Read Western Krahn Wloma 1 Bible Online

Wloma 1 - Western Krahn bible

Wloma 1

¹Mɔ̍ Pɔɔ ɔ̀ nu̍-a Jusu Klai-a pòi̍ju-ɛ, nɔ̌ ǐn we̍ bo chlǐh-dɛ̍ la ɛ̍ sɔ-ɔ. Nyɔsoa dǎ m iě gba̍tòà nu̍, wɛ̀ ɔ̍ tè-e ǐn pɔ̌ iě pɔ̀n chɛ̀ sɔ-a dě ɔ̍ we̍-ɛ bla̍.

²Pɔ̀n chɛ̀ la Nyɔsoa po̍ ɛ̍ wlu̍ tɔ̀ma̍a̍ tɛin se̍e̍ dě ɔ̍ tu̍owli po̍ nyɔ̍ ja̍a̍, iě u̍h chlǐh ɛ̍ dě ɔ̍ wlu̍ di̍i̍.

³Ɛ̍ tba̍ dǒ ɔ̍ Jǔ ɔ̀ nu̍-a à Joi Jusu Klai-ɛ pùn i̍, ɔ̀ nu̍-a Depe-a tloemlai dě nyi̍ɔ̍ku di̍i̍-ɛ.

⁴Ti̍ Klai mɛ̌-aɛ, Nyɔsoa-a Sùù flɔn-ɛ ɛ̍ we̍i̍ ka ɔ̍ wlǔh-ae wɛ̀ ɔ̍ nu̍-a Nyɔsoa-a Jǔ ɔ̍ blě-a gbǐh-ɛ.

⁵Dě ɔ̍ ja̍a̍ bo à jii wɛ̀ Nyɔsoa-a blɛ nɛ-ɛ nui àɔ̀ ɔ̍ gba̍tòà we̍i̍. Ɔ̍ nynɛ̌-a i̍ bɛ̌-ɛ tìh bo ɔ̍ dbo̍ àɔ̀ dě kmɔ̌ nyɔ̍ kli̍hgbɛ̍ we̍, wɛ̀ u̍h iě ɔ̍ wlùh gbaɛ u̍h iě ɔ̍ wlu̍ nu̍.

⁶Mɔ̀ɔ̍ ùh nɛ-a dǒ Wlom wlɔ̀ di̍i̍-ɛ, mɔ̀ dǎ-ɛɛ ke mɔ̀ iě Jusu Klai-a nyɔ̍ nu̍.

⁷Chlǐh-dɛ̍ la ɛ̍ ji̍ mɔ̀ɔ̍ Nyɔsoa-a tìh kma nyɔ̍ kli̍hgbɛ̍ nɛ-a dǒ Wlom wlɔ̀ di̍i̍-ɛ we̍, mɔ̀ɔ̍ ɔ̍ dǎ-a mɔ̀ iě-a ɔ̍ chɛ̀-a nyɔ̍ nu̍-ɛ. Ǎn sà nǐ wɔ̍n, à Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

⁸Sàǐtòò-ɛ, ǐn po̍ ǎn Nyɔsoa tlɔ̌ dě Jusu Klai ja̍a̍ dǒ mɔ̀ kli̍hgbɛ̍ we̍. Dɛ̍nu̍ɛ, mɔ̀-a wlùh gbaɛ blě pɔ̀n wɔ̀ kmɔ̌ kli̍hgbɛ̍ la dlǔ.

⁹Nyɔsoa ɔ̀ ǎn dbee-a jǔ dǒ ǎn wlùh kli̍hgbɛ̍ we̍ wɛ̀ ǎn bla̍-a pɔ̀n chɛ̀ ɛ̀ kɔ̍-a dǒ ɔ̍ Jǔ pùn i̍-ɛ, ɔ̍-ɔ bo ɔ̀ nu̍ ǎn sàànsi̍i̍h ka ǎn ba̍le-a dǒ mɔ̀-a tàà ti̍ kli̍hgbɛ̍ we̍-ɛ.

¹⁰Ǎn tèle Nyɔsoa i̍ ɔ̍ wlùh iě ɛ̍ kɛ̍n i̍ wɔ̌ɛn ǎn wìè iě pɔ̀ni, wɛ̀ iě dě mɔ̀ we̍ i̍ nala ji̍ suei̍.

¹¹Mɔ̀-a jě-e tɔ̌n-a nu̍ m, wɛ̀ iě mɔ̀ Nyɔsoa-a Sùù-a nyǐ-dɛ̍ jii̍ gblè, wɛ̀ ɛ̍ iě mɔ̀-a wlùh fùka.

¹²Dɛ̍ ǎn dǎ-aɛ, ɛ̍ nu̍ pò ǐn ji̍ dě mɔ̀ we̍-ɛ, wɛ̀ à iě wlùh we̍ fùka-ɛ dě à wlùh gbaɛ blě-ɛ di̍i̍.

¹³Ǐn de̍di̍i̍ᵻ, ǎn pɔ̀n mɔ̀ iě ɛ̍ juo ka ǎn chɛ̍n-a di̍i̍chì te̍e̍ iě-a dě mɔ̀ we̍ ji̍-ɛ. Ǐn ji̍-ɛ, wɛ̀ iě nyɔ̍ kmɔ̌ sà dě mɔ̀ nynɛ̌, ɛ̀ kɔn ba̍ ǐn nu̍-a dě mɔ̀ ba̍ᵻ duuh ùh se̍-a Juu nyɔ̍-ɛ nynɛ̌-ɛ. Jɛ nɛ̀ dɛ̍ᵻ diih-a sà ǐn wìè-i.

¹⁴Dɛ̍nu̍ɛ, dɛ̍ jlǐh juo nyɔ̍ ke juh se̍-a dɛ̍ jlǐh juo-ɛ ke, flɔ̍nwlùh blě nyɔ̍ ke juh se̍-a flɔ̍nwlùh blě-ɛ, ǐn nɛ dǒ u̍h-a tɔ̀ma̍a̍.

¹⁵Ɛ̍ kɔn mɔ̀ɔ̍ nɛ-a dě Wlom wlɔ̀ di̍i̍-ɛ, ǎn wlùh-a nu̍ jàjà iě pɔ̀n chɛ̀ la bla̍ ke dě mɔ̀ we̍.

¹⁶Ǐn se̍ Nyɔsoa-a pɔ̀n chɛ̀-a tɛ̀n ple̍, dɛ̍nu̍ɛ, ɛ̍ bo ɛ̀ nu̍ ɔ̍ gbǐh ɛ̀ iě wlùh gbaɛ blě nyɔ̍ kli̍hgbɛ̍ sèìe. Juu nyɔ̍ bo ɛ̍ mu̍ pùn nɛ sàǐtòò, wɛ̀ ɛ̍ iě juh se̍-a Juu nyɔ̍-ɛ jɛɛ-ɛ dǔ ke.

¹⁷Dɛ̍nu̍ɛ, dě pɔ̀n chɛ̀ di̍i̍ bo Nyɔsoa slè-e àɔ̀ i̍ slɛ̌-nyɔ̍ wɛ̀ dě wlùh gbaɛ di̍i̍. Nyɔ̍ kli̍hgbɛ̍ ùh blě-a wlùh gbaɛ-ɛ bo ùh slɛ̌ i̍. Kǎ ɛ̍ dǎ dě Nyɔsoa-a wlu̍ di̍i̍, ɛ̍ la̍a̍, “Wlùh gbaɛ bo ɛ̀ mu̍ i̍ slɛ̌-nyɔ̍ kmɔ̌ nɛ-ɛ.”

¹⁸Nyɔsoa-a jlu̍h sɔ dě ja̍i̍wlɔ̀ wɛ̀ ɛ̍ wlǔh tà nɔ̌ sɔ̀n dǒ se̍ Nyɔsoa dɛ-ɛ nɛ nyɔ̍ ke kà kɔn nyɔ̍ we̍. U̍h-a kà kɔn-ɛ nu̍ ɛ̍ wɛ̀ nyɔ̍-ɔ juo tìh-a taǐn.

¹⁹Nyɔsoa gbǎ jlu̍h-u, dɛ̍nu̍ɛ, dɛ̍ ɛ̀ nyɔ̍ iě-a juo dǒ ɔ̍ dɛ we̍-ɛ, ɛ̍ flɔn we̍i̍ dě u̍h we̍. Nyɔsoa bo ɔ̀ flɔn-ɛ ɛ̍ we̍i̍ dě u̍h we̍.

²⁰Ɛ̀ sɔ-a dě kmɔ̌-a gbɔ̀ tè la̍-ɛ, Nyɔsoa-a nɛka ɛ̀ nyɔ̍-ɔ jě-aɛ, ɔ̍ gbǐh ìh se̍-a siee la̍ kɔn-ɛ ke ka ɔ̍ nu̍-a tìh-a taǐn Nyɔsoa-a, dě dɛ̍ᵻ ɔ̍ nu̍-a di̍i̍ bo nyɔ̍-a jě-e i̍h te̍gbe̍i̍n. Sɔ nɛ̀ nyɔ̍ se̍-o i̍ pɔ̀.

²¹U̍h juo Nyɔsoa-a tìh, jɛ u̍h-u tè ɔ̍ ja̍, iě u̍h wɔ̍-ɔ po̍ ɔ̍ tlɔ̌ ke. U̍h boe, u̍h-a wlùh gbe kɛ̍n i̍, iě u̍h-a wlùh i̍ naɛ dɛ̍ᵻ se̍ dɛ̍kɛ̍n gbǎ.

²²U̍h la̍ u̍h flɔn di̍i̍ i̍ tìh u̍h-a wlu̍, jɛ u̍h boe.

²³Nyɔsoa ɔ̀ se̍-a mɛ̌ la̍ kɔn-ɛ, ɔ̍ wɛɛ sà-a bo u̍h-a dǔ-u u̍h-a gba̍ dǒ dɛ̍ᵻ ìh mɛ̍-ɛa we̍. I̍h-a diih wɔ̀ nyi̍ɔ̍ fɔɔ, iě diih wɔ̀ na̍wɛ̍ᵻ, wɛ̀ diih wɔ̀ nmi̍i̍ chɛ̀ ke pɛ̀lɛ̌ naɛ nmi̍i̍.

²⁴Ɛ̍ kɔn Nyɔsoa tǎli u̍h i̍ iě u̍h-a nu̍ sììjii̍ gblɛ̍n u̍h-a wlùh-a pɔ̀n-a nu̍-ɛ i̍-ɛ. U̍h-a sǔh-a nu̍-dɛ̍ᵻá sà u̍h-a chɛ̀-a nyi̍ɔ̍tu fau kɛ̍n.

²⁵Tìh-a taǐn ɛ̀ kɔ̍-a dǒ Nyɔsoa dɛ pùn i̍-ɛ bo u̍h-a nu̍ si̍h we̍i̍. U̍h-a sà dɛ̍ᵻ ìh Nyɔsoa nu̍-a wɛɛ, iě u̍h-a si̍e̍-o ɔ̍ i̍, ɔ̍ jɔ nu̍-a dɛ̍ᵻ kli̍hgbɛ̍-a chɛ̀-ɛ. Ɔ̍ bo ɔ̀ kɔn nynɛ̌ iě i̍ bɛ̌ ma̍u̍. Kǎ ɛ̍-ɛ nɛ.

²⁶Ɛ̍ bo ɛ̀ nu̍ ɛ̍ wɛ̀ Nyɔsoa tǎli u̍h i̍, iě u̍h-a chɛ̀-a wlùh dɛ̍ᵻá sà u̍h fau kɛ̍n. Ɛ̍ tìh u̍h-a nynɔ̌gbaɔᵻá pɛ̌n nynɔ̌gbaɔᵻ we̍, u̍h-a nu̍ u̍h-a chɛ̀ se̍i̍kɔɛn pùn i̍.

²⁷Kǎ jɔ̍gbauᵻá nu̍ ke, u̍h tǎli nynɔ̌gbaɔᵻ nɔ̀ɔ̍ i̍, wɛ̀ u̍h-a pɛ̌n u̍h ba̍ᵻ jɔ̍gbauᵻ we̍, iě u̍h-a sǔh-a nu̍ se̍i̍kɔɛn. Dɛ̍ᵻ ìh se̍-a nu̍ ka̍ nɛ-ɛ bo u̍h-a nu̍ dǒ u̍h ba̍ᵻ pùn. Ɛ̍ tìh-ɛ, gblɛ̍n sɔ̀ɛ̀n la u̍h nu̍-aɛ, ɛ̍ kɔn u̍h ja u̍h-a chɛ̀ kàn gbɛ̍n-ɛ ɛ̀ ke i̍h blaɛ i̍-ɛ we̍.

²⁸Ka u̍h se̍-a Nyɔsoa-a tìh-a taǐn-a tìh i̍ wɔ̌ɛn-ɛ, ɛ̍ kɔn ɔ̍ tǎli u̍h i̍ wɛ̀ u̍h wɔ̀ dǒ u̍h-a tba̍ɛ kɛ̍n i̍ nu̍ wlùh de̍e̍, iě u̍h-a nu̍ se̍i̍kɔɛn.

²⁹Kà gblɛ̍n bo ɛ̀ jǐ dě u̍h di̍i̍. U̍h-a nu̍ dɛ̍ᵻ sɔ̀nᵻ u̍h kɔn klǎn, iě gblɛ̍n-ɛ nyni-ɛa po̍ u̍h gbǐh. U̍h kɔn wlɛ̀n, u̍h-a poe nyɔ̍ gbe̍ja̍a̍, iě u̍h blě chɛ̀-ɛ. U̍h kɔn gblàa̍, iě u̍h-a naɛ dɛ̍ sɔ̀n nu̍-ɛ wlùh i̍ dǒ nyɔ̍ duuh we̍, wɛ̀ u̍h-a chɛ̍n nyɔ̍.

³⁰U̍h nyni nyɔ̍-a wlu̍ wɔ̍i̍n. U̍h faɛn Nyɔsoa, iě u̍h-u jě nyɔ̍ dɛɛ, u̍h-a blɔ̌-ɛ, u̍h-a po̍ wɔ̍i̍n. U̍h-a chɛ̍n dɛ̍ sɔ̀n nu̍-ɛa di̍i̍chì, iě u̍h-a blaɛ u̍h de̍ bei wɔ̍n.

³¹U̍h bo we̍i̍, u̍h-u gbɛ̍n wlu̍ kɛ̍n i̍, u̍h se̍ wɔɛ kɔn, iě u̍h se̍ nyɔ̍-a ti̍ blě.

³²U̍h juo Nyɔsoa-a telě ke kleǐn ka nyɔ̍ ùh-a nu̍-a ìh kaɛn la-a, nɛ̀ u̍h kɔn u̍h iě mɛ̌. U̍h-u gba̍ ìh la nu̍-ɛ nɛ due dluwe̍ i̍, jɛ nyɔ̍ duuh ùh-a nu̍-a ìh la ke-ɛ u̍h-a wɔ̌ɛn u̍h-a tìh i̍.