Read Western Krahn 2 Kɔwlɛntiɔn 12 Bible Online

2 Kɔwlɛntiɔn 12 - Western Krahn bible

2 Kɔwlɛntiɔn 12

¹Ǐn kɔn iě wɔ̍i̍n po̍. Ɛ̍ se̍-o dɛ̍ po̍ mu̍ gbɛɛ, jɛ ǎn mu̍ se̍ mɔ̌ ja̍ᵻ ke nyɔ̍ i̍ toe dɛ̍ᵻ Joi toe-a m-ɛ sà.

²Ǐn juo jɔ̍gbau ɔ̀ gbaɛ-a Klai wlùh iě Nyɔsoa gba̍-a dě ja̍i̍wlɔ̀ tà Nyɔsoa tè-a i̍-ɛ. Ɛ̍ nɛ-aɛ, sɔ̀nᵻá pùè jɔ̌ nyìɛ̍ sì wɛ̀. Ǎn chɛ̀ bo ǎn dǎ. Ǐn se̍ ɛ̍ juo pò ǐn nɛ dě ǎn nyi̍ɔ̍ku di̍i̍ chɛ̀ iě ǐn gba̍-ɛ deě-ɛ. Nyɔsoa nɛ due bo ɔ̀ juo ɛ̍.

³Na̍a̍ dɛ-ɛ, ǐn juo jɔ̍gbau la ɔ̍ gba̍-a dě Wlɔ̀ Plǔ di̍i̍-ɛ. Ǐn se̍ ɛ̍ juo pò ǐn nɛ dě ǎn nyi̍ɔ̍ku di̍i̍ chɛ̀ iě ǐn gba̍-ɛ deě-ɛ. Nyɔsoa nɛ due bo ɔ̀ juo ɛ̍.

⁴Dě ǐn wɔ̌n-ɛ dɛ̍ᵻ nyɔ̍ se̍-a sà-a bɛ̌ɛ-ɛ, ìh wlɔ̀ nyi̍ɔ̍ se̍-a kɔn u̍h iě-a sà-ɛ.

⁵Ǎn mu̍ wɔ̍i̍n po̍ dǒ dɛ̍ᵻ la we̍, jɛ ǐn se̍ wɔ̍i̍n po̍ mu̍ dǒ dɛ̍ᵻ di̍i̍h we̍. Dɛ̍ᵻ ìh-a to-a ǎn gbǐh-a sɔɔn nu̍-ɛɛ, i̍h kɔn tɛ̀ ǐn sà-o.

⁶Pò ǐn ja pɔ̀n iě wɔ̍i̍n po̍ de-ɛ, ǐn se̍ bo-nyɔ̍ nu̍ mu̍ de. Dɛ̍nu̍ɛ, ǎn mu̍ tìh-a taǐn sà. Jɛ ǐn se̍ wɔ̍i̍n po̍ mu̍. Dɛ̍nu̍ɛ, ǐn se̍ pɔ̀n nyɔ̍-o-nyɔ̍ iě ǐn ja̍ tè kaa̍ dǒ dɛ̍ᵻ ɔ̍ jě-a m ǐn nu̍-aɛ ke ìh ǐn sà-a ɔ̍ wɔ̌n-aɛ we̍.

⁷Wiǎ poe-ɛ dě ǐn ku̍u̍ wɛ̀ ɛ̍ iě ɛ̍ nu̍ nɛ̌ je̍e ǎn chɛ̀ i̍ bɛ̌-ɛ dǒ blɔ̌-ɛ we̍ dǒ dɛ̍ᵻ chɛ̀ Nyɔsoa toe-a m-ɛ we̍. Wiǎ la ɛ̍ wɔ̀ Setɔn-a tu̍owli po̍ nyɔ̍, wɛ̀ ɛ̍ iě ǐn nu̍ nɛ̌ je̍e blɔ̌.

⁸Ǐn nu̍ ba̍le-ɛa gbɔ̍ᵻ ta̍a̍n Joi iě ɛ̍ dǒ ǐn de̍e̍ sà.

⁹Jɛ ɔ̍ la̍a̍ dě ǐn we̍, “Ǎn blɛ nɛ-ɛ nu̍ ɛ̍ wɛ̀ ìn blě dɛ̍ᵻ kli̍hgbɛ̍ ìn kɔn iě-a blě-ɛ. Ǎn gbǐh-a kmu i̍ kaa̍ pò àn gbǐh ja sɔɔn nu̍-ɛ.” Ǎn mu̍ mɔna̍-a gbǎ kaa̍ wɛ̀ iě wɔ̍i̍n po̍ dǒ ǎn gbǐh-a sɔɔn nu̍-ɛ we̍, wɛ̀ Klai-a gbǐh iě ǐn kɛ̍n kaɛn.

¹⁰Klai-a tìh bo ǎn wɔ̌ɛn ǎn gbǐh-a sɔɔn nu̍-ɛ ke, ǎn chlèe-ɛ ke, tìh jě-ɛ ke, klè jě-ɛ ke jua̍i̍ sàɛ̀ ke. Pò ǎn gbǐh ja sɔɔn nu̍-ɛ nɛ̀ ǎn kmu i̍.

¹¹Ǐn nu̍ dɛ̍ᵻ ka bo-nyɔ̍-ɛ, jɛ mɔ̀ɔ̍ bo ùh nu̍ ɛ̍. Mɔ̀ɔ̍ bo ùh kɔn ùh iě ǎn tìh-a bu̍hᵻ wlù i̍ po̍ de. Ǐn se̍ dɛ̍-a chɛ̀ gbɛɛ, jɛ ǐn se̍ gba̍tòà-a konynǐ naɛ dǒ nyɔ̍ la mɔ̀-a dǎɛ-a Klai-a gba̍tòà klaaᵻɛ́ kɛ̍n.

¹²Jbaɛdih ke nyɔ̍ wɔ̍n flɔn-ɛ dɛ̍ᵻ ke dɛ̍ᵻ klaaᵻ nui-ɛ dě mɔ̀ nynɛ̌, iě i̍h to ɛ̍ ka ǐn nu̍-a Klai-a gba̍tòà dǒ ǎn wlùh i̍ gbɛ̍n-ɛ we̍ kaa̍.

¹³Dɛ̍ ǐn nu̍ mɔ̀ pùn kaa̍ ɛ̀ sìì chɔchi̍h nyɔ̍ duuh ɛ? Ǐn se̍ mɔ̀ wlǐ tba̍ dǒ ǎn dbo̍ we̍. Ka ǐn se̍-a mɔ̀ wlǐ tba̍-ɛ, pò ɛ̍ tù mɔ̀-a dɛ̍ sɔ̀n iě nu̍-ɛ, nɛ mɔ̀ tǎli ǎn dɛ̍ sɔ̀n la ɛ̍ tìh i̍.

¹⁴Dě mɔ̀ we̍ i̍ nala ji̍-ɛa gbɔ̍ᵻ ta̍a̍n naɛ kɔn ti̍ bo ǐn jě wɛ̀ iě-e mɔ̀ we̍ ji̍. Ǐn se̍ mɔ̀ dɛ̍-ɛ i̍ pɔ̀n-ɛ mu̍. Ǐn se̍ mɔ̀-a kɔn-dɛ̍ᵻ i̍ pɔ̀n, jɛ mɔ̀-a chɛ̀ bo ǎn pɔ̀n i̍. Nynuu̍ se̍ kɔn u̍h iě dǒ u̍h baaᵻ we̍ i̍ gbɛ̀n, jɛ baaᵻ bo ùh kɔn ùh iě dǒ u̍h-a nynuu̍ we̍ i̍ gbɛ̀n.

¹⁵Ɛ̍ mu̍ ǐn gbǐh po̍ kaa̍ iě ǎn dɛ̍ᵻ kli̍hgbɛ̍ àe̍e̍ ǎn chɛ̀ ple̍ dǒ mɔ̀-a sùù we̍. Ǐn jbɛɛ mɔ̀ɔ̍ kaa̍, nɛ̀ mɔ̀-a ǐn jbɛɛ-ɛ kɔn ɛ̍ iě i̍ wàn ae?

¹⁶Mɔ̀-a mu̍ ǐn we̍ wɔ̌ɛn ka ǐn se̍-a mɔ̀ dɛ̍-ɛ i̍ pɔ̀n-ɛɛ. Jɛ nyɔ̍ dɔɔ-a mu̍ ka nu̍ ǐn kɔn gblàa̍ iě ǐn poe mɔ̀ gblàa̍ i̍ dǒ si̍h we̍.

¹⁷Nyɔ̍ ǐn dbo̍-a dě mɔ̀ we̍-ɛ, u̍h-a nyɔ̍-o-nyɔ̍ di̍ mɔ̀ kanieǐ ae?

¹⁸Ǐn ba̍le Taitɔ ɔ̍ iě mu̍, iě ǐn dbo̍ ɔ̍ ke à de̍di̍i̍. Taitɔ di̍ mɔ̀ kanieǐ ae? Ɔ̍ ke ǐn ke à wlùh nɛ due iě à nu̍-dɛ̍ᵻ se̍ wɔ̀ɛ-ɛ ae?

¹⁹Nyɔ̍-se̍-juo mɔ̀-a naɛ wlùh i̍ ti̍ kli̍hgbɛ̍ we̍, mɔ̀ la̍ à sà à chɛ̀ tìh dlǔ i̍ dǒ mɔ̀ jǔ. À wlu-i dǒ Nyɔsoa jǔ ka Klai-a pòi̍nynuu̍-ɛ. À tìh kma nyɔ̍, dɛ̍ᵻ kli̍hgbɛ̍ à nu̍-aɛ, à nu̍ i̍h i̍h iě-o mɔ̀ dɛ̍ po̍.

²⁰Ǎn ple̍ faɔn pò ǐn ji̍ dě mɔ̀ we̍-ɛ, nɛ̌ je̍e mɔ̀ kɛ̍n jɛɛ wɛ̀ ka ǎn pɔ̀n-a mɔ̀ iě-a nɛ-ɛ, mɔ̀ɔ̍ se̍ la̍a̍n nɛ. Wɛ̀ nɛ̌ se̍-e ka mɔ̀-a pɔ̀n-a iě-a nɛ-ɛ nɛ ke. Nyɔ̍-se̍-juo wɔ̍ɔ̍n i̍ sà-a ke, wlɛ̀n nu̍-ɛ ke, jlu̍h-u gbǎ-a ke, klǎn kɔn-ɛ ke, nyɔ̍ wlu̍ sɔ̀nᵻ pùn i̍ po̍-ɛ ke, nyɔ̍ chɛ̍n-ɛ ke, nyɔ̍-a chɛ̀ i̍ bɛ̌-ɛɛ ke dɛ̍ᵻ ja̍i̍ gbà-a je̍e dě mɔ̀ nynɛ̌ nɛ.

²¹Ǎn ple̍ faɔn pò ǐn ji̍ dě mɔ̀ we̍ dɛ-ɛ, ǎn Nyɔsoa-a mu̍ ɛ̍ nu̍ iě mɔ̀-a tɛ̀n ple̍. Nyɔ̍-se̍-juo ǎn mu̍ sùàɛ̀n pa̍ dǒ nyɔ̍ dɔu ùh nu̍-a gblɛ̍n sɔ̀ɛ̀n sàì wɛ̀ ùh se̍-a i̍h kɛ̍n i̍ poe dǒ u̍h-a chɛ̀-a sììjii̍ nu̍-ɛ ke, gbǎn nu̍-ɛ ke se̍i̍kɔɛn u̍h nu̍-a we̍.