Read Western Krahn Ɛfɛsɔ 6 Bible Online

Ɛfɛsɔ 6 - Western Krahn bible

Ɛfɛsɔ 6

¹Nynuu̍, mɔ̀ nu̍ mɔ̀ de̍ᵻ ke mɔ̀ baaᵻá wlu̍ ka mɔ̀ kɔn-a dǒ Joi we̍-ɛ, dɛ̍nu̍ɛ, ɛ̍ bo ɛ̀ slɛ̌ i̍.

²Sàǐtòò telě ɛ̀ ke tɔ̀ma̍a̍ wlu̍ na-aa, ɛ̍ la̍a̍, “Tè ìn de̍ ke ìn baa ja̍.

³Nɛ̀ dɛ̍ᵻ kli̍hgbɛ̍-a mu̍ nmɔ la̍ mu̍ dǒ ìn we̍, wɛ̀ ìè i̍ wlè nɔ̌ blǔh la kɛ̍n.”

⁴Baaᵻ, dɛ̍ ɛ̀ mu̍-a mɔ̀-a nynuu̍ jlu̍h di̍i̍ i̍ po̍-ɛ, mɔ̀ bɔ̌ ɛ̍ nu̍-ɛ. Jɛ mɔ̀ gbàɛ̀n u̍h, mɔ̀ sà u̍h gblɛ̍n kwa̍ i̍, mɔ̀ iě u̍h slɛ̌ chèɛ̀ i̍ po̍ dě Joi-a fɔ̌ we̍.

⁵Kèi̍ᵻ, mɔ̀ nu̍ nyɔ̍ ùh kɔn-a mɔ̀-ɛ u̍h-a wlu̍ mɔ̀ iě u̍h-a faɔn ple̍ kaa̍. Mɔ̀ nu̍ ɛ̍ dǒ wlùh-a i̍ pɛ̌n-ɛ we̍ ka mɔ̀-a nu̍-a Klai dɛ̍ɛ̍ jě-ɛɛ.

⁶Mɔ̀ bɔ̌ u̍h-a jlǐh jě-ɛ wɛ̀ mɔ̀ bɔ̌ dɛ̍ nu̍-ɛ dǒ u̍h we̍. Jɛ mɔ̀ nu̍ Nyɔsoa-a wlùh dǒ mɔ̀-a wlùh kli̍hgbɛ̍ we̍ ka Klai-a pòi̍nynuu̍-ɛ.

⁷Mɔ̀ nu̍ dbo̍ dǒ mɔ̀-a wlùh kli̍hgbɛ̍ we̍ ka nyɔ̍ la̍ Joi-a dbo̍ bo mɔ̀-a nu̍ jɛ ɛ̍ se̍ wlɔ̀ nyi̍ɔ̍-a dbo̍-ɛ.

⁸Dɛ̍ mɔ̀ iě-a juo-ɛ, ɛ̍ nu̍ kèi̍ o, se̍ kèi̍ o, dbo̍ chɛ̀ jɔ nu̍-aɛ, ɛ̍ blaiɛ̍ bo ɔ̍ mu̍ jě dě Joi kwa̍a̍.

⁹Dlǔtuᵻ, mɔ̀ ple̍ tìh i̍ ke dǒ mɔ̀-a kèi̍ᵻ we̍, jɛ mɔ̀ bɔ̌ u̍h plǐn-ɛ. Dɛ̍ mɔ̀ iě-a juo-ɛ, ɛ̍ nu̍ u̍h ke mɔ̀ blě Dlǔtu due, ɔ̀ nɛ-a dě ja̍i̍wlɔ̀ ɔ̀-ɔ sà-a wìè fɔ̌ due-ɛ.

¹⁰Ɛ̍ bɔ̌ɛ-aoɛ, mɔ̀ po̍-e gbǐh dě mɔ̀ ke Joi-a due nɛ-ɛ di̍i̍ dǒ ɔ̍ kmu-u gbǐh we̍.

¹¹Mɔ̀ pa̍ fɔ̀n-dɛ̍ᵻ kli̍hgbɛ̍ Nyɔsoa nyǐ-a mɔ̀-ɛ, wɛ̀ mɔ̀ iě Kǔ-a gblàa̍ i̍ nyna-a bɛ̌ɛ.

¹²Dɛ̍nu̍ɛ, à se̍ wlɔ̀ nyi̍ɔ̍ we̍ fɔ̀n, jɛ dɛ̍ᵻ wlu̍ i̍ kɔn-ɛ ke, tùn blě-ɛ ke, si̍h nyɔsoa ìh kɔn-a kwile kmɔ̌ la wlu̍ i̍-ɛ ke, gbǐh sɔ̀nᵻ ìh nɛ-a dě ja̍i̍-ɛ bo à fɔ̀n we̍.

¹³Ɛ̍ tìh-ɛ, mɔ̀ dǔ fɔ̀n-dɛ̍ᵻ kli̍hgbɛ̍ Nyɔsoa nyǐ-a mɔ̀-ɛ mɔ̀ iě i̍h-i pa̍. Nɛ̀ pò dɛ̍ᵻ sɔ̀nᵻ la i̍h ji̍-ɛ, nɛ̀ mɔ̀-a mu̍ i̍h i̍ nyna-a bɛ̌ɛ te̍e̍ wɛ̀ tu̍h la ɛ̍ iě chlà.

¹⁴Ɛ̍ tìh-ɛ, mɔ̀ chlìì kɛ̍n dǒ mɔ̀-a bɛtɛ̍ ɛ̀ nu̍-a tìh-a taǐn ɛ̀ kɔ̍-a dǒ Nyɔsoa pùn i̍-ɛ we̍, wɛ̀ mɔ̀ iě i̍ nyna. Nɛ̀ i̍ slɛ̌-ɛ bo ɛ̀ iě mɔ̀-a nɛ̍ne̍ɛ̍ wola̍ nu̍ mɔ̀ iě-e pa̍.

¹⁵Jě ti̍ ìè kmɔ̌ i̍ gbe̍ɛ̍ɛn pɔ̀n chɛ̀ bla̍. Ɛ̍ bo ɛ̀ iě suǐ nu̍ mɔ̀ iě-e po̍.

¹⁶Dode̍-ɛ, wlùh gbaɛ bo ɛ̀ iě gblu̍ paɔ nu̍ mɔ̀ iě dǒ de̍e̍ nɛ. Nɛ̀ ɛ̍ mu̍ kmɔ̌ nɛ wɛ̀ pò Nyɔ̍ Sɔ̀n laa̍ ɛ̍ po̍ gbòtàùᵻɛ́, wɛ̀ mɔ̀ iě i̍h mɔ̌-ɛɛ bɛ̌ɛ.

¹⁷Nɛ̀ Nyɔsoa-a mɔ̀ pǔh-iɛ bo ɛ̀ iě mɔ̀-a nɛ̍ne̍ɛ̍ gblà nu̍ mɔ̀ iě tèè. Nyɔsoa-a wlu̍ ɔ̍ Sùù nyǐ-a mɔ̀-ɛ, mɔ̀ dǔ ɛ̍-ɛ, ɛ̍ iě mɔ̀-a plàn chlɛ̀n nu̍.

¹⁸Mɔ̀-a ba̍le-ɛ kli̍hgbɛ̍ ke, dɛ̍ jbǎ-a ke̍, dě Nyɔsoa-a Sùù ja̍a̍ bo i̍h iě jii. Mɔ̀ bɔ̌ se̍a̍-a, mɔ̀ ba̍le dǒ Nyɔsoa nyɔ̍ kli̍hgbɛ̍-a tàà te̍e̍ kleǐn.

¹⁹Nɛ̀ mɔ̀ ba̍le dǒ ǎn tàà ke, pò ǐn ja wlu-ɛ wɛ̀ Nyɔsoa iě ǐn wlu̍ wɔ̍ɔ̍n po̍, wɛ̀ iě sìle dɛ̍ ɛ̀ tba̍-a dǒ pɔ̀n chɛ̀ pùn i̍-ɛ ɛ̍ tìh bla̍ gbài̍gbài̍.

²⁰Pɔ̀n chɛ̀-a tìh bo ǎn wlu dě Klai we̍, ɛ̍ kɔn tìh bo ǐn nɛ ka dě jɔɔdbǔᵻ di̍i̍. Jɛ mɔ̀ ba̍le dǒ ǎn tàà wɛ̀ ka ǐn kɔn iě-a pɔ̀n chɛ̀-a tìh bla̍-a nu̍ gbài̍gbài̍-ɛ, iě laǎn nu̍.

²¹Tekikɔ ɔ̀ nu̍-a tìh kma de̍di̍i̍ à tè-a wlì dě Joi-a dbo̍ nu̍-ɛ di̍i̍-ɛ, ɔ̍ mu̍ ǎn pɔ̀n dě mɔ̀ we̍ ja wɛ̀ ka ǐn pɛ̌n-a ǐn tè-aɛ, iě mɔ̀ iě ɛ̍ we̍ i̍ ju̍o̍e.

²²Ɛ̍ kɔn tìh ǎn dbo̍ ɔ̍ dě mɔ̀ we̍, wɛ̀ ka à nɛ-a nɔ̀ɔ̍-ɛ, ɔ̍ iě ɛ̍ mɔ̀ wlùh sèàɛ̍, wɛ̀ ɛ̍ iě mɔ̀-a wlùh fùka.

²³Ǎn sà nǐ wɔ̍n Baa Nyɔsoa ke Joi Jusu Klai iě de̍di̍i̍ᵻ kli̍hgbɛ̍ kmɔ̌-a i̍ gbe̍ɛ̍ɛn ke wlùh gbaɛ ke jbɛɛ nyǐ.

²⁴Nɛ̀ nyɔ̍ kli̍hgbɛ̍ ùh blě-a jbɛɛ ɛ̀ se̍-a siee la̍ kɔn dǒ à Joi Jusu Klai we̍-ɛ, Nyɔsoa-a blɛ nɛ dǒ u̍h we̍ o.