Read Western Krahn Kelesea 6 Bible Online

Kelesea 6 - Western Krahn bible

Kelesea 6

¹Ǐn de̍di̍i̍ᵻ, pò nyɔ̍ gba̍ wìè sɔ̀n-ɛ, nɛ̀ mɔ̀ɔ̍ juh nɛ-a dě Nyɔsoa-a Sùù-ɛ, nɛ̀ mɔ̀ɔ̍ bo ùh iě ɔ̍ wìè-e po̍ dě gba̍n gbɛ̍n-ɛ di̍i̍. Jɛ nɛ̀ mɔ̀ nu̍ nɛnɛ̌ wɛ̀ mɔ̀-a chɛ̀ je̍e blu̍ja̍a̍ gbǎ ke.

²Pò jɔ kɔn ba̍ ja tìh jě-ɛ, nɛ̀ ɔ̍ gbǎ ɔ̍ we̍ u̍h iě ɛ̍ kwa̍a̍ i̍ gblè-e. Ɛ̍ ja laan nɛ-ɛ, nɛ̀ mɔ̀-a jě la̍ Klai-a telě kli̍hgbɛ̍ dɛ̍ɛ̍.

³Pò nyɔ̍ se̍ dɛ̍-a nyɔ̍ wɛ̀ ɔ̍ iě ɔ̍ chɛ̀ dɛ̍-a nyɔ̍ dǎɛ-ɛ, nɛ̀ ɔ̍ boe-e ɔ̍ chɛ̀ i̍.

⁴Nyɔ̍ jɔ-ɛ, nɛ̀ ɔ̍ chlɛ̌ ɔ̍ chɛ̀-a nu̍-dɛ̍ᵻ we̍ i̍. Pò i̍h nmɔ jii̍-ɛ, nɛ̀ ɔ̍ blɔ̌ dǒ ɔ̍ chɛ̀ we̍, jɛ nɛ̀ ɔ̍ bɔ̌ ɔ̍ chɛ̀ nyɔ̍ dɔɔ i̍ blaɛ-ɛ.

⁵Dɛ̍nu̍ɛ, nyɔ̍ jɔ-ɛ, ɔ̍ mu̍ ɔ̍ chɛ̀-a gbɛ̀ blě.

⁶Nyɔ̍ ɔ̀ u̍h po̍-a nǎ dě Nyɔsoa-a wlu̍ di̍i̍-ɛ, nɛ̀ dɛ̍ᵻ chɛ̀ kli̍hgbɛ̍ ɔ̍ blě-aɛ, ɔ̍ sà-o ɔ̍ iě ɔ̍ nǎ po̍ nyɔ̍ nyǐ.

⁷Bɔ̌ àn chɛ̀ i̍ boe-ɛ, nyɔ̍-ɔ nui Nyɔsoa-a tìh jlǐh i̍. Dɛ̍ nyɔ̍ tù-a bo ɔ̍ mu̍ gbǎn.

⁸Pò nyɔ̍ tù dɛ̍ dě ɔ̍ gblɛ̍n sɔ̀ɛ̀n-a tu̍ di̍i̍-ɛ, nɛ̀ mɛ̌ɛ bo ɔ̍ mu̍-e gbǎn-ɛ. Pò ɔ̍ tù dɛ̍ dě Nyɔsoa-a Sùù di̍i̍-ɛ, nɛ̀ dě Sùù di̍i̍ bo ɔ̍ mu̍ kmɔ̌ sie feɛ gbǎn-ɛ.

⁹Nɛ̀ɛ̍, mɔ̀ à bɔ̌ se̍a̍-a dǒ dɛ̍ chɛ̀ nu̍-ɛ we̍. Pò à se̍ se̍a̍ wɛ̀ ti̍ iě nyni̍-ɛ, nɛ̀ à mu̍ dɛ̍ chɛ̀ gbǎn.

¹⁰Ɛ̍ tìh-ɛ, pò à jě flɔn la̍-ɛ, mɔ̀ à nu̍ dɛ̍ᵻ chɛ̀ dǒ nyɔ̍ kli̍hgbɛ̍ we̍. Nyɔ̍ ùh ke à nɛ-a dě Klai wlùh gbaɛ dɛ di̍i̍-ɛ, u̍h bo à iě ɛ̍ pùn nu̍ chɛ̀ɛ̌chɛ̀.

¹¹Chlǐh-dɛ̍ la ǎn chlǐh-a dǒ ǎn chɛ̀-a sɔ̍n we̍-ɛ, ka ɛ̍ jlǐh nu̍-a dlǔ bɛ̌-ɛɛ, ɛ̍ bo mɔ̀ iě jě.

¹²Nyɔ̍ ùh-a pɔ̀n-a u̍h-a chɛ̀ nyɔ̍ chɛ̀ we̍i̍ nu̍-ɛ i̍-ɛ, u̍h bo ùh-a nɛ̌ mɔ̀ kɛ̍ɛ̍n mɔ̀ iě plɔ̀n gbǎ. U̍h-a nu̍ laan wɛ̀ u̍h-u je̍e klě jě Klai ɔ̀ mɛ̌-a dǒ gbàɛ̍ kɛ̍n i̍ tu̍ wlì-ɛ ɔ̍ tìh.

¹³Nyɔ̍-a chɛ̀ ùh gbǎ-a plɔ̀n-ɛ, u̍h-u jě telě dɛ̍ɛ̍. Jɛ u̍h-a pɔ̀n mɔ̀ iě plɔ̀n gbǎ wɛ̀ u̍h iě mɔ̀-a plɔ̀n gbǎ dɛ i̍ blɔ̌-ɛ.

¹⁴Jɛ mɔ̍ɔ-ɛ, à Joi Jusu Klai-a dǒ gbàɛ̍ kɛ̍n i̍ tu̍ wlì mɛ̌ɛ tìh nɛ due bo ǎn mu̍ blɔ̌. Ɔ̍ tìh bo kmɔ̌ we̍ dɛ̍ᵻ mɛ̌ dǒ ǐn we̍, wɛ̀ ǐn mɛ̌ ke dǒ i̍h we̍.

¹⁵Nyɔ̍ gbǎ plɔ̀n o, nyɔ̍ se̍ plɔ̀n gbǎ o, ɛ̍ tìh se̍ kma. Jɛ nyɔ̍ delee nu̍ tìh bo ɛ̀ kma.

¹⁶Dɛ̍ ǎn bla̍-aɛ, nyɔ̍ ɔ̀ mu̍-a ɛ̍ nu̍-ɛ, nɛ̀ ɔ̍ mu̍ wɔɛ jě-ɛ, wɛ̀ ɔ̍ wlùh iě i̍ tè. Mɔ̀ɔ̍ bo ùh wɔ̀ ka Eslɔɛ nyɔ̍ wɛ̀ dǒ Nyɔsoa we̍.

¹⁷Dɛ̍ ǎn mu̍-a kɛ̍n chlà-ɛɛ, ɛ̍ nu̍ nyɔ̍ bɔ̌ ǐn wɔ̍ɔ̍n i̍ bɛ̌ɛ dɛ kleǐnklein. Dɛ̍nu̍ɛ, pǎᵻ nɛ-a dǒ ǎn ku̍ pùn-ɛ, Jusu-a tìh bo i̍h nɛ-o.

¹⁸Ǐn de̍di̍i̍ᵻ, ǎn sà nǐ wɔ̍n à Joi Jusu Klai-a blɛ iě mɔ̀ we̍ nɛ. Kǎ ɛ̍-ɛ nɛ.