Read Western Krahn Felepai 2 Bible Online

Felepai 2 - Western Krahn bible

Felepai 2

¹Mɔ̀-a dě Klai ja̍a̍ nɛ-ɛa fùka mɔ̀-a wlùh. Ɔ̍ jbɛɛ-a tù mɔ̀ gbàì, iě mɔ̀ ke Nyɔsoa-a Sùù nɛ due. Mɔ̀-a nmɔ-ɛ gblɛ̍n we̍, iě mɔ̀-a jiěe wɔɛ we̍.

²Ka ɛ̍ nɛ-a ka-ɛ, nɛ̀ mɔ̀ nu̍ ɛ̍ la̍ sǔh ǎn nmɔ-ɛ iě kwlǎ wɛ̀ dǒ mɔ̀-a wlùh-a due nɛ-ɛ ke, jbɛɛ-a due nɛ-ɛ ke, pɔluh-a due nɛ-ɛ ke mɔ̀-a di̍i̍chì due chɛ̍n-ɛ we̍.

³Mɔ̀ tǎli klǎn kɔn dɛ i̍, mɔ̀ bɔ̌ mɔ̀-a chɛ̀ i̍ bɛ̌-ɛ. Jɛ mɔ̀ ja mɔ̀-a chɛ̀ wlù dě mɔ̀-a sǔh nynɛ̌, nɛ̀ mɔ̀ jě nyɔ̍ duuh chɛ̀ ka ɛ̍ iě mɔ̀-a chɛ̀ sìì.

⁴Mɔ̀-a jɔ-ɛ, nɛ̀ ɔ̍ jě ɔ̍ ba̍-a bli kwlǐ wɔ̍n, jɛ ɔ̍ bɔ̌ ɔ̍ chɛ̀ nɛ due-a bli kwlǐ wɔ̍n jě-ɛ sǔh.

⁵Nɛ̀ gblɛ̍n Jusu Klai blě-aɛ, ɛ̍ bo mɔ̀ iě blě ke.

⁶Ɔ̍ nɛ dě Nyɔsoa-a tu̍ di̍i̍ te̍kle̍e̍, jɛ ɔ̍ se̍ ɛ̍ nu̍ ɔ̍ ke Nyɔsoa-a wɔ̍i̍n beɛ̍ɛ.

⁷Jɛ ɔ̍ nu̍ ɔ̍ chɛ̀ nyɔ̍ fɔ̍ɔ̍ we̍i̍, wɛ̀ ɔ̍ gbǎ dě pòi̍ju-a tu̍ di̍i̍, iě ɔ̍ wlǔh ka wlɔ̀ nyi̍ɔ̍-ɛ.

⁸Ɔ̍ nɛ dě wlɔ̀ nyi̍ɔ̍-a tu̍ di̍i̍ wɛ̀ ɔ̍ ja ɔ̍ chɛ̀ wlù, iě ɔ̍ tù Nyɔsoa-a wlu̍ nu̍ tìh ɔ̍ mɛ̌. Ɛ̍ bo ɛ̀ nu̍-a ɔ̍ mɛ̌ɛ dǒ gbàɛ̍ kɛ̍n i̍ tu̍ wlì.

⁹Ɛ̍ kɔn tìh Nyɔsoa dǔ ɔ̍ ja̍i̍, iě ɔ̍ sìì dɛ̍ᵻ kli̍hgbɛ̍ wɔ̍n. Wɛ̀ ɔ̍ nyǐ ɔ̍ nynɛ̌ ɛ̀ nɛ-a dǒ nynɛ̌ kli̍hgbɛ̍ dlǔwèàì-ɛ.

¹⁰Nɛ̀ Jusu-a nynɛ̌ tìh-ɛ, kɔlu̍ᵻ kli̍hgbɛ̍ nɛ-a dě ja̍i̍wlɔ̀-ɛ ke jih nɛ-a nɔ̌ kmɔ̌-ɛ ke, dě blǔh sɔ̀n-ɛ, i̍h-a mu̍ wlù wlǎ.

¹¹Nɛ̀ nyɔ̍ kli̍hgbɛ̍-a mu̍ ɛ̍-ɛ wɔ̌ɛn dǒ gbaɛ̍we̍ ka Jusu Klai nu̍-a u̍h-a Joi-ɛ, wɛ̀ ɛ̍ iě Baa Nyɔsoa tìhwe̍ po̍.

¹²Ɛ̍ tìh-ɛ, ǎn tìh kma nyɔ̍, ka mɔ̀-a nu̍-a ǎn wlu̍ i̍ wɔ̌n-ɛ se̍e̍-ɛ, ɛ̍-ɛ bo mɔ̀ iě dluwe̍ i̍ gba̍. Ɛ̍ se̍ pò ǎn jlǐhɛ̍ tè ka-ɛ, wɛ̀ mɔ̀ iě ɛ̍ nu̍ gbɔ̀. Jɛ ka ǐn se̍-a dǒ mɔ̀ we̍ nɛ dɛ-ɛ, jɛwɛ̀ mɔ̀ iě-e de̍ i̍ gbǎ dǒ ɛ̍ nu̍ la̍. Nɛ̀ mɔ̀ gba̍ dbo̍ nu̍-ɛ ɛ̀ kɔ̍-a dǒ mɔ̀-a pǔh-ɛ pùn i̍-ɛ dluwe̍ i̍ dě Nyɔsoa dɛ̍ɛ̍ jě-ɛ di̍i̍.

¹³Dɛ̍nu̍ɛ, Nyɔsoa bo ɔ̀ nu̍ dbo̍ dě mɔ̀ ja̍a̍ wɛ̀ dɛ̍ ɛ̀ pɛ̌n-ɛa ɔ̍ wlùh i̍-ɛ, iě mɔ̀-a pɔ̀n ɛ̍ nu̍-ɛ i̍.

¹⁴Dɛ̍ᵻ kli̍hgbɛ̍ mɔ̀-a mu̍-a nu̍-ɛ, mɔ̀ bɔ̌ ɛ̍ dɛ̍ᵻ jlǐh we̍ i̍ gba̍-a ke wɔ̍ɔ̍n i̍ sà-a nui-ɛ.

¹⁵Nɛ̀ mɔ̀-a nynɛ̌ se̍ kɔ̌ mu̍, mɔ̀ iě wlaǎwla nɛ. Nɛ̀ mɔ̀-a mu̍ Nyɔsoa-a nynuu̍ ùh se̍-a nɛi̍ nɛ-ɛ wɔ̀ dě ùh-a nu̍-a klǐ-dɛ̍ᵻ ke tba̍ɛ kɛ̍n i̍-ɛ we̍. Mɔ̀ kɔn mɔ̀ iě fa̍n dě u̍h nynɛ̌ ka chǔhtlɛ̀n-a fa̍n dě ja̍u̍n wlì-ɛ,

¹⁶ka mɔ̀ gbɛ̍n-a tu̍owli la ɛ̀ nyǐ-a nyɔ̍ feɛ-ɛ, ɛ̍ nya̍ gba̍-a i̍-ɛ. Pò mɔ̀ ja laan nu̍-ɛ, nɛ̀ ɛ̍ mu̍ ǎn bu̍hᵻ dlǔ bɛ̌-ɛ dǒ weɛ̍ Klai-a mu̍-a ji̍-ɛ di̍i̍. Nɛ̀ ǎn gbǐh se̍-e gbɔ̀lɔ mu̍ dǒ dbo̍ dɔu ǐn nu̍-aɛ we̍.

¹⁷Pò ǎn jɛ dbǎ-ɛ, wɛ̀ ǎn nymɔ̍ iě chɛ̌li-ɛ dǒ slaǎ sà-ɛ dɛ̍ mɔ̀-a wlùh gbaɛ nyǐ-a Nyɔsoa-a kɛ̍n-ɛ, nɛ̀ ǎn pɔluh pɛ̌n i̍ mɔ̀ ke ǐn ke à iě mɔna̍ we̍ nui kli̍hgbɛ̍.

¹⁸Mɔ̀-a pɔluh kɔn ɛ̍ iě i̍ pɛ̌n ke mɔ̀ ke ǐn ke à iě mɔna̍ we̍ nui.

¹⁹Pò Joi Jusu wɔ̌n-ɛ, ǐn tè ɛ̍ wlì iě Timote dě mɔ̀ we̍ dbo̍ suei̍. Nɛ̀ pò ǐn wɔ̌n dě mɔ̀ we̍ i̍-ɛ, wɛ̀ iě mɔna̍-a gbǎ.

²⁰Ɔ̍ nɛ due gbài̍ bo ǐn blě ka, ɔ̀ blě mɔ̀-a ti̍ kaa̍.

²¹Jɛ juh kli̍hgbɛ̍ sie-a dǒ de̍-ɛ, u̍h-a sì u̍h-a chɛ̀-a tìh sǔh, u̍h se̍ Jusu Klai-a tìh sì.

²²Mɔ̀-a chɛ̀ juo ka Timote-a nu̍-dɛ̍ flɔn-ɛa ɔ̍ nyɔ̍ chɛ̀ dɛ we̍i̍-ɛ. Ɛ̍ kɔn pò ìn jě ɔ̍ ke ǐn ke-ɛ, ka jǔ ke baa-a na-a, iě à bla̍ pɔ̀n chɛ̀-a tìh.

²³Ǐn tè ɛ̍ wlì iě ɔ̍ dě mɔ̀ we̍ dbo̍ suei̍. Jɛ ka dɛ̍ᵻá mu̍-a nɛ dǒ ǐn we̍-ɛ, wɛ̀ iě ɔ̍ dbo̍.

²⁴Ǐn tè Joi wlì ǎn chɛ̀ iě dě mɔ̀ we̍ ji̍ ke suei̍.

²⁵Ǐn naɛ-a ɛ̍ wlùh i̍-ɛ, ɛ̍ blaɛ i̍ iě à de̍di̍i̍ Ipaflodaitɔ dě mɔ̀ we̍ dbo̍ ke. Ɔ̍ bo ɔ̀ nu̍ dbo̍ iě ɔ̍ fɔ̀n dɛ̍ we̍ ke dǒ ǐn gbèɛ̀n kɛ̍n. Iě mɔ̀ dbo̍ ɔ̍ ɔ̍ iě ǐn sɔ̀nᵻ we̍ i̍ naɛ dɛ ke.

²⁶Mɔ̀-a jě-e tɔ̌n-a nu̍ ɔ̍-ɛ. Ɔ̍ poa pɔ̀n mɔ̀ wɔ̌n-aɛ, ɛ̍ bo ɛ̀ po̍ ɔ̍ wlùh dě de̍ i̍.

²⁷Kǎ ɛ̍ nɛ, ɔ̍ poa-ɛ de chɛ̀, ɔ̍ tɛ̌blɛ mɛ̌-ɛ. Jɛ Nyɔsoa jě ɔ̍ wɔɛ. Ɛ̍ se̍ ɔ̍ nɛ due Nyɔsoa se̍ wɔɛ jě, mɔ̍ bo ɔ̍ jě wɔɛ ke. Ɔ̍ nu̍ ɛ̍-ɛ wɛ̀ ǎn wlùh-a seɔn gbǎ-a je̍e kɛ̍n i̍ gboǎɛ.

²⁸Ɛ̍ kɔn ǎn wlùh-a nu̍ ka jàjà iě ɔ̍ dě mɔ̀ we̍ dbo̍. Wɛ̀ pò mɔ̀ jě ɔ̍ dɛ-ɛ, mɔ̀ iě nmɔ, iě ǎn wlùh iě i̍ tè ke.

²⁹Ɛ̍ tìh-ɛ, mɔ̀ gbɛ̍n ɔ̍ tìh i̍ dě Joi ja̍a̍ mɔ̀ iě nmɔ kaa̍. Nyɔ̍ ùh nɛ-a ka-ɛ, u̍h bo mɔ̀ iě ja̍ tè.

³⁰Dɛ̍nu̍ɛ, ɔ̍ tè ɔ̍ feɛ tɔ̀ma̍a̍ ɔ̍ iě ǐn we̍ gbǎ, iě ɔ̍ tɛ̌blɛ mɛ̌-ɛ Klai-a dbo̍ nu̍ tìh. Wɛ̀ ka mɔ̀ se̍-a ǐn we̍ gbǎ-a nu̍-ɛ bɛ̌ɛ-ɛ, iě ɔ̍ nu̍ la̍a̍n ǐn we̍ gbǎ-a.