Read Western Krahn Wloma 16 Bible Online

Wloma 16 - Western Krahn bible

Wloma 16

¹À de̍di̍i̍ nynɔ̌gbaɔ Fiibi ɔ̀ dbee-a chɔchi̍h nyɔ̍ nɛ-a dě Sɛnklia wlɔ̀ di̍i̍-ɛ jǔ-ɛ, ǎn po̍ ɔ̍ kɛ̍n wlu̍ dě mɔ̀ we̍.

²Mɔ̀ gbɛ̍n ɔ̍ tìh i̍ dǒ Joi-a nynɛ̌ kɛ̍n, kǎ Nyɔsoa nyɔ̍ kɔn u̍h iě nu̍. Nɛ̀ dɛ̍-o-dɛ̍ kli̍hgbɛ̍ ɔ̍ nɛ-a blě ka̍-ɛ, mɔ̀ gbǎ ɔ̍ we̍ ɔ̍ iě ɛ̍ jě. Dɛ̍nu̍ɛ, ɔ̍ dǔ nyɔ̍ dɔu we̍ gbǎ-a se̍e̍, ɛ̍ ke ǎn chɛ̀ ke.

³Mɔ̍ sà Plisela ke Akwela nyinɔ̍ i̍, ùh ke ǐn ke à nu̍-a dbo̍ tu̍ due dǒ Jusu Klai we̍-ɛ.

⁴U̍h tù ǎn tìh iě u̍h tè u̍h-a feɛ tɔ̀ma̍a̍. Ɛ̍ se̍ ǐn nɛ due ɔ̀ se̍ u̍h tlɔ̌ po̍, jɛ chɔchi̍h nyɔ̍ ùh se̍-a Juu nyɔ̍-ɛ, u̍h kli̍hgbɛ̍ bo ùh-a po̍ u̍h tlɔ̌ ke.

⁵Nyɔ̍ ùh-a tù-a chɔchi̍h dě u̍h blǐ gbò-ɛ, mɔ̍ sà u̍h nyinɔ̍ i̍. Mɔ̍ sà ǎn tìh kma nyɔ̍ Ɛpainitɔ nyinɔ̍ i̍. Ɔ̍ bo ɔ̀ nu̍ sàǐtòò nyɔ̍ ɔ̀ gbaɛ Klai wlùh dě Esea bloa̍ kɛ̍n.

⁶Mɛle ɔ̀ po̍-ae dbo̍ nu̍-ɛa gbǐh dǒ mɔ̀ we̍-ɛ, mɔ̍ sà ɔ̍ nyinɔ̍ i̍.

⁷Andloneka ke Chuniɔ ùh nu̍-a ǐn blǐ nynuu̍ ùh nu̍-a ǐn ba̍ᵻ gbɛ̍n-nyɔ̍ de̍-ɛ, mɔ̍ sà u̍h nyinɔ̍ i̍. Nyɔ̍ɔ juo u̍h-a nynɛ̌ dě Klai-a gba̍tòà nynɛ̌. Iě u̍h gbǎ dǒ Klai de̍e̍ sàì wɛ̀ ǐn dǔ ɔ̍ de̍e̍ gbǎ-a ke.

⁸Anpleata ɔ̀ nu̍-a ǎn tìh kma nyɔ̍ ɔ̀ ke Joi nɛ-a due-ɛ, mɔ̍ sà ɔ̍ nyinɔ̍ i̍.

⁹Ɔbanɔ ɔ̀ ke à nu̍-a dbo̍ tu̍ due dǒ Klai we̍-ɛ, mɔ̍ sà ɔ̍ nyinɔ̍ i̍. Mɔ̍ sà ǎn tìh kma nyɔ̍ Slake nyinɔ̍ i̍ ke.

¹⁰Nɛ̀ Apɛli ɔ̀ to-a ɛ̍ ka ɔ̍ gbɛ̍n-ɛa Klai dɛ sɔ̍nᵻ sɔɔ̌n i̍-ɛ, mɔ̍ sà ɔ̍ nyinɔ̍ i̍. Nɛ̀ mɔ̍ sà Awleslɔbulɔ-a chɛ̌ nyinɔ̍ i̍ ke.

¹¹Mɔ̍ sà ǐn blǐ jǔ Ɛlodiɔn nyinɔ̍ i̍. Nɛ̀ Nasese-a chɛ̌ ùh gbaɛ-a Joi Nyɔsoa wlùh-ɛ, mɔ̍ sà u̍h nyinɔ̍ i̍.

¹²Mɔ̍ sà Joi-a dbo̍ nu̍ nyɔ̍ Tlefina ke Tlefosa nyinɔ̍ i̍, ɛ̍ ke ǎn tìh kma nyɔ̍ Pɛse ɔ̀ po̍-ae gbǐh dǒ Joi-a dbo̍ we̍-ɛ ke.

¹³Wlufɔ ɔ̀ kɔn tìh Joi kma-aɛ, mɔ̍ sà ɔ̍ nyinɔ̍ i̍, ɛ̍ ke ɔ̍ de̍ ɔ̀ nu̍-a ka ǐn de̍ wɛ̀-ɛ ke.

¹⁴Asinkwletɔ ke, Flɛkɔn ke, Ɔmi ke, Patlɔba ke, Ɔmɔ ke à de̍di̍i̍ᵻ kli̍hgbɛ̍ nɛ-a dě u̍h we̍-ɛ, mɔ̍ sà u̍h nyinɔ̍ i̍.

¹⁵Felɔlɔkɔ ke, Julia ke, Nɛwliɔ ke, ɔ̍ de̍di̍i̍ nynɔ̌gbaɔ ke, Olinpa ke Nyɔsoa nyɔ̍ kli̍hgbɛ̍ nɛ-a dě u̍h we̍-ɛ, mɔ̍ sà u̍h nyinɔ̍ i̍.

¹⁶Mɔ̀ gblèè mɔ̀ ba̍ᵻ Nyɔsoa nyɔ̍ dǒ nyinɔ̍ i̍ sèàɛ̍ la̍. Klai-a chɔchi̍h nyɔ̍ kli̍hgbɛ̍ la̍ u̍h sà mɔ̀ nyinɔ̍ i̍ o.

¹⁷Ǐn de̍di̍i̍ᵻ, ǐn gbɛ̍n mɔ̀-a bu̍hᵻ i̍, nyɔ̍ ùh-a nui-a nyɔ̍ gblɛ̍n sɔ̀ɛ̀n wɛ̀ u̍h-a che̍ɛ̍ɛn-a nyɔ̍ i̍-ɛ, mɔ̀ nu̍ u̍h-a nɛnɛ̌ o. Ùh faɛn-a dɛ̍ ɛ̀ mɔ̀-a nǎ poe nyɔ̍ poe-a mɔ̀ nǎ-a, nɛ̀ mɔ̀ sà u̍h sɔ̍n-ɔ i̍.

¹⁸Dɛ̍nu̍ɛ, nyɔ̍ kaɛn laa̍ nɛ̀ u̍h se̍ Klai ɔ̀ nu̍-a à Joi-ɛ jǔ dbee, jɛ u̍h-a chɛ̀-a wlùh dɛ̍ᵻ bo u̍h-a nu̍. U̍h-a wɔ̍n nmɔ wlu̍ bo ɛ̀ boe nyɔ̍ ùh se̍-a dɛ̍ we̍ i̍ ju̍o̍e-ɛ i̍.

¹⁹Nyɔ̍ kli̍hgbɛ̍ wɔ̌n mɔ̀-a nynɛ̌ wɛ̀ ka mɔ̀ gbɛ̍n-ɛa pɔ̀n chɛ̀ sɔ̍nᵻ sɔɔ̌n i̍-ɛ, sɔ ɛ̍ po̍ ǐn mɔna̍-a kaa̍. Jɛ ǎn pɔ̀n mɔ̀ iě di̍i̍ i̍ flɔn dǒ dɛ̍ chɛ̀ we̍, wɛ̀ dě mɔ̀ di̍i̍ iě i̍ gbe dǒ dɛ̍ sɔ̀n we̍.

²⁰Nɛ̀ Nyɔsoa ɔ̀ nyǐ-a nyɔ̍ wlùh-a i̍ tè-ɛɛ, ɔ̍ mu̍ Setɔn keě wlǎ tiɔ tiɔ dě mɔ̀ bu̍h sɔ̀n. Ǎn sà nǐ wɔ̍n à Joi Jusu Klai-a blɛ iě dǒ mɔ̀ we̍ nɛ.

²¹Timote ɔ̀ ke ǐn ke à nu̍-a dbo̍ tu̍ due-ɛ, ɔ̍ la̍ ɔ̍ sà mɔ̀ nyinɔ̍ i̍. Nɛ̀ Lusiɔ ke, Jeesɛn ke, Sosepata ùh nu̍-a ǐn blǐ nynuu̍-ɛ, u̍h la̍ u̍h sà mɔ̀ nyinɔ̍ i̍ ke.

²²Mɔ̍ Tɛseɔ ɔ̀ chlǐh-a chlǐh-dɛ̍-a chɛ̀ la dǒ Pɔɔ we̍-ɛ, mɔ̍ sà mɔ̀ nyinɔ̍ i̍ ke. Mɔ̍ Joi wlùh gbaɛ nyɔ̍ ke.

²³Ǎn dihwi̍h baa Kaeɔ ɔ̀ kɔn blǐ gbò à pa̍-ɛa chɔchi̍h-ɛ, ɔ̍ la̍ ɔ̍ sà mɔ̀ nyinɔ̍ i̍. Nɛ̀ Iwlaslu ɔ̀ nu̍-a wlɔ̀-a wlǐ i̍ tè nyɔ̍-ɛ ke à de̍di̍i̍ Kwatɔ la̍ u̍h sà mɔ̀ nyinɔ̍ i̍ ke. [

²⁴Ǎn sà nǐ wɔ̍n à Joi Jusu Klai-a blɛ iě dǒ mɔ̀ kli̍hgbɛ̍ we̍ nɛ. Kǎ ɛ̍-ɛ nɛ.]

²⁵Mɔ̀ à bɛ̌-ɛ Nyɔsoa-a nynɛ̌ i̍. Ɔ̍ bo ɔ̀ bɛ̌ɛ mɔ̀-a wlùh gbaɛ i̍ kui-ɛ, kǎ pɔ̀n chɛ̀ ǎn bla̍-a dǒ Jusu Klai pùn-ɛ dǎ. Dɛ̍ ɛ̀ sìle-a dǒ ti̍ dɔu di̍i̍-ɛ, ɛ̍ toe-ɛ nyɔ̍ i̍ wɛ̀, kǎ ɛ̍ dǎ ke.

²⁶Kmɔ̌ sie Nyɔsoa po̍ ɔ̍ tu̍owli po̍ nyɔ̍ slǔh u̍h iě chlǐh dǒ sìle dɛ̍ la we̍. Ɛ̍ bo ɛ̀ sà-ɛ tà iě nyɔ̍ kli̍hgbɛ̍ juo i̍h, wɛ̀ u̍h iě ɔ̍ wlùh gbaɛ u̍h iě ɔ̍ wlu̍ nu̍.

²⁷Nyɔsoa due gbài̍ ɔ̀ blě-a flɔ̍nwlùh kli̍hgbɛ̍-ɛ, mɔ̀ bɛ̌-ɛ ɔ̍ nynɛ̌ i̍ nɔ̌ kmɔ̌-a kmɔ̌ dě Jusu Klai ja̍a̍. Kǎ ɛ̍-ɛ nɛ.