Read Western Krahn 1 Kɔwlɛntiɔn 10 Bible Online

1 Kɔwlɛntiɔn 10 - Western Krahn bible

1 Kɔwlɛntiɔn 10

¹Ǐn de̍di̍i̍ᵻ, ǎn pɔ̀n mɔ̀ iě ìh la juo. Nǐgban ɛ̀ toe-a à baaᵻá baaᵻ Mose naɛ-aɛ wìè-ɛ, dǒ ɛ̍ sɔ̀n bo u̍h kli̍hgbɛ̍ u̍h naɛ te̍e̍ wɛ̀ u̍h kli̍hgbɛ̍ jii dǒ Jbǒ Sàɛ̀n wèa̍.

²Wɛ̀ u̍h kli̍hgbɛ̍ u̍h po̍ nǐ dlǔ dě nǐgban sɔ̀n ke dǒ jbǒ kɛ̍n, iě u̍h ke Mose nɛ due.

³U̍h kli̍hgbɛ̍ u̍h di̍ di̍-dɛ̍ᵻ ìh jii-a dě Nyɔsoa-a Sùù-ɛ,

⁴iě u̍h kli̍hgbɛ̍ nǎ nǐ ɛ̀ jii-a dě ɔ̍ Sùù-ɛ. Wɛ̀ u̍h nǎ nǐ ɛ̀ sɔ-a dě ɔ̍ Sùù-a sɔɔ̌ ɛ̀ ke u̍h-a na-ɛ di̍i̍. Sɔɔ̌ laa̍ bo ɛ̀ nu̍ Klai.

⁵Jɛ Nyɔsoa-a wlùh se̍ i̍ tè dǒ u̍h-a dɔu we̍. Ɛ̍ kɔn tìh u̍h mɛ̌ dě kwlǎslò we̍.

⁶Nɛ̀ɛ̍, ìh kli̍hgbɛ̍ la i̍h-a gbòɛ̀ɛ̀ àɔ̀ wɛ̀ à je̍e dɛ̍ᵻ sɔ̀nᵻ nu̍-ɛ i̍ pɔ̀n ka u̍h nu̍-aɛ.

⁷Mɔ̀ bɔ̌ kwɛ̍i̍n gbo̍ᵻ wɛɛ sà-a, ɛ̍ kɔn ba̍ bo u̍h-a duuh nu̍. Nyɔsoa-a wlu̍ la̍a̍, “Nyɔ̍ la u̍h tìèe̍ i̍ iě u̍h-a di̍ dɛ̍ u̍h-a nǎ, u̍h wa̍n bloɔ̍-ɔ u̍h-a de̍le dǒ kwɛ̍i̍n gbo̍ᵻ wɛɛ sà-a we̍.”

⁸Mɔ̀ à bɔ̌ gbǎn dɛ nu̍-ɛ. Ɛ̍ kɔn ba̍ bo u̍h-a duuh nu̍ wɛ̀ u̍h-a wlǔ-a kwela sɔɔ̌n jɔ̌ ta̍a̍n (23,000) mɛ̌ dǒ weɛ̍ due di̍i̍.

⁹Mɔ̀ à bɔ̌ Joi i̍ tɛ̀n-ɛ. Ɛ̍ kɔn ba̍ bo u̍h-a duuh nu̍ wɛ̀ sɛ̍ᵻ dbǎ u̍h.

¹⁰Mɔ̀ bɔ̌ sàǎsà nu̍-ɛ, ɛ̍ kɔn ba̍ bo u̍h-a duuh nu̍ wɛ̀ Nyɔsoa-a ǐnchɔ̀ gbɔ̀lɔ u̍h-u.

¹¹Ìh kli̍hgbɛ̍ la i̍h nɛ u̍h jii̍ wɛ̀ nyɔ̍ iě i̍h dɛ̍ i̍ blaɛ. I̍h chlǐh-ɛ wɛ̀ i̍h iě à gbòɛ̀ɛ̀ dǒ àɔ̀ ùh nɛ-a kmɔ̌ dǒ ti̍ la ɛ̍ dlǔ i̍ chlà la̍-ɛ.

¹²Pò nyɔ̍-o-nyɔ̍ jě nyna la̍ wɛ̀ dě ɔ̍ chɛ̀ jlǐh-ɛ, nɛ̀ ɔ̍ nu̍ nɛnɛ̌ wɛ̀ ɔ̍-ɔ je̍e i̍ kà.

¹³Nyɔ̍ blu̍ja̍a̍ po̍-ɛ ɛ̀ ji̍-a nyɔ̍ kli̍hgbɛ̍ we̍-ɛ, ɛ̍ ba̍ bo ɛ̀ ji̍ mɔ̀ we̍ ke. Jɛ Nyɔsoa-a gblìh wlu̍ kɛ̍n. Nyɔ̍ i̍ tɛ̀n-ɛ ɛ̀ mu̍-a mɔ̀ klà sà-ɛ, ɔ̍ se̍ wɔ̌n mu̍ ɛ̍ iě mɔ̀ we̍ ji̍. Jɛ pò ɛ̍ ji̍ mɔ̀ we̍-ɛ, ɔ̍ mu̍ ɛ̍ nu̍ mɔ̀ iě-e klì i̍ ku̍, wɛ̀ mɔ̀ iě ɛ̍ wɔ̍i̍n wa̍n.

¹⁴Ɛ̍ tìh-ɛ, ǎn tìh kma nyɔ̍, mɔ̀ sà kwɛ̍i̍n gbo̍ᵻ wɛɛ sà dɛ sɔ̍n di̍i̍.

¹⁵Ka mɔ̀ flɔn-a di̍i̍ i̍-ɛ, ɛ̍ kɔn ǎn wlu dě mɔ̀ we̍. Dɛ̍ ǎn bla̍-aɛ, mɔ̀-a chɛ̀ naɛ ɛ̍ wlùh i̍ mɔ̀ iě jě.

¹⁶Kàu̍n la ɛ̀ kɔn tìh à po̍-a Nyɔsoa tlɔ̌-ɛ, pò à nǎ-ɛ ɛ̍ di̍i̍-ɛ, nɛ̀ ɛ̍ se̍ Klai-a nymɔ̍ à se̍ kwa̍a̍ i̍ gblè-e ae? Blèe̍ à chɛɛn-a i̍-ɛ, pò à di̍ ɛ̍-ɛ, nɛ̀ ɛ̍ se̍ Klai-a ku̍ à se̍ kwa̍a̍ i̍ gblè-e ae?

¹⁷Blèe̍ gba̍n nɛ due, wɛ̀ àɔ̀ dɔu la iě à nu̍ nyɔ̍ due, dɛ̍nu̍ɛ, à kli̍hgbɛ̍ à gblè-e blèe̍ gba̍n due kwa̍a̍ i̍.

¹⁸Eslɔɛ nyɔ̍ juh ùh-a di̍-a Nyɔsoa-a slaǎ sà dɛ̍ᵻ dǒ gblǒ kɛ̍n-ɛ, nɛ̀ u̍h ke slaǎ sà-ɛ dɛ̍ᵻá dbee Nyɔsoa jǔ.

¹⁹Nɛ̀ɛ̍, ɛ̀ ǎn bla̍-a ka-ɛ, nɛ̀ di̍-dɛ̍ᵻ u̍h sà-ɛa slaǎ dǒ kwɛ̍i̍n gbo̍ᵻ we̍-ɛ, i̍h bo ìh gbǎ dɛ̍kɛ̍n ɛɛ, àe̍e̍ kwɛ̍i̍n gbo̍ᵻ bo ìh gbǎ dɛ̍kɛ̍n ae?

²⁰Iěe, dɛ̍ ǎn bla̍-a ka-ɛ ɛ̍ nu̍, dɛ̍ nyɔ̍ ùh se̍-a Nyɔsoa juo-ɛ u̍h-a sà-ɛa slaǎ-ɛ, nɛ̀ u̍h-a nyǐ ɛ̍ jeědih u̍h se̍ ɛ̍ Nyɔsoa nyǐ. Ǐn se̍ pɔ̀n mɔ̀ ke jeědih iě dɛ̍-ɛ gbà.

²¹Mɔ̀ se̍ dě Joi-a kàu̍n di̍i̍ nǎɛ wɔ̀ mu̍-ɛ, wɛ̀ mɔ̀ iě dě jeědih-a kàu̍n di̍i̍ nǎɛ dɛ ke. Mɔ̀ se̍ dǒ Joi-a teble̍ kɛ̍n dɛ̍ di̍-iɛ wɔ̀ mu̍-ɛ, wɛ̀ mɔ̀ iě-o jeědih-a teble̍ kɛ̍n dɛ̍ di̍-i dɛ.

²²Mɔ̀-a pɔ̀n à iě-o Joi-a jlu̍h duǐh tù ae? À kmu i̍ à sìì ɔ̍ ae?

²³“Dɛ̍ᵻ kli̍hgbɛ̍ se̍ kɛɛkɛ̍n nɛ,” kǎ à dǎ. Jɛ ɛ̍ se̍ dɛ̍ᵻ kli̍hgbɛ̍ ìh se̍ jii̍ nmɔ. “Dɛ̍ᵻ kli̍hgbɛ̍ se̍ kɛɛkɛ̍n nɛ,” jɛ dɛ̍ᵻ kli̍hgbɛ̍-ɛ po̍-o dɛ̍.

²⁴Nyɔ̍ bɔ̌ ɔ̍ chɛ̀-a tìh sì-ɛ, jɛ nyɔ̍ duuh naɛ bo ɔ̍ iě sì.

²⁵Mɔ̀ di̍ nmi̍i̍ kli̍hgbɛ̍ u̍h-a ple̍-a dě dɔɔ̌-ɛ. Ɛ̍ bɔ̌ mɔ̀-a wlùh-a kaǎka nu̍-ɛ, wɛ̀ mɔ̀ɔ̍ je̍e dɛ̍-o-dɛ̍ i̍ tèle.

²⁶Nyɔsoa-a wlu̍ la̍a̍, “Bloa̍ ke dɛ̍ᵻ kli̍hgbɛ̍ nɛ-a nɔ̌ ɛ̍ kɛ̍n-ɛ, i̍h kɔn dǒ Joi we̍.”

²⁷Pò se̍ Nyɔsoa juo nyɔ̍ dǎ mɔ̀ dɛ̍ di̍ la̍ wɛ̀ mɔ̀ iě-e mu̍-ɛ, dɛ̍-o-dɛ̍ u̍h-a mu̍-a dǒ mɔ̀ jǔ i̍ tè-ɛ, mɔ̀ di̍ ɛ̍. Ɛ̍ bɔ̌ mɔ̀-a wlùh-a kaǎka nu̍-ɛ, wɛ̀ mɔ̀-ɔ je̍e dɛ̍-o-dɛ̍ i̍ tèle.

²⁸Jɛ pò nyɔ̍ la̍a̍ dě mɔ̀ we̍, “Di̍-dɛ̍ᵻ la u̍h sà-ɛ i̍h slaǎ dǒ kwɛ̍i̍n gbo̍ᵻ we̍-ɛ,” nɛ̀ mɔ̀ bɔ̌ i̍h di̍-ɛ, nyɔ̍ ɔ̀ sèàɛ̍-ɛa mɔ̀ wlùh-ɛ ɔ̍ tìh ke wlùh je̍e kaǎka nɛ tìh.

²⁹Ǐn se̍ nàɛ̀ wlùh dǎ, jɛ ɔ̍ wlùh bo ǎn dǎ. Nyɔ̍ dɔɔ-a wlùh je̍e kaǎka nɛ tìh bo naɛ̍ de̍e̍ i̍ flɔn-ɛ iě dlǔ i̍ dbǎ ae?

³⁰Pò ǐn ja dɛ̍ di̍ la̍ ji̍ wɛ̀ iě Nyɔsoa tlɔ̌ po̍ dǒ ɛ̍ we̍-ɛ, nɛ̀ dɛ̍nu̍ nyɔ̍ dɔɔ-a mu̍ ǐn pàwe̍i̍ po̍ dɛ dǒ dɛ̍ kɔn tìh ǎn po̍-a Nyɔsoa tlɔ̌-ɛ we̍ ɛ?

³¹Ɛ̍ tìh-ɛ, pò mɔ̀ ja dɛ̍ di̍ o, mɔ̀ ja nǐ nǎ o, dɛ̍-o-dɛ̍ mɔ̀-a mu̍-a nu̍-ɛ, mɔ̀ nu̍ ɛ̍ dǒ Nyɔsoa-a tìh-a i̍ bɛ̌-ɛ we̍.

³²Juu nyɔ̍ o, se̍ Juu o, Nyɔsoa-a chɔchi̍h-a nyɔ̍ o, bɔ̌ u̍h-a nyɔ̍ gblɛ̍n sɔ̀ɛ̀n nui-ɛ.

³³Ka ǎn fɔ̀n-a dɛ̍ we̍ iě-a nyɔ̍ kli̍hgbɛ̍-a wlùh i̍ tè-e dǒ nu̍-dɛ̍ᵻ kli̍hgbɛ̍ we̍ wɛ̀ ǎn sì-a nyɔ̍ dɔu-a tìh u̍h iě-a pǔh-ɛ, kǎ mɔ̀ iě nu̍ ke.