Read Western Krahn Nu̍-dɛ̍ᵻ 6 Bible Online

Nu̍-dɛ̍ᵻ 6 - Western Krahn bible

Nu̍-dɛ̍ᵻ 6

¹Dǒ ti̍ laa̍ di̍i̍ nɛ̀ Jusu-a kòà-a gbǎ la̍ kɛ̍n kaa̍. Doǒ bo Juu juh-a nu̍-a Klii gblɛ̍n-ɛ ke Juu chɛ̀ɛ̌chɛ̀ sà-ɛ wɔ̍ɔ̍n i̍. Juh-a nu̍-a Klii gblɛ̍n-ɛ u̍h la̍ Juu chɛ̀ɛ̌chɛ̀-a bla̍ u̍h-a tèwànynɔ̌gbaɔᵻ jlǐhɛ̍ dlǔ dǒ dɛ̍ gblè la̍ te̍e̍.

²Iě Jusu-a gba̍tòà-a pùè jɔ̌ sɔɔ̌n laa̍, wɛ̀ u̍h gbòe ɔ̍ kòà kli̍hgbɛ̍ i̍. U̍h la̍a̍, “Ɛ̍ se̍ i̍ blaɛ Nyɔsoa-a wlu̍ bla̍ dbo̍ iě i̍ tǎli-ɛ, wɛ̀ à iě di̍-dɛ̍ᵻ gblè dbo̍ nu̍.

³Ɛ̍ tìh-ɛ, de̍di̍i̍ᵻ, mɔ̀ tba̍ nyɔ̍ chɛ̀ mɛ̀sɔɔ̌n chèɛ̀ dě mɔ̀ nynɛ̌ ùh Nyɔsoa-a Sùù jǐi-a i̍ wɛ̀ u̍h blě-a flɔ̍nwlùh-ɛ. Nɛ̀ dě u̍h kwa̍a̍ bo à mu̍ dɛ̍ gblè dbo̍ la po̍.

⁴Wɛ̀ àɔ̀ nɔ̀ɔ̍ à iě ba̍le-ɛ ke Nyɔsoa-a wlu̍ bla̍ dbo̍ we̍ fòè.”

⁵Sɔ u̍h-a slɛ̌ laa̍ ɛ̍ po̍ nyɔ̍ kli̍hgbɛ̍ laa̍ gbǐh. Wɛ̀ u̍h tba̍ Slifɛn chèɛ̀, ɔ̀ wlùh gbaɛ-ɛ ke Nyɔsoa-a Sùù jǐ-a dě ku̍u̍-ɛ. Ɛ̍ ke Felɔ ke, Plokɔwlɔ ke, Nekeinɔ ke, Taimɔ ke, Pamɛnɔ ke Nikola ɔ̀ sɔ-a dǒ Antiɔ wlɔ̀ di̍i̍ iě ɔ̍ gbǎ-a ka Juu nyɔ̍-a dɛ-ɛ ke.

⁶U̍h-u bo u̍h sà kwlǎ dě gba̍tòà we̍, wɛ̀ u̍h tè u̍h sɔ̍n dlǔ iě u̍h ba̍le dǒ u̍h-a tàà.

⁷Sɔ Nyɔsoa-a wlu̍ sɛ̍ i̍, wɛ̀ Jusu-a kòà nɛ-a dǒ Juluslɛn wlɔ̀-ɛ, iě u̍h gboǎɛ kɛ̍n i̍ dɛ̍blɔ. Wɛ̀ Nyɔsoa-a slaǎ sà nyɔ̍ dɔu gbaɛ Jusu wlùh.

⁸Sɔ Slifɛn bo ɔ̀ nu̍ nyɔ̍ Nyɔsoa nyǐ nya̍ pàɛ̀n pɔ̀ìě. Wɛ̀ ɔ̍ blě gbǐh dǒ nyɔ̍ wɔ̍n flɔn-ɛ dɛ̍ᵻ ke jbaɛdih po̍-ɛ we̍ dě nyɔ̍gbei nynɛ̌.

⁹Jɛ wɛɛ sà gbò u̍h-a dǎɛ-a de̍e̍ i̍ flɔn nyɔ̍-a wɛɛ sà gbò-ɛ, nyɔ̍ ùh sɔ-a dě ɛ̍ sɔ̀n-ɛ, ɛ̍ bo ɛ̀ nu̍-a Juu nyɔ̍ ùh sɔ-a dǒ Saiwlein ke Ɛlesandlea wlɔ̀ di̍i̍. Ɛ̍ ke juh sɔ-a dǒ Selesia ke Esea bloa̍ kɛ̍n-ɛ, u̍hɔ̍ɔ̍ bo ùh-a tòlo Slifɛn we̍.

¹⁰Jɛ Nyɔsoa-a Sùù nyǐ ɔ̍ flɔ̍nwlùh, sɔ nɛ̀ pò ɔ̍ wlu-ɛ, nɛ̀ u̍h se̍ ɔ̍ wlu̍ de̍ sà-a bɛ̌ɛ.

¹¹Ɛ̍ kɔn u̍h pa̍ nyɔ̍ sɔ̀n i̍ u̍h iě ka dǎ, “À wɔ̌n Slifɛn-a wlu̍, nɛ̀ ɔ̍ bla̍ wlu̍ sɔ̀nᵻ dǒ Mose ke Nyɔsoa pùn.”

¹²Sɔ ɛ̍ wa̍ nyɔ̍ kli̍hgbɛ̍ ke, nyɔ̍ klaaᵻ ke telě nǎ poe nyɔ̍-a dlǔ. Iě u̍h mu̍ wɛ̀ u̍h gbɛ̍n Slifɛn. Wɛ̀ u̍h gba̍ ɔ̍ dě taɔ pa̍ nyɔ̍ jǔ.

¹³Wɛ̀ u̍h ja nyɔ̍ u̍h iě ɔ̍ si̍h i̍ tmɔ̌-ɛ, u̍h la̍a̍, “Jɔ̍gbau la, à Nyɔsoa-a slaǎ sà gbò bo ɔ̍ po̍ wlu̍ pùn i̍ ma̍u̍ sǔh, ɛ̍ ke à telě ke.

¹⁴Ɔ̍ wlu la̍ Jusu la ɔ̀ sɔ-a dǒ Naaslɔɛ wlɔ̀ di̍i̍-ɛ, ɔ̍ mu̍ slaǎ sà gbò la wlǎ, iě à tǐwai dɛ̍ᵻ ìh Mose toe àɔ̀-ɛ, wɛ̀ ɔ̍ iě i̍h i̍ bǐi.”

¹⁵Sɔ taɔ pa̍ nyɔ̍ kli̍hgbɛ̍ u̍h-a jlǐh nɛ klɛ̀ìn dě Slifɛn ja̍. Jɛ nɛ̀ ɔ̍ jua̍a̍ wɔ̀ Nyɔsoa-a ǐnchɔ̀-a jua̍a̍.