Read Western Krahn 1 Kɔwlɛntiɔn 11 Bible Online

1 Kɔwlɛntiɔn 11 - Western Krahn bible

1 Kɔwlɛntiɔn 11

¹Mɔ̀ sà-e ǎn wɔ̀ɔ̀ i̍, ka ǎn nu̍-ae Klai-a wɔ̀ɔ̀ i̍ sà-aɛ.

²Ǎn po̍ mɔ̀ tìhwe̍, dɛ̍nu̍ɛ, mɔ̀-a blě-e ǎn tìh dǒ wlùh kɛ̍n te̍e̍, iě mɔ̀-a jě nǎ po̍ wlu̍ ǐn ja-a dě mɔ̀ we̍-ɛ dɛ̍ɛ̍.

³Jɛ ǎn pɔ̀n mɔ̀ iě ɛ̍ i̍ juo ka Klai nu̍-a jɔ̍gbauᵻ kli̍hgbɛ̍-a dlǔtu-ɛ. Jɔ̍gbauᵻ nu̍ u̍h-a nynɔ̌gbaɔᵻá dlǔtu, iě Nyɔsoa nu̍ Klai-a dlǔtu.

⁴Pò jɔ̍gbau ja ba̍le àe̍e̍ ɔ̍ ja Nyɔsoa-a tu̍owli po̍ wɛ̀ ɔ̍ iě dɛ̍ tèè-ɛ, nɛ̀ ɔ̍ blaɛ ɔ̍ dlǔtu wɔ̍n.

⁵Nɛ̀ pò nynɔ̌gbaɔ ja ba̍le àe̍e̍ ɔ̍ ja Nyɔsoa-a tu̍owli po̍ wɛ̀ ɔ̍ iě dlǔ i̍ flɔn-ɛ, nɛ̀ ɔ̍ blaɛ-ɛ ɔ̍ dlǔtu wɔ̍n. Nɛ̀ ka nyɔ̍ gbla̍n dlǔ-ɛ, nɛ̀ kǎ ɔ̍ tìh nɛ.

⁶Pò nynɔ̌gbaɔ la̍ ɔ̍ se̍ dɛ̍ dlǔ bla̍ mu̍-ɛ, nɛ̀ ɔ̍ chɛ̍n ɔ̍ mǐ. Jɛ pò mǐ kɛ̍n i̍ chɛ̍n-ɛ ke dlǔ gbla̍n-a ja ɔ̍ plǔh i̍ wlǎ-ɛ mu̍-ɛ, nɛ̀ ɔ̍ bla̍ dɛ̍ dlǔ.

⁷Nyɔsoa nu̍ jɔ̍gbauᵻ u̍h iě ɔ̍ wɔ̀, wɛ̀ u̍h iě ɔ̍ ja̍ tè. Ɛ̍ tìh-ɛ, jɔ̍gbau se̍ kɔn ɔ̍ iě dɛ̍ tèè. Jɛ nynɔ̌gbaɔᵻ nui-ɛ u̍h iě jɔ̍gbauᵻ ja̍ tè.

⁸Dɛ̍nu̍ɛ, jɔ̍gbau-a nu̍-ɛ se̍ dě nynɔ̌gbaɔ ja̍a̍ sɔ, jɛ nynɔ̌gbaɔ-a nu̍-ɛ sɔ dě jɔ̍gbau ja̍a̍.

⁹Nɛ̀ jɔ̍gbau wɔ̍ se̍ nui-ɛ nynɔ̌gbaɔ-a tìh, jɛ nynɔ̌gbaɔ nui-ɛ jɔ̍gbau-a tìh.

¹⁰Ɛ̍ tìh-ɛ, nynɔ̌gbaɔ kɔn ɔ̍ iě dɛ̍ dlǔ bla̍ wɛ̀ ɛ̍ iě ɛ̍ to ka ɔ̍ nɛ-a dǒ nyɔ̍ sɔ̀n-ɛ, ɛ̍ ke Nyɔsoa-a ǐnchɔ̀-a tìh ke.

¹¹Gbɔ̀gbɔ̀ sǔh-ɛ, dě à ke Joi-a due nɛ-ɛ di̍i̍-ɛ, jɔ̍gbau se̍ ɔ̍ blǐ na-ɛ mu̍ dǒ nynɔ̌gbaɔ we̍. Nynɔ̌gbaɔ wɔ̍ se̍ ɔ̍ blǐ na-ɛ mu̍ ke dǒ jɔ̍gbau we̍.

¹²Nynɔ̌gbaɔ-a nu̍-ɛ sɔ dě jɔ̍gbau ja̍a̍, jɛ nynɔ̌gbaɔ-a wlǔh-i jɔ̍gbau. Jɛ dɛ̍ᵻ kli̍hgbɛ̍ sɔ dě Nyɔsoa we̍.

¹³Mɔ̀-a chɛ̀ gbɛ̀n ɛ̍ ja̍ mɔ̀ iě jě, pò nynɔ̌gbaɔ se̍ dɛ̍ dlǔ bla̍ wɛ̀ ɔ̍ iě Nyɔsoa ba̍le-ɛ, nɛ̀ ɛ̍ mu̍ jii̍ nmɔ ae?

¹⁴Ɛ̀ sɔ-a dě nyaa ja̍a̍-ɛ, pò jɔ̍gbau blě mǐ tɔ̀ɔ̀nᵻɛ́, nɛ̀ ɛ̍ nɛ boɛjii̍.

¹⁵Jɛ pò nynɔ̌gbaɔ blě mǐ tɔ̀ɔ̀nᵻɛ́, nɛ̀ ɛ̍ po̍ ɔ̍ bu̍hᵻ gbɔ̀. Dɛ̍nu̍ɛ, Nyɔsoa nyǐ ɔ̍ mǐ tɔ̀ɔ̀nᵻ i̍h iě ɔ̍ dlǔ chlìi.

¹⁶Pò nyɔ̍-o-nyɔ̍ ja pɔ̀n ɔ̍ iě ǐn we̍ tòlo-ɛ, dɛ̍ ǎn bla̍-ɛ, ɛ̍ nu̍ à ke Nyɔsoa-a chɔchi̍h nyɔ̍ kli̍hgbɛ̍ ke à se̍ nu̍a̍a̍ diih blě.

¹⁷Jɛ ǎn ji̍-a bla̍ la̍ dě mɔ̀ we̍-ɛ, ǐn se̍ mɔ̀ tìhwe̍ po̍ la̍ ji̍. Dɛ̍nu̍ɛ, mɔ̀-a gbèɛ̀ɛn-ɛ blě dɛ̍ sɔ̀n ɛ̍ sìì dɛ̍ chɛ̀.

¹⁸Sàǐtòò dɛ-ɛ, ǐn wɔ̌n i̍h pò mɔ̀ gbǎ tàdùè-ɛ, nɛ̀ mɔ̀-a gblè-e mɔ̀-a chɛ̀ i̍. Ǐn po̍ i̍h-a diih tìh chɛ̀.

¹⁹I̍i̍n, mɔ̀-a gblɛ̍n nɔ̀ɔ̍, i̍h kɔn i̍h iě-e sèàɛ̍ wɛ̀ ɛ̍ iě nyɔ̍ ùh nu̍-a Nyɔsoa nyɔ̍ chɛ̀ɛ̌chɛ̀ dě mɔ̀ nynɛ̌-ɛ to.

²⁰Pò mɔ̀ gbǎ tàdùè-ɛ, nɛ̀ ɛ̍ se̍ Joi-a Wìe̍dɛ mɔ̀-ɔ di̍.

²¹Dɛ̍nu̍ɛ, mɔ̀-ɔ fuo-e dǒ dɛ̍ di̍ la̍. Jɛ jɔ gbù-ɛ nɛ̀ ɔ̍ di̍ la̍ dɛ̍ sǔh, wɛ̀ mɔ̌-a nu̍ duuh, iě kwlǐ-a sì duuh gbɔ̀ i̍ wɛ̀ u̍h-a sìèè u̍h-a chɛ̀ nmɔ̍ wlì.

²²Mɔ̀ se̍ mɔ̀-a chɛ̀-a gbòᵻ blě mɔ̀ iě-e dɛ̍ di̍-i mɔ̀ iě nǎ ae? Àe̍e̍ mɔ̀ se̍ Nyɔsoa-a chɔchi̍h dɛ̍ dǎɛ iě mɔ̀-a po̍ nyɔ̍ ùh se̍-a dɛ̍ blě-ɛ tɛ̀n-ɛ i̍ ae? Ka iě dǎ dě mɔ̀ we̍ ɛ? Iě mɔ̀ tìhwe̍ po̍ ɛ̍ tìh ae? Iěe, ǐn se̍ ɛ̍ nu̍ mu̍.

²³Dɛ̍ ǐn jě-a Joi kwa̍a̍-ɛ, ɛ̍-ɛ bo ǐn toe-a mɔ̀. Wlù weɛ̍ Joi Jusu sà-ɛa kwlǎ-ɛ, dǒ ɔ̍ dǔ-i blèe̍ gba̍n-a,

²⁴iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ la̍a̍, “Ɛ̀ la ǎn ku̍ bo ɛ̀ sà-ɛa slaǎ-a dǒ mɔ̀ we̍-ɛ. Mɔ̀ di̍ ɛ̀ la wɛ̀ ǎn tìh iě dǒ mɔ̀ wlì i̍ sǐ.”

²⁵Ti̍ u̍h wɔ̀-a dɛ̍ di̍-ɛ, ɛ̀ due laa̍ bo ɔ̍ nu̍ dɛ, iě ɔ̍ dǔ kàu̍n wɛ̀ ɔ̍ la̍a̍, “Kàu̍n la, ɛ̍ bo ɛ̀ nu̍ ku̍o̍ delee Nyɔsoa po̍ dǒ ǎn nymɔ̍ we̍. Pò mɔ̀ nǎɛ ɛ̀ la di̍i̍-ɛ, wɛ̀ ɛ̍ iě ǎn tìh dǒ mɔ̀ wlì i̍ sǐ-i.”

²⁶Ti̍ kli̍hgbɛ̍ we̍ mɔ̀-a mu̍-a blèe̍ la di̍ mɔ̀ iě-a kàu̍n la di̍i̍ nǎɛ-ɛ, nɛ̀ Joi-a mɛ̌ɛ tìh bo mɔ̀-a bla̍-a te̍e̍ wɛ̀ ɛ̍ iě ɔ̍ ji̍-ɛ kɛ̍n jɛɛ.

²⁷Ɛ̍ tìh-ɛ, nyɔ̍-o-nyɔ̍ ɔ̀ mu̍-a Joi-a blèe̍ di̍ wɛ̀ ɔ̀ iě-a ɔ̍ kàu̍n di̍i̍ nǎɛ-ɛ dǒ se̍o̍nɛ we̍-ɛ, nɛ̀ tìh wlǎ ɔ̍ dlǔ wɛ̀ dǒ gblɛ̍n sɔ̀ɛ̀n ɔ̍ nu̍-a Joi-a ku̍ ke ɔ̍ nymɔ̍ pùn-ɛ we̍.

²⁸Nɛ̀ɛ̍, nyɔ̍ kɔn ɔ̍ iě ɔ̍ chɛ̀ we̍ i̍ jě sasǎ, wɛ̀ ɔ̍ iě blèe̍ la di̍-ɛ dǔ, wɛ̀ ɔ̍ iě kàu̍n la di̍i̍ nǎɛ.

²⁹Jɛ nyɔ̍-o-nyɔ̍ ɔ̀ se̍-a Joi-a ku̍ dɛ we̍ i̍ ju̍o̍e wɛ̀ ɔ̍ di̍-a ɔ̍ blèe̍ iě ɔ̍ nǎɛ-a ɔ̍ kàu̍n di̍i̍-ɛ, nɛ̀ ɔ̍ ja ɔ̍ chɛ̀ tìh we̍.

³⁰Ɛ̍-ɛ bo ɛ̀ nu̍ ɛ̍ wɛ̀ mɔ̀-a nyɔ̍ dɔu-a gbǐh-a mɛ̌, iě u̍h-a poa, iě duuh mɛ̌ ka.

³¹Jɛ pò à jě dě à chɛ̀ we̍ i̍ chɛ̀ɛ̌chɛ̀-ɛ, nɛ̀ tìh se̍ à dlǔ wlǎ mu̍.

³²Jɛ pò Joi chlɛ̌ à i̍-ɛ, nɛ̀ ɔ̍ sà à gblɛ̍n kwa̍ i̍. Ɔ̍ nu̍ ɛ̍-ɛ wɛ̀ à ke kmɔ̌ we̍ nyɔ̍ ke tìh i̍ je̍e à tàdùè gbɛ̍n-ɛ.

³³Ɛ̍ tìh-ɛ, ǐn de̍di̍i̍ᵻ, pò mɔ̀ gbǎ tàdùè mɔ̀ iě Joi-a Wìe̍dɛ di̍-ɛ, nɛ̀ mɔ̀ fuo-e.

³⁴Pò mɔ̌ ja mɔ̀-a nyɔ̍ nu̍-ɛ, nɛ̀ ɔ̍ di̍ dɛ̍ dě ɔ̍ blǐ gbò, wɛ̀ tìh i̍ je̍e mɔ̀ gbɛ̍n dǒ mɔ̀-a tàdùè gbǎ-a di̍i̍. Jih sie-a dǒ de̍-ɛ, pò ǐn ji̍-ɛ, nɛ̀ ǎn mu̍ mɔ̀ slɛ̌ chèɛ̀ i̍ po̍.