Read Western Krahn Wloma 8 Bible Online

Wloma 8 - Western Krahn bible

Wloma 8

¹Nɛ̀ɛ̍, kaka la̍, nyɔ̍ ùh ke Jusu Klai nɛ-a due-ɛ, u̍h se̍ kɛ̀n sà-ɛɛ.

²Dɛ̍nu̍ɛ, Nyɔsoa-a Sùù-a telě ɛ̀ ja-a à feɛ dě à ke Jusu Klai-a due nɛ-ɛ di̍i̍-ɛ, ɛ̍ bo ɛ̀ nu̍ ɛ̍ iě telě ɛ̀ ja-a gblɛ̍n sɔ̀ɛ̀n ke mɛ̌ɛ-ɛ, wɛ̀ ɛ̍ se̍ ǐn wlu̍ i̍ kɔn.

³Dɛ̍ ɛ̀ telě se̍-a nu̍-ɛ bɛ̌ɛ à gblɛ̍n sɔ̀ɛ̀n ku̍-a gbǐh-a mɛ̌-ɛ tìh-ɛ, ɛ̍ bo Nyɔsoa nu̍. Ɔ̍ dbo̍ ɔ̍ chɛ̀-a Jǔ dě gblɛ̍n sɔ̀ɛ̀n nu̍ nyɔ̍-a tu̍ di̍i̍ ɔ̍ iě gblɛ̍n sɔ̀ɛ̀n-a slaǎ sà-ɛ dɛ̍ nu̍. Nyɔsoa sà gblɛ̍n sɔ̀ɛ̀n kɛ̀n dě ɔ̍ Jǔ-a ku̍ laa̍ di̍i̍.

⁴Nyɔsoa nu̍ ɛ̍-ɛ, wɛ̀ à iě i̍ slɛ̌ ka telě la̍ à iě-a nɛ-ɛ. À se̍ dɛ̍ gblɛ̍n sɔ̀ɛ̀n-a tu̍ dǎ-ɛ nu̍, jɛ àɔ̀ bo à nu̍ dɛ̍ Nyɔsoa-a Sùù dǎ-aɛ.

⁵Nyɔ̍ ùh-a nu̍-a dɛ̍ gblɛ̍n sɔ̀ɛ̀n-a tu̍ dǎ-ɛ, nɛ̀ dɛ̍ᵻ gblɛ̍n sɔ̀ɛ̀n-a tu̍-a pɔ̀n-a i̍-ɛ bo u̍h-a wlùh nɛ we̍. Jɛ nyɔ̍ ùh-a nu̍-a dɛ̍ Sùù dǎ-a, nɛ̀ dɛ̍ᵻ Sùù-a pɔ̀n-a i̍-ɛ bo u̍h-a wlùh nɛ we̍.

⁶Nɛ̀ nyɔ̍ ɔ̀ kɔn wlùh gblɛ̍n sɔ̀ɛ̀n-a tu̍ kɔn-a wlu̍ i̍-ɛ, ɔ̍ mu̍ mɛ̌. Jɛ nyɔ̍ ɔ̀ kɔn wlùh Sùù kɔn-a wlu̍ i̍-ɛ, nɛ̀ ɔ̍ mu̍ feɛ ke wlùh-a i̍ tè-ɛ blě.

⁷Nɛ̀ɛ̍, nyɔ̍ ɔ̀ kɔn wlùh gblɛ̍n sɔ̀ɛ̀n-a tu̍ kɔn-a wlu̍ i̍-ɛ, nɛ̀ ɔ̍ tbaɛ Nyɔsoa bu̍hᵻ i̍. Ɔ̍ se̍ Nyɔsoa-a telě dɛ̍ɛ̍ jě-ɛ bɛ̌ɛ, ka ɛ̍ nɛ chɛ̀.

⁸Nyɔ̍ ùh gblɛ̍n sɔ̀ɛ̀n-a tu̍ kɔn-a wlu̍ i̍-ɛ, nɛ̀ u̍h se̍ Nyɔsoa-a wlùh i̍ tè-eɛ bɛ̌ɛ.

⁹Mɔ̀ɔ̍ nɔ̀ɔ̍, gblɛ̍n sɔ̀ɛ̀n-a tu̍ se̍ mɔ̀ wlu̍ i̍ kɔn dɛ, jɛ Nyɔsoa-a Sùù bo ɛ̀ kɔn mɔ̀ wlu̍ i̍ wɛ̀ ka ɛ̍ nɛ-a dě mɔ̀ ja̍a̍-ɛ. Nyɔ̍ ɔ̀ Klai-a Sùù se̍-a dě ja̍a̍ nɛ-ɛ, nɛ̀ ɔ̍ se̍ dǒ Klai we̍ kɔn.

¹⁰Gblɛ̍n sɔ̀ɛ̀n nu̍ ɛ̍ wɛ̀ mɔ̀-a nyi̍ɔ̍ku mɛ̌. Kǎ ɛ̍ nɛ gbɛɛ, ka Klai nɛ-a mɔ̀ɔ̍-ɛ, nɛ̀ mɔ̀ nɛ kmɔ̌. Dɛ̍nu̍ɛ, mɔ̀ slɛ̌ i̍ dě Nyɔsoa jlǐh.

¹¹Nyɔsoa ɔ̀ sà-e Jusu-ɛ, ka ɔ̍ Sùù nɛ-a dě mɔ̀ ja̍a̍-ɛ, nɛ̀ ɔ̍-ɔ due sà-e Jusu Klai-ɛ, ɔ̍ mu̍ ɔ̍ Sùù ɛ̀ nɛ-a dě mɔ̀ ja̍a̍-ɛ jii wɛ̀ ɔ̍ iě mɔ̀-a ku̍ ɛ̀ mu̍-a mɛ̌-ɛɛ kmɔ̌ nɛ-ɛ ke.

¹²Nɛ̀ɛ̍, ǐn de̍di̍i̍ᵻ, à se̍ gba̍ blě dɛ dǒ à gblɛ̍n sɔ̀ɛ̀n-a tu̍ we̍, wɛ̀ à iě dɛ̍ ɛ̍ dǎ-ɛ nu̍.

¹³Pò mɔ̀ nu̍ dɛ̍ ɛ̀ gblɛ̍n sɔ̀ɛ̀n tu̍ dǎ-aɛ, nɛ̀ mɔ̀-a mu̍ mɛ̌. Jɛ pò Nyɔsoa-a Sùù nu̍ ɛ̍ wɛ̀ mɔ̀ iě gblɛ̍n sɔ̀ɛ̀n tu̍-a nu̍-dɛ̍ᵻ dbǎ-ɛ, nɛ̀ mɔ̀-a mu̍ kmɔ̌ nɛ.

¹⁴Nyɔ̍ ùh Nyɔsoa-a Sùù-a naɛ-aɛ, u̍h bo ùh nu̍ Nyɔsoa-a nynuu̍.

¹⁵Dɛ̍nu̍ɛ, Sùù ɛ̀ mɔ̀ jě-aɛ, ɛ̍ se̍ mɔ̀ kèi̍ᵻ we̍i̍ nu̍ la̍ ji̍ dode̍ mɔ̀ iě faɔn ple̍. Jɛ mɔ̀ jě ɛ̍-ɛ, ɛ̍ iě mɔ̀ Nyɔsoa-a nynuu̍ we̍i̍ nu̍, wɛ̀ à iě Nyɔsoa à Baa dǎɛ.

¹⁶Nyɔsoa-a Sùù bo ɛ̀ nu̍ sàànsi̍i̍h ka à nu̍-a ɔ̍ nynuu̍-ɛ.

¹⁷Ka à nu̍-a Nyɔsoa-a nynuu̍-ɛ, nɛ̀ à nu̍ dǒ Nyɔsoa-a gbaa kɛ̍n sie nynuu̍. À ke Klai nu̍ gbaa kɛ̍n sie nynuu̍ pò à sàɛ̀ jua̍i̍ ka ɔ̍ nu̍-a jua̍i̍ sàɛ̀-ɛ, wɛ̀ à nynɛ̌ iě i̍ bɛ̌ ka ɔ̍ nynɛ̌ nu̍-a i̍ bɛ̌-ɛ.

¹⁸Dɛ̍ ǐn juo-a i̍-ɛ, ɛ̍ nu̍, tìh-a i̍ bɛ̌-ɛ jɛ Nyɔsoa-a mu̍-a à nyǐ dě nya̍-ɛ, ɛ̍ gbǎ dɛ̍kɛ̍n kaa̍ ɛ̍ sìì jua̍i̍ à sàɛ̀-a ka da̍a ti̍ la di̍i̍-ɛ.

¹⁹Kmɔ̌ kli̍hgbɛ̍ Nyɔsoa nu̍-aɛ, ɛ̍ wlùh-a nu̍ jàjà ɛ̍ fuo ti̍ ɔ̍ mu̍-a ɔ̍ nynuu̍ ɛ̍ i̍ to-ɛ kɛ̍ɛ̍n.

²⁰Dɛ̍nu̍ɛ, kmɔ̌ kli̍hgbɛ̍ Nyɔsoa nu̍-aɛ, ɔ̍ nu̍ ɛ̍ iě i̍h sàɛ̀ pɔ̀ɔ̍pìe̍ dɛ̍ᵻ. Ɛ̍ se̍ ɔ̍ nu̍-u kmɔ̌-a wlùh dɛ̍, jɛ ɔ̀ nu̍-a ɛ̍ iě i̍h sàɛ̀-a pɔ̀ɔ̍pìe̍ dɛ̍ᵻɛ́, ɔ̍ wlùh dɛ̍ bo. Jɛ wlùh i̍ kɔ̍ dɛ̍ nɛ-o ke̍.

²¹Dɛ̍nu̍ɛ, kmɔ̌ kli̍hgbɛ̍ ɛ̀ nui-a, dɛ̍ᵻ ìh-a mu̍-a mɛ̌-ɛ i̍h se̍ ɛ̍ wlu̍ i̍ kɔn mu̍. Ɛ̍ se̍ kèi̍ nu̍ mu̍ dɛ, jɛ ɛ̍ mu̍ de̍e̍ i̍ flɔn-ɛ ke tìh-a i̍ bɛ̌-ɛ Nyɔsoa-a nynuu̍ blě-a blě ke.

²²Kaka la̍, à juo ɛ̍-ɛ sɔ dě tɔ̀blɔ̍ɔ̍ wɛ̀ ɛ̍ iě-a ti̍ la jɛɛ-ɛ, kmɔ̌ kli̍hgbɛ̍ ɛ̀ nui-aɛ, ɛ̍ tù wlu̍ ka nynɔ̌-a pɔ̀n gbàɔ̀n sà-a i̍-ɛ.

²³Jɛ ɛ̍ se̍ kmɔ̌ kli̍hgbɛ̍ ɛ̀ nui-aɛ nɛ due, dě à di̍i̍-a si̍n i̍ ke. Àɔ̀ juh jě-a Nyɔsoa-a Sùù ɛ̀ nu̍-a nyǐ-dɛ̍ᵻá sàǐtòò naɛ-ɛ, à chlì Nyɔsoa we̍ i̍ ɔ̍ iě àɔ̀ ɔ̍ kui nynuu̍ we̍i̍ nu̍, wɛ̀ à ku̍ kli̍hgbɛ̍ iě sèìe-ɛ.

²⁴Dɛ̍nu̍ɛ, à kɔ̍ dɛ̍ wlùh i̍, ɛ̍ bo ɛ̀ sèìe àɔ̀. Dɛ̍ nyɔ̍ tba̍-a jlǐhɛ̍-ɛ, nɛ̀ ɛ̍ nɔ̀ɔ̍, ɛ̍ se̍ wlùh i̍ kɔ̍ dɛ̍ dɛ. Nyɔ̍we̍ mɔ̀ jě ɔ̀ tba̍ dɛ̍ jlǐhɛ̍ sasǎ wɛ̀ ɔ̍ kɔ̍ ɛ̍ wlùh i̍ ɛ?

²⁵Jɛ pò dɛ̍ à se̍-a jlǐhɛ̍ tba̍-ɛ wɛ̀ à iě ɛ̍ wlùh i̍ kɔ̍-ɛ, nɛ̀ à gbɛ̍n wlùh i̍ iě à chlì ɛ̍ we̍ i̍.

²⁶Àɔ̀ kɔn gbǐh-a mɛ̌-aɛ, kǎ Nyɔsoa-a Sùù nu̍ à we̍ gbǎ-a ke. Dɛ̍nu̍ɛ, à se̍ ka à kɔn à iě-a ba̍le-ɛ nu̍-ɛ juo, wɛ̀ Sùù-a chɛ̀-a bla̍-ɛ Nyɔsoa gbòɛ̀ i̍ dǒ à tàà, dě di̍i̍-a si̍n-ɛ ɛ̀ kmɔ̌ se̍-a we̍ i̍ sèàɛ̍ bɛ̌ɛ-ɛ we̍.

²⁷Nɛ̀ Nyɔsoa ɔ̀ juo-a nyɔ̍-a wlùh-ɛ, ɔ̍ bo ɔ̀ juo Sùù-a wlùh. Dɛ̍nu̍ɛ, dɛ̍ nu̍-a ɔ̍ wlùh-ɛ bo Sùù-a bla̍-ɛ ɔ̍ gbòɛ̀ i̍ dǒ ɔ̍ nyɔ̍-a tàà.

²⁸Nɛ̀ à juo i̍h nyɔ̍ ùh jbɛɛ-a Nyɔsoa-ɛ, dɛ̍-o-dɛ̍ ɛ̀ nɛ-a u̍h pùn-ɛ, ɔ̍ sàɛ̀ ɛ̍ dɛ̍ chɛ̀ dǒ u̍h we̍. U̍h bo ɔ̍ dǎ ùh iě dɛ̍ ɛ̀ kɔn di̍i̍chì ɔ̍ chɛ̍n-a nu̍.

²⁹Nyɔ̍ ùh Nyɔsoa tba̍-a chèɛ̀ se̍e̍-ɛ, ɔ̍ tè u̍h pɔ̌ wɛ̀ u̍h iě ɔ̍ Jǔ wɔ̀, wɛ̀ ɔ̍ iě sàì Jǔ nu̍ dě de̍di̍i̍ᵻ dɔu nynɛ̌.

³⁰Ùh ɔ̍ tè-ea pɔ̌-ɛ, u̍h bo ɔ̍ dǎ. Ùh ɔ̍ dǎ-aɛ, u̍h bo ɔ̍ slɛ̌-ɛ i̍ dě ɔ̍ chɛ̀ jlǐh. Ùh ɔ̍ slɛ̌-a i̍-ɛ, u̍h-a nynɛ̌ bo ɔ̍ bɛ̌-ɛ i̍.

³¹Ka à mu̍ ka dǎ dǒ ɛ̀ la we̍ ɛ? Pò Nyɔsoa tǐn à we̍-ɛ, nɛ̀ nyɔ̍ bo ɔ̀ bɛ̌ɛ à klà sà-a ɛ?

³²Ɔ̀ se̍-a ɔ̍ chɛ̀-a Jǔ tɛ̌n tè iě ɔ̍ sà-a ɔ̍ kwlǎ dǒ àɔ̀ kli̍hgbɛ̍ we̍-ɛ, dǒ-o bo ɔ̍ se̍ àɔ̀ dɛ̍ᵻ kli̍hgbɛ̍ nyǐ i̍ mu̍ ke ae?

³³Ùh ɔ̍ tba̍-a chèɛ̀-ɛ, nyɔ̍ dɔɔ we̍ bo ɔ̀ bɛ̌ɛ u̍h tìh dlǔ po̍-ɛ ɛ? Nyɔsoa-a chɛ̀ bo ɔ̀ slè-e u̍h i̍ slɛ̌-nyɔ̍.

³⁴Nyɔ̍we̍ bo ɔ̀ bɛ̌ɛ àɔ̀ kɛ̀n sà-a ɛ? Jusu Klai ae? Iěe, ɔ̍ jɔ mɛ̌-a wɛ̀ ɔ̍ wlǔh-ae dode̍ iě ɔ̍ tè-a ka i̍ dǒ Nyɔsoa-a di̍na̍ sɔ̍n we̍ wɛ̀ ɔ̍ bla̍-ɛ ɔ̍ gbòɛ̀ i̍ à tìh-ɛ, ɔ̍ bo ɔ̀ mu̍ à kɛ̀n sà ae?

³⁵Klai-a à-a jbɛɛ la, nyɔ̍ bo ɔ̀ bɛ̌ɛ ɛ̍ ke àɔ̀ i̍ che̍ɛ̍ɛn ɛ? Wě bo ɛ̀ mu̍ ɛ̍ nu̍ ɛɛ, àe̍e̍ tìh jě-ɛ, àe̍e̍ klě jě-ɛ ke, mɔ̌ ke, nyɔ̍gbà ke, kanɛa dɛ̍ᵻ ke plàn chlɛ̀n bo ìh-a mu̍ àɔ̀ i̍ che̍ɛ̍ɛn ae?

³⁶Ɛ̍ kɔn Nyɔsoa-a wlu̍ la̍a̍, “Àn tìh bo wɛ̀ ka sɔ̀n-a sɛ̀n-aɛ, iě à na-ɛ mɛ̌ɛ wɔ̍i̍n. U̍h dǔ àɔ̀ ka dbǎ-a blawɛ̌ᵻɛ́.”

³⁷Iěe, ìh kli̍hgbɛ̍ la i̍h se̍ à i̍ che̍ɛ̍ɛn bɛ̌ɛ. À sìì tu̍h du̍ nyɔ̍-a chɛ̀ wɛ̀ dě ɔ̀ jbɛɛ-a àɔ̀-ɛ ja̍a̍.

³⁸Dɛ̍nu̍ɛ, ǐn juo ɛ̍-ɛ kleǐn dɛ̍ dɛɛ se̍ ɔ̍ ke à jbɛɛ i̍ che̍ɛ̍ɛn bɛ̌ɛ. À jɛ mɛ̌, iě pò à nɛ kmɔ̌-a chɛ̀-ɛ, ɛ̍ se̍ nɛ mu̍. Nyɔsoa-a ǐnchɔ̀ ke jeědih se̍ ɛ̍ bɛ̌ɛ. Kaka ke dě nya̍ se̍ ɛ̍ bɛ̌ɛ. Ɛ̍ se̍ gbǐh diih-a chɛ̀ kɔn.

³⁹Dě à dlǔwèàì o, dě blǔh sɔ̀n o, dɛ̍ dɛɛ se̍ dě Nyɔsoa-a nu̍-dɛ̍ᵻá chɛ̀ la nynɛ̌ nɛ wɛ̀ ɛ̍ iě ɔ̍ ke à jbɛɛ i̍ che̍ɛ̍ɛn bɛ̌ɛ. Jbɛɛ la ɔ̍ jaɛ ɛ̍ dě à Joi Jusu Klai ja̍a̍.