Read Western Krahn 1 Kɔwlɛntiɔn 14 Bible Online

1 Kɔwlɛntiɔn 14 - Western Krahn bible

1 Kɔwlɛntiɔn 14

¹Jbɛɛ-a di̍i̍chì bo mɔ̀ iě chɛ̍n, nɛ̀ Nyɔsoa-a Sùù-a nyǐ-dɛ̍ᵻ bo mɔ̀ iě i̍ pɔ̀n chɛ̀ɛ̌chɛ̀. Jɛ nɛ̀ Nyɔsoa-a tu̍owli po̍-ɛ i̍ pɔ̀n-ɛ bo ɛ̀ iě-o sìì.

²Nyɔ̍ ɔ̀ po̍-a wlu̍ diih-ɛ, nɛ̀ ɔ̍ se̍ dě nyɔ̍ we̍ wlu. Ka nyɔ̍-ɔ wɔ̌n-a ɔ̍ wlu̍ i̍-ɛ, nɛ̀ dě Nyɔsoa we̍ bo ɔ̍ wlu. Nɛ̀ Nyɔsoa-a Sùù bo ɛ̀ toe ɔ̍ slǎn wlu̍ laa̍.

³Jɛ nyɔ̍ ɔ̀ po̍-a Nyɔsoa-a tu̍owli-ɛ, ɔ̍ wlu-e nyɔ̍ we̍, iě ɔ̍ tè-e u̍h-a wlùh i̍ iě ɔ̍ fùka u̍h-a wlùh. Ɔ̍ po̍ u̍h gbǐh ku̍u̍.

⁴Nyɔ̍ ɔ̀ po̍-a wlu̍ diih-ɛ, nɛ̀ ɔ̍ chɛ̀ bo ɔ̍ po̍ gbǐh ku̍u̍. Jɛ nyɔ̍ ɔ̀ po̍-a Nyɔsoa-a tu̍owli-ɛ, nɛ̀ chɔchi̍h nyɔ̍ kli̍hgbɛ̍ bo ɔ̍ po̍ gbǐh ku̍u̍.

⁵Ɛ̍ po̍ ǐn gbǐh mɔ̀ kli̍hgbɛ̍ mɔ̀ iě wlu̍ diih po̍ nɔ̀ɔ̍ wa, jɛ Nyɔsoa-a tu̍owli po̍-ɛ bo ǎn pɔ̀n kaa̍. Nyɔ̍ ɔ̀ po̍-a Nyɔsoa-a tu̍owli-ɛ, ɔ̍ ku̍ wɔ̍n ɔ̍ sìì nyɔ̍ ɔ̀ po̍-a wlu̍ diih-ɛ. Jɛ pò nyɔ̍ nɛ ɔ̍ iě wlu̍ diih ɔ̍ po̍-aɛ we̍ i̍ sèàɛ̍-ɛ, wɛ̀ ɛ̍ iě chɔchi̍h gbǐh ku̍u̍ po̍-ɛ, nɛ̀ ɛ̍ tɛ̀ bo ǐn sà-o.

⁶Nɛ̀ɛ̍, ǐn de̍di̍i̍ᵻ, pò ǐn ji̍ dě mɔ̀ we̍ wɛ̀ iě wlu̍ diih po̍-ɛ, nɛ̀ dɛ̍ ǐn po̍-o mɔ̀ ɛ? Pò iě-o mɔ̀ dɛ̍ po̍-ɛ, nɛ̀ ǎn mu̍ tìh-a taǐn Nyɔsoa toe-a m-ɛ mɔ̀ toe, iě ɔ̍ tɔɔ ja, iě ɔ̍ tu̍owli po̍, wɛ̀ iě ɔ̍ tìh mɔ̀ nǎ poe.

⁷Pò ble̍-dɛ̍ᵻ ìh se̍-a feɛ blě ìh nu̍-a pànkɔɛ̍ ke kain bei-ɛ, i̍h se̍ klɛ̀n-ɛ nɛ̀ ka nyɔ̍-a mu̍ i̍h-a wlu̍-u nmɔ-ɛ i̍ juo-ɛ nu̍ ɛ?

⁸Nɛ̀ɛ̍, pò tu̍h dɔ̍gbɛ̍ bla̍ nyɔ̍ se̍ ɛ̍ wlu̍ we̍i̍ flɔn-ɛɛ, nɛ̀ nyɔ̍we̍ bo ɔ̀ mu̍ tu̍h we̍ mu̍ tìh gbàɛ̀ ɛ?

⁹Kǎ ɛ̍ nɛ ke dǒ mɔ̀ we̍ pò mɔ̀ ja wlu̍ diih po̍-ɛ. Pò nyɔ̍ se̍ i̍h i̍ wɔ̌n-ɛ, nɛ̀ mɔ̀-a wlu-i bu̍ɛ̍i̍.

¹⁰Wlu̍ kaɛn kaɛn dɔu nɛ nɔ̌ kmɔ̌ la we̍, jɛ i̍h kli̍hgbɛ̍ i̍h blě gbɔ̀.

¹¹Jɛ pò ǐn se̍ wlu̍ juo-ɛ, nɛ̀ ǎn mu̍ dakɔ̍ pàìn nu̍ dǒ nyɔ̍ ɔ̀ wlu-aɛ we̍, iě ɔ̀ wlu-aɛ, ɔ̍ iě dakɔ̍ pàìn nu̍ dǒ ǐn we̍ ke.

¹²Ka mɔ̀-a wlùh-a nu̍-a jàjà mɔ̀ iě-a Sùù-a nyǐ-dɛ̍ᵻ blě-ɛ, nɛ̀ mɔ̀ fɔ̀n dɛ̍ we̍ mɔ̀ iě nyǐ-dɛ̍ᵻ ìh-a mu̍-a chɔchi̍h i̍ kui-ɛ blě.

¹³Ɛ̍ tìh-ɛ, nyɔ̍ ɔ̀ po̍-a wlu̍ diih-ɛ, nɛ̀ ɔ̍ ba̍le wɛ̀ ɔ̍ iě i̍h we̍ i̍ sèàɛ̍ gbǐh blě.

¹⁴Pò ǐn ba̍le dě wlu̍ diih po̍-ɛ di̍i̍-ɛ, nɛ̀ ǎn sùù bo ɛ̀ ba̍le, jɛ nɛ̀ ǎn wlùh se̍ dǒ ɛ̍ kɛ̍n i̍ kɔ̍.

¹⁵Dɛ̍ iě ka nu̍ ɛ? Ǎn mu̍ ǎn sùù-u ba̍le-e, wɛ̀ iě ǎn wlùh-u ba̍le-e ke. Ǎn mu̍ ǎn sùù-u ble̍-e, wɛ̀ iě ǎn wlùh-u ble̍-e ke.

¹⁶Pò ìn ja àn sùù nɛ due Nyɔsoa tlɔ̌ po̍-eɛ, nɛ̀ dihwi̍h ɔ̀ se̍-a dě àn tlɔ̌ po̍-ɛ di̍i̍ juo dě mɔ̀ nynɛ̌-ɛ, nɛ̀ ka ɔ̍ mu̍ ka ɛ̍-ɛ wɔ̌ɛn nu̍ ɛ?

¹⁷Pò àn Nyɔsoa tlɔ̌ po̍-e wlu̍-a jɛ nmɔ jii̍-ɛ, jɛ nɛ̀ ɛ̍ se̍-o nyɔ̍ dɔɔ dɛ̍ po̍ mu̍.

¹⁸Ǐn po̍ Nyɔsoa tlɔ̌ wɛ̀ ǎn po̍ wlu̍ diih ɛ̍ sìì mɔ̀ kli̍hgbɛ̍.

¹⁹Jɛ dě chɔchi̍h-ɛ, ɛ̍ mu̍ ǐn gbǐh po̍ iě wlu̍ m̀m̌ nyɔ̍gbei-a wɔ̌n-a i̍-ɛ bla̍, wɛ̀ i̍h iě u̍h nǎ po̍, ɛ̍ sìì po̍ wlu̍ diih-a wlǔ pùè (10,000) wɛ̀ nyɔ̍ se̍ i̍h wɔ̌n.

²⁰Ǐn de̍di̍i̍ᵻ, mɔ̀ bɔ̌ wlùh i̍ naɛ ka nynuu̍plìh-ɛ. Dǒ dɛ̍ sɔ̀n we̍ bo mɔ̀ iě nynuu̍plìh wɔ̀ɛ-ɛɛ. Jɛ mɔ̀ nu̍ nyɔ̍ klaaᵻ nɔ̀ɔ̍ dǒ wlùh-i naɛ la̍.

²¹Ɛ̍ chlǐh-ɛ dě Nyɔsoa-a wlu̍ di̍i̍, Joi la̍a̍, “Wlu̍ diih ke dakɔ̍ pàɔ̀n-a wɔ̍i̍n wlu̍ bo ǎn mu̍-u jii, wɛ̀ iě dě nyɔ̍ la we̍ wlu-i. Jɛ pò ǎn jɛ nu̍ ɛ̍-ɛ, u̍h-a dounᵻ se̍ ǐn we̍ nɛ mu̍.”

²²Wlu̍ diih po̍-ɛ se̍ dǒ wlùh gbaɛ blě nyɔ̍ we̍ kɔn, jɛ ɛ̍ kɔn dǒ se̍ wlùh gbaɛ blě nyɔ̍ we̍. Nɛ̀ Nyɔsoa-a tu̍owli po̍-ɛ kɔn dǒ wlùh gbaɛ blě nyɔ̍ we̍, jɛ ɛ̍ se̍ dǒ se̍ wlùh gbaɛ blě nyɔ̍ we̍ kɔn.

²³Ɛ̍ se̍-o siee, pò chɔchi̍h nyɔ̍ kli̍hgbɛ̍ gbǎ tàdùè wɛ̀ u̍h kli̍hgbɛ̍ iě wlu̍ diih po̍-ɛ, nɛ̀ pò dihwi̍h àe̍e̍ se̍ wlùh gbaɛ blě nyɔ̍ pa̍-e gbò-ɛ, nɛ̀ u̍h se̍ mɔ̀ se̍na̍-a nu̍-u nyɔ̍ dǎɛ mu̍ ae?

²⁴Jɛ pò nyɔ̍ kli̍hgbɛ̍ ja Nyɔsoa-a tu̍owli po̍, wɛ̀ se̍ wlùh gbaɛ blě nyɔ̍ àe̍e̍ dihwi̍h iě pa̍-ɛ, nɛ̀ ɔ̍ mu̍ dlǔ wlù po̍ dǒ wlu̍ kli̍hgbɛ̍ ɔ̍ wɔ̌n-a we̍. Nɛ̀ dě ɔ̍ di̍i̍-a mu̍ sɔ̀ìn chɛ̍n dǒ ìh kli̍hgbɛ̍ ɔ̍ wɔ̌n-a we̍.

²⁵Nɛ̀ dɛ̍ᵻ ìh nɛ-a dě kwile-e de dě ɔ̍ wlùh di̍i̍-ɛ, i̍h-a mu̍ gbɔ̀ wlǔh. Nɛ̀ ɔ̍ mu̍ i̍ chlìi ɔ̍ iě Nyɔsoa wɛɛ sà, ɔ̍ iě ka dǎ, “I̍i̍n, Nyɔsoa nɛ nɔ̌ mɔ̀ nynɛ̌ chɛ̀ɛ̌chɛ̀.”

²⁶Ka ǐn dǎ ka-o ǐn de̍di̍i̍ᵻ, pò mɔ̀ gbǎ tàdùè mɔ̀ iě Nyɔsoa wɛɛ sà-ɛ, nɛ̀ mɔ̀-a nyɔ̍ due ble̍, wɛ̀ dɔɔ iě nyɔ̍ nǎ po̍, nɛ̀ dɔɔ to Nyɔsoa-a nyɔ̍ i̍ toe dɛ̍, wɛ̀ dɔɔ iě wlu̍ diih po̍, wɛ̀ dɔɔ iě wlu̍ diih we̍ i̍ sèàɛ̍ nyɔ̍ nu̍. Dɛ̍ᵻ kli̍hgbɛ̍ kɔn i̍h iě nɛ dǒ chɔchi̍h-a gbǐh ku̍u̍ po̍-ɛ we̍.

²⁷Pò nyɔ̍ ja wlu̍ diih po̍-ɛ, nɛ̀ u̍h nɛ sɔɔ̌n àe̍e̍ ta̍a̍n gbài̍. Nɛ̀ u̍h nu̍ jɔ sɔ-o jɔ gbǎ-o. Jɛ nɛ̀ nyɔ̍ due kɔn ɔ̍ iě wlu̍ we̍ i̍ sèàɛ̍ nyɔ̍ nu̍.

²⁸Jɛ pò wlu̍ we̍ i̍ sèàɛ̍ nyɔ̍ se̍ nɛ-ɛ, nɛ̀ wlu̍ diih po̍ nyɔ̍ kɔn u̍h iě tìi̍n nɛ dě chɔchi̍h, wɛ̀ u̍h iě-e u̍h-a chɛ̀ ke dě Nyɔsoa we̍ wlu dě u̍h di̍i̍.

²⁹Nyɔsoa-a tu̍owli po̍ nyɔ̍-a sɔɔ̌n àe̍e̍ ta̍a̍n kɔn u̍h iě wlu, wɛ̀ juh sie-a dode̍-ɛ, u̍h iě dɛ̍ᵻ u̍h-a bla̍-aɛ we̍ i̍ chlɛ̌.

³⁰Pò Nyɔsoa toe nyɔ̍ ɔ̀ tè-a i̍-ɛ dɛ̍ ɔ̍ iě-e sà-ɛ, nɛ̀ jɔ wlu-a sàǐtòò-ɛ ɔ̍ nɛ tìi̍n.

³¹Dɛ̍nu̍ɛ, mɔ̀ɔ̍ kli̍hgbɛ̍ ùh-a po̍-a Nyɔsoa-a tu̍owli-ɛ mɔ̀ kɔn mɔ̀ iě ɛ̍ nu̍ due due, wɛ̀ ɛ̍ iě ɛ̍ nu̍ nyɔ̍ kli̍hgbɛ̍ iě dɛ̍ cheǎn, wɛ̀ u̍h iě gbǐh ku̍u̍ gbǎ.

³²Nyɔsoa-a tu̍owli po̍ nyɔ̍ kɔn u̍h-a chɛ̀-a nyǐ-dɛ̍ᵻ wlu̍ i̍.

³³Dɛ̍nu̍ɛ, Nyɔsoa-a pɔ̀n à dɛ̍ᵻ kli̍hgbɛ̍ iě gbain nɛ, à iě dɛ̍ᵻ nu̍ dě wlùh-a i̍ tè-ɛ di̍i̍. Kǎ ɛ̍ nɛ dě Nyɔsoa-a chɔchi̍h nyɔ̍ kli̍hgbɛ̍ nynɛ̌.

³⁴Nynɔ̌gbaɔᵻ kɔn u̍h iě tìi̍n nɛ dě chɔchi̍h nyɔ̍ nynɛ̌. U̍h se̍ wlu̍ kɛ̍n sà-ɛ u̍h iě wlu. U̍h kɔn u̍h iě dǒ nyɔ̍ sɔ̀n nɛ, kǎ Mose-a telě dǎ.

³⁵Pò u̍h ja dɛ̍-o-dɛ̍ juo-ɛ i̍ pɔ̀n-ɛ, u̍h tèle u̍h-a kɔanᵻ i̍ dě u̍h blǐ gbò. Ɛ̍ nu̍ tɛ̀n dɛ dǒ nynɔ̌gbaɔ ɔ̀ wlu-a dě chɔchi̍h-ɛ we̍.

³⁶Dě mɔ̀ we̍ bo Nyɔsoa-a wlu̍ sɔ ɛɛ, àe̍e̍ mɔ̀ nɛ due we̍ bo ɛ̍ nyni̍ wɛ̀ ae?

³⁷Pò nyɔ̍-o-nyɔ̍ la̍ ɔ̍-ɔ Nyɔsoa-a tu̍owli po̍ nyɔ̍ àe̍e̍ ɔ̍ blě Nyɔsoa-a Sùù-a nyǐ-dɛ̍-ɛ, nɛ̀ ɔ̍ kɔn ɔ̍ iě ɛ̍ i̍ juo ka dɛ̍ ǎn chlǐh-a dě mɔ̀ we̍-ɛ, ɛ̍ nu̍-a Joi-a telě-ɛ.

³⁸Pò nyɔ̍-o-nyɔ̍ bla̍ ɛ̀ la jlǐhɛ̍ dlǔ-ɛ, nɛ̀ ɔ̍ mu̍ jlǐhɛ̍ dlǔ bla̍-ɛ ke.

³⁹Ɛ̍ tìh-ɛ, ǐn de̍di̍i̍ᵻ, Nyɔsoa-a tu̍owli po̍ tìh bo mɔ̀ iě sì chɛ̀ɛ̌chɛ̀, jɛ mɔ̀ bɔ̌ nyɔ̍ ùh-a po̍-a wlu̍ diih-ɛ bɔ̌ i̍ po̍-ɛ.

⁴⁰Dɛ̍ᵻ kli̍hgbɛ̍ kɔn i̍h iě nui-ɛ dě jii̍ nmɔ-ɛ ke gbain nɛ-ɛ di̍i̍.