Read Western Krahn Nu̍-dɛ̍ᵻ 5 Bible Online

Nu̍-dɛ̍ᵻ 5 - Western Krahn bible

Nu̍-dɛ̍ᵻ 5

¹Jɛ jɔ̍gbau dɔɔ ɔ̀ kɔn nynɛ̌ nu̍-a Ɛlenaea, ɔ̍ ke ɔ̍ nynɔ̌ Sofaia bo ùh ple̍ u̍h-a blǔh-a fɔ̌.

²Jɛ ɔ̍ si̍e̍ wlǐ diih ɔ̍ chɛ̀ de̍e̍, iě ɔ̍ dǔ jih sie-a doǒ-ɛ Jusu-a gba̍tòà we̍ ja-a. Ɔ̍ nynɔ̌ juo-o dɛ i̍.

³Wɛ̀ Pitɛ la̍a̍, “Ɛlenaea, dɛ̍nu̍ àn wɔ̌n iě Setɔn-a gbǎ dǒ ìn pɔluh kɛ̍n wɛ̀ àn tmɔ̌-ɛ Nyɔsoa-a Sùù si̍h wɔ̍i̍n iě àn si̍e̍ àn blǔh-a wlǐ diih dǒ àn chɛ̀ de̍e̍ ɛ?

⁴Ìè-a blǔh laa̍ ple̍-ɛ, nɛ̀ mɔ̀ kɔn ɛ̍. Wlǐ ɛ̍ jě-aɛ, mɔ̀ kɔn i̍h ke. Dɛ̍ bo ɛ̀ po̍ dɛ̍ kaɛn la dǒ ìn pɔluh kɛ̍n ɛ? Ìn se̍ nyi̍ɔ̍ si̍h wɔ̍i̍n tmɔ̌-ɛ, jɛ Nyɔsoa bo ìn tmɔ̌-ɛ si̍h wɔ̍i̍n o.”

⁵Ɛlenaea wɔ̌n-a wlu̍ la-a, ɔ̍ kà i̍ iě ɔ̍ mɛ̌. Nyɔ̍ kli̍hgbɛ̍ ùh wɔ̌n-a pɔ̀n la-a, u̍h gbǎ faɔn.

⁶Wɛ̀ nynuu̍gbèè ji̍ u̍h pìàɛ̍n ɔ̍ kǔ dɛ̍ dlǔ i̍, iě u̍h gba̍ ɔ̍ i̍ tè la̍.

⁷Ɛ̍ bɛ̌ɛ àba̍ ta̍a̍n nu̍-ɛ, wɛ̀ ɔ̍ nynɔ̌ pa̍ gbò. Jɛ ɔ̍ se̍ dɛ̍ nɛ-a ɔ̍ kɔan pùn-ɛ juo.

⁸Wɛ̀ Pitɛ la̍a̍, “Ìn ke àn kɔan ke wlǐ mɔ̀ jě-a dǒ mɔ̀-a blǔh mɔ̀ ple̍-a we̍-ɛ, kǎ i̍h tìè ka sǔh ae?” Ɔ̍ la̍a̍, “I̍i̍n, kǎ i̍h tìè.”

⁹Wɛ̀ Pitɛ la̍a̍ dě ɔ̍ we̍, “Dɛ̍nu̍ ìn ke àn kɔan-a wlu̍-a nɛ due iě mɔ̀-a tù-o Joi-a Sùù-a jlu̍h duǐh ɛ? Gbɛ̀n-e, nynuu̍ ùh tè-a àn kɔan i̍-ɛ, u̍h nɛ dǒ gbò wɔ̍i̍n. U̍h-a mu̍ ìn gba̍ ke.”

¹⁰Dǒ tàdùè laa̍, nynɔ̌ kà i̍ dǒ ɔ̍ jǔ, iě ɔ̍ mɛ̌. Wɛ̀ nynuu̍gbèè laa̍ u̍h pa̍ gbò. U̍h gbɛ̀n-a nynɔ̌ ja̍-ɛ, nɛ̀ ɔ̍ mɛ̌ wɛ̀. Iě u̍h gba̍ ɔ̍, wɛ̀ u̍h tè ɔ̍ i̍ dǒ ɔ̍ kɔan pùn.

¹¹Chɔchi̍h nyɔ̍ kli̍hgbɛ̍ ke nyɔ̍ ùh wɔ̌n-a pɔ̀n la-a, sɔ ɛ̍ po̍ u̍h faɔn kaa̍.

¹²Wɛ̀ Jusu-a gba̍tòà poe jbaɛdih dɔu ke nyɔ̍ wɔ̍n flɔn-ɛ dɛ̍ᵻ dě nyɔ̍ɔ nynɛ̌. Nɛ̀ dǒ Sɔlɔma-a Fùnǐ sɔ̀n bo u̍h-a gbèɛ̀ɛn chɛ̍chɛ̍.

¹³Sɔ nɛ̀ dɛ̍ nyɔ̍gbei-a nu̍-a u̍h ja̍ tè-ɛ, ɛ̍ sì-o dɛ̍ i̍. Jɛ nyɔ̍ dɔɔ se̍ u̍h nynɛ̌ gbǎ-a bɛ̌ɛ.

¹⁴Sɔ dɛ̍ nynɔ̌gbaɔᵻ ke jɔ̍gbauᵻ dɔu-a nu̍-a la̍ kɛ̍n i̍ gboǎɛ dě u̍h-a gbɔ̀ù di̍i̍ Joi wlùh gbaɛ tìh-ɛ, nɛ̀ ɛ̍ se̍ dɛ̍ka nɛ.

¹⁵Sɔ u̍h-a jbaɛdih nu̍ ɛ̍ nyɔ̍gbei-a gba̍ wɛ̌ᵻ nyɔ̍ dǒ wlɔ̀gbàɛ̀, iě u̍h-a peɛ̌ɛn u̍h i̍ dǒ klìɔ̀ᵻ ke slɛᵻ kɛ̍n. Wɛ̀ pò Pitɛ ja sì-ɛ, ɛ̍ tù ɔ̍ peɛ-a chɛ̀-ɛ, ɛ̍ iě u̍h-a duuh wlǎɛ.

¹⁶Wɛ̀ nyɔ̍ tlùgbei̍ sɔ wlɔ̀ᵻ nɛ-a Juluslɛn wlɔ̀ de̍e̍ i̍-ɛ di̍i̍, iě u̍h ja u̍h-a wɛ̌ᵻ nyɔ̍ ke jeědih-a de̍e̍ nɛ nyɔ̍. Wɛ̀ u̍h pǔh kli̍hgbɛ̍.

¹⁷Sɔ Nyɔsoa-a slaǎ sà nyɔ̍ klaa ke ɔ̍ nyɔ̍ nɛ-a dě Sadiusii nyɔ̍-a gbɔ̀ù di̍i̍-ɛ, wlɛ̀n jǐ dě u̍h di̍i̍ tliin.

¹⁸Iě u̍h gbɛ̍n Jusu-a gba̍tòà. Wɛ̀ u̍h po̍ u̍h dě mlɔ̌ kasoo di̍i̍.

¹⁹Jɛ Joi-a ǐnchɔ̀ ji̍-i maɔ̍, wɛ̀ ɛ̍ pɔ̀ni kasoo gbò wɔ̍i̍n iě ɛ̍ sǐ-i u̍h sɔ̀n.

²⁰Ɛ̍ la̍a̍, “Mɔ̀ mu̍ mɔ̀ iě i̍ nyna dě Nyɔsoa-a slaǎ sà gbò sɔ̀n, mɔ̀ iě kmɔ̌ delee la ɛ̍ dɛ we̍i̍ bla̍ kli̍hgbɛ̍ dě nyɔ̍ɔ we̍.”

²¹Dɛ̍ ɛ̍ sà-aɛ bo u̍h nu̍. Sɔ̀n sɛ̀n-a, wɛ̀ u̍h pa̍ dě slaǎ sà gbò sɔ̀n u̍h-a po̍ nyɔ̍ nǎ. Wɛ̀ slaǎ sà nyɔ̍ klaa ke ɔ̍-ɔ naɛ nyɔ̍ ji̍. Iě u̍h dǎ taɔ pa̍ nyɔ̍ ke Eslɔɛ-a nyɔ̍ klaaᵻ kli̍hgbɛ̍ iě u̍h gbèɛ̀ɛn. Wɛ̀ u̍h dbo̍ wlu̍ dě kasoo u̍h iě gba̍tòà laa̍ ja.

²²Jɛ nyɔ̍ u̍h dbo̍-aɛ, u̍h mu̍-aɛ, u̍h se̍ u̍h dě kasoo jɛɛ. Wɛ̀ u̍h mu̍ de̍ iě u̍h po̍ kunǎ.

²³U̍h la̍a̍, “À iě-a mu̍-ɛ, nɛ̀ kasoo gbò ka̍n wɔ̍i̍n gba̍i̍ngba̍i̍n, wɛ̀ ɛ̍ jlǐhɛ̍ we̍ tù nyɔ̍ nyna i̍ dǒ ɛ̍ wɔ̍i̍n. Jɛ à pɔ̀ni-a doǒ-ɛ, nɛ̀ nyɔ̍ se̍-e nɛ.”

²⁴Ti̍ slaǎ sà gbò-a chape ke slaǎ sà nyɔ̍ klaaᵻ wɔ̌n-a u̍h-a kunǎ po̍ wlu̍-ɛ, sɔ ɛ̍ gbe-e dě u̍h di̍i̍ i̍. Iě u̍h-a pu̍e̍e wlùh i̍ pò ka ɛ̍ nu̍ nɛ-ɛ kɔ̌ɔ.

²⁵Wɛ̀ nyɔ̍ ji̍, iě ɔ̍ la̍a̍, “Mɔ̀ gbɛ̀n-e, ùh mɔ̀ po̍-a kasoo-ɛ, u̍h bo ùh nɛ-a dě slaǎ sà gbò sɔ̀n de̍à ùh-a po̍-a nyɔ̍ nǎ.”

²⁶Wɛ̀ chape ke ɔ̍ fledlǔ mu̍-e, iě u̍h ja u̍h. Jɛ u̍h se̍ u̍h-a klànklàn nu̍. Dɛ̍nu̍ɛ, u̍h-a ple̍ faɔn wɛ̀ nyɔ̍ɔ je̍e u̍h sɔɔ̌ᵻ i̍ tbaɛ.

²⁷U̍h ja-a gba̍tòà laa̍-ɛ, wɛ̀ u̍h nyna-ɛ u̍h i̍ dǒ taɔ pa̍ nyɔ̍ jǔ. Iě slaǎ sà nyɔ̍ klaa tèle u̍h i̍.

²⁸Ɔ̍ la̍a̍, “À po̍ mɔ̀ telě i̍ gbe̍i̍n kleǐn mɔ̀-ɔ je̍e nyɔ̍ nǎ po̍ dǒ jɔ̍gbau la ɔ̍ nynɛ̌ kɛ̍n. Jɛ Juluslɛn wlɔ̀-a chɛ̀ bo mɔ̀ wɔ̀-ɛ nǎ po̍-ɛ dlǔ wɛ̀. Wɛ̀ mɔ̀-a nu̍ ɛ̍ jǔ la ɔ̍ mɛ̌ɛ tìh iě dǒ à dlǔ i̍ tè.”

²⁹Wɛ̀ Pitɛ bei sà u̍h-a wlu̍ pɔ̀n we̍, u̍h la̍a̍, “À kɔn à iě Nyɔsoa-a wlu̍ nu̍ ɛ̍ iě nyi̍ɔ̍ naɛ sìì.

³⁰Jusu mɔ̀ pèle-a dǒ tu̍ wlì wɛ̀ ɔ̍ iě-a mɛ̌-ɛ, ɔ̍ bo à baaᵻá Nyɔsoa sà-e.

³¹Iě Nyɔsoa dǔ ɔ̍ ja̍i̍ dǒ ɔ̍ di̍na̍ we̍, ɔ̍ iě Dlǔtu ke nyɔ̍ Sèìe Nyɔ̍ nu̍. Wɛ̀ ɔ̍ iě Eslɔɛ nyɔ̍ flɔna̍ nyǐ u̍h iě i̍ bǐi wɛ̀ u̍h-a gblɛ̍n sɔ̀ɛ̀n-a tìh iě i̍ tǎli-ɛ.

³²Àɔ̀ bo à nu̍ ìh la i̍h-a sàànsi̍i̍h, à ke Nyɔsoa-a Sùù ɛ̀ nu̍-a ɔ̍ nyǐ-dɛ̍ dǒ nyɔ̍ ɔ̀ nu̍-a ɔ̍ wlu̍ we̍-ɛ.”

³³U̍h wɔ̌n-a wlu̍ la-ɛ, nɛ̀ u̍h sɔ̀n wɛ̀ dǒ ta̍i̍, iě u̍h-a pɔ̀n Pitɛ bei dbǎ-a i̍.

³⁴Jɛ Fɛlesii jǔ due ɔ̍ nynɛ̌ bo Kamediɔ, ɔ̍ nu̍ taɔ-a nyɔ̍ due. Nyɔ̍ kli̍hgbɛ̍-a tè ɔ̍ ja̍. Ɔ̍ nu̍ telě nǎ poe nyɔ̍, iě ɔ̍ nyna i̍, ɔ̍ sèàɛ̍ nyɔ̍ wlùh u̍h iě nynuu̍ la dǒ sɔ̀n gba̍ wɛɛ.

³⁵Wɛ̀ ɔ̍ la̍a̍, “Mɔ̀ɔ̍ Eslɔɛ nyɔ̍, mɔ̀ nu̍ nɛnɛ̌ dǒ dɛ̍ mɔ̀-a pɔ̀n-a nyɔ̍ la pùn nu̍-ɛ i̍-ɛ we̍ o.

³⁶Ɛ̍ nu̍ ti̍ due wɛ̀ Tuda wlǔh kwlǎ ɔ̍ la̍ ɔ̍-ɔ dɛ̍-a nyɔ̍, iě ùh gbǎ-a dǒ ɔ̍ de̍e̍-ɛ, u̍h wɛ̀ nyɔ̍-a kmɛ nyìɛ̍ (400). Wɛ̀ ɔ̍ dbǎ-ɛ, wɛ̀ ɔ̍ de̍e̍ na nyɔ̍ kli̍hgbɛ̍ gbà ja̍i̍, iě ɔ̍ naɛ nynɛ̌ mɛ̌.

³⁷Ɔ̍ dɛ sì-a i̍-ɛ, wɛ̀ Juda ɔ̀ sɔ-a dě Kaladii fɔɔ-ɛ wlǔh tà ke̍. Nɛ̀ ɛ̍ nu̍ nyɔ̍ slè ti̍, iě ɔ̍ chlì nyɔ̍ dɔu ke dǒ ɔ̍ chɛ̀ de̍e̍. Jɛ ɔ̍ dbǎ-ɛ ke, wɛ̀ ɔ̍ de̍e̍ na nyɔ̍ kli̍hgbɛ̍ gbà ja̍i̍.

³⁸Nɛ̀ɛ̍ kaka la̍, ǎn sèàɛ̍ mɔ̀ wlùh mɔ̀ iě nyɔ̍ la sɔ̍n pùn sà. U̍h mu̍ u̍h-a dɛ̍. Dɛ̍nu̍ɛ, pò u̍h-a di̍i̍chì ke nu̍-dɛ̍ sɔ dě nyi̍ɔ̍ ja̍a̍-ɛ, nɛ̀ ɛ̍ mu̍ ja̍a̍i̍ gbǎ tiɔ.

³⁹Jɛ pò ɛ̍ sɔ dě Nyɔsoa we̍-ɛ, nɛ̀ mɔ̀ se̍ nyɔ̍ la klà sà-a bɛ̌ɛ o. Mɔ̀ se̍ nɛnɛ̌ nu̍-ɛ, nɛ̀ mɔ̀-a fɔ̀n la̍ Nyɔsoa we̍ sǔh o.” Sɔ u̍h wɔ̌n ɔ̍ wlu̍-u i̍ ke.

⁴⁰Wɛ̀ u̍h dǎ Jusu-a gba̍tòà laa̍ dě de̍ gbò, iě u̍h bla̍ u̍h. U̍h la̍a̍, “Mɔ̀-ɔ wlu-i dǒ Jusu-a nynɛ̌ kɛ̍n dɛ de o.” Wɛ̀ u̍h dǔ u̍h sɔ̍n kɛ̍n sà-a.

⁴¹Ti̍ gba̍tòà-a sɔ-a dǒ taɔ laa̍ we̍-ɛ, nɛ̀ u̍h-a nu̍ mɔna̍ kaa̍, dɛ̍nu̍ɛ, Nyɔsoa slè-e u̍h nyɔ̍ chɛ̀ wɛ̀ u̍h iě mlɔ̌ wɔ̍n gbǎ dǒ Jusu-a nynɛ̌ kɛ̍n.

⁴²Ka Jusu nu̍-a Nyɔsoa-a Chèɛ̀ Tba̍ju-ɛ, ka sɔ̀n-a sɛ̀n-a, kǎ u̍h-a mu̍ dě Nyɔsoa-a slaǎ sà gbò sɔ̀n ke gbòᵻ di̍i̍ i̍ iě u̍h-a poe ɛ̍ nyɔ̍ nǎ u̍h-a bla̍ ɛ̍ we̍i̍. U̍h-a wɔ̍n se̍ kǎ sèàn tàǎntàn.