Read Western Krahn Wloma 7 Bible Online

Wloma 7 - Western Krahn bible

Wloma 7

¹Ǐn de̍di̍i̍ᵻ, mɔ̀ɔ̍ ùh juo-a telě-ɛ, dɛ̍ ǎn ji̍-a bla̍ la̍-ɛ, mɔ̀-a mu̍ ɛ̍ i̍ wɔ̌n. Ti̍ nyɔ̍ tè-a kmɔ̌ i̍-ɛ, dǒ telě-a nɛ-ɛ ɔ̍ kɛ̍n.

²Ɛ̍ blaiɛ̍ bo ke, pò nynɔ̌gbaɔ tǐn jla̍-ɛ, nɛ̀ telě nɛ ɔ̍ kɛ̍n dǒ ɔ̍ kɔan pùn. Jɛ pò ɔ̍ kɔan mɛ̌-ɛ, nɛ̀ telě sà ɔ̍ sɔ̍n kɛ̍n wɛ̀ dǒ ɔ̍ kɔan we̍.

³Nɛ̀ pò ɔ̍ kɔan tè kmɔ̌ i̍ wɛ̀ ɔ̍ iě nyɔ̍ dɔɔ dǔ-ɛ, nɛ̀ u̍h-a mu̍ ɔ̍ nynɛ̌à nu̍ nyɔ̍ dǎɛ. Jɛ pò ɔ̍ kɔan mɛ̌-ɛ, nɛ̀ ɔ̍ flɔn de̍e̍ i̍ wɛ̀ dǒ telě la we̍. Nɛ̀ pò ɔ̍ jɛ dǔ ka jɔ̍gbau dɔɔ-ɛ, nɛ̀ ɛ̍ se̍ nynɛ̌à ɔ̍ se̍ nu̍ dɛ.

⁴Ǐn de̍di̍i̍ᵻ, kǎ ɛ̍ nɛ ke dǒ mɔ̀ we̍. Mɔ̀ mɛ̌ wɛ̀ dǒ telě we̍, dɛ̍nu̍ɛ, mɔ̀ kɔn dǒ Klai we̍, ɔ̀ mɛ̌-a wɛ̀ ɔ̀ wlǔh-aeɛ, wɛ̀ à iě dɛ̍ᵻ chɛ̀ nu̍ wɛ̀ à iě Nyɔsoa jǔ dbee.

⁵Ti̍ à nɛ-a dě à gblɛ̍n sɔ̀ɛ̀n-a ku̍ di̍i̍-ɛ, iě telě nu̍ ɛ̍ wɛ̀ à nu̍ gblɛ̍n sɔ̀ɛ̀n-a wlùh dɛ̍ᵻ. Sɔ dɛ̍ᵻ à nu̍-aɛ, i̍h ja à mɛ̌ɛ we̍.

⁶Jɛ telě jɛ nu̍-a à gbɛ̍n-nyɔ̍ we̍i̍ de-ɛ, à mɛ̌ wɛ̀ dǒ ɛ̍ we̍ iě Nyɔsoa sà àɔ̀ dǒ ɛ̍ sɔ̍n wɛ̀. Sɔ nɛ̀ à se̍ dǒ telě soa nɔ̀ɔ̍ sɔ̀n nɛ dɛ, jɛ à dbee la̍ Nyɔsoa jǔ dě gblɛ̍n delee di̍i̍, dɛ̍nu̍ɛ, à jě ɔ̍ Sùù dɛ̍ɛ̍.

⁷Ka à iě ka dǎ ɛ? À iě ka nu̍ telě-a chɛ̀ bo ɛ̀ ja gblɛ̍n sɔ̀ɛ̀n ae? Iěe tììh. Jɛ telě bo ɛ̀ flɔn-ɛ dě ǐn jlǐh wɛ̀ ǐn juo ǎn gblɛ̍n sɔ̀ɛ̀n-a dɛ i̍. Dɛ̍nu̍ɛ, pò telě se̍ la̍ nyɔ̍ bɔ̌ nyɔ̍ dɔɔ-a dɛ̍ wɛɛn i̍ nui-ɛ de-ɛ, nɛ̀ ǐn se̍ i̍h juo mu̍ de ka ǎn nu̍-a dɛ̍-a wɛɛn-ɛ.

⁸Jɛ dě telě po̍-ɛ di̍i̍ bo gblɛ̍n sɔ̀ɛ̀n jěe flɔn la̍, wɛ̀ ɛ̍ po̍ wɛɛn nu̍-ɛ kaɛn kaɛn dě ǐn ku̍sɔ̀n. Jɛ pò telě se̍ dǒ tà nɛ-ɛ, nɛ̀ gblɛ̍n sɔ̀ɛ̀n-a gbǐh-i wlǔh tà.

⁹Ti̍ telě se̍-a nɛ-ɛ, nɛ̀ ǐn tè kmɔ̌ i̍ de. Jɛ telě po̍ dɛ ji̍-a sǔh-ɛ, sɔ gblɛ̍n sɔ̀ɛ̀n-a gbǐh wlǔh tà iě ǐn mɛ̌.

¹⁰Telě ɛ̀ la̍ ǎn mu̍-a kmɔ̌ nɛ de-ɛ, ɛ̍ bo ɛ̀ nu̍ ɛ̍ wɛ̀ ǐn mɛ̌.

¹¹Dě telě di̍i̍ bo gblɛ̍n sɔ̀ɛ̀n jěe flɔna̍ wɛ̀ ɛ̍ boe ǐn i̍. Iě ɛ̍ jii dě telě di̍i̍ wɛ̀ ɛ̍ dbǎ m̌.

¹²Nɛ̀ɛ̍, telě wɛ̀ nɛi̍, ɛ̍ slɛ̌ i̍ iě ɛ̍ nmɔ jii̍.

¹³Pò ɛ̍ nɛ ka-ɛ, nɛ̀ dɛ̍ ɛ̀ nmɔ-a jii̍-ɛ, ɛ̍ bo ɛ̀ ja ǐn mɛ̌ɛ we̍ ae? Iěe tììh. Jɛ gblɛ̍n sɔ̀ɛ̀n ja ǐn mɛ̌ɛ we̍ dǒ dɛ̍ ɛ̀ nmɔ-a jii̍-ɛ we̍. Wɛ̀ ǐn juo ka gblɛ̍n sɔ̀ɛ̀n nɛ-aɛ. Sɔ dě telě di̍i̍ bo gblɛ̍n sɔ̀ɛ̀n jii wɛ̀ ɛ̍ to ɛ̍ ka ɛ̍ nu̍-a dɛ̍ᵻ sɔ̀nᵻ kaa̍-ɛ.

¹⁴À juo ɛ̍-ɛ ka telě sɔ-a dě Nyɔsoa we̍-ɛ. Jɛ mɔ̍ bo ɔ̀ nu̍ kmɔ̌ we̍ nyɔ̍, iě ǐn ple̍-eɛ ka kèi̍-ɛ dě gblɛ̍n sɔ̀ɛ̀n we̍.

¹⁵Sɔ nɛ̌ juo ǎn chɛ̀-a nu̍-dɛ̍ i̍, dɛ̍nu̍ɛ, dɛ̍ ǎn pɔ̀n-a iě-a nu̍-ɛ, nɛ̌ nu̍ ɛ̍. Jɛ dɛ̍ ǐn faɛn-a bo ǎn nu̍.

¹⁶Ka dɛ̍ ǐn se̍-a pɔ̀n iě-a nu̍-ɛ bo ǎn nu̍-a la̍-ɛ, nɛ̀ ɛ̍ to ɛ̍ ka ǐn wɔ̌ɛn-ɛ ka telě nmɔ-a jii̍-ɛ.

¹⁷Ka ɛ̍ nɛ-a ka-ɛ, nɛ̀ ɛ̍ se̍ mɔ̍ ɔ̀ se̍ dɛ̍ laa̍ nu̍, jɛ nɛ̀ gblɛ̍n sɔ̀ɛ̀n nɛ-a dě ǐn ja̍a̍-a bo ɛ̀ nu̍ ɛ̍.

¹⁸Ǐn juo ɛ̍-ɛ dɛ̍ chɛ̀ se̍ dě ǐn ja̍a̍ nɛ, ǎn dǎ dě ǎn gblɛ̍n sɔ̀ɛ̀n ku̍ di̍i̍. Dɛ̍nu̍ɛ, ǎn pɔ̀n dɛ̍ chɛ̀ nu̍-ɛ i̍ de, jɛ nɛ̌ nu̍ ɛ̍.

¹⁹Dɛ̍ chɛ̀ ǎn pɔ̀n-a nu̍-ɛ i̍-ɛ bo nɛ̌ nu̍, jɛ dɛ̍ sɔ̀n jɛ ǐn se̍-a nu̍-ɛ i̍ pɔ̀n-ɛ bo ǎn nu̍.

²⁰Nɛ̀ɛ̍, dɛ̍ ǐn se̍-a pɔ̀n iě-a nu̍-ɛ, pò ǐn ja la̍ ɛ̍ nu̍-ɛ, nɛ̀ ɛ̍ se̍ mɔ̍ ɔ̀ se̍ ɛ̍ nu̍. Jɛ nɛ̀ gblɛ̍n sɔ̀ɛ̀n nɛ-a dě ǐn ja̍a̍-a bo ɛ̀ nu̍ ɛ̍.

²¹Nɛ̀ɛ̍, dɛ̍ ǐn juo-a i̍-ɛ, ɛ̍ nu̍ pò ǐn ja dɛ̍ chɛ̀ nu̍-ɛ i̍ pɔ̀n-ɛ, nɛ̀ dɛ̍ sɔ̀n gbǎ-ɛ dǒ ɛ̍ wɔ̀ɔ̀.

²²Ǎn wlùh nɔ̀ɔ̍ ɛ̍ gbǎ mɔna̍-a kaa̍ dǒ Nyɔsoa-a telě we̍ de wa.

²³Jɛ ǎn jě telě dɛɛ dǒ ǎn ku̍ kli̍hgbɛ̍ pùn, iě ɛ̍ fɔ̀n Nyɔsoa-a telě jɛ ǎn wlùh wɔ̌ɛn-a kɛ̍n i̍-ɛ we̍. Wɛ̀ ɛ̍ nu̍ ǐn gbɛ̍n-nyɔ̍ we̍i̍ dǒ gblɛ̍n sɔ̀ɛ̀n-a telě ɛ̀ nɛ-a dě ǐn ku̍sɔ̀n-ɛ we̍.

²⁴Mɔ̀ jě ka ǐn nu̍-a chlě i̍ nɛ nyɔ̍ nu̍-ɛ. Nyɔ̍ bo ɔ̀ mu̍ ǐn sèìe dě ǎn ku̍ la ɛ̀ mu̍-a mɛ̌-ɛ di̍i̍ ɛ?

²⁵Ǐn po̍ Nyɔsoa tlɔ̌ ɔ̀ sèìe-a m dě à Joi Jusu Klai ja̍a̍-ɛ. Nɛ̀ɛ̍, dě ǐn wlùh di̍i̍ bo ǎn jě-e Nyɔsoa-a telě dɛ̍ɛ̍, jɛ ǎn gblɛ̍n sɔ̀ɛ̀n ku̍ bo ɛ̀ jě gblɛ̍n sɔ̀ɛ̀n-a telě dɛ̍ɛ̍.