Read Western Krahn Felepai 1 Bible Online

Felepai 1 - Western Krahn bible

Felepai 1

¹Chlǐh-dɛ̍ la ɛ̍ sɔ nɔ̌ mɔ̍ Pɔɔ ke Timote we̍, àɔ̀ nu̍-a Jusu Klai-a pòi̍nynuu̍-ɛ. Ɛ̍ mu̍ dě Nyɔsoa nyɔ̍ kli̍hgbɛ̍ ùh kɔn-a dǒ Jusu Klai we̍ dǒ Felepai wlɔ̀ di̍i̍-ɛ we̍, ɛ̍ ke chɔchi̍h-a fààmlà ke ɛ̍ jǔ dbee nyɔ̍ ke.

²Ǎn sà nǐ wɔ̍n, à Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

³Pò mɔ̀-a tìh sǐ dǒ ǐn wlì i̍ ti̍ kli̍hgbɛ̍ we̍-ɛ, nɛ̀ ǎn po̍ ǎn Nyɔsoa tlɔ̌.

⁴Ǎn ba̍le-e dǒ mɔ̀ kli̍hgbɛ̍-a tàà ma̍u̍. Ǎn nmɔ-ɛ dǒ ǎn ba̍le la̍.

⁵Dɛ̍nu̍ɛ, sɔ dǒ sàǐtòò weɛ̍ di̍i̍ wɛ̀ ɛ̍ iě-a sèàn jɛɛ-ɛ, mɔ̀ dǔ-a ǐn we̍ gbǎ-a bo mɔ̀ blě-a dě pɔ̀n chɛ̀ gba̍ dbo̍ la di̍i̍.

⁶Nɛ̀ ǐn tè ɛ̍ wlì kleǐn Nyɔsoa ɔ̀ tè-a dbo̍ chɛ̀ la gbɔ̀ dě mɔ̀ ja̍a̍-ɛ, ɔ̍ mu̍ ɛ̍ nya̍ gba̍ te̍e̍ wɛ̀ ɛ̍ iě i̍ wɛ̀ gblaan dǒ Jusu Klai-a ji̍-i weɛ̍ di̍i̍.

⁷Ɛ̍ slɛ̌ i̍ ǎn wlùh iě ka wa̍-a nu̍ mɔ̀-a tìh. Dɛ̍nu̍ɛ, mɔ̀-a dɛ nɛ-a dǒ ǐn wlì-ɛ, ɛ̍ bɛ̌ i̍. Nɛ̀ ǎn pɔ̀n chɛ̀ kɛ̍n wlǔh-ɛ ke, ǎn ɛ̍ i̍ kui-ɛ ke, ǎn dě kasoo nɛ-ɛ ke, mɔ̀ kli̍hgbɛ̍ ke ǐn ke à nu̍ i̍h dě Nyɔsoa-a blɛ nɛ-ɛ di̍i̍.

⁸Ka ǎn mɔ̀-a tìh kma-a kɔ̍-a dě Jusu Klai we̍ i̍, iě ǎn gble-a mɔ̀ kli̍hgbɛ̍-a tìh kaa̍-ɛ, Nyɔsoa-a chɛ̀-a gbǎ bo ɔ̀ nu̍ ǎn sàànsi̍i̍h.

⁹Ǎn ba̍le wlu̍ nu̍ mɔ̀-a jbɛɛ iě kɛ̍n i̍ gboǎɛ dě tɔɔ blě-ɛ ke dɛ̍ ɛ̀ slɛ̌-a i̍-ɛ juo-ɛ di̍i̍.

¹⁰Nɛ̀ mɔ̀-a mu̍ dɛ̍ chɛ̀ klɛ̀ɛ̀n-ɛ bɛ̌ɛ. Nɛ̀ mɔ̀-a nynɛ̌ se̍ kɔ̌ mu̍ wɛ̀ mɔ̀ iě wlaǎwla nɛ dǒ Klai-a ji̍-i weɛ̍ di̍i̍.

¹¹Weɛ̍ laa̍ ɛ̍ iě ji̍-ɛ, i̍-i slɛ̌-ɛ ɛ̀ jii-a dě Jusu Klai ja̍a̍-ɛ, ɛ̍ iě mɔ̀ tlo-e ti̍ kli̍hgbɛ̍ we̍. Nɛ̀ ɛ̍ mu̍ Nyɔsoa-a nynɛ̌ i̍ bɛ̌-ɛ, ɔ̍ iě tìhwe̍ poe-ɛ.

¹²Ǐn de̍di̍i̍ᵻ, ǎn pɔ̀n mɔ̀ iě ɛ̍ juo ka dɛ̍ ɛ̀ nɛ-a ǐn pùn-ɛ, ɛ̍ nɛ-a kmɔ̌ wɛ̀ pɔ̀n chɛ̀ la ɛ̍ naɛ-a dǒ nya̍ kaa̍ka-ɛ.

¹³Kɔ̀mla̍ gbò-a jlǐhɛ̍ tù nyɔ̍ ke nyɔ̍ kli̍hgbɛ̍ juo ɛ̍ i̍ ka ǐn gbǎ-a kasoo Klai-a tìh-ɛ.

¹⁴Ǎn kasoo nɛ-ɛ nu̍ ɛ̍ iě de̍di̍i̍ᵻ dɔu nɛ-a dě Joi ja̍a̍-ɛ, wɛ̀ ɛ̍ po̍ u̍h gbǐh ku̍u̍. Kaka la̍ u̍h sà faɔn wlì wɛ̀, iě u̍h-a bla̍ Nyɔsoa tìh gbài̍gbài̍.

¹⁵Kǎ ɛ̍ nɛ, duuh-a Klai-a tìh bla̍-a kɔ̍-o wlɛ̀n ke chɛ̀-eɛ kɛ̍n i̍. Jɛ duuh-a bla̍ ɔ̍ tìh dǒ wlùh wlǎ we̍.

¹⁶U̍h nu̍ ɛ̍-ɛ dǒ jbɛɛ we̍, dɛ̍nu̍ɛ, u̍h juo ɛ̍-ɛ Nyɔsoa po̍ ǐn da̍a iě pɔ̀n chɛ̀ kɛ̍n wlǔh.

¹⁷Duuh-a Klai-a tìh bla̍-a se̍ wlùh wlǎ blě. Dɛ̍nu̍ɛ, u̍h-a nui ɛ̍ klǎn kɔn-ɛ, u̍h-a pɔ̀n ti̍ ǐn nɛ-a kasoo-ɛ u̍h iě ǐn wě dlǔ po̍.

¹⁸Jɛ ǎn dounᵻ se̍-e nɛ, pò ɛ̍ jɛ tù sɔ̀n ka àe̍e̍ ɛ̍ tù tìh-a taǐn-ɛ. Klai-a tìh bla̍-a nɛ due bo ɛ̀ nmɔ-ɛ m̍. Ǎn mu̍ nmɔ-ɛ dluwe̍ i̍ gba̍.

¹⁹Dɛ̍nu̍ɛ, ǐn juo ɛ̍-ɛ kleǐn, ka mɔ̀-a ba̍le wlu̍ ke Jusu Klai-a Sùù-a ǐn we̍ gbǎ-a mu̍-a ǐn sèìe-ɛ.

²⁰Dɛ̍ ǐn gbàɛ̀-a iě ǐn tè-a wlì-ɛ, ɛ̍ nu̍ ǐn se̍ ǎn chɛ̀ tɛ̀n nui mu̍ kleǐnklein. Ǎn mu̍ wlu gbài̍gbài̍ kaka, wɛ̀ pò dě nya̍-ɛ, ǐn nɛ kmɔ̌ àe̍e̍ pò ǐn mɛ̌-ɛ, wɛ̀ ǎn ku̍ kli̍hgbɛ̍ iě Klai ja̍ tè.

²¹Ɛ̍ tù ǎn tìh-ɛ, nɛ̀ kmɔ̌ nɛ-ɛ la Klai jǔ dbee tìh bo. Mɛ̌ɛ bo ɛ̀ mu̍-o ǐn dɛ̍ po̍.

²²Jɛ pò feɛ nɛ dǒ ǐn wɔ̍i̍n-ɛ, nɛ̀ ǎn dbo̍ nu̍-ɛa mu̍ buǒ we̍ flù-i. Sɔ nɛ̀ dɛ̍ iě-a chèɛ̀ tba̍-ɛ, ǐn se̍ ɛ̍ juo.

²³Ɛ̍ tù ǐn dǒ tu̍ᵻ nynɛ̌. Ǎn pɔ̀n iě da̍a kmɔ̌ la we̍ sɔ iě Klai we̍ mu̍, ɛ̍ bo ɛ̀ nmɔ jii̍-a chɛ̀ kleǐn.

²⁴Jɛ ɛ̍ nmɔ jii̍ kaa̍ iě kmɔ̌ nɛ mɔ̀-a tìh.

²⁵Ǎn chɛ̀ ǎn dlǔ jli̍ wɛ̀ dǒ ɛ̍ we̍, ǐn juo ɛ̍-ɛ ǎn mu̍ kmɔ̌ nɛ dǒ mɔ̀ kli̍hgbɛ̍ we̍. Ǎn mu̍ mɔ̀ we̍ gbǎ-a dluwe̍ gba̍, wɛ̀ mɔ̀ iě nmɔ mɔ̀ iě ku̍ dě wlùh gbaɛ di̍i̍.

²⁶Nɛ̀ ti̍ ǎn mu̍-a dě mɔ̀ we̍ ji̍ dɛ-ɛ, wɛ̀ mɔ̀ iě Jusu Klai tìhwe̍ po̍ ǎn tìh.

²⁷Dɛ̍ due gbài̍ mɔ̀ iě-a nu̍-ɛ, ɛ̍ nu̍ ka Klai-a pɔ̀n chɛ̀-a pɔ̀n-a mɔ̀ iě-a nɛ-ɛ, mɔ̀ iě laǎn nɛ. Wɛ̀ pò ǎn jɛ ji̍ dě mɔ̀ we̍-o, iě pò ǐn se̍-e ji̍-o, iě i̍h wɔ̌n mɔ̀ iě kǎn i̍ nyna dě wlùh due di̍i̍. Wɛ̀ mɔ̀-a dɛ̍ we̍ fɔ̀n-ɛ iě due nɛ dǒ wlùh gbaɛ ɛ̀ kɔ̍-a dǒ pɔ̀n chɛ̀ kɛ̍n i̍-ɛ we̍.

²⁸Mɔ̀ bɔ̌ mɔ̀-a nyɛ̌-nyɔ̍ jǔ ple̍-ɛ tà kli̍hgbɛ̍. Ɛ̍-ɛ bo ɛ̀ mu̍ ɛ̍ we̍i̍ flɔn-ɛ dě u̍h we̍ ka u̍h nɔ̀ɔ̍, u̍h-a mu̍-aa gbɔ̀lɔ-ɛ, jɛ mɔ̀ɔ̍ bo ùh-a mu̍-a pǔh-ɛ. Nyɔsoa bo ɔ̀ mu̍ mɔ̀ pǔh-i.

²⁹Dɛ̍nu̍ɛ, mɔ̀ɔ̍ nɔ̀ɔ̍, mɔ̀ jě bu̍h-a tba̍ la̍ wɛ̀ mɔ̀ iě Klai jǔ dbee. Ɛ̍ se̍ mɔ̀ iě ɔ̍ wlùh gbaɛ nɛ due, jɛ mɔ̀ iě jua̍i̍ sàɛ̀ ke ɔ̍ tìh.

³⁰Mɔ̀-a chɛ̀-a fɔ̀n tu̍h la ke, tu̍h mɔ̀ jě-a m ǎn fɔ̀n-a se̍e̍-ɛ, ɛ̍ bo mɔ̀-a wɔ̌n-a ǎn fɔ̀n-a ke̍ ma̍u̍.