Read Western Krahn 1 Kɔwlɛntiɔn 6 Bible Online

1 Kɔwlɛntiɔn 6 - Western Krahn bible

1 Kɔwlɛntiɔn 6

¹Pò mɔ̀-a nyɔ̍ gbǎ-ɛ ɔ̍ ba̍ chɔchi̍h nyɔ̍ jlǔh-uɛ, nɛ̀ tà ɔ̍ si̍e̍ Nyɔsoa nyɔ̍ nɔ̀ɔ̍, wɛ̀ ɔ̍ pɔ̀n nyɔ̍ ùh se̍-a i̍ slɛ̌-ɛ i̍ u̍h iě u̍h-a taɔ pa̍ ɛ?

²Mɔ̀ se̍ i̍h juo ka Nyɔsoa nyɔ̍-a mu̍-a kmɔ̌ la ɛ̍ taɔ nu̍-ɛ ae? Nɛ̀ɛ̍, pò mɔ̀ ja la̍ kmɔ̌ la ɛ̍ taɔ nu̍ mu̍-ɛ, nɛ̀ plǒai sɔ̀nwli-a taɔ bo mɔ̀ se̍ nu̍-ɛ bɛ̌ɛ ae?

³Mɔ̀ se̍ i̍h juo ka à mu̍-a Nyɔsoa-a ǐnchɔ̀-a taɔ nu̍-ɛ ae? Nɛ̀ dɛ̍ dɛɛ we̍ sie-o dɛ dǒ kmɔ̌ la ɛ̍ naɛ we̍ ɛ?

⁴Pò mɔ̀ blě sɔ̀nwli kaɛn la-ɛ, nɛ̀ dɛ̍nu̍ mɔ̀-a gba̍ i̍h nyɔ̍ ùh se̍-a dě chɔchi̍h i̍ nɛ-ɛ we̍ ɛ?

⁵Ɛ̍ nu̍ tɛ̀n dɛ̍ dǒ mɔ̀ we̍. Di̍i̍ flɔn nyɔ̍-a due-a chɛ̀ bo ɔ̀ se̍ dě mɔ̀ nynɛ̌ nɛ ɔ̀ iě mɔ̀-a tìh wlu̍ kɛ̍n po̍ dɛbo,

⁶ɛ̍ kɔn mɔ̀-a sǔh-a sì sàwi̍h dǒ se̍ wlùh gbaɛ blě nyɔ̍ jǔ ae?

⁷Pò mɔ̀-a sǔh ja sàwi̍h sì-ɛ, nɛ̀ ɛ̍ wàn-ɛ mɔ̀ i̍. Nɛ̀ mɔ̀-ɔ gbɛ̍n wlùh i̍-a chɛ̀ u̍h iě mɔ̀ dɛ̍ sɔ̀n pùn nu̍ ae? Nɛ̀ mɔ̀-ɔ gbɛ̍n wlùh i̍ u̍h iě mɔ̀ kanieǐ di̍ ae?

⁸Jɛ mɔ̀-a chɛ̀ bo ùh-a nu̍ dɛ̍ᵻ sɔ̀nᵻ, iě mɔ̀-a di̍ nyɔ̍ kanieǐ, mɔ̀-a nu̍ ɛ̍ mɔ̀-a chɔchi̍h de̍di̍i̍ᵻ pùn bei.

⁹Mɔ̀ juo ɛ̍, ka nyɔ̍ ùh se̍-a i̍ slɛ̌-ɛ, u̍h se̍-a dě Nyɔsoa-a kmɔ̌ wlu̍ i̍ kɔn-ɛ di̍i̍ nyni̍ mu̍-ɛ. Mɔ̀ bɔ̌ mɔ̀-a chɛ̀ i̍ boe-ɛ, gbǎn nu̍ nyɔ̍ ke, kwɛ̍i̍n gbo̍ᵻ wɛɛ sà nyɔ̍ ke, nynɛ̌à nu̍ nyɔ̍ ke, tba̍ɛ kɛ̍n i̍ nu̍ nyɔ̍ ke,

¹⁰jlǐ-nyɔ̍ ke, klǎn kɔn nyɔ̍ ke, chɛ̀ nmɔ̍ wlì sìèè nyɔ̍ ke, wlu̍ wɔ̍ɔ̍n i̍ nyni nyɔ̍ ke, ɛ̍ ke dɛ̍ᵻá kloǒ nu̍ nyɔ̍ ke u̍h se̍ dě Nyɔsoa-a kmɔ̌ wlu̍ i̍ kɔn-ɛ di̍i̍ nyni̍ mu̍.

¹¹Kǎ mɔ̀-a nyɔ̍ duuh nɛ de, jɛ mɔ̀ wɛ̀ nɛi̍ wɛ̀, iě mɔ̀ kɔn dǒ Nyɔsoa we̍. Mɔ̀ slɛ̌ i̍ wɛ̀ dě Nyɔsoa jlǐh dǒ ɔ̍ Sùù we̍, ɛ̍ ke dǒ à Joi Jusu Klai-a nynɛ̌ kɛ̍n ke.

¹²Nyɔ̍-a mu̍ ka dǎ, “Dɛ̍ᵻ kli̍hgbɛ̍ se̍ kɛɛkɛ̍n nɛ dǒ ǐn we̍.” I̍i̍n, ka ɛ̍ nɛ, jɛ ɛ̍ se̍ dɛ̍ᵻ kli̍hgbɛ̍ ìh se̍-o ìn dɛ̍ po̍ mu̍. “Dɛ̍ᵻ kli̍hgbɛ̍ se̍ kɛɛkɛ̍n nɛ dǒ ǐn we̍.” Jɛ ǐn se̍ dɛ̍-o-dɛ̍-a kèi̍ nu̍ tìh i̍ wɔ̌ɛn mu̍.

¹³Nyɔ̍ dɔɔ-a mu̍ ka dǎ, “Di̍-dɛ̍ kɔn dǒ kwlǐ we̍, wɛ̀ kwlǐ kɔn dǒ di̍-dɛ̍ we̍.” I̍i̍n, ka ɛ̍ nɛ, jɛ ɛ̍ mu̍ weɛ̍ kɔn wɛ̀ Nyɔsoa iě i̍h nɛ-a sɔɔ̌n-ɛ gbɔ̀lɔ. Nyɔ̍-a ku̍ se̍ dǒ gbǎn nu̍-ɛ we̍ kɔn. Ɛ̍ kɔn dǒ Joi Jusu we̍, wɛ̀ Joi kɔn ɛ̍ wlu̍ i̍.

¹⁴Ka Nyɔsoa sà-e Joi-ɛ, ɔ̍ mu̍ àɔ̀ dě-e sà ke dǒ ɔ̍ gbǐh we̍.

¹⁵Mɔ̀ se̍ i̍h juo ka mɔ̀-a ku̍ ke Klai-a ku̍ nɛ-a due-ɛ ae? Nɛ̀ Klai-a ku̍ bo iě-e dǔ, wɛ̀ iě ɛ̍ kàìà nynɔ̌-a ku̍ we̍i̍ nu̍ ae? Sakǒ lě.

¹⁶Mɔ̀ se̍ i̍h juo ka nyɔ̍ ɔ̀ ke kàìà nynɔ̌ po̍-a dlǔ tàdùè i̍-ɛ, nɛ̀ u̍h-a ku̍ nɛ-a due-ɛ ae? Nyɔsoa-a wlu̍ la̍a̍, “U̍h nɛ-a sɔɔ̌n-ɛ, u̍h-a mu̍ nyɔ̍ due nu̍.”

¹⁷Nɛ̀ nyɔ̍ ɔ̀ ke Joi tùi-a i̍-ɛ, nɛ̀ ɔ̍ ke ɔ̍ wlùh nɛ due.

¹⁸Sà gbǎn nu̍-ɛ sɔ̍n di̍i̍. Gblɛ̍n sɔ̀ɛ̀n jih sie-a dǒ de̍-ɛ, i̍h-i nui nyɔ̍-a ku̍ dɛ̍, jɛ nyɔ̍ ɔ̀ nu̍-a gbǎn-ɛ, nɛ̀ ɔ̍ nu̍ ɔ̍ chɛ̀-a ku̍ gblɛ̍n sɔ̀ɛ̀n pùn wɛ̀.

¹⁹Nyɔsoa-a Sùù ɛ̀ nɛ-a dě mɔ̀ ja̍a̍-ɛ, ka mɔ̀-a ku̍ nu̍-a ɛ̍ slaǎ sà gbò-ɛ, mɔ̀ se̍ i̍h juo ae? Mɔ̀ se̍ dǒ mɔ̀-a chɛ̀ we̍ kɔn o.

²⁰Ɔ̍ po̍ mɔ̀-a pɛlǔh. Ɛ̍ tìh-ɛ, mɔ̀ nu̍ ɛ̍ mɔ̀-a ku̍ iě Nyɔsoa-a nynɛ̌ i̍ bɛ̌-ɛ.