Read Western Krahn Wloma 11 Bible Online

Wloma 11 - Western Krahn bible

Wloma 11

¹Ǎn tèle tìh i̍ o, nɛ̀ Nyɔsoa bɔ̌ ɔ̍ chɛ̀-a nyɔ̍ wɛ̀ ae? Iěe tììh. Mɔ̍ la mɔ̍ Eslɔɛ jǔ, mɔ̍ Eblaɛɛn-a tloemlai, iě ǐn sɔ dě Bɛnyima-a chɛǐ.

²Nyɔsoa-a nyɔ̍ ùh ɔ̍ tba̍-a chèɛ̀ se̍e̍-ɛ, u̍h bo ɔ̍ iě bɔ̌ ae? Ɛ̍ bo Nyɔsoa-a wlu̍ sà-a dǒ Ilaɛja pùn. Ka ɔ̍ nu̍-a Eslɔɛ nyɔ̍ kunǎ i̍ poe-ɛ dě Nyɔsoa we̍-ɛ, mɔ̀-ɔ se̍-a i̍h wɔ̌n ae? Ɔ̍ la̍a̍,

³“Joi, u̍h dbǎ àn tu̍owli po̍ nyɔ̍ wɛ̀, iě u̍h waɛ àn slaǎ sà-ɛ gblǒᵻ i̍. Ǐn nɛ due bo ɔ̀ sie ka-o, iě u̍h-a pɔ̀n ka ǐn dbǎ-a i̍ dɛ ke.”

⁴Jɛ Nyɔsoa sà ɔ̍ wlu̍ pɔ̀n we̍, ɔ̍ la̍a̍, “U̍h-a si̍h nyɔsoa u̍h-a dǎɛ-a Beo-ɛ, nyɔ̍-a wlǔ mɛ̀sɔɔ̌n (7,000) ùh se̍-a dǒ ɛ̍ jǔ i̍ chlìi-ɛ, u̍h bo ǐn tè tɛ̌n dǒ ǎn chɛ̀ we̍.”

⁵Kǎ ɛ̍ nɛ ke kaka, Nyɔsoa-a blɛ nɛ-ɛ bo ɛ̀ nu̍ ɛ̍ iě ɔ̍ tba̍ nyɔ̍ jɔ̌ wei la chèɛ̀.

⁶Ɔ̍ u̍h-a chèɛ̀ tba̍-a kɔ̍ dǒ blɛ kɛ̍n i̍, ɛ̍ se̍ u̍h-a nu̍-dɛ̍-a tìh. Jɛ pò ɛ̍ tù u̍h-a nu̍-dɛ̍-a tìh de-ɛ, nɛ̀ ɛ̍ se̍ dǒ blɛ nɛ-ɛ kɛ̍n i̍ kɔ̍.

⁷Nɛ̀ kaka la̍, dɛ̍ Eslɔɛ nyɔ̍-a pɔ̀n-a i̍-ɛ, u̍h se̍ ɛ̍ jě. Jɛ ùh Nyɔsoa tba̍-a chèɛ̀-ɛ bo ùh jě ɛ̍. Juh sie-aoɛ, u̍h ku̍ dlǔ.

⁸Ɛ̍ kɔn Nyɔsoa-a wlu̍ la̍a̍, “Nyɔsoa nu̍ ɛ̍ iě u̍h slù ka sèàn tàǎntàn. Ɔ̍ gbe-e dě u̍h jlǐh, iě ɔ̍ ka̍n u̍h-a dounᵻ.”

⁹Iě Depe la̍a̍, “U̍h-a chɛ̀-a dɛ̍ kɛ̍n di̍-i teble̍-a mu̍ plu̍h nu̍ ɛ̍ iě u̍h gbɛ̍n. Ɛ̍ mu̍ sòò nu̍ u̍h iě ɛ̍ gbèle, u̍h iě i̍ kà wɛ̀ u̍h iě kàn gbɛ̍n-ɛ.

¹⁰Bɔ̌ dě u̍h jlǐh iě-e gbe, u̍h-u je̍e i̍ jě. Wě bo ɛ̀ iě u̍h-a mlǎ tǐh blǔ la̍ gba̍ ma̍u̍ sǔh.”

¹¹Ǎn tèle tìh i̍ dɛ o, ɛ̀ Juu nyɔ̍ gbèle-a ka-ɛ, nɛ̀ u̍h kà i̍ wɛ̀ kleǐnklein ae? Iěe tììh. Jɛ u̍h-a gblɛ̍n sɔ̀ɛ̀n nu̍ ɛ̍ wɛ̀ pǔh-ɛ ji̍ ùh se̍-a Juu nyɔ̍-ɛ we̍, ɛ̍ iě Juu nyɔ̍ wlɛ̀n di̍i̍ po̍.

¹²U̍h-a gblɛ̍n sɔ̀ɛ̀n nu̍ ɛ̍ wɛ̀ Nyɔsoa-a pɔ̀ìě-a pàn-ɛ ka nya̍ da̍a kmɔ̌ we̍, iě u̍h-a klà sà-a nyǐ ùh se̍-a Juu nyɔ̍-ɛ pɔ̀ìě dɔu. Jɛ nɛ̀ à ji̍ pɔ̀ìě kmɔ̌-a mu̍-a jě-ɛ jě pò Juu nyɔ̍ ùh Nyɔsoa-a mu̍-a chèɛ̀ tba̍-a kɔn dǒ ɔ̍ we̍-ɛ.

¹³Kaka la̍, mɔ̀ɔ̍ ùh se̍-a Juu nyɔ̍-ɛ, dě mɔ̀ we̍ bo ǎn wlu. Ka jɛ ǐn nu̍-a Klai-a gba̍tòà dǒ mɔ̀ we̍-ɛ, sɔ nɛ̀ dbo̍-a chɛ̀ kɔn tìh bo ǎn po̍ tlɔ̌.

¹⁴Nyɔ̍-se̍-juo ɛ̍ bo ɛ̀ mu̍ ǐn blǐ nyɔ̍ wlɛ̀n di̍i̍ po̍ wɛ̀ Nyɔsoa iě u̍h-a duuh pǔh-i.

¹⁵U̍h-a chla tba̍-a ja kɛ̍n i̍ gbe̍ɛ̍ɛn dǒ Nyɔsoa ke kmɔ̌ nyɔ̍ nynɛ̌ we̍. Jɛ ti̍ Nyɔsoa-a mu̍-a u̍h-a tìh i̍ gbɛ̍n-ɛ, nɛ̀ ɛ̍ mu̍ mɛ̌-nyɔ̍-a dě-e wlǔh-ɛ wɔ̀.

¹⁶Pò sàǐtòò blèe̍ fɔ̌ nyǐ-ɛ Nyɔsoa-ɛ, nɛ̀ blèe̍ gba̍n gbàǐ-a chɛ̀ kɔn dǒ ɔ̍ we̍ wɛ̀. Nɛ̀ pò tu̍-a sɛ̌n nyǐ-ɛ Nyɔsoa-ɛ, nɛ̀ ɛ̍ bu̍hᵻ kɔn dǒ ɔ̍ we̍ wɛ̀ ke.

¹⁷Ɔle-tu̍ u̍h tù-a dě klè-ɛ, pò ɛ̍ chɛ̍n bu̍hᵻ ja̍-ɛ, nɛ̀ u̍h poe i̍h wɔ̀ɔ̀ dǒ kwlǎ ɔle-a bu̍hᵻ we̍. Nɛ̀ kwlǎ ɔle bu̍h-a mu̍ buǒᵻ chɛ̀ po̍-ɛ bɛ̌ɛ, dɛ̍nu̍ɛ, ɛ̍ ke ɔle-tu̍ chɛ̀ tùi i̍ wɛ̀. Kǎ ɛ̍ nu̍ mɔ̀ɔ̍ ùh se̍-a Juu nyɔ̍-ɛ dɛ̍kɛ̍n po̍-ɛ ke dě Juu nyɔ̍ ja̍a̍.

¹⁸Ɛ̍ tìh-ɛ, mɔ̀ bɔ̌ mɔ̀-a chɛ̀ i̍ bɛ̌-ɛ dǒ ɔle-tu̍ chɛ̀-a bu̍hᵻ we̍. Mɔ̀ bɔ̌ mǎle-ɛ, mɔ̀ se̍ tu̍-a sɛ̌n nɔ̀ɔ̍ i̍ gbɛ̍n, i̍h bo ìh gbɛ̍n mɔ̀ i̍.

¹⁹Mɔ̀ɔ̍ nɔ̀ɔ̍, kǎ mɔ̀-a mu̍ ka dǎ, “À iě dǒ ɔle-tu̍ chɛ̀-a bu̍hᵻ wɔ̀ɔ̀ gbǎ-ɛ dɛbo ɛ̍ kɔn i̍h chɛn-o.”

²⁰Tìh-a taǐn bo, kǎ ɛ̍ nɛ. Juu nyɔ̍ ùh nu̍-a ɔle-tu̍ chɛ̀-a bu̍hᵻɛ́, u̍h se̍ wlùh gbaɛ blě ɛ̍ kɔn u̍h chɛn-o, wɛ̀ mɔ̀-a wlùh gbaɛ jě-e mɔ̀ nyna la̍. Nɛ̀ mɔ̀ bɔ̌ mɔ̀-a chɛ̀ i̍ bɛ̌-ɛ, jɛ nɛ̀ mɔ̀ gbǎ faɔn.

²¹Tu̍-a chɛ̀-ɛ gbǎ-a bu̍hᵻ bo Nyɔsoa chɛ̍n i̍, jɛ nɛ̀ mɔ̀ɔ̍ bo ɔ̍ se̍ i̍ chɛ̍n-ɛ bɛ̌ɛ ke ae?

²²Mɔ̀-a jě ka Nyɔsoa nu̍-a gblɛ̍n-ɛ nmɔ-ɛ wɛ̀ ɔ̍ kma-a wɔ̍n ke-ɛ. Ɔ̍ kma wɔ̍n dǒ nyɔ̍ ùh-a nu̍-a gblɛ̍n sɔ̀ɛ̀n-ɛ we̍. Jɛ mɔ̀ɔ̍ nɔ̀ɔ̍, ɔ̍ nmɔ-ɛ mɔ̀ gblɛ̍n kɛ̍n i̍, pò mɔ̀ ja ɔ̍ wlì tè-ɛ dluwe̍ i̍ gba̍-ɛ. Jɛ pò ɛ̍ se̍ la̍a̍n nɛ-ɛ, nɛ̀ mɔ̀-a mu̍-o chɛn ke o.

²³Nɛ̀ pò Juu nyɔ̍ blě wlùh gbaɛ dɛ-ɛ, nɛ̀ tà u̍h sɔ-aɛ, u̍h-a mu̍-o de̍ gbǎ. Dɛ̍nu̍ɛ, Nyɔsoa blě gbǐh ɔ̍ iě u̍h dǒ de̍ po̍.

²⁴Mɔ̀ɔ̍ ùh se̍-a Juu nyɔ̍-ɛ mɔ̀ɔ̍ juh nu̍-a kwlǎ ɔle-a bu̍h-ɛ, mɔ̀ɔ̍ bo Nyɔsoa chɛ̍n wɛ̀ ɔ̍ nu̍ mɔ̀ dɛ̍ ɛ̀ se̍-a kɔn ɛ̀ iě-a nɛ-ɛ we̍i̍. Ɔ̍ poe mɔ̀ dǒ Juu nyɔ̍ juh nu̍-a tù-u ɔle chɛ̀-a bu̍h-ɛ wɔ̀ɔ̀. Jɛ sa̍nblɛ Juu nyɔ̍ juh nu̍-a tù-u ɔle-a bu̍hᵻɛ́, u̍hɔ̍ɔ̍ bo ɔ̍ se̍ dǒ u̍h-a chɛ̀-a tu̍ pùn po̍-ɛ bɛ̌ɛ mu̍ dode̍ ae?

²⁵Ǐn de̍di̍i̍ᵻ, mɔ̀ bɔ̌ ka nu̍ mɔ̀ blě flɔ̍nwlùh kli̍hgbɛ̍ wɛ̀. Ǎn pɔ̀n mɔ̀ iě tìh-a taǐn ɛ̀ sìle-a juo. Ɛ̍ se̍ Eslɔɛ nyɔ̍ kli̍hgbɛ̍ ùh se̍ dlǔ ku̍. Jɛ kǎ ɛ̍ mu̍ nɛ ke̍ te̍e̍ wɛ̀ ùh se̍-a Juu nyɔ̍ ùh Nyɔsoa tba̍-a chèɛ̀-ɛ, wɛ̀ u̍h iě ɔ̍ we̍ ji̍.

²⁶Nɛ̀ kǎ Nyɔsoa-a mu̍ ka Eslɔɛ nyɔ̍ kli̍hgbɛ̍ sèìe-ɛ nu̍. Ɛ̍ kɔn ɛ̍ chlǐh-wlu̍ la̍a̍, “Nyɔ̍ Sèìe Nyɔ̍-a mu̍ dǒ Saiɛn Tlu̍h kɛ̍n sɔ, wɛ̀ ɔ̍ iě Jekɔ-a nynuu̍ dě se̍ Nyɔsoa dɛ-ɛ nɛ dɛ̍ di̍i̍ sà.

²⁷Nɛ̀ ǎn mu̍ u̍h-a gblɛ̍n sɔ̀ɛ̀n-a tìh i̍ tǎli. Ɛ̍ bo ɛ̀ nu̍ ku̍o̍ ǐn po̍ dǒ u̍h we̍.”

²⁸Pɔ̀n chɛ̀ Juu nyɔ̍ tba̍-a chla-ɛ, ɛ̍ bo ɛ̀ nu̍ ɛ̍ iě u̍h nu̍ Nyɔsoa-a nyɛ̌-nyɔ̍ wɛ̀ ɛ̍ iě-o mɔ̀ dɛ̍ po̍. Jɛ ɛ̀ kɔ̍-a dǒ Nyɔsoa-a u̍h chèɛ̀ tba̍ dɛ̍ we̍-ɛ pùn i̍-ɛ, ɔ̍ po̍ wlu̍ tɔ̀ma̍a̍ dě u̍h baaᵻ we̍ ka ɔ̍ kma u̍h-a tìh-ɛ.

²⁹Nyɔsoa-a sàɛ̀ wlu̍ gbààn i̍ pò ɔ̍ tba̍ nyɔ̍ chèɛ̀, àe̍e̍ pò ɔ̍ nyǐ nyɔ̍ dɛ̍-ɛ.

³⁰Mɔ̀ɔ̍ ùh se̍-a Juu nyɔ̍-ɛ, mɔ̀ blaɛ Nyɔsoa wɔ̍n tɛin. Jɛ kaka la̍, Juu nyɔ̍-a ɔ̍ wɔ̍n blaɛ bo ɛ̀ nu̍ ɛ̍ wɛ̀ ɔ̍ jě mɔ̀ wɔɛ.

³¹Nyɔsoa-a mɔ̀ wɔɛ jě-ɛ bo ɛ̀ nu̍ ɛ̍ iě Juu nyɔ̍-a blaɛ ɔ̍ wɔ̍n kaka. U̍h-a ɔ̍ wɔ̍n blaɛ bo ɛ̀ nu̍ ɛ̍ wɛ̀ u̍h jě-ɛ wɔɛ ke.

³²Nyɔsoa nu̍ nyɔ̍ kli̍hgbɛ̍ gbɛ̍n-nyɔ̍ we̍i̍, dɛ̍nu̍ɛ, u̍h blaɛ ɔ̍ wɔ̍n. Ɔ̍ nu̍ ɛ̍-ɛ wɛ̀ ɔ̍ iě u̍h kli̍hgbɛ̍ wɔɛ jě.

³³Nyɔsoa-a wɔɛ kɔn-ɛ bɛ̌ i̍ kaa̍. Kǎ ɔ̍ flɔ̍nwlùh ke ɔ̍ tɔɔ nu̍ di̍i̍ tɛn-ɛ ke. Nyɔ̍ se̍ ɔ̍ tìh i̍ chɛ̍n-ɛ we̍ i̍ ju̍o̍e. Nyɔ̍ se̍ ɔ̍ wlùh juo-ɛ bɛ̌ɛ.

³⁴Ɛ̍ kɔn Nyɔsoa-a wlu̍ la̍a̍, “Nyɔ̍ bo ɔ̀ juo Joi-a wlùh ɛ? Nyɔ̍ bo ɔ̀ bɛ̌ɛ ɔ̍ slɛ̌n tù nyɔ̍ nu̍-ɛ ɛ?

³⁵Nyɔ̍we̍ bo ɔ̀ nyǐ ɔ̍ dɛ̍ wɛ̀ sàì wɛ̀ ɔ̍ iě ɛ̍ de̍ pɛ̌ɛ ɛ?”

³⁶Ɔ̍ bo ɔ̀ nu̍ dɛ̍ᵻ kli̍hgbɛ̍. Dě ɔ̍ ja̍a̍ bo i̍h nɛ. Ɔ̍ tìh bo i̍h nɛ kmɔ̌. Ɔ̍ bo tìh-a i̍ bɛ̌-ɛ kɔn dǒ we̍ nɔ̌ kmɔ̌-a kmɔ̌. Kǎ ɛ̍-ɛ nɛ.