Read Western Krahn 1 Kɔwlɛntiɔn 8 Bible Online

1 Kɔwlɛntiɔn 8 - Western Krahn bible

1 Kɔwlɛntiɔn 8

¹Nɛ̀ɛ̍, ɛ̀ la bo ɛ̀ tba̍ dǒ kwɛ̍i̍n gbo̍ᵻá slaǎ sà di̍-dɛ̍ᵻ pùn i̍. À juo i̍h ka “à kli̍hgbɛ̍ à blě-a tɔɔ-ɛ.” Jɛ tɔɔ-a bɛ̌-ɛ ɛ̍ chɛ̀ i̍, wɛ̀ jbɛɛ nɔ̀ɔ̍, ɛ̍ po̍ muɔ.

²Nyɔ̍ ɔ̀ la̍ ɔ̀ juo-a dɛ̍-ɛ, nɛ̀ ɔ̍ se̍ ɛ̍ juo ka ɔ̍ kɔn ɔ̍ iě-a ɛ̍ juo-ɛ nu̍-ɛ.

³Jɛ nyɔ̍ ɔ̀ jbɛɛ-a Nyɔsoa-aɛ, nɛ̀ Nyɔsoa juo ɔ̍-ɛ.

⁴Ɛ̍ tìh-ɛ, di̍-dɛ̍ᵻ u̍h-a sà-ɛa slaǎ dǒ kwɛ̍i̍n gbo̍ᵻ we̍-ɛ, kǎ i̍h-a di̍-i tìh nɛ ka. À kli̍hgbɛ̍ à juo i̍h ka kwɛ̍i̍n gbo̍ se̍-a feɛ blě nɔ̌ kmɔ̌ la we̍-ɛ. Nɛ̀ à juo ka Nyɔsoa nɛ-a due gbài̍-ɛ.

⁵Nyɔ̍ duuh la̍ u̍h-a nyɔsoa diih nɛ dě ja̍i̍wlɔ̀ àe̍e̍ nɔ̌ bloɔ̍. U̍h juo ɛ̍ dǒ u̍h-a chɛ̀ we̍ ka nyɔsoa dɔu ke joi dɔu nɛ-aɛ.

⁶Jɛ àɔ̀ nɔ̀ɔ̍-ɛ, à blě Nyɔsoa due gbài̍. Baa ɔ̀ nu̍-a dɛ̍ᵻ kli̍hgbɛ̍-ɛ, ɔ̀ à nɛ-ɛa kmɔ̌-ɛ bo. Nɛ̀ à blě Joi due gbài̍. Jusu Klai, ɔ̀ kɔn ja̍a̍ dɛ̍ᵻ kli̍hgbɛ̍ nui-aɛ bo. Ɔ̍ kɔn ja̍a̍ bo à nɛ-ɛ kmɔ̌.

⁷Jɛ ɛ̍ se̍ nyɔ̍ kli̍hgbɛ̍ ùh se̍ tɔɔ la blě. Kwɛ̍i̍n gbo̍ᵻ dɛ ju̍o̍e dě nyɔ̍ duuh jlǐh i̍ wɛ̀. Ɛ̍ kɔn pò u̍h di̍ di̍-dɛ̍ᵻ nɛ ka-aɛ, nɛ̀ u̍h jajeɛ̍ kwɛ̍i̍n gbo̍ᵻ kɔn i̍h de. Nɛ̀ ɛ̍ kǎ u̍h-a wlùh-u kaa̍. Sɔ nɛ̀ u̍h jajeɛ̍ i̍h nyni-i u̍h dě Nyɔsoa jlǐh i̍ de.

⁸Di̍-dɛ̍ᵻ se̍ à Nyɔsoa we̍ gba̍ mu̍. À se̍-e de̍ i̍ gbǎ mu̍ pò à se̍ dɛ̍ di̍-ɛ. Iě dɛ̍ di̍-ɛ wɔ̍ se̍-o à dɛ̍ po̍ mu̍ ke.

⁹Ɛ̍ tìh-ɛ, mɔ̀ nu̍ nɛnɛ̌ mɔ̀-a de̍e̍ i̍ flɔn-ɛ je̍e nyɔ̍ ùh kɔn wlùh gbaɛ se̍-a i̍ ku̍-ɛ blu̍ja̍a̍ po̍.

¹⁰Pò nyɔ̍ jě mɔ̀ɔ̍ tɔɔ blě nyɔ̍-a dɛ̍ di̍ la̍ dě kwɛ̍i̍n gbo̍ᵻá slaǎ sà gbò sɔ̀n-ɛ, nɛ̀ ɛ̍ mu̍ u̍h-a wlùh kǎ. Ɛ̍ mu̍ u̍h-a wlùh fùka wɛ̀ u̍h iě di̍-dɛ̍ᵻá chɛ̀ di̍ ke.

¹¹Nɛ̀ɛ̍, àn tɔɔ blě tìh bo ìn de̍di̍i̍ iě-e gbɔ̀lɔ ae? Ɔ̍ wlùh gbaɛ se̍ i̍ ku̍ gbɛɛ, jɛ ɔ̍ tìh bo Klai mɛ̌ ke.

¹²Pò mɔ̀ ja gblɛ̍n sɔ̀ɛ̀n nɛka i̍ nu̍ dǒ mɔ̀ de̍di̍i̍ᵻ pùn mɔ̀ ja u̍h-a wlùh kǎ-ɛ, nɛ̀ Klai bo mɔ̀-a nu̍ gblɛ̍n sɔ̀ɛ̀n pùn.

¹³Ɛ̍ tìh-ɛ, nmi̍ɛ̍ ǎn di̍-aɛ, pò ɛ̍ ja ǐn de̍di̍i̍ i̍ kà mu̍ dě gblɛ̍n sɔ̀ɛ̀n di̍i̍-ɛ, nɛ̀ ǐn se̍ ɛ̍ di̍ mu̍ dɛ kleǐnklein, wɛ̀ nɛ̌ je̍e ǐn de̍di̍i̍ i̍ kà dě gblɛ̍n sɔ̀ɛ̀n di̍i̍.