Read Western Krahn 2 Kɔwlɛntiɔn 4 Bible Online

2 Kɔwlɛntiɔn 4 - Western Krahn bible

2 Kɔwlɛntiɔn 4

¹Dě Nyɔsoa-a wɔɛ kɔn-ɛ di̍i̍ bo ɔ̍ nyǐ-i àɔ̀ dbo̍ la à iě nu̍. Ɛ̍ tìh-ɛ, à se̍ se̍a̍ dǒ dbo̍ nu̍ la̍.

²À se̍ sìle dɛ̍ᵻ ke tɛ̀n dɛ̍ᵻ kli̍hgbɛ̍-a ti̍ blě. À-a nu̍ nyɔ̍ i̍ boe dɛ̍ᵻ, à-a sà-ɛ Nyɔsoa-a wlu̍ gbààn i̍ ke. Jɛ tìh-a taǐn nɛ due bo à bla̍. À fɔ̀n dɛ̍ we̍ à iě dě nyɔ̍ kli̍hgbɛ̍ jlǐh i̍ nmɔ dǒ Nyɔsoa jǔ.

³Pò pɔ̀n chɛ̀ à bla̍-aɛ, nyɔ̍ se̍ ɛ̍-ɛ i̍ wɔ̌n-ɛ, nɛ̀ nyɔ̍ ùh-u pǔh-aɛ bo ùh se̍ ɛ̍-ɛ i̍ wɔ̌n.

⁴U̍h se̍ wlùh gbaɛ blě, dɛ̍nu̍ɛ, Setɔn ɛ̀ nu̍-a kmɔ̌ la ɛ̍ nyɔsoa-a bo ɛ̀ kaɛn u̍h-a wlùh kɛ̍n dě kwile-e. Ɛ̍ kaɛn u̍h kɛ̍n u̍h-u je̍e sɔ̀npli jě. Ɛ̍ sɔ dě pɔ̀n chɛ̀ ɛ̀ kɔ̍-a dǒ Klai-a tìh-a i̍ bɛ̌-ɛ pùn i̍-ɛ we̍, ɔ̀ ke Nyɔsoa ke ùh wɔ̀ɛ-aɛ.

⁵Ɛ̍ se̍ à chɛ̀-a tìh à se̍ bla̍. À bla̍ ka Jusu Klai nu̍-a Joi-ɛ tìh, ɛ̍ ke ka à nu̍-a mɔ̀-a pòi̍nynuu̍ Jusu-a tìh-ɛ ke.

⁶Nyɔsoa ɔ̀ la̍a̍, “Sɔ̀npli fa̍n dě kwile-ɛ,” ɔ̍-ɔ due laa̍ bo ɔ̀ nu̍ ɛ̍ iě ɔ̍ sɔ̀npli-a fa̍n dě à wlùh di̍i̍, wɛ̀ à iě i̍h juo ka ɔ̍ tìh-a i̍ bɛ̌-ɛa fa̍n-a dě Klai ja̍a̍-ɛ.

⁷À wɔ̀ jawih ìh kɔn di̍i̍ pàn-dɛ̍ᵻ nɛ-aɛ. Ɛ̍ to ɛ̍ ka gbǐh ku̍-a wɔ̍n-ɛ i̍h kɔn-a dǒ Nyɔsoa we̍ i̍h se̍-a dǒ à we̍ kɔn-ɛ.

⁸Nyɔ̍-a sàɛ̀ à jua̍i̍ tà kli̍hgbɛ̍, jɛ à se̍ klà sà-ɛ. À se̍ nu̍ ka̍ juo, jɛ à se̍ à wlùh gbaɛ kɛ̍n i̍ poe.

⁹Nyɔ̍-a jě-e à klě, jɛ Nyɔsoa se̍ à i̍ tǎli. À du̍ i̍-ɛ, jɛ à se̍-e gbɔ̀lɔ-ɛ.

¹⁰À na-ɛ mɛ̌ɛ wɔ̍i̍n ti̍ kli̍hgbɛ̍ we̍, ɛ̀ kɔn ba̍ nɛ-a Jusu pùn-ɛ, wɛ̀ ɔ̍ kmɔ̌ iě jě-ɛ dě à ja̍a̍.

¹¹À nɛ kmɔ̌, jɛ à na-ɛ mɛ̌ɛ wɔ̍i̍n ti̍ kli̍hgbɛ̍ we̍ Jusu-a tìh, ɛ̍ iě ɛ̍ nu̍ wɛ̀ Jusu-a kmɔ̌ iě jě-ɛ dě à ja̍a̍.

¹²Ɛ̍ tìh-ɛ, à se̍ mɛ̌ɛ we̍ i̍ ti̍ɛ̍ɛn, jɛ feɛ-a nu̍ dbo̍ dě mɔ̀ ja̍a̍.

¹³Nyɔsoa-a wlu̍ la̍a̍, “Ǐn wlu-i, dɛ̍nu̍ɛ, ǐn gbaɛ Nyɔsoa wlùh.” Dě wlùh gbaɛ due laa̍ di̍i̍ bo à wlu-i ke. Dɛ̍nu̍ɛ, à gbaɛ Nyɔsoa wlùh.

¹⁴À juo ka Nyɔsoa ɔ̀ sà-e Joi Jusu-ɛ, ɔ̍ mu̍-a à dě-e sà ke ka ɔ̍ nu̍-a Jusu-ɛ. Wɛ̀ ɔ̍ iě mɔ̀ ke à gba̍ dě Jusu we̍.

¹⁵Mɔ̀-a tìh bo ìh kli̍hgbɛ̍ la i̍h nɛ. Nɛ̀ ka nyɔ̍ dɔu-a pǔh-a dǒ Nyɔsoa-a blɛ nɛ-ɛ we̍-ɛ, u̍h-a mu̍ tìh-a i̍ bɛ̌-ɛ Nyɔsoa-a tlɔ̌ po̍-ɛ i̍ bɛ̌-ɛ.

¹⁶Ɛ̍ tìh-ɛ, à se̍ se̍a̍ dǒ dbo̍ nu̍ la̍. À nyi̍ɔ̍tu-a nyni̍ la̍ jii̍ gbɛɛ, jɛ à wlùh-a gbǎ delee i̍ ti̍ kli̍hgbɛ̍ we̍.

¹⁷Jua̍i̍ sàɛ̀ juwɛ la ɛ̀ se̍-a i̍ wlè mu̍-ɛ, ɛ̍ po̍ à gba̍a̍ dǒ kmɔ̌ sie tìh-a i̍ bɛ̌-ɛ ɛ̀ se̍-a i̍ blaɛ dɛ̍ kɔn-ɛ we̍.

¹⁸Dɛ̍nu̍ɛ, à-a gbɛ̀n dɛ̍ᵻ ìh nyɔ̍-a jě-aɛ ja̍, jɛ à gbɛ̀n dɛ̍ᵻ ìh nyɔ̍-ɔ jě-aɛ ja̍. Dɛ̍ᵻ ìh nyɔ̍-a jě-aɛ, i̍h-a wlè i̍ dǒ ti̍ gbɔ̍ di̍i̍, jɛ dɛ̍ᵻ ìh nyɔ̍-ɔ jě-aɛ, i̍h-a wlè i̍ nɔ̌ kmɔ̌-a kmɔ̌.