Read Western Krahn Kelesea 1 Bible Online

Kelesea 1 - Western Krahn bible

Kelesea 1

¹Mɔ̍ Pɔɔ, mɔ̍ Klai-a gba̍tòà. Jɛ nyi̍ɔ̍ se̍ ɛ̍ ǐn we̍i̍ nu̍, iě ɛ̍ wɔ̍ se̍ dě nyi̍ɔ̍ we̍ sɔ-ɛ ke. Jɛ ɛ̍ sɔ-ɛ dě Jusu Klai we̍, ɛ̍ ke Baa Nyɔsoa jɔ sà ɔ̍-eɛ ke.

²De̍di̍i̍ᵻ kli̍hgbɛ̍ nɛ-a nɔ̌ ǐn we̍-ɛ, u̍h ke ǐn ke àɔ̀ sà chɔchi̍h nyɔ̍ nɛ-a dě Kelesea bloa̍ kɛ̍n-ɛ nyinɔ̍ i̍.

³Ǎn sà nǐ wɔ̍n Baa Nyɔsoa ke à Joi Jusu Klai iě mɔ̀ blɛ ke wlùh-a i̍ tè-ɛ nyǐ.

⁴Jusu sà ɔ̍ chɛ̀ kwlǎ à gblɛ̍n sɔ̀ɛ̀n-a tìh, wɛ̀ ɔ̍ iě à dě dɛ̍ᵻ sɔ̀nᵻ nu̍ kmɔ̌ la di̍i̍ sèìe dě à Baa Nyɔsoa-a wlùh-a i̍ pɛ̌n-ɛ di̍i̍.

⁵Tìh-a i̍ bɛ̌-ɛ kɔn dǒ ɔ̍ we̍ nɔ̌ kmɔ̌-a kmɔ̌. Kǎ ɛ̍-ɛ nɛ.

⁶Mɔ̀-a nu̍-dɛ̍ᵻ wlǔh i̍ ǐn de̍e̍. Ɛ̍ se̍-o wlè fu̍u̍ wɛ̀ mɔ̀-a poe nyɔ̍ ɔ̀ dǎ-a mɔ̀ dě Klai-a blɛ nɛ-ɛ di̍i̍-ɛ kɛ̍n i̍, iě mɔ̀-a bǐi dě pɔ̀n chɛ̀ dɛɛ we̍ i̍.

⁷Jɛ pɔ̀n chɛ̀ dɛɛ se̍ nɛ fu̍u̍. Dě mɔ̀ we̍ bo nyɔ̍ duuh nɛ u̍h-a bɛ̌ɛ mɔ̀ wɔ̍ɔ̍n i̍, u̍h iě Klai-a pɔ̀n chɛ̀-a klě-e fiǎn.

⁸Jɛ pò à chɛ̀-o, àe̍e̍ Nyɔsoa-a ǐnchɔ̀ sɔ dě ja̍i̍wlɔ̀ wɛ̀ ɔ̍ iě pɔ̀n chɛ̀-a tìh bla̍ dě mɔ̀ we̍, wɛ̀ ɛ̍ ke jɛ à bla̍-a dě mɔ̀ we̍-ɛ ɛ̍ se̍ due nɛ-ɛ, nɛ̀ kɛ̀n-a mu̍ nyɔ̍ laa̍ kwa̍a̍ sɔ, ɔ̍ iě dě kàn nɛ̍ di̍i̍ gbǎ.

⁹À bla̍ ɛ̍ sàǐtòò, iě ǎn bla̍ ɛ̍ ka dɛ. Pò nyɔ̍-o-nyɔ̍ bla̍ pɔ̀n chɛ̀ dě mɔ̀ we̍, wɛ̀ ɛ̍ iě-o dɔɔ̌ nɛ dǒ jɛ mɔ̀ gbɛ̍n-a i̍-ɛ we̍-ɛ, nɛ̀ kɛ̀n-a mu̍ ɔ̍ kwa̍a̍ sɔ.

¹⁰Kaka la̍ ǎn pɔ̀n iě-e nyɔ̍ jlǐh i̍ nmɔ ɛɛ, àe̍e̍ iě dě Nyɔsoa jlǐh i̍ nmɔ ae? Àe̍e̍ ǎn fɔ̀n dɛ̍ we̍ iě nyɔ̍-a wlùh i̍ pɛ̌n-ɛ ae? Pò ǐn ja nyɔ̍-a wlùh i̍ pɛ̌n-ɛ i̍ pɔ̀n-ɛ, nɛ̀ ǐn se̍ Klai-a pòi̍ju nu̍ mu̍ de.

¹¹Ǐn de̍di̍i̍ᵻ, bɔ̌ ǐn sèàɛ̍ mɔ̀ wlùh, pɔ̀n chɛ̀ la ǎn bla̍-a ka-ɛ, ɛ̍ se̍ dě wlɔ̀ nyi̍ɔ̍ we̍ sɔ-ɛ.

¹²Nyɔ̍-o-nyɔ̍ se̍ ɛ̍ ǐn nyǐ, iě nyɔ̍ se̍ ɛ̍ ǐn nǎ poe ke. Jusu Klai-a chɛ̀-a gbǎ bo ɔ̀ toe ɛ̍ m.

¹³Ti̍ iě-a dě Juu nyɔ̍ naɛ Nyɔsoa wɛɛ sà kmɔ̌ di̍i̍ nɛ tɛin-ɛ, mɔ̀ wɔ̌n ɛ̍ pɔ̀n. Nɛ̀ ǎn jě-e Nyɔsoa-a chɔchi̍h klě kàka̍, iě ǎn fɔ̀n dɛ̍ we̍ iě i̍h-i gbɔ̀lɔ.

¹⁴Ǐn sìì ǎn tùngbàᵻ dɔu dlǔ i̍ dě à blǐ Juu nyɔ̍ naɛ Nyɔsoa wɛɛ sà dɛ di̍i̍. Nɛ̀ ǐn fòè ǐn baaᵻá kmɔ̌ nɛ-ɛ dɛ̍ᵻ we̍ kaa̍ka.

¹⁵Jɛ iě-a wlǔh-ɛ, nɛ̀ Nyɔsoa tè-e ǐn pɔ̌ wɛ̀, nɛ̀ ɔ̍ dǎ la̍ m dě ɔ̍ blɛ nɛ-ɛ di̍i̍. Ɔ̍ pɔluh pɛ̌n i̍

¹⁶ɔ̍ iě ɔ̍ jǔ tà sà dě ǐn we̍, wɛ̀ iě ɔ̍ tìh we̍i̍ bla̍ dě ùh se̍-a Juu nyɔ̍-ɛ nynɛ̌. Ǐn se̍ nyɔ̍-o-nyɔ̍ dlǔ i̍ te.

¹⁷Nyɔ̍ ùh nu̍-a Klai-a gba̍tòà dǒ ǐn jǔ-ɛ, ǐn se̍ u̍h jě la̍a̍ mu̍ dǒ Juluslɛn wlɔ̀ di̍i̍. Jɛ ǐn mu̍ dě Awlebia bloa̍ kɛ̍n suei̍, wɛ̀ ǐn ji̍ de̍ dǒ Damaɛkɔ wlɔ̀ di̍i̍.

¹⁸Sɔ̀nᵻ ta̍a̍n sì-aɛ, wɛ̀ ǐn mu̍ dǒ Juluslɛn ǐn ke Pitɛ ke à iě i̍ ju̍o̍e. Iě ǐn nu̍-e dɔɔ̌dlǔᵻ sɔɔ̌n.

¹⁹Ǐn se̍ Klai-a gba̍tòà juh sie-a dǒ de̍-ɛ jě, Chiin nɛ due bo ǐn jě, ɔ̀ nu̍-a Joi de̍di̍i̍-ɛ.

²⁰Ìh ǎn chlǐh-a mɔ̀ we̍-ɛ, Nyɔsoa nu̍ ǎn sàànsi̍i̍h, ǐn se̍ si̍h tmɔ̌.

²¹Wɛ̀ ǐn mu̍ dě Siwlia bloa̍ ke Selesia bloa̍ kɛ̍n.

²²Dǒ ti̍ laa̍ di̍i̍-ɛ, nɛ̀ Klai-a chɔchi̍h nyɔ̍ ùh nɛ-a dě Judia bloa̍ kɛ̍n-ɛ, nɛ̀ u̍h se̍ ǐn juo ke̍.

²³Dɛ̍ due u̍h juo-a sǔh nyɔ̍gbei-a sà-aɛ, ɛ̍ nu̍, “Jɔ̍gbau ɔ̀ jě-ea à klě de-ɛ, ɔ̍ bo ɔ̀ bla̍-a la̍ wlùh gbaɛ blě tìh ti̍laa, ɛ̀ ɔ̍ pɔ̀n-a gbɔ̀lɔ-ɛ i̍ de-ɛ.”

²⁴Wɛ̀ u̍h bɛ̌-ɛ Nyɔsoa-a nynɛ̌ i̍ ǎn tìh.