Read Western Krahn Wloma 9 Bible Online

Wloma 9 - Western Krahn bible

Wloma 9

¹Tìh-a taǐn bo ǎn sà-a dě Klai ja̍a̍. Nyɔsoa-a Sùù bo ɛ̀ nu̍ ɛ̍ iě ǎn wlùh nu̍ ǎn sàànsi̍i̍h. Ǐn se̍ si̍h tmɔ̌,

²ǎn wlùh gbǎ seɔn kaa̍, iě ǎn pɔluh-a wàànwààn nu̍-ɛ se̍ dlǔ i̍ chlà la̍ kɔn dǒ ǐn de̍di̍i̍ᵻ Eslɔɛ nyɔ̍ we̍.

³Pò Nyɔsoa-a jɛ poe ǐn pǎ ǐn de̍di̍i̍ᵻ Eslɔɛ nyɔ̍-a tìh, ùh ke ǐn ke à nu̍-a à blǐ nyɔ̍ due-ɛ, wɛ̀ ɔ̍ iě ǐn dǒ Klai de̍e̍ sà-ɛ, nɛ̀ ɛ̍ mu̍ ǐn gbǐh po̍.

⁴Eslɔɛ nyɔ̍ laa̍ u̍h-u bo Nyɔsoa nu̍ ɔ̍ nynuu̍ we̍i̍. Ɔ̍ toe u̍h ɔ̍ tìh-a i̍ bɛ̌-ɛ, iě ɔ̍ dǔ ku̍o̍ po̍-ɛ dǒ ɔ̍ ke u̍h nynɛ̌. Wɛ̀ ɔ̍ nyǐ u̍h telě, iě ɔ̍ toe u̍h wɛɛ sà-a, wɛ̀ ɔ̍ dǔ wlu̍ tɔ̀ma̍a̍ po̍-ɛ dě u̍h we̍.

⁵U̍h bo ùh nu̍ à blǔh baaᵻá nynuu̍, wɛ̀ Klai nu̍ u̍h blǐ jǔ dě nyi̍ɔ̍tu di̍i̍. Nɛ̀ Nyɔsoa ɔ̀ kɔn-a dɛ̍ᵻ kli̍hgbɛ̍ wlu̍ i̍-ɛ, ɔ̍ bo ɔ̀ iě nǐ wɔ̍n sà-ɛɛ nɔ̌ kmɔ̌-a kmɔ̌. Kǎ ɛ̍-ɛ nɛ.

⁶Dɛ̍ ǎn bla̍-aɛ, ɛ̍ se̍ nɛ̀ Nyɔsoa-a wlu̍ gbǎ si̍h i̍ kai. Ɛ̍ se̍ Eslɔɛ nyɔ̍-a tloemlai kli̍hgbɛ̍ à se̍ Eslɔɛ nyɔ̍ dǎɛ.

⁷Nɛ̀ ɛ̍ se̍ Eblaɛɛn-a tloemlai kli̍hgbɛ̍ à se̍ Eblaɛɛn-a nynuu̍ dǎɛ. Dɛ̍nu̍ɛ, Nyɔsoa la̍a̍ dě Eblaɛɛn we̍, “Ase-a tloemlai bo ǎn mu̍ àn nynuu̍ slè-e.”

⁸Ɛ̍ se̍ Eblaɛɛn-a nynuu̍ kli̍hgbɛ̍ ùh se̍ Nyɔsoa-a nynuu̍. Jɛ nynuu̍ juh wlǔh-a dǒ Nyɔsoa-a tɔ̀ma̍a̍ wlu̍ we̍-ɛ, u̍h bo ùh nu̍ Eblaɛɛn-a nynuu̍.

⁹Dɛ̍nu̍ɛ, ti̍ Nyɔsoa po̍-a wlu̍ tɔ̀ma̍a̍-ɛ, ɔ̍ la̍a̍, “Ti̍ ǐn tba̍-aɛ pò ɛ̍ nyni̍-ɛ, nɛ̀ ǎn mu̍ de̍ ji̍ wɛ̀ Selɔ iě jɔ̍gbau jǔ wlǔh-i.”

¹⁰Ɛ̍ se̍-o siee, Wlibɛkɔ-a nynuu̍ nɛ-a sɔɔ̌n-ɛ, u̍h baa nɛ due. Ɔ̍ bo ɔ̀ nu̍-a à baa klaa Ase.

¹¹Ti̍ ɔ̍ nynuu̍ laa̍ u̍h se̍-a wlǔh ke̍-ɛ, nɛ̀ u̍h-u se̍a dɛ̍ sɔ̀n ke dɛ̍ chɛ̀ nu̍, dǒ Nyɔsoa tba̍-ɛ u̍h-a due chèɛ̀. Ɛ̍ to ɛ̍ ka Nyɔsoa-a nyɔ̍ chèɛ̀ tba̍-a se̍-a dǒ dɛ̍-o-dɛ̍ nyɔ̍ nu̍-a kɛ̍n i̍ tba̍-a. Ɛ̍ tba̍ dǒ Nyɔsoa ɔ̀ dǎ-a nyɔ̍-ɛ ɔ̍ wlùh kɛ̍n i̍.

¹²Ɛ̍ kɔn ɔ̍ sèàɛ̍ Wlibɛkɔ wlùh ɔ̍ la̍a̍, “Àn jǔ klaa-a mu̍ wɛ naɛ jǔ dbee o.”

¹³Ɛ̍ kɔn Nyɔsoa-a wlu̍ la̍a̍, “Ǐn jbɛɛ Jekɔ-ɔ, jɛ ǐn faɛn Isɔ.”

¹⁴Nɛ̀ ka à iě ka dǎ ɛ? Nɛ̀ Nyɔsoa-a nu̍-dɛ̍ se̍ i̍ slɛ̌ bo ae? Iěe tììh.

¹⁵Dɛ̍nu̍ɛ, Nyɔsoa la̍a̍ dě Mose we̍, “Nyɔ̍ ǎn pɔ̀n-a iě-a wɔɛ jě-ɛ, ǎn mu̍ ɔ̍ wɔɛ jě. Nyɔ̍ ǎn pɔ̀n-a iě-a gblɛ̍n-ɛ nmɔ̍-ɛ, nɛ̀ ǎn mu̍ gblɛ̍n-ɛ nmɔ̍ dǒ ɔ̍ we̍.”

¹⁶Sɔ nɛ̀ Nyɔsoa-a nyɔ̍ chèɛ̀ tba̍-a se̍ dǒ nyi̍ɔ̍-a wlùh dɛ̍ ke nu̍-dɛ̍ kɛ̍n i̍ tba̍, jɛ ɛ̍ tba̍ dǒ ɔ̍ wɔɛ kɛ̍n i̍.

¹⁷Ɛ̍ kɔn Nyɔsoa-a wlu̍ la̍a̍ dě Fewlo we̍, “Fewlo, dɛ̍ kɔn tìh ǐn nu̍-a ìn blǔh baa we̍i̍-ɛ, ǎn pɔ̀n iě ǎn gbǐh to dě ìn ja̍a̍. Wɛ̀ iě ɛ̍ nu̍ ǎn nynɛ̌ iě kmɔ̌ kli̍hgbɛ̍ la we̍ i̍ sɛ̍.”

¹⁸Ɛ̍ tìh-ɛ, nyɔ̍ ɔ̀ Nyɔsoa-a pɔ̀n-a wɔɛ jě-ɛ i̍-ɛ, ɔ̍ bo ɔ̍ jě wɔɛ. Nɛ̀ nyɔ̍ ɔ̍ pɔ̀n-a dlǔ ku̍-iɛ i̍-ɛ, ɔ̍ bo ɔ̍ ku̍-i dlǔ.

¹⁹Mɔ̀-a nyɔ̍-a mu̍ ǐn i̍ tèle, “Nyɔ̍ se̍a Nyɔsoa bu̍hᵻ i̍ tba̍-a bɛ̌ɛ-ɛ, nɛ̀ dɛ̍nu̍ Nyɔsoa-a gbɛ̍n-ɛ nyɔ̍ tìh ɛ?”

²⁰Ǎn chɛ̀-a nyɔ̍, àn nynɛ̌-ɛ wɛ̀ àn sà Nyɔsoa-a wlu̍ de̍ ɛ? Jawih bɛ̌ɛ gbɛ̀n dě ɛ̍ mɛ̍-nyɔ̍ we̍ wɛ̀ ɛ̍ iě ka nu̍, “Dɛ̍nu̍ ìn nu̍ ka ǐn mɛ̍-ɛ ɛ?”

²¹Nɛ̀ɛ̍, mɛ̍-nyɔ̍ bo ɔ̀ se̍ ɔ̍ mɛ̍-ɛ wlu̍ i̍ kɔn ae? Ɔ̍ bo pò ɔ̀ ja mɛ̍-ɛ, ɔ̀ mu̍ jawih ɛ̀ nɛ-a maloo-ɛ ke slùɔ̍ dě mɛ̍ gbo̍ due di̍i̍ sà.

²²Nyɔsoa-a pɔ̀n nyɔ̍ iě ɔ̍ jlu̍h ke ɔ̍ gbǐh blě dɛ̍ i̍ juo. Jɛ ɔ̍ gbɛ̍n wlùh i̍ kaa̍ dǒ nyɔ̍ ùh ɔ̍ gbǎ-ɛa jlu̍h-u ɔ̍ mu̍-a gbɔ̀lɔ de-ɛ we̍.

²³Ɔ̍ pɔ̀n nyɔ̍ ùh kɔn-a dǒ ɔ̍ wɔɛ we̍-ɛ, u̍h iě ɔ̍ tìh-a i̍ bɛ̌-ɛ ɛ̀ ku̍-a wɔ̍n kaa̍-ɛ juo. U̍hɔ̍ɔ̍ laa̍ bo ɔ̍ po̍ gba̍a̍ se̍e̍ u̍h iě ɔ̍ tìh-a i̍ bɛ̌-ɛ i̍ gbɛ̍n.

²⁴Àɔ̀ bo à nu̍ nyɔ̍ ùh ɔ̍ dǎ-a ke-ɛ. À nyɔ̍ duuh nu̍ Juu nyɔ̍ iě à duuh se̍ Juu nyɔ̍.

²⁵Dě Osia chlǐh-dɛ̍ di̍i̍-ɛ, Nyɔsoa la̍a̍, “Nyɔ̍ ùh se̍-a ǎn nyɔ̍ de-ɛ, u̍h bo ǎn mu̍ ǎn nyɔ̍ dǎɛ ti̍laa. Nɛ̀ bloa̍ jɛ kɔn tìh ǐn se̍-a kma de-ɛ, ɛ̍ bo ǎn mu̍ ǎn tìh kma blǔh dǎɛ ti̍laa.

²⁶Nɛ̀ tà ǐn na̍a̍, ‘Mɔ̀ɔ̍ la mɔ̀ se̍ ǎn nyɔ̍ o-ɛ,’ dǒ kɔn taǐn bo u̍h-a mu̍ Kmɔ̌ Nɛ Nyɔsoa-a nynuu̍ dǎɛ.”

²⁷Kǎ Asaia nu̍ ɛ̍ bla̍-a dǒ Eslɔɛ nyɔ̍ pùn, ɔ̍ la̍a̍, “Eslɔɛ nyɔ̍-a jɛ tìè i̍ sǔh u̍h iě jbǒ penɔ̍ɔ̍ wɔ̀-ɛ, jɛ u̍h-a jɔ̌ wei bo ùh-a mu̍-o tàn.

²⁸Dɛ̍nu̍ɛ, nyɔ̍ kàn gbɛ̍n-ɛa bɔ̌ɛ-o naɛ Joi la̍ ɔ̍ mu̍-a ja-ɛ, ɔ̍ mu̍ ɛ̍ ja suei̍ da̍a blǔh la kɛ̍n.”

²⁹Ɛ̍-ɛ bo Asaia bla̍ tɛin, ɔ̍ la̍a̍, “Pò Joi Ɔ̀ Blě-a Gbǐh Kli̍hgbɛ̍-ɛ, ɔ̍ se̍ à nynuu̍ duuh sie-e de-ɛ, nɛ̀ à mu̍-u gbɔ̀lɔ de ka Sɔdɔm ke Kɔmowla wlɔ̀ᵻɛ́.”

³⁰Nɛ̀ ka à iě ka dǎ ɛ? Nyɔ̍ ùh se̍-a Juu nyɔ̍ ùh se̍-a i̍ slɛ̌-ɛ i̍ pɔ̀n de dě Nyɔsoa jlǐh-ɛ, u̍h slɛ̌ i̍ dě wlùh gbaɛ di̍i̍.

³¹Wɛ̀ Eslɔɛ nyɔ̍ juh-a pɔ̀n-a telě dɛɛ jě-ɛ i̍ ɛ̍ iě-a u̍h i̍ slɛ̌-ɛ de-ɛ, wɛ̀ ɛ̍ se̍ u̍h i̍ slɛ̌-ɛ.

³²Dɛ̍nu̍ ɛ̍ se̍ u̍h i̍ slɛ̌-ɛ ɛ? U̍h se̍ i̍ slɛ̌-ɛ i̍ pɔ̀n dě wlùh gbaɛ di̍i̍, jɛ u̍h-a chɛ̀-a nu̍-dɛ̍ᵻ bo u̍h tba̍ wlùh i̍. Sɔ nɛ̀ nyɔ̍ gbèle sɔɔ̌ bo u̍h gbèle.

³³Kǎ Nyɔsoa-a wlu̍ dǎ ka dǒ sɔɔ̌ la pùn, ɛ̍ la̍a̍, “Mɔ̀ gbɛ̀n-e, sɔɔ̌ ɛ̀ nyɔ̍-a mu̍-a gbèle-ɛ, ɛ̍ bo ǎn pɛ̌n-ɛ i̍ dǒ Saiɛn Tlu̍h kɛ̍n. Sɔɔ̌ la ɛ̀ mu̍-a u̍h i̍ kà-ɛ bo. Jɛ nyɔ̍ ɔ̀ gbaɛ-a ɔ̍ wlùh-ɛ, nɛ̀ ɔ̍ se̍ tɛ̀n-ɛ i̍ gbǎ mu̍.”