Read Western Krahn 2 Kɔwlɛntiɔn 6 Bible Online

2 Kɔwlɛntiɔn 6 - Western Krahn bible

2 Kɔwlɛntiɔn 6

¹Ka à nu̍-a Nyɔsoa-a pòi̍nynuu̍-ɛ, nɛ̀ à ba̍le mɔ̀ɔ̍ ùh jě-a ɔ̍ blɛ-ɛ, mɔ̀ɔ̍ je̍e ɛ̍-ɛ gbɔ̀lɔ.

²Nyɔsoa la̍a̍, “Ti̍ nyni̍-a iě-a ìn we̍ gbǎ-ɛ, ǐn wɔ̌n àn wlu̍ i̍. Weɛ̍ iě-a ìn pǔh-iɛ, ǐn gbǎ ìn we̍.” Ti̍ nyni̍ wɛ̀ kaka dǒ Nyɔsoa-a nyɔ̍ we̍ gbǎ la̍. Kaka bo ɛ̀ nu̍ sèàn weɛ̍ dǒ nyɔ̍-a pǔh-ɛ we̍.

³À se̍ pɔ̀n nyɔ̍-o-nyɔ̍ iě à dbo̍ kɛ̍ pùn jě. Ɛ̍ kɔn à fɔ̀n dɛ̍ we̍, à-a je̍e ɛ̍ nu̍ nyɔ̍-o-nyɔ̍ je̍e gbèle.

⁴Jɛ dɛ̍ᵻ kli̍hgbɛ̍ à nu̍-aɛ, à to ɛ̍ ka à nu̍-a Nyɔsoa-a pòi̍nynuu̍-ɛ. À ku̍-e klì i̍ kaa̍ dǒ à wě jě-ɛ ke, tìh jě-ɛ ke jua̍i̍ sàɛ̀-ɛ we̍.

⁵À bla̍-aɛ, à poe-ɛ kasoo iě à poe-ɛ slɛ̀ dlǔ i̍. À nu̍ kmu-u dbo̍, à se̍ mɔ̌-ɔ nyinɔ̍ kɔn iě mɔ̌-a nu̍ àɔ̀.

⁶À to ɛ̍ ka à nu̍-a Nyɔsoa-a pòi̍nynuu̍ dǒ à wlùh-a wlaǎwla nɛ-ɛ ke, pɔ̀n chɛ̀-a tɔɔ blě-ɛ ke, wlùh i̍ gbɛ̍n-ɛ ke gblɛ̍n-ɛ nmɔ-ɛ we̍. Nyɔsoa-a Sùù nɛ à we̍, iě à blě jbɛɛ chɛ̀.

⁷À tu̍owli nu̍ tìh-a taǐn, iě Nyɔsoa-a gbǐh nɛ à we̍. À i̍ slɛ̌-ɛ bo ɛ̀ nu̍ à fɔ̀n-dɛ̍ᵻ dǒ à fɔ̀n-ɛ kli̍hgbɛ̍ we̍.

⁸Nyɔ̍ duuh-a tè à ja̍ wɛ̀ duuh-a sà à kǔkɛ̍n. Duuh-a chlèe àɔ̀, iě duuh-a po̍ à tìhwe̍. Nyɔ̍-a jě àɔ̀ ka si̍h tmɔ̌ nyɔ̍-ɛ, jɛ à sà tìh-a taǐn.

⁹À wɔ̀ dihwi̍hᵻ, jɛ nyɔ̍ kli̍hgbɛ̍ juo àɔ̀. À wɔ̀ mɛ̌-nyɔ̍, jɛ à nɛ kmɔ̌. U̍h gbɛ̍n àɔ̀ kàn, jɛ à se̍ dbǎ-ɛ.

¹⁰À nɛ wɔɛ gbɛɛ, jɛ à nu̍ mɔna̍ ti̍ kli̍hgbɛ̍ we̍. À wɔ̀ nyɔ̍gbà nyɔ̍, jɛ à pàn-ɛ nyɔ̍ dɔu. À wɔ̀ nyɔ̍ ùh se̍-a dɛ̍-o-dɛ̍ blě-ɛ, jɛ à kɔn dɛ̍ᵻ kli̍hgbɛ̍.

¹¹Kɔwlɛn nyɔ̍, dɛ̍ᵻ kli̍hgbɛ̍ nɛ-a dě à wlùh we̍-ɛ à sèàɛ̍ i̍h mɔ̀ wlùh. À wlùh flɔn kɛ̍n i̍ dǒ mɔ̀ we̍.

¹²Ɛ̍ se̍ àɔ̀ mɔ̀ à se̍ à jbɛɛ de̍ chlì-i dǒ mɔ̀ we̍. Mɔ̀ɔ̍ bo ùh chlì-i mɔ̀-a jbɛɛ de̍ dǒ à we̍.

¹³Ǎn wlu-i kaka dě mɔ̀ we̍ ka nyɔ̍-a wlu dě ɔ̍ chɛ̀-a nynuu̍ we̍-ɛ. Ka à nu̍-a mɔ̀-a wlùh blě-ɛɛ, kǎ mɔ̀ iě à wlùh blě-ɛ nu̍ ke. Mɔ̀ flɔn-ɛ mɔ̀-a wlùh kɛ̍n i̍ ke.

¹⁴Nyɔ̍ ùh se̍-a wlùh gbaɛ blě-ɛ mɔ̀ bɔ̌ u̍h ke mɔ̀-a dbo̍ due nu̍ dɛ we̍ fɔ̀n-ɛ. Ka dɛ̍ chɛ̀ ke dɛ̍ sɔ̀n-a mu̍ ba̍ᵻ nu̍-ɛ nu̍ ɛ? Sɔ̀npli ke kwile nɛ due ae?

¹⁵Ka Klai ke Kǔ-a mu̍ wlu̍ i̍ wɔɛ̌ɛn nu̍ ɛ? Ka wlùh gbaɛ blě nyɔ̍ ke se̍ wlùh gbaɛ nyɔ̍-a mu̍ dɛ̍ᵻ kwa̍a̍ i̍ pu̍e̍e-ɛ nu̍ ɛ?

¹⁶Ka Nyɔsoa-a slaǎ sà gbò ke kwɛ̍i̍n gbo̍ᵻá mu̍ wlu̍ i̍ wɔɛ̌ɛn-ɛ nu̍ ɛ? À-a bo à nu̍ kmɔ̌ nɛ Nyɔsoa-a slaǎ sà gbò. Nyɔsoa-a chɛ̀ la̍a̍, “Ǎn mu̍ dě ǎn nyɔ̍ nynɛ̌ tǐn, wɛ̀ iě u̍h nynɛ̌ i̍ na. Ǎn mu̍ u̍h-a Nyɔsoa nu̍, wɛ̀ u̍h iě ǎn nyɔ̍ nu̍.”

¹⁷Ɛ̍ tìh-ɛ, Joi la̍a̍ dě ɔ̍ nyɔ̍ we̍, “Mɔ̀ sɔ dě nyɔ̍ ùh se̍-a ǐn juo-ɛ nynɛ̌, mɔ̀ iě u̍h we̍ i̍ ti̍ɛ̍ɛn. Mɔ̀ bɔ̌ dɛ̍ ɛ̀ se̍-a nɛi̍ wɛ̀-ɛ i̍ tǔh-ɛ, nɛ̀ ǎn mu̍ mɔ̀ i̍ gbɛ̍n.

¹⁸Ǎn mu̍ mɔ̀ baa nu̍, wɛ̀ mɔ̀ iě ǎn jɔ̍gbauᵻ nynuu̍ ke nynɔ̌gbaɔᵻ nynuu̍ nu̍. Kǎ mɔ̍ Joi Ɔ̀ Blě-a Gbǐh Kli̍hgbɛ̍-ɛ dǎ.”