Read Western Krahn 1 Kɔwlɛntiɔn 3 Bible Online

1 Kɔwlɛntiɔn 3 - Western Krahn bible

1 Kɔwlɛntiɔn 3

¹Ǐn de̍di̍i̍ᵻ, ka ǐn nu̍-a dě Nyɔsoa-a Sùù blě nyɔ̍ we̍ wlu-ɛɛ, ǐn se̍ la̍a̍n wlu-ɛ nu̍-ɛ bɛ̌ɛ dě mɔ̀ we̍. Jɛ ǐn wlu dě mɔ̀ we̍ ka dě kmɔ̌ we̍ nɛ nyɔ̍-ɛ. Dɛ̍nu̍ɛ, mɔ̀ wɔ̀ nynuu̍pli ke̍ dě Klai wlùh gbaɛ di̍i̍.

²Ǐn nyǐ mɔ̀ nyɛnɛ nǐ. Ɛ̍ se̍ kmu-u di̍-dɛ̍ᵻ, dɛ̍nu̍ɛ, dǒ ti̍ laa̍ di̍i̍-ɛ, nɛ̀ mɔ̀ se̍ dǒ i̍h-a di̍ la̍ nɛ. Kaka-a chɛ̀-ɛ, mɔ̀ se̍-o nɛ ke̍.

³Dɛ̍nu̍ɛ, mɔ̀ wɔ̀ kmɔ̌-a nyɔ̍ ke̍. Wlɛ̀n nu̍-ɛ ke wɔ̍ɔ̍n i̍ sà-a nɛ-a dě mɔ̀ nynɛ̌-ɛ, nɛ̀ ɛ̍ se̍ kmɔ̌-a dɛ̍ᵻ mɔ̀-a se̍ nu̍ ke̍ gbɔ̀ɔ ae?

⁴Pò mɔ̀-a due la̍a̍, “Mɔ̍ Pɔɔ-a nyɔ̍,” wɛ̀ dɔɔ iě ka nu̍, “Mɔ̍ Apolo-a nyɔ̍-ɛ,” nɛ̀ mɔ̀ se̍ kmɔ̌ nyɔ̍ ke̍ ae?

⁵Nyɔ̍ bo ɔ̀ nu̍ Apolo ɛ? Iě nyɔ̍ bo ɔ̀ nu̍ Pɔɔ ɛ? Àɔ̀ Nyɔsoa-a pòi̍nynuu̍, àɔ̀ kɔn ja̍a̍ bo mɔ̀ jii wɛ̀ mɔ̀ blě ka wlùh gbaɛ. À jɔ-ɛ, nɛ̀ Joi nyǐ ɔ̍ naɛ dɛ̍ ɔ̍ iě nu̍.

⁶Mɔ̍ bo ɔ̀ tù dɛ̍, iě Apolo nyǐ ɛ̍ nǐ, jɛ nɛ̀ Nyɔsoa bo ɔ̀ nu̍ ɛ̍ wɛ̀ ɛ̍ ku̍.

⁷Nyɔ̍ ɔ̀ tù-a dɛ̍-ɛ ke ɔ̀ nyǐ-a ɛ̍ nǐ-ɛ u̍h-a tìh se̍ kma, jɛ Nyɔsoa-a tìh bo ɛ̀ kma. Dɛ̍nu̍ɛ, ɔ̍-ɔ bo ɔ̀ nu̍ ɛ̍ wɛ̀ ɛ̍ ku̍.

⁸Nyɔ̍ ɔ̀ tù-a dɛ̍-ɛ ke jɔ nyǐ-a ɛ̍ nǐ-ɛ, u̍h-a dbo̍ beɛ̍ɛ. Ɛ̍ tìh ka jɔ-a dbo̍ nɛ-ɛ, nɛ̀ kǎ ɔ̍ jě-dɛ̍ nɛ.

⁹Àɔ̀ Nyɔsoa-a pàn, iě mɔ̀ nu̍ Nyɔsoa-a klè. Iě mɔ̀ nu̍ ɔ̍ gbò dɛ ke.

¹⁰Nyɔsoa-a blɛ nɛ-ɛ bo ɛ̀ nu̍ ɛ̍ iě ǐn kàn gbò ka slɛ̌ kɔn nyɔ̍-ɛ, wɛ̀ nyɔ̍ dɔɔ-a poe ɛ̍ gbò kɛ̍n. Jɛ jɔ-ɛ, nɛ̀ ɔ̍ kɔn ɔ̍ iě nɛnɛ̌ nu̍ dǒ ɔ̍ naɛ gbò po̍ la̍.

¹¹Jusu Klai bo ɔ̀ nu̍ gbò Nyɔsoa kàn. Ɛ̍ we̍ gbò dɛɛ se̍ kàn-ɛ bɛ̌ɛ.

¹²Nyɔ̍ duuh-a mu̍ kòo̍ nu̍ iě duuh iě sebla̍ nu̍, duuh iě sɔɔ̌ᵻ chɛ̀ nu̍, duuh iě tu̍ᵻ nu̍, duuh iě pei nu̍, wɛ̀ duuh iě seɔn gbauᵻ nu̍ u̍h iě gbò po̍ dǒ ɛ̍ kɛ̍n.

¹³Jɔ kɔn ɔ̍ naɛ dbo̍-ɛ nɛ̀ ɛ̍ mu̍ jě-ɛ dǒ weɛ̍ Klai-a mu̍-a ja-ɛ di̍i̍. Dǒ weɛ̍ laa̍ di̍i̍ jɔ kɔn ɔ̍ naɛ dbo̍-ɛ, nɛ̀ nɛ̍-a mu̍ ɛ̍ kɛ̍n nyɛ-ɛ. Nɛ̍-a mu̍ ɛ̍ tɛ̀n, wɛ̀ ɛ̍ iě dbo̍ tu̍ ɛ̍ nu̍-aɛ to.

¹⁴Dɛ̍ ɛ̀ nyɔ̍ po̍-a dǒ gbò-a gbɔ̀ la kɛ̍n wɛ̀ ɛ̍ iě nɛ̍-i pǔh-ɛ, nɛ̀ ɔ̍ mu̍ ɛ̍ dɛ̍ we̍ jě.

¹⁵Jɛ nyɔ̍ ɔ̀ kɔn dbo̍-a mu̍-a si̍n-ɛ, nɛ̀ ɔ̍ dɛ̍ᵻ kli̍hgbɛ̍-a mu̍ mǎ. Ɔ̍ chɛ̀ nɔ̀ɔ̍, ɔ̍ mu̍ pǔh gbɛɛ, jɛ nɛ̀ ka nyɔ̍ jii dě nɛ̍-ɛ.

¹⁶Ka mɔ̀ nu̍-a Nyɔsoa-a slaǎ sà gbò wɛ̀ Nyɔsoa-a Sùù tǐn-a dě mɔ̀ ja̍a̍-ɛ, mɔ̀ se̍ i̍h juo ae?

¹⁷Pò nyɔ̍-o-nyɔ̍ gbɔ̀lɔ Nyɔsoa-a slaǎ sà gbò-ɛ, nɛ̀ Nyɔsoa-a mu̍ ɔ̍-ɔ gbɔ̀lɔ ke. Dɛ̍nu̍ɛ, Nyɔsoa-a slaǎ sà gbò tè-ɛ pɔ̌ dǒ ɔ̍ we̍. Mɔ̀ɔ̍ bo ùh nu̍ ɔ̍ slaǎ sà gbò-a chɛ̀.

¹⁸Mɔ̀-a nyɔ̍ bɔ̌ ɔ̍ chɛ̀ i̍ boe-ɛ. Pò nyɔ̍ nɛ dě mɔ̀ nynɛ̌ wɛ̀ ɔ̍ iě ɔ̍ chɛ̀ di̍i̍ i̍ flɔn nyɔ̍ dǎɛ nɔ̌ kmɔ̌ la we̍-ɛ, nɛ̀ ɔ̍ nu̍ ɔ̍ chɛ̀ bo-nyɔ̍ we̍i̍, wɛ̀ ɛ̍ iě ɛ̍ nu̍ ɔ̍ iě flɔ̍nwlùh blě.

¹⁹Dɛ̍ kmɔ̌ la ɛ̍ dǎɛ-a flɔ̍nwlùh-ɛ, nɛ̀ se̍o̍nɛ bo dǒ Nyɔsoa we̍. Nyɔsoa-a wlu̍ la̍a̍, “Ɔ̍ gbɛ̍n di̍i̍ i̍ flɔn nyɔ̍ dě u̍h-a chɛ̀-a gblàa̍ kɔn-ɛ di̍i̍.”

²⁰Ɔ̍ wlu̍ dɛɛ la̍a̍, “Joi juo ka di̍i̍ i̍ flɔn nyɔ̍-a wlùh i̍ naɛ dɛ̍ᵻ se̍-a dɛ̍kɛ̍n gbǎ-ɛ.”

²¹Ɛ̍ tìh-ɛ, nyɔ̍ bɔ̌ wlɔ̀ nyi̍ɔ̍-a bu̍hᵻ wlù i̍ po̍-ɛ. Dɛ̍ᵻ kli̍hgbɛ̍ kɔn dǒ mɔ̀ we̍.

²²Kaka la̍, Pɔɔ o, Apolo o, Pitɛ o, kmɔ̌ la o, kmɔ̌ nɛ-ɛ o, mɛ̌ɛ o, dɛ̍ᵻ nɛ-a kaka-ɛ ke jih-a mu̍-a nɛ dě nya̍-ɛ, mɔ̀ɔ̍ kɔn i̍h kli̍hgbɛ̍,

²³wɛ̀ mɔ̀ kɔn dǒ Klai we̍, iě Klai kɔn dǒ Nyɔsoa we̍.