Read Western Krahn 1 Kɔwlɛntiɔn 4 Bible Online

1 Kɔwlɛntiɔn 4 - Western Krahn bible

1 Kɔwlɛntiɔn 4

¹Mɔ̀ jě àɔ̀ Klai-a pòi̍nynuu̍ ka, ɛ̍ ke nyɔ̍ ùh-a sèàɛ̍-a Nyɔsoa-a slǎn wlu̍ we̍ i̍-ɛ ke.

²Dɛ̍ due ɛ̀ pòi̍nynuu̍ kaɛn la u̍h iě-a nu̍-ɛ, ɛ̍ nu̍ u̍h-a dlǔtu iě u̍h wlì tè.

³Mɔ̀ɔ̍ ke kmɔ̌ nyɔ̍-a ǎn i̍ chlɛ̌-ɛ nɔ̀ɔ̍, ǎn dounᵻ se̍-e nɛ. Nɛ̌ chlɛ̌-e ǎn chɛ̀ i̍-a chɛ̀ ke.

⁴Ǐn se̍ ǎn chɛ̀ dɛ̍ sɔ̀n pùn jě, jɛ ɛ̍ se̍ nɛ̀ ǐn gba̍ kɛ̀n kai. Jɛ Joi nɛ due bo ɔ̀ mu̍ ǐn i̍ chlɛ̌.

⁵Ɛ̍ tìh-ɛ, bɔ̌ nyɔ̍ tìh pùn jě-ɛ te̍e̍ wɛ̀ ti̍ iě nyni̍. Chlì Joi-a ji̍-ɛ we̍ i̍. Ɔ̍-ɔ bo ɔ̀ mu̍ dɛ̍ᵻ ìh sìle-a dě kwile-ɛ nɔ̌ sɔ̀npli we̍ ja, wɛ̀ ɔ̍ iě dɛ̍ᵻ nɛ-a dě nyɔ̍ wlùh di̍i̍-ɛ gbɔ̀ i̍ sà. Nɛ̀ ka jɔ-a nu̍-dɛ̍ nɛ-aɛ, kǎ Nyɔsoa-a mu̍ ɔ̍ tìhwe̍ po̍-ɛ nu̍.

⁶Ǐn de̍di̍i̍ᵻ, dɛ̍ ǎn sà-a dě mɔ̀ we̍-ɛ, ǎn pɔ̀n mɔ̀ iě dě ɛ̍ di̍i̍ i̍ wɔ̌n. Ɛ̍ kɔn wɛ̀ ǎn blaɛ ǐn ke Apolo dɛ̍ i̍, wɛ̀ mɔ̀ iě ìh à bla̍-aɛ i̍h-a gbɔ̀ juo. Mɔ̀ bɔ̌ ìh chlǐh-a dě Nyɔsoa-a wlu̍ di̍i̍-ɛ kɛ̍n tàn-ɛ. Nɛ̀ mɔ̀ bɔ̌ nyɔ̍ due-a bu̍hᵻ wlù i̍ po̍-ɛ, wɛ̀ mɔ̀ bɔ̌-o dɔɔ i̍ sie-ɛ.

⁷Nyɔ̍ bo ùh nu̍ mɔ̀ nynɛ̌ nyɔ̍ we̍i̍ dǒ mɔ̀ ba̍ᵻ kɛ̍n ɛ? Ɛ̍ se̍ Nyɔsoa ɔ̀ se̍ mɔ̀ dɛ̍ᵻ kli̍hgbɛ̍ nyǐ ae? Nɛ̀ɛ̍, dɛ̍nu̍ mɔ̀-a po̍ ɛ̍ naɛ bu̍hᵻ wlù i̍ ka nyɔ̍ la̍ dɛ̍ᵻ mɔ̀ blě-aɛ, nyɔ̍ se̍ i̍h mɔ̀ nyǐ-ɛ.

⁸Mɔ̀ blě dɛ̍ᵻ kli̍hgbɛ̍ mɔ̀-a pɔ̀n-aɛ wɛ̀, iě mɔ̀ pàn ke. Mɔ̀ nu̍ blǔh baaᵻ dǒ àɔ̀ kɛ̍n. Ɛ̍ mu̍ ǎn gbǐh po̍ dɛ̍ nu̍ de mɔ̀ iě blǔh baaᵻ nu̍ chɛ̀ɛ̌chɛ̀, wɛ̀ mɔ̀ ke à iě mɔ̀-a blǔh baaᵻ dɛ dɛ̍we̍ di̍.

⁹Mɔ̍ɔ, nɛ̀ na̍a̍ àɔ̀ gba̍tòà bo Nyɔsoa wɔ̀-ɛ de̍ dǒ dɛ̍ᵻ kli̍hgbɛ̍ we̍. Ka nyɔ̍ gbɛ̍n nyɔ̍ kàn wɛ̀ u̍h-a gba̍ u̍h dbǎ la̍ dǒ gbaɛ̍we̍-ɛ, kǎ à tìh nɛ, iě Nyɔsoa-a ǐnchɔ̀ ke nyɔ̍ kli̍hgbɛ̍-a jě àɔ̀ i̍.

¹⁰À nu̍ bo-nyɔ̍ Klai-a tìh, jɛ mɔ̀ɔ̍ nɔ̀ɔ̍-ɛ, mɔ̀ flɔn di̍i̍ i̍ dě mɔ̀ ke Klai-a due nɛ-ɛ di̍i̍. À gbǐh-a mɛ̌-ɛ, jɛ mɔ̀ɔ̍ nɔ̀ɔ̍-ɛ, mɔ̀ kmu i̍. Nyɔ̍-a tè mɔ̀ ja̍, jɛ u̍h-u tè àɔ̀ nɔ̀ɔ̍ ja̍.

¹¹Kaka la̍ mɔ̌ ke nǐ nǎ tɔ̌n-a nu̍ àɔ̀, à pa̍ jlii̍ sɔ̀nᵻ, iě nyɔ̍gbei-a bla̍ àɔ̀, wɛ̀ à se̍ tèla̍ kɔn.

¹²À nu̍ kmu-u dbo̍ dǒ à chɛ̀-a sɔ̍n gbǎ we̍. Pò nyɔ̍ chlèe àɔ̀-ɛ, nɛ̀ à sà-ɛ u̍h nǐ wɔ̍n. Pò u̍h jě-e àɔ̀ klě-ɛ, nɛ̀ à ku̍-e klì i̍ kleǐn.

¹³Pò nyɔ̍ chlèe àɔ̀-ɛ, nɛ̀ à peɛ-ɛ wlu̍ i̍ dě u̍h we̍. À wɔ̀ kmɔ̌ la ɛ̍ sɛɛn ìh u̍h-a po̍-a de̍ ti̍ kli̍hgbɛ̍ we̍-ɛ.

¹⁴Ǐn se̍ ɛ̀ la chlǐh dě mɔ̀ we̍ iě mɔ̀ ja̍a̍i̍ po̍, jɛ ǎn chlǐh ɛ̍ iě mɔ̀ dɛ̍ toe ka mɔ̀ nu̍-a ǎn chɛ̀-a tìh kma nynuu̍-ɛ.

¹⁵Pò mɔ̀-a jɛ blě nyɔ̍-a wlǔ pùè-a chɛ̀ u̍h ja mɔ̀ nǎ po̍ dǒ Klai dɛ we̍-ɛ, mɔ̀ se̍ baaᵻ dɔu blě. Dɛ̍nu̍ɛ, mɔ̍ bo ɔ̀ nu̍ mɔ̀ baa dě mɔ̀ ke Jusu Klai-a due nɛ-ɛ di̍i̍ dǒ pɔ̀n chɛ̀ ǐn ja-a dě mɔ̀ we̍-ɛ we̍.

¹⁶Ɛ̍ tìh-ɛ, ǐn gbɛ̍n mɔ̀-a bu̍hᵻ i̍, mɔ̀ iě-e ǎn wɔ̀ɔ̀ i̍ sà.

¹⁷Nɛ̀ɛ̍, Timote ɔ̀ nu̍-a ǎn jǔ dě Joi-a dbo̍ nu̍-ɛ di̍i̍ iě ǐn kma-a ɔ̍ tìh wɛ̀ ǐn tè-a ɔ̍ wlì-ɛ, ɔ̍-ɔ bo ǐn dbo̍ dě mɔ̀ we̍. Ǐn dbo̍ ɔ̍ ɔ̍ iě mɔ̀ tìh wlì i̍ sǐi ka ǎn kmɔ̌ nɛ-a dě Klai ja̍a̍, iě ǎn poe-a ɛ̍ nyɔ̍ nǎ dě chɔchi̍h nyɔ̍ kli̍hgbɛ̍ nynɛ̌-ɛ.

¹⁸Mɔ̀-a nyɔ̍ duuh-a bɛ̌-ɛ u̍h-a chɛ̀ i̍. Dɛ̍nu̍ɛ, u̍h jajeɛ̍ ǐn se̍ dě mɔ̀ we̍ ji̍ mu̍ dɛ de.

¹⁹Jɛ ǎn mu̍-e mɔ̀ we̍ ji̍ suei̍ pò Joi wɔ̌ɛn ɛ̍ kɛ̍n i̍-ɛ. Nyɔ̍ ùh-a bɛ̌-ɛa u̍h-a chɛ̀ i̍-ɛ, ǎn mu̍ ji̍ wɛ̀ iě jlǐhɛ̍ gba̍ iě u̍h-a gbǐh u̍h blě-aɛ jě. Ɛ̍ se̍ u̍h-a wlu-ɛ nɛ due ǐn se̍-e wɔ̌n la̍ ji̍.

²⁰Nyɔsoa-a kmɔ̌ wlu̍ i̍ kɔn-ɛ se̍ wlu-ɛ jbǎ, jɛ gbǐh nɛ-ɛ bo ɛ̍ kɔn dǒ we̍.

²¹Jɛwe̍ ɛ̀ mu̍ mɔ̀ gbǐh po̍ ɛ? Ǐn ja bliku iě mɔ̀ bla̍ ɛɛ, àe̍e̍ ǐn ja jbɛɛ ke gba̍n gbɛ̍n-ɛ dě wlùh wlǎ di̍i̍ ae?