Read Western Krahn 1 Kɔwlɛntiɔn 15 Bible Online

1 Kɔwlɛntiɔn 15 - Western Krahn bible

1 Kɔwlɛntiɔn 15

¹Ǐn de̍di̍i̍ᵻ, ǎn pɔ̀n iě mɔ̀ tìh wlì i̍ sǐi kaka pɔ̀n chɛ̀ ǐn bla̍-a dě mɔ̀ we̍-ɛ ɛ̍ tìh. Ɛ̍ bo mɔ̀ gbɛ̍n i̍, iě mɔ̀ nyna ka ɛ̍ kɛ̍n gba̍i̍ngba̍i̍n dǒ wlùh gbaɛ blě-ɛ we̍.

²Ɛ̍ nu̍ pɔ̀n chɛ̀ la ǎn bla̍-a dě mɔ̀ we̍-ɛ, pò mɔ̀ gbɛ̍n-ɛ ɛ̍ sɔ̍nᵻ sɔɔ̌n i̍-ɛ, nɛ̀ ɛ̍ mu̍ mɔ̀ pǔh-i. Pò mɔ̀ se̍ wlùh gbaɛ blě nɔ̀ɔ̍-ɛ, nɛ̀ ɛ̍ kɔn tɛ̀ ǐn sà-o.

³Ɛ̀ gbǎ-a dɛ̍kɛ̍n kaa̍ ǐn cheǎn-aɛ, ɛ̍-ɛ bo ǎn toe mɔ̀. Ɛ̍ nu̍ Klai mɛ̌-ɛ dǒ à gblɛ̍n sɔ̀ɛ̀n-ɛa tìh we̍, wɛ̀ ɛ̍ iě Nyɔsoa-a wlu̍ kɛ̀ǐn po̍.

⁴U̍h tè-a ɔ̍ i̍-ɛ, wǐh ta̍a̍n sì-aɛ, wɛ̀ ɔ̍ wlǔh-e, kǎ ɛ̍ nu̍ chlǐh-ɛ dě Nyɔsoa-a wlu̍ di̍i̍.

⁵Ɔ̍ wlǔh-i Pitɛ i̍ sàǐtòò, iě ɔ̍ dǔ ɔ̍ kòà-a pùè jɔ̌ sɔɔ̌n i̍ wlǔh-iɛ.

⁶Nyɔsoa nyɔ̍ ɔ̍ wlǔh-ia i̍ dɛ dǒ tàdùè-ɛ, u̍h sì kmɛ m̀m̌ (500) kɛ̍n. U̍h-a duuh mɛ̌ wɛ̀ gbɛɛ, jɛ u̍h-a dɔu nɛ kmɔ̌ ke̍.

⁷Iě ɔ̍ wlǔh-i Chiin i̍, wɛ̀ ɔ̍ wlǔh-i gba̍tòà kli̍hgbɛ̍ i̍ ke.

⁸Ɛ̀ bɔ̌ɛ-aoɛ, mɔ̍ bo ɔ̍ wlǔh-i i̍. Jɛ nɛ̀ ǐn wɔ̀ ka jǔ-a ti̍ se̍ i̍ blaɛ wɛ̀ ɔ̀ wlǔh-ɛ.

⁹Sɔ mɔ̍ bo ɔ̀ nu̍ Klai-a gba̍tòà kli̍hgbɛ̍-a konynǐ naɛ. Ǐn se̍ i̍ blaɛ-a chɛ̀ u̍h iě ǐn gba̍tòà dǎɛ. Dɛ̍nu̍ɛ, ǐn jě-e Nyɔsoa-a chɔchi̍h klě.

¹⁰Jɛ Nyɔsoa-a blɛ bo ɛ̀ nu̍ ɛ̍ wɛ̀ ǐn nɛ ka ǐn nɛ-a ka-ɛ. Sɔ ɔ̍ blɛ ɔ̍ nɛ-a dǒ ǐn we̍-ɛ, ɛ̍ se̍ bu̍ɛ̍i̍ nu̍. Iěe, ǐn nu̍ dbo̍ kaa̍ ɛ̍ sìì gba̍tòà kli̍hgbɛ̍. Ɛ̍ se̍ ǎn chɛ̀ ɔ̀ se̍ dbo̍ nu̍, jɛ Nyɔsoa-a blɛ ɔ̍ nɛ-a dǒ ǐn we̍-ɛ bo ɛ̀ nu̍ ɛ̍.

¹¹Ɛ̍ tìh-ɛ, pò u̍h bla̍ pɔ̀n chɛ̀-a tìh dě mɔ̀ we̍ àe̍e̍ ɛ̍ sɔ dě ǐn we̍-ɛ, dɛ̍ due bo à kli̍hgbɛ̍ à bla̍, iě mɔ̀ gbaɛ ɛ̍ wlùh.

¹²Nɛ̀ɛ̍, ka Klai wlǔh-aeɛ, pò à ja la̍ i̍h bla̍-ɛ, nɛ̀ ka mɔ̀-a nyɔ̍ duuh nu̍ wɛ̀ u̍h la̍ mɛ̌-nyɔ̍ se̍-e wlǔh mu̍ ɛ?

¹³Nɛ̀ pò mɛ̌-nyɔ̍ se̍-e wlǔh mu̍-ɛ, nɛ̀ Klai se̍-e wlǔh ke lě.

¹⁴Jɛ pò Klai se̍-e wlǔh de-ɛ, nɛ̀ à bla̍-a tìh nu̍ bu̍ɛ̍i̍, nɛ̀ mɔ̀-a wlùh gbaɛ wɔ̍ nu̍ bu̍ɛ̍i̍ ke.

¹⁵Dɛ̍ ɛ̍ mu̍-a nu̍-ɛ, nɛ̀ ɛ̍ mu̍ à Nyɔsoa si̍h i̍ tùi nyɔ̍ we̍i̍ nu̍. Dɛ̍nu̍ɛ, à la̍ ɔ̍ sà-e Klai. Jɛ pò mɛ̌-nyɔ̍ se̍-e wlǔh mu̍ chɛ̀-ɛ, nɛ̀ ɔ̍ se̍-e Klai sà chɛ̀ka.

¹⁶Dɛ̍nu̍ɛ, pò mɛ̌-nyɔ̍ se̍-e wlǔh mu̍-ɛ, nɛ̀ Klai se̍-e wlǔh o.

¹⁷Pò Klai se̍-e wlǔh de-ɛ, nɛ̀ mɔ̀-a wlùh gbaɛ se̍ dɛ̍ i̍ blaɛ, iě gblɛ̍n sɔ̀ɛ̀n kɔn mɔ̀ wlu̍ i̍ ke̍ de.

¹⁸Nɛ̀ nyɔ̍ ùh gbaɛ-a Klai wlùh wɛ̀ u̍h mɛ̌-aɛ, nɛ̀ u̍h gbɔ̀lɔ-ɔ ke.

¹⁹Pò ɛ̍ tù da̍a kmɔ̌ la we̍ nɛ due à iě Klai wlì tè-eɛ, nɛ̀ à mu̍ wɔɛ nɛ à iě nyɔ̍ kli̍hgbɛ̍ sìì.

²⁰Jɛ ɛ̀ nu̍-a tìh-a taǐn-ɛ, ɛ̍ nu̍ Klai wlǔh-e, ɛ̍ bo ɛ̀ nu̍ ɛ̍ wɛ̀ nyɔ̍ ùh mɛ̌-aɛ, u̍h iě-e wlǔh ke gbɔ̀gbɔ̀.

²¹Ka mɛ̌ɛ jii-a dě jɔ̍gbau due ja̍a̍-ɛ, kǎ nyɔ̍-ae wlǔh-ɛ nu̍ dě jɔ̍gbau due dɔɔ ja̍a̍ jii-ɛ ke.

²²Ka Adaun nu̍-a nyɔ̍ kli̍hgbɛ̍ mɛ̌ɛ we̍ ja-aɛ, kǎ Klai-a mu̍ nyɔ̍ kli̍hgbɛ̍ dě-e wlǔh-ɛ we̍ ja-a nu̍ ke.

²³Jɛ jɔ-ɛ, ɔ̍ mu̍-e wlǔh dǒ ɔ̍ ti̍ we̍. Klai bo ɔ̀ wlǔh-e sàǐtòò. Nɛ̀ɛ̍, ti̍ ɔ̍ mu̍-a ji̍-ɛ, nyɔ̍ ùh kɔn-a dǒ ɔ̍ we̍-ɛ, u̍h-a mu̍-e wlǔh ke.

²⁴Wɛ̀ ti̍-a dlǔ i̍ chlà-a iě nyni̍. Klai-a mu̍ nyɔ̍-a wlu̍ kwa̍ blě nyɔ̍ ke, tùn blě nyɔ̍ ke gbǐh blě nyɔ̍ kli̍hgbɛ̍-ɛ gbɔ̀lɔ, wɛ̀ ɔ̍ iě kmɔ̌ wlu̍ i̍ kɔn-ɛ kwlǎ sà-a dǔ dě Baa Nyɔsoa we̍.

²⁵Dɛ̍nu̍ɛ, Klai kɔn ɔ̍ iě Blǔh Baa nu̍ te̍e̍ wɛ̀ Nyɔsoa iě ɔ̍ nyɛ̌-nyɔ̍ kli̍hgbɛ̍ dě ɔ̍ bu̍h sɔ̀n po̍.

²⁶Mɛ̌ɛ bo ɛ̀ nu̍ nyɛ̌-nyɔ̍-a bɔ̌ɛ-o naɛ ɛ̀ mu̍-u gbɔ̀lɔ-ɛ.

²⁷Nyɔsoa-a wlu̍ la̍a̍, “Nyɔsoa po̍ dɛ̍ᵻ kli̍hgbɛ̍ dě ɔ̍ bu̍h sɔ̀n.” Sɔ ɛ̍ flɔn we̍i̍ ka Nyɔsoa se̍-a dě “dɛ̍ᵻ kli̍hgbɛ̍” laa̍ i̍h-a kòo nɛ-ɛ. Dɛ̍nu̍ɛ, ɔ̍-ɔ bo ɔ̀ po̍ i̍h kli̍hgbɛ̍ dǒ Klai sɔ̀n.

²⁸Jɛ pò dɛ̍ᵻ kli̍hgbɛ̍ nɛ dǒ Klai ɔ̀ nu̍-a Jǔ-ɛ sɔ̀n wɛ̀-ɛ, wɛ̀ Nyɔsoa jɔ po̍-a dɛ̍ᵻ kli̍hgbɛ̍-a chɛ̀ dǒ ɔ̍ Jǔ sɔ̀n-ɛ, wɛ̀ Jǔ-a chɛ̀ iě dǒ ɔ̍ sɔ̀n nɛ-ɛ dǔ ke. Wɛ̀ Nyɔsoa iě dɛ̍ᵻ kli̍hgbɛ̍ wlu̍ i̍ kɔn-ɛ dǔ slèěslè.

²⁹Pò mɛ̌-nyɔ̍ se̍-e wlǔh mu̍-ɛ, nɛ̀ dɛ̍nu̍ nyɔ̍ɔ-a po̍ nǐ dlǔ dǒ u̍h-a tàà ɛ? Nɛ̀ dɛ̍nu̍ nyɔ̍ɔ-a nu̍ la̍a̍n ɛ?

³⁰Nɛ̀ dɛ̍ kɔn tìh à na-ɛ kanɛa dɛ̍ᵻ wɔ̍i̍n ti̍ kli̍hgbɛ̍ we̍ ɛ?

³¹Ǐn de̍di̍i̍ᵻ, ɛ̍ se̍ pàɔ̀n, ka sɔ̀n-a sɛ̀n-aɛ, kǎ ǎn na-ɛ mɛ̌ɛ wɔ̍i̍n. Ǎn bla̍ ɛ̀ la, dɛ̍nu̍ɛ, dě à ke à Joi Jusu Klai-a due nɛ-ɛ di̍i̍ nu̍ ɛ̍ iě ǎn po̍ mɔ̀-a tìh-a bu̍hᵻ wlù i̍.

³²Pò ǎn jɛ fɔ̀n kwlǎ nmi̍i̍ we̍ dǒ Ɛfɛsɔ wlɔ̀ di̍i̍-ɛ, nɛ̀ dɛ̍ ǎn mu̍-o jě ɛ? Pò mɛ̌-nyɔ̍ se̍-e wlǔh mu̍-ɛ, “Nɛ̀ mɔ̀ à di̍ dɛ̍ à iě nǎ, klàe̍-ɛ, à iě mɛ̌.”

³³Bɔ̌ wɔ̌n-ɛ nyɔ̍ bɔ̌ mɔ̀ i̍ boe-ɛ, “Ba̍ᵻ sɔ̀nᵻá nyni i̍ nyɔ̍ jii̍.”

³⁴Mɔ̀ ja mɔ̀-a wlùh de̍, mɔ̀ iě gblɛ̍n sɔ̀ɛ̀n nu̍ tìh bɔ̌. Dɛ̍nu̍ɛ, mɔ̀-a nyɔ̍ duuh se̍ Nyɔsoa juo. Ǐn bla̍ ɛ̀ la wɛ̀ ɛ̍ iě mɔ̀ tɛ̀n tùi.

³⁵Jɛ nyɔ̍-a mu̍ dɛ̍ i̍ tèle, “Ka mɛ̌-nyɔ̍-a mu̍-e wlǔh-ɛ nu̍ ɛ? Nɛ̀ ku̍ jɛwe̍ bo u̍h-a mu̍ blě ɛ?”

³⁶Sa̍a̍sa̍ bo àn sà-a. Dɛ̍ jɔ̌ɛ ìn tù-aɛ, ɛ̍ mu̍ mɛ̌ sasǎ wɛ̀ ɛ̍ iě wlǔh-ɛ dǔ.

³⁷Pò ɛ̍ tù kwǐ kɛnɛ̌ àe̍e̍ dɛ̍ jɔ̌ɛ dɛɛ-a chɛ̀ ìè tù-ɛ, ɛ̍ se̍ ɛ̍ gbau jɛ mu̍-a wlǔh-ɛ nɛ̀ tù, jɛ ɛ̍ jɔ̌ɛ bo àn tù.

³⁸Jɛ nɛ̀ ku̍ Nyɔsoa-a pɔ̀n-a ɛ̍ iě-a blě-ɛ, nɛ̀ ɛ̍ bo ɔ̍ nyǐ ɛ̍. Dɛ̍ jɔ̌ɛ jɛ-ɛ, nɛ̀ ɛ̍ naɛ ku̍ bo ɔ̍ nyǐ ɛ̍.

³⁹Ɛ̍ se̍ ku̍ kli̍hgbɛ̍ ìh se̍ wɔ̀ɛ-ɛ, jɛ nyi̍ɔ̍ blě u̍h naɛ, nmi̍i̍ blě i̍h naɛ, na̍wɛ̍ᵻ blě i̍h naɛ, iě smìi̍ blě i̍h naɛ.

⁴⁰Ja̍u̍n naɛ we̍ na dɛ̍ᵻ blě i̍h naɛ tu̍, iě bloa̍ naɛ blě i̍h naɛ tu̍. Ja̍u̍n naɛ-a jii̍ nmɔ-ɛ nɛ dǒ dɔɔ̌, wɛ̀ bloa̍ naɛ-a jii̍ nmɔ-ɛ nɛ dǒ dɔɔ̌.

⁴¹Jlǔh blě ɛ̍ naɛ jii̍ nmɔ-ɛ, iě chǔh blě ɛ̍ naɛ jii̍ nmɔ-ɛ, iě chǔhtlɛ̀n blě ɛ̍ naɛ jii̍ nmɔ-ɛ. Chǔhtlɛ̀n kli̍hgbɛ̍ se̍ wɔ̀ɛ-ɛ dǒ i̍h-a jii̍ nmɔ la.

⁴²Kǎ ɛ̍ mu̍ nɛ ke dǒ mɛ̌-nyɔ̍ ùh-a mu̍-ae wlǔh-ɛ we̍. Nyɔ̍-a ku̍-a mu̍ mɛ̌, jɛ ku̍ jɛ mu̍-ae wlǔh-ɛ, nɛ̀ ɛ̍ se̍ mɛ̌ mu̍ dɛ.

⁴³Pò ɛ̍ tè-eɛ i̍-ɛ, nɛ̀ ɛ̍ nyni jii̍, ɛ̍ se̍ gbǐh blě. Jɛ pò ɛ̍ wlǔh-eɛ, nɛ̀ ɛ̍ mu̍ jii̍ nmɔ ɛ̍ iě kmu.

⁴⁴Pò ɛ̍ tè-eɛ i̍-ɛ, nɛ̀ ɛ̍ nu̍ nyi̍ɔ̍ku, jɛ pò ɛ̍ wlǔh-eɛ, nɛ̀ ɛ̍ nu̍ ku̍ ɛ̀ Nyɔsoa-a Sùù nɛ-a dě ja̍a̍-ɛ. Nyi̍ɔ̍ku nɛ-o, wɛ̀ ku̍ ɛ̀ Sùù nɛ-a dě ja̍a̍-ɛ nɛ-o ke.

⁴⁵Nyɔsoa-a wlu̍ la̍a̍, “Sàǐtòò jɔ̍gbau Nyɔsoa nu̍-aa ɔ̍ nynɛ̌ bo Adaun.” Jɛ Adaun jɔ bɔ̌ɛ-aoɛ bo ɔ̀ nu̍ nyɔ̍ feɛ nyǐ nyɔ̍.

⁴⁶Nyi̍ɔ̍ku bo ɛ̀ ji̍ sàì, wɛ̀ ku̍ Nyɔsoa-a Sùù nɛ-a dě ja̍a̍-ɛ dǔ-o i̍ tba̍-a.

⁴⁷Sàǐtòò Adaun nui-ɛ blǔh nɔ̌ bloɔ̍, iě Adaun-a sɔɔ̌n naɛ sɔ dě ja̍i̍wlɔ̀.

⁴⁸Nyɔ̍ ùh kɔn-a dǒ blǔh we̍-ɛ, u̍h wɔ̀ nyɔ̍ ɔ̀ nui-a blǔh-ɛ. Nyɔ̍ ùh kɔn-a dǒ ja̍i̍wlɔ̀ we̍-ɛ, u̍h wɔ̀ nyɔ̍ ɔ̀ sɔ-a dě ja̍i̍wlɔ̀-ɛ.

⁴⁹Ka à wɔ̀-a jɔ̍gbau ɔ̀ nui-a blǔh-ɛ, kǎ à mu̍ jɔ̍gbau ɔ̀ sɔ-a dě ja̍i̍wlɔ̀-ɛ wɔ̀-ɛ nu̍ ke.

⁵⁰Ǐn de̍di̍i̍ᵻ, ǎn sèàɛ̍ mɔ̀ wlùh, nyi̍ɔ̍ku ke nymɔ̍ se̍ dě Nyɔsoa-a kmɔ̌ wlu̍ i̍ kɔn-ɛ di̍i̍ i̍ nyni̍-ɛ bɛ̌ɛ. Dɛ̍ ɛ̀ mu̍-a mɛ̌-ɛ, ɛ̍ se̍ dɛ̍ kɔn-ɛ bɛ̌ɛ dě dɛ̍ ɛ̀ se̍-a mɛ̌ la̍ kɔn-ɛ di̍i̍.

⁵¹Mɔ̀ po̍-e dounᵻ iě mɔ̀ dɛ̍ ɛ̀ nɛ-a dě slǎn-ɛ wlùh sèàɛ̍. À kli̍hgbɛ̍ à se̍ mɛ̌ mu̍, jɛ pò bɔ̌ɛ-o dɔ̍gbɛ̍ wlu-ɛ, ka nyɔ̍-a nu̍-a kǎbo-ɛ, kǎ à kli̍hgbɛ̍ à mu̍ sàɛ̀ nu̍ suei̍. Dɛ̍nu̍ɛ, pò dɔ̍gbɛ̍ wlu-ɛ, nyɔ̍ ùh mɛ̌-aɛ, u̍h-a mu̍-e wlǔh. Nɛ̀ u̍h se̍ mɛ̌ mu̍ dɛ, wɛ̀ à iě sàɛ̀ ke.

⁵²

⁵³Dɛ̍ ɛ̀ mu̍-a jii̍ nyni-ɛ ɛ̍ kɔn ɛ̍ iě dɛ̍ ɛ̀ se̍-a jii̍ nyni mu̍-ɛ ɛ̍ ku̍-u pa̍. Dɛ̍ ɛ̀ mu̍-a mɛ̌-ɛ, ɛ̍ kɔn ɛ̍ iě dɛ̍ ɛ̀ se̍-a mɛ̌ mu̍-ɛ ɛ̍ ku̍-u pa̍.

⁵⁴Pò dɛ̍ ɛ̀ mu̍-a jii̍ nyni-ɛ, ɛ̍ pa̍ dě dɛ̍ ɛ̀ se̍-a jii̍ nyni mu̍-ɛ ɛ̍ ku̍-ɛ, iě dɛ̍ ɛ̀ mu̍-a mɛ̌-ɛ ɛ̍ iě dě dɛ̍ ɛ̀ se̍-a mɛ̌ mu̍-ɛ ɛ̍ ku̍-u pa̍ wɛ̀-ɛ, nɛ̀ Nyɔsoa-a wlu̍-a mu̍ tìh-a taǐn nu̍. Ɛ̍ la̍a̍, “Nyɔsoa sà mɛ̌ɛ klà wɛ̀, iě ɔ̍ gbɔ̀lɔ ɛ̍-ɛ.”

⁵⁵“Mɛ̌ɛ, tà àn dɛ̍ klà sà-a nɛ-ɛ wɛ̀ ɛ? Mɛ̌ɛ, tà àn gbǐh ɛ̀ dbǎ-a nyɔ̍-ɛ nɛ dɛ ɛ?”

⁵⁶Mɛ̌ɛ-a sà ɛ̍ nyɔ̍ dbǎ gbǐh dě gblɛ̍n sɔ̀ɛ̀n we̍, iě gblɛ̍n sɔ̀ɛ̀n-a sà ɛ̍ gbǐh dě Mose-a telě di̍i̍.

⁵⁷Jɛ à po̍ Nyɔsoa tlɔ̌ ɔ̀ nyǐ-a à dɛ̍ klà sà-a dě à Joi Jusu Klai ja̍a̍-ɛ.

⁵⁸Ɛ̍ tìh-ɛ, ǐn de̍di̍i̍ᵻ, mɔ̀ ku̍-e klì i̍ mɔ̀ iě mɔ̀-a chɛ̀ i̍ kui. Mɔ̀ nu̍ Joi-a dbo̍ ti̍ kli̍hgbɛ̍ we̍, ka mɔ̀ juo-a dɛ̍-o-dɛ̍ mɔ̀-a mu̍-a nu̍ dǒ Joi we̍-ɛ, ɛ̍ se̍-a bu̍ɛ̍i̍ nu̍ mu̍-ɛ.