě u̍h kli̍hgbɛ̍ ba̍le Nyɔsoa. U̍h la̍a̍, “Joi, mɔ̀ bo ɔ̀ nu̍ bloa̍ ke ja̍u̍n ke jbǒ, ɛ̍ ke dɛ̍ᵻ kli̍hgbɛ̍ nɛ-a dě i̍h di̍i̍-ɛ ke.

²⁵Mɔ̀ bo ɔ̀ jii dě àn Sùù di̍i̍ wɛ̀ ìn wlu-i dě à baa Depe ja̍a̍ ɔ̀ nu̍-a àn pòi̍ju-ɛ, iě ɔ̍ la̍a̍, ‘Dɛ̍-ɛ tìh ùh se̍-a Juu nyɔ̍-a fɛ̍n jlu̍h, iě u̍h-a sɔ̌ bu̍ɛ̍i̍ ɛ?

²⁶Blǔh baaᵻ nɛ-a nɔ̌ bloɔ̍-ɛ, u̍h po̍ u̍h-a chɛ̀ gba̍a̍, iě nyɔ̍-a wlu̍ kwa̍ blě nyɔ̍-a gbòe i̍, u̍h iě Joi ke ɔ̍ Chèɛ̀ Tba̍ju bu̍hᵻ tbaɛ.’

²⁷I̍i̍n, kǎ ɛ̍ nɛ, àn pòi̍ju Jusu ɔ̀ wɛ̀-a nɛi̍ iě ìn tba̍-a chèɛ̀-ɛ, Ɛlo ke, Pɔntiɔ Pale ke ɔ̍ bu̍hᵻ tbaɛ tìh bo u̍h tù wɛ̀ u̍h ke ùh se̍-a Juu nyɔ̍-ɛ ke Eslɔɛ nyɔ̍ gbòe i̍ da̍a tùgbàwlɔ̀ la di̍i̍.

²⁸Dɛ̍ ìn po̍-a gbɔ̀ se̍e̍ dǒ àn gbǐh we̍ ɛ̀ iě-a nɛ-ɛ, ɛ̍ bo u̍h gbòe i̍ u̍h iě nu̍.

²⁹Nɛ̀ɛ̍ Joi, kaka la̍ u̍h-a plǐn-ɛ bo ìè ja̍ gbɛ̀n wɛ̀ ìè àɔ̀ nu̍-a àn pòi̍nynuu̍-ɛ gbǐh nyǐ, à iě àn wlu̍ bla̍ gbài̍gbài̍.

³⁰Nɛ̀ ìn to àn sɔ̍n ɛ̍ iě nyɔ̍ pǔh-i. Nɛ̀ ìn po̍ jbaɛdih ìè nyɔ̍ wɔ̍n flɔn-ɛ dɛ̍ᵻ nu̍ dǒ àn pòi̍ju Jusu-a nynɛ̌ kɛ̍n, ɔ̀ wɛ̀-a nɛi̍-ɛ.”

³¹U̍h iě-a ba̍le-ɛ wɔ̀-ɛ, tà u̍h nɛ-a wɛ̀ u̍h iě-a ba̍le-ɛ, sɔ dǒ sìka i̍ sǔh. Wɛ̀ Nyɔsoa-a Sùù jǐi u̍h kli̍hgbɛ̍ i̍, iě u̍h-a bla̍ Nyɔsoa-a wlu̍ gbài̍gbài̍.

³²Wlùh gbaɛ blě nyɔ̍ kli̍hgbɛ̍ u̍h blě-e wlùh iě u̍h-a pɔluh nɛ due. Dɛ̍-ɛ i̍ gblè nyɔ̍ se̍ dě u̍h nynɛ̌ nɛ. U̍h-a pu̍e̍e dɛ̍ᵻ kwa̍a̍ i̍ kleǐn.

³³Sɔ Jusu-a gba̍tòà blě gbǐh ɛ̀ ku̍-a wɔ̍n-ɛ, iě u̍h-a sà Joi Jusu-a mɛ̌ wlǔh-e tìh i̍. Iě Nyɔsoa-a wɔ̍n ku̍ pɔ̀ìě nɛ u̍h kli̍hgbɛ̍ we̍.

³⁴Sɔ nyɔ̍ dɛ̍-a tìh iě-a i̍ nu̍ dě u̍h nynɛ̌-ɛ, ɔ̍ se̍ nɛ. Nɛ̀ɛ̍, nyɔ̍ kli̍hgbɛ̍ ùh blě-a blǔh ke gbòᵻáɛ, u̍h-a ple̍ i̍h, iě u̍h-a ja i̍h-a wlǐ

³⁵u̍h-a sà i̍h kwlǎ dě gba̍tòà we̍, wɛ̀ u̍h-a gblè i̍h. Dɛ̍ nɛ-a jɔ-a gba̍ ka̍-ɛ, nɛ̀ ɛ̍ bo ɔ̍ gba̍.

³⁶Josɛ ɔ̀ sɔ-a Saiplɔ bloa̍ kɛ̍n-ɛ, kǎ ɔ̍ nu̍ ke. Gba̍tòà-a dǎɛ ɔ̍ Banaba. Ɛ̍ gbɔ̀ nu̍ wlùh fùka nyɔ̍. Liifaɛ jǔ bo.

³⁷Ɔ̍ ple̍-a ɔ̍ blǔh-ɛ, wɛ̀ ɔ̍ ja ɛ̍ wlǐ laa̍ iě ɔ̍ sà-ɛ i̍h gba̍tòà kwlǎ.