Read Western Krahn 2 Kɔwlɛntiɔn 13 Bible Online

2 Kɔwlɛntiɔn 13 - Western Krahn bible

2 Kɔwlɛntiɔn 13

¹Dě mɔ̀ we̍ i̍ nala ji̍-ɛ gbɔ̍ᵻ ta̍a̍n naɛ bo ǎn ji̍-a nu̍ la̍. Nyɔsoa-a wlu̍ la̍a̍, “Sɔ̀nwli kli̍hgbɛ̍ i̍h kɔn i̍h iě sàànsi̍i̍h sɔɔ̌n àe̍e̍ ta̍a̍n blě, wɛ̀ i̍h iě we̍i̍ flɔn.”

²Ǐn tù nyɔ̍ ùh nu̍-a gblɛ̍n sɔ̀ɛ̀n sàǐtòò-ɛ slɛ̌n, ɛ̍ ke nyɔ̍ duuh ke. Ka ǐn nu̍-a u̍h slɛ̌n tù-ɛ dě ǎn u̍h we̍ i̍ nala mu̍-ɛa gbɔ̍ᵻ sɔɔ̌n naɛ di̍i̍-ɛ, kǎ ǎn mu̍ u̍h slɛ̌n tù-ɛ nu̍ dɛ kaka ka ǐn se̍-a dě u̍h we̍ nɛ-ɛ. Pò ǐn ji̍ dě u̍h we̍ dɛ-ɛ, nɛ̀ nyɔ̍-o-nyɔ̍ se̍-o tàn mu̍ dǒ kàn gbɛ̍n-ɛ we̍.

³Ǎn mu̍ ɛ̍ nu̍, dɛ̍nu̍ɛ, mɔ̀-a pɔ̀n dɛ̍ ɛ̍ iě ɛ̍ to ka Klai-a wlu-ia dě ǐn ja̍a̍-ɛ. Ɔ̍ gbǐh-i nu̍ sɔɔn dǒ mɔ̀ dɛ̍ pùn nu̍-ɛ we̍, jɛ ɔ̍ to ɔ̍ gbǐh-a i̍ bɛ̌-ɛ dě mɔ̀ nynɛ̌.

⁴Ɔ̍ dbǎ-ɛ dǒ gbàɛ̍ kɛ̍n i̍ tu̍ wlì ti̍ ɔ̍ gbǐh-a nu̍-a sɔɔn-ɛ. Jɛ ɔ̍ nɛ kmɔ̌ dǒ Nyɔsoa-a gbǐh we̍. Dě à ke Klai-a due nɛ-ɛ di̍i̍-ɛ, à gbǐh-a nu̍ sɔɔn ke. À nɛ kmɔ̌ dě ɔ̍ we̍ dǒ Nyɔsoa-a gbǐh we̍ mɔ̀-a jǔ dbee tìh.

⁵Mɔ̀ chlɛ̌ mɔ̀-a chɛ̀ i̍ pò mɔ̀ blě wlùh gbaɛ chɛ̀ɛ̌chɛ̀-ɛ. Mɔ̀ tɛ̀n mɔ̀-a chɛ̀-ɛ. Mɔ̀ se̍ i̍h juo ka Jusu Klai nɛ-a dě mɔ̀ ja̍a̍-ɛ ae? Pò mɔ̀ pɔ̀ dě mɔ̀-a tɛ̀n-ɛ di̍i̍-ɛ, ɛ̍ kɔn tɛ̀ ǐn sà-o.

⁶Ǐn tè ɛ̍ wlì, mɔ̀-a mu̍ i̍h juo ka à se̍-a pɔ̀-ɛ.

⁷À ba̍le Nyɔsoa mɔ̀ɔ̍ je̍e dɛ̍ sɔ̀n nu̍. Ɛ̍ se̍ nɛ̀ à iě dě nyɔ̍ jlǐh i̍ nmɔ kai, jɛ wɛ̀ mɔ̀ iě dɛ̍ ɛ̀ slɛ̌-a i̍-ɛ nu̍ dɛbo, pò nyɔ̍ ja à pɔ̀-ɔ nyɔ̍ dǎɛ.

⁸À se̍ dɛ̍-o-dɛ̍ nu̍-ɛ bɛ̌ɛ pɔ̀n chɛ̀-a bu̍hᵻ tbaɛ tìh. Jɛ dɛ̍ᵻ ìh-a mu̍-a pɔ̀n chɛ̀ we̍ gbǎ-ɛ nɛ due bo à bɛ̌ɛ à iě nu̍.

⁹À gbǎ mɔna̍-a pò à gbǐh ja sɔɔn nu̍ iě mɔ̀ iě kmu-ɛ. Dɛ̍ kɔn tìh à ba̍le-aɛ, ɛ̍ nu̍ mɔ̀ iě gblɛ̍ja̍i̍ wɛ̀.

¹⁰Ǐn chlǐh chlǐh-dɛ̍ la ti̍ ǐn se̍-a dě mɔ̀ we̍ nɛ-ɛ, ɛ̍ iě ɛ̍ nu̍ pò ǐn ji̍-ɛ wɛ̀ nɛ̌ je̍e wɔ̍n kma dǒ tùn Joi nyǐ-a m-ɛ we̍. Ɔ̍ nyǐ ǐn tùn iě mɔ̀ gbǐh ku̍u̍ po̍, ɛ̍ se̍ mɔ̀ɔ̍ gbɔ̀lɔ tìh.

¹¹Ɛ̀ bɔ̌ɛ-aoɛ ǐn de̍di̍i̍ᵻ, mɔ̀ à nɛ klàe̍. Mɔ̀ fɔ̀n dɛ̍ we̍ mɔ̀ iě gblɛ̍ja̍i̍ wɛ̀. Mɔ̀ nu̍ ǎn slɛ̌n tù wlu̍, mɔ̀ wɔ̌ɛn wlu̍ i̍. Mɔ̀ na-ɛe wlùh-a i̍ tè-ɛ di̍i̍, nɛ̀ Nyɔsoa ɔ̀ jbɛɛ-a àɔ̀ iě ɔ̍ nyǐ-a à wlùh-a i̍ tè-ɛ, nɛ̀ ɔ̍ mu̍ mɔ̀ we̍ nɛ-o.

¹²Mɔ̀ gblèè mɔ̀ ba̍ᵻ Nyɔsoa nyɔ̍ dǒ nyinɔ̍ i̍ sèàɛ̍ la̍.

¹³Nyɔsoa nyɔ̍ kli̍hgbɛ̍ la̍ u̍h sà mɔ̀ nyinɔ̍ i̍.

¹⁴Ǎn sà nǐ wɔ̍n Joi Jusu Klai-a blɛ nɛ-ɛ ke Nyɔsoa-a jbɛɛ iě mɔ̀ we̍ nɛ. Mɔ̀ kli̍hgbɛ̍ ke Nyɔsoa-a Sùù nɛ̍aɛ we̍.