Read Western Krahn Kelesea 3 Bible Online

Kelesea 3 - Western Krahn bible

Kelesea 3

¹Mɔ̀ɔ̍ Kelesea nyɔ̍ ùh bo-a we̍i̍-ɛ, ǐn juo ɛ̍-ɛ nyɔ̍ po̍ mɔ̀ dɛ̍ jlǐh. Ǐn nyna dǒ mɔ̀ jǔ i̍ wɛ̀ ǐn sèàɛ̍ ɛ̍ we̍ i̍ nmɔ jii̍ dě mɔ̀ we̍ ka Jusu Klai mɛ̌-a dǒ gbàɛ̍ kɛ̍n i̍ tu̍ wlì-ɛ.

²Bɔ̌ ǐn tèle mɔ̀ dɛ̍ due i̍. Telě dɛ̍ɛ̍ jě tìh bo ɛ̀ jě-e mɔ̀ Nyɔsoa-a Sùù ɛɛ, àe̍e̍ mɔ̀ wɔ̌n pɔ̀n chɛ̀ iě mɔ̀ gbaɛ ɛ̍ wlùh dɛbo ae?

³Mɔ̀ bo we̍i̍ ae? Dɛ̍nu̍ mɔ̀ tè dɛ̍ gbɔ̀ dǒ Sùù we̍, wɛ̀ mɔ̀-a pɔ̀n mɔ̀ iě ɛ̍ i̍ wɔ̀ dǒ mɔ̀-a chɛ̀-a gbǐh we̍ ɛ?

⁴Wɛ̀ dɛ̍ᵻ kli̍hgbɛ̍ ìh nɛ-a mɔ̀ pùn-ɛ, i̍h iě niɔ̍ wlǎ ae? Ǐn juo ɛ̍-ɛ, i̍h se̍ niɔ̍ wlǎ mu̍.

⁵Nyɔsoa nyǐ mɔ̀ ɔ̍ Sùù iě ɔ̍ po̍ jbaɛdih dǒ mɔ̀ we̍ mɔ̀-a telě dɛ̍ɛ̍ jě tìh ɛɛ, àe̍e̍ mɔ̀ wɔ̌n pɔ̀n chɛ̀ iě mɔ̀ gbaɛ ɛ̍ wlùh dɛbo ae?

⁶Mɔ̀ gbɛ̀n dɛ̍ nɛ-a Eblaɛɛn jii̍-ɛ ja. Ɛ̍ chlǐh-wlu̍ la̍a̍, “Ɔ̍ gbaɛ Nyɔsoa wlùh, ɛ̍ kɔn Nyɔsoa slè-e ɔ̍ i̍ slɛ̌-nyɔ̍.”

⁷Nɛ̀ mɔ̀ blě wlùh la̍ sǔh ka nyɔ̍ ùh blě-a wlùh gbaɛ-ɛ, nɛ̀ u̍h-u bo ùh nu̍-a Eblaɛɛn-a tloemlai-ɛ.

⁸Nyɔsoa-a wlu̍ sà ɛ̍-ɛ se̍e̍ ka ɔ̍ mu̍-a ùh se̍-a Juu nyɔ̍-ɛ i̍ slɛ̌-nyɔ̍ dǎɛ dě u̍h-a wlùh gbaɛ-ɛ di̍i̍-ɛ. Ti̍ sie nya̍ wɛ̀ pɔ̀n chɛ̀-a tìh bla̍-ɛɛ dě Eblaɛɛn we̍. Ɛ̍ la̍a̍, “Dě ìn ja̍a̍ bo bloa̍ kli̍hgbɛ̍-a mu̍ pɔ̀ìě jě-e.”

⁹Eblaɛɛn blě wlùh gbaɛ. Ɛ̍ bo ɛ̀ nu̍ ɛ̍ iě ɔ̍ jě pɔ̀ìě. Nɛ̀ nyɔ̍ ɔ̀ mu̍-a wlùh gbaɛ blě ke-ɛ, nɛ̀ ɔ̍ mu̍ Eblaɛɛn we̍ pɔ̀ìě jě ke.

¹⁰Nyɔ̍ ùh tè-a telě dɛ̍ɛ̍ jě-ɛ wlì-ɛ, nɛ̀ kàɔ̀-a mu̍ u̍h gbɛ̍n. Dɛ̍nu̍ɛ, ɛ̍ chlǐh-wlu̍ la̍a̍, “Nyɔ̍-o-nyɔ̍ ɔ̀ se̍-a dɛ̍ᵻ kli̍hgbɛ̍ ìh chlǐh-a dě telě chlǐh-dɛ̍ di̍i̍-ɛ dɛ̍ɛ̍ jě-ɛ dluwe̍ gba̍ mu̍-ɛ, nɛ̀ Nyɔsoa-a kàɔ̀ gbɛ̍n ɔ̍-ɛ.”

¹¹Kaka la̍ ɛ̍ flɔn we̍i̍ ka nyɔ̍ se̍-a dě Nyɔsoa jlǐh i̍ nmɔ mu̍ dǒ telě dɛ̍ɛ̍ jě-ɛ we̍-ɛ. Dɛ̍nu̍ɛ, ɛ̍ chlǐh-wlu̍ la̍a̍, “Wlùh gbaɛ bo ɛ̀ mu̍ i̍ slɛ̌-nyɔ̍ kmɔ̌ nɛ-ɛ.”

¹²Jɛ telě se̍ dɛ̍ blě ɛ̍ iě nu̍ dǒ wlùh gbaɛ we̍. Ɛ̍ chlǐh-wlu̍ la̍a̍, “Nyɔ̍ ɔ̀ nu̍-a dɛ̍ᵻ kli̍hgbɛ̍ telě-a dǎ-aɛ, nɛ̀ ɔ̍ mu̍ kmɔ̌ nɛ.”

¹³Klai pùhbɔ à kɛ̍ɛ̍n dǒ kàɔ̀ telě-a mu̍-a à dlǔ wlǎ de-ɛ we̍. Kàɔ̀ ɛ̀ iě-a à dlǔ wlǎ de-ɛ, ɛ̍ bo ɛ̀ wlǎ-a dǒ Klai dlǔ dǒ à wɔ̀ɔ̀. Dɛ̍nu̍ɛ, ɛ̍ chlǐh-wlu̍ la̍a̍, “Nyɔ̍-o-nyɔ̍ ɔ̀ u̍h pèle-a dǒ tu̍ wlì-ɛ, nɛ̀ kàɔ̀ gbɛ̍n ɔ̍-ɛ.”

¹⁴Ɔ̍ pùhbɔ à kɛ̍ɛ̍n iě pɔ̀ìě Nyɔsoa-a mu̍-a Eblaɛɛn nyǐ-ɛ, wɛ̀ ɛ̍ iě ùh se̍-a Juu nyɔ̍-ɛ we̍ ji̍ ke dě ɔ̍ ja̍a̍. Wɛ̀ à iě Sùù kɔn wlu̍ Nyɔsoa po̍-a tɔ̀ma̍a̍-a jě dě wlùh gbaɛ di̍i̍.

¹⁵Ǐn de̍di̍i̍ᵻ, bɔ̌ ǐn blaɛ nu̍-dɛ̍ᵻ nɛ-a nɔ̌ kmɔ̌ we̍-ɛ dɛ̍ i̍. Pò nyɔ̍ sɔɔ̌n dbǎ wlu̍ i̍-ɛ, nɛ̀ nyɔ̍ dɔɔ bɔ̌ ɛ̍ cha̍n we̍ po̍-ɛ. Nɛ̀ ɔ̍ wɔ̍ bɔ̌ ɛ̍ dɛ̍ kɛ̍n po̍-ɛ ke.

¹⁶Nyɔsoa po̍ wlu̍ tɔ̀ma̍a̍ dě Eblaɛɛn ke ɔ̍ tloemlai we̍. Nyɔsoa-a wlu̍ se̍ ka nu̍ Eblaɛɛn-a tloemlai dɔu. Jɛ ɛ̍ la̍ tloemlai due, nɛ̀ nyɔ̍ due bo ɛ̍ dǎ. Ɛ̍-ɛ bo ɛ̀ nu̍-a Klai.

¹⁷Dɛ̍ ǎn pɔ̀n-a iě-a bla̍-ɛ, ɛ̍ nu̍ Nyɔsoa po̍ ku̍o̍ dě Eblaɛɛn we̍, iě ɔ̍ po̍ wlu̍ tɔ̀ma̍a̍ ka ɔ̍ se̍-a ɛ̍ wa̍ mu̍-ɛ. Telě ɛ̀ nu̍-a sɔ̀nᵻá kmɛ nyìɛ̍ kwela ta̍a̍n (430) wɛ̀-ɛ, ɛ̍ se̍ ku̍o̍ la wa̍-a bɛ̌ɛ wɛ̀ ɛ̍ iě Nyɔsoa-a tɔ̀ma̍a̍ wlu̍-a chɛ̀ dǒ wìè-i sà.

¹⁸Pò dɛ̍ᵻ Nyɔsoa tè-a i̍ dǒ ɔ̍ nyɔ̍ we̍-ɛ, i̍h tba̍ dǒ telě kɛ̍n i̍-ɛ, nɛ̀ ɛ̍ se̍ dǒ ɔ̍ tɔ̀ma̍a̍ wlu̍ kɛ̍n i̍ tba̍ dɛ. Jɛ ɛ̍ tba̍ dǒ ɔ̍ tɔ̀ma̍a̍ wlu̍ kɛ̍n i̍ ɛ̍ kɔn ɔ̍ nyǐ ɛ̍ Eblaɛɛn.

¹⁹Dɛ̍ kɔn tìh telě la ɛ̍ poe-ɛ la̍ ɛ? Ɛ̍ gbǎ dǒ kɛ̍n wɛ̀ ɛ̍ iě gblɛ̍n sɔ̀ɛ̀n kɛ̍n nyɛ-ɛ. Kǎ ɛ̍ mu̍ nɛ te̍e̍ iě Eblaɛɛn-a tloemlai ɔ̀ kɔn wlu̍ Nyɔsoa po̍-a tɔ̀ma̍a̍-aɛ, wɛ̀ ɔ̍ iě ji̍. Nyɔsoa-a ǐnchɔ̀ bo ìh ja telě la, iě ɛ̍ jii dě ɔ̀ nu̍-a tùna̍-i̍-tu̍-ɛ kwa̍a̍.

²⁰Pò nyɔ̍ nɛ due-ɛ, nɛ̀ ɔ̍ se̍ tùna̍-i̍-tu̍ i̍ pɔ̀n. Wɛ̀ Nyɔsoa nɛ due.

²¹Pò ɛ̍ nɛ ka-ɛ, nɛ̀ telě ke Nyɔsoa-a tɔ̀ma̍a̍ wlu̍ se̍ i̍ wɛɛn ae? Sakǒ, ɛ̍ se̍ la̍a̍n nɛ. Pò telě ja wlɔ̀ nyi̍ɔ̍ feɛ nyǐ de-ɛ, nɛ̀ telě dɛ̍ɛ̍ jě-ɛ bo ɛ̀ mu̍ nyɔ̍ i̍ slɛ̌-ɛ dě Nyɔsoa jlǐh de.

²²Ɛ̍ kɔn Nyɔsoa-a wlu̍ la̍ kmɔ̌ kli̍hgbɛ̍ nɛ dě gblɛ̍n sɔ̀ɛ̀n-a kèìe̍e̍, wɛ̀ tɔ̀ma̍a̍ wlu̍ ɛ̀ kɔ̍-a dǒ wlùh gbaɛ kɛ̍n i̍ dě Jusu Klai ja̍a̍-ɛ, wɛ̀ ɛ̍ iě wlùh gbaɛ blě nyɔ̍ nyǐ-ɛ.

²³Jɛ wlùh gbaɛ iě-a ji̍-ɛ, nɛ̀ telě sa̍n àɔ̀ wɛ̀ ka gbɛ̍n-nyɔ̍-ɛ. Wɛ̀ ɛ̍ iě laǎn nɛ te̍e̍ wlùh gbaɛ la ɛ̍ iě tà sà-ɛ.

²⁴Iě telě naɛ à sɔ̍nᵻ we̍ i̍ te̍e̍ wɛ̀ Klai ji̍, wɛ̀ wlùh gbaɛ iě à i̍ slɛ̌-ɛ dě Nyɔsoa jlǐh.

²⁵Kaka la̍, ɛ̍ nu̍ wlùh gbaɛ naɛ ti̍ wɛ̀, nɛ̀ à se̍ dǒ telě sɔ̀n nɛ dɛ.

²⁶Wlùh gbaɛ bo ɛ̀ nu̍ mɔ̀ kli̍hgbɛ̍ Nyɔsoa-a chɛǐ nynuu̍ we̍i̍ wɛ̀ dě Jusu Klai ja̍a̍.

²⁷Mɔ̀ɔ̍ ùh poe-a nǐ dlǔ dě Klai ja̍a̍-ɛ, nɛ̀ mɔ̀ pa̍ Klai-i wɛ̀.

²⁸Juu nyɔ̍ se̍-o dɔɔ̌ nɛ, wɛ̀ ùh se̍-a Juu nyɔ̍-ɛ se̍-o dɔɔ̌ nɛ. Kèi̍ se̍-o dɔɔ̌ nɛ, wɛ̀ i̍ flɔn nyɔ̍ se̍-o dɔɔ̌ nɛ. Jɔ̍gbau se̍-o dɔɔ̌ nɛ, wɛ̀ nynɔ̌gbaɔ se̍-o dɔɔ̌ nɛ. Jɛ mɔ̀ kli̍hgbɛ̍ mɔ̀ nɛ due wɛ̀ dě Jusu Klai ja̍a̍.

²⁹Pò mɔ̀ kɔn dǒ Klai we̍-ɛ, nɛ̀ mɔ̀ɔ̍ Eblaɛɛn-a tloemlai, nɛ̀ mɔ̀-a mu̍ dɛ̍ ɛ̀ kɔn wlu̍ Nyɔsoa po̍-a tɔ̀ma̍a̍-a jě.