Read Western Krahn Felepai 3 Bible Online

Felepai 3 - Western Krahn bible

Felepai 3

¹Ǐn de̍di̍i̍ᵻ, ǎn chlà-a wlu̍ nu̍, mɔ̀ nmɔ, dɛ̍nu̍ɛ, mɔ̀ kɔn dǒ Joi we̍. Dɛ̍ ǐn chlǐh-a sàì-ɛ, ɛ̍ kɛ̍n i̍ gba̍-a se̍ dǒ ǐn wlì feǎn, wɛ̀ ɛ̍ iě mɔ̀ kɛ̍n kaɛn.

²Gbèᵻ la ùh-a nu̍-a dɛ̍ᵻ sɔ̀nᵻɛ́, mɔ̀ nu̍ nɛnɛ̌ dǒ u̍h pùn. U̍h la̍ nyɔ̍ kɔn nyɔ̍ iě plɔ̀n gbǎ dǒ nyi̍ɔ̍-a sɔ̍n we̍ wɛ̀ u̍h iě Nyɔsoa nyɔ̍ nu̍.

³Àɔ̀ nɔ̀ɔ̍, àɔ̀ bo à gbǎ plɔ̀n-a gblangbai̍ naɛ, dɛ̍nu̍ɛ, à se̍ plɔ̀n gbǎ dǒ nyi̍ɔ̍-a sɔ̍n we̍. À sà Nyɔsoa wɛɛ dě ɔ̍ Sùù di̍i̍. À nmɔ-ɛ, dɛ̍nu̍ɛ, à nɛ kmɔ̌ dě Jusu Klai ja̍a̍. À se̍ dɛ̍ᵻ à nu̍-a à chɛ̀ pùn-ɛ wlì tè.

⁴Kǎ ɛ̍ nɛ nɔ̀ɔ̍, ǐn blě bu̍h-a tba̍ la iě dɛ̍ᵻ ǐn nu̍-a ǎn chɛ̀ pùn-ɛ wlì tè. Jɛ pò nyɔ̍-o-nyɔ̍ nu̍ wlùh wɛ̀ ɔ̍ iě bu̍h-a tba̍ la blě ke dǒ ɛ̍ we̍-ɛ, nɛ̀ ǐn sìì ɔ̍-ɛ.

⁵Ǐn wlǔh-aɛ, ǎn wǐh nɛ mɛ̀ta̍a̍n iě ǐn poe-ɛ plɔ̀n. Mɔ̍ Eslɔɛ jǔ gbe̍i̍n ǐn sɔ dě Bɛnyima-a chɛǐ. Ǐn de̍ ke ǐn baa nu̍ Iblu nynuu̍. Ǐn tè-o Juu nyɔ̍-a telě kli̍hgbɛ̍ i̍ ka Fɛlesii nyɔ̍-ɛ.

⁶Wɛ̀ ǎn wlùh-a nu̍ jàjà iě chɔchi̍h klě jě-e. Pò ɛ̍ tù telě dɛɛ jě-ɛ ɛ̀ slɛ̌-ɛ nyɔ̍ i̍-ɛ, nɛ̀ mɔ̍ bo ɔ̀ wɛ̀ nɛi̍.

⁷Jɛ ìh-a mu̍-ao ǐn dɛ̍ po̍ de-ɛ, i̍h bo ǎn dǎɛ ka pɔ̀ɔ̍pìe̍ dɛ̍ᵻ ti̍laa Klai-a tìh.

⁸Jɛ ɛ̍ se̍ ìh la nɛ due, dɛ̍ᵻ kli̍hgbɛ̍-a chɛ̀ bo ìh nu̍ ka pɔ̀ɔ̍pìe̍ dɛ̍ᵻ wɛ̀ dǒ ǐn we̍. Ǎn Joi Jusu Klai juo dɛ nɛ due ɛ̀ gbǎ ka dɛ̍kɛ̍n dǒ ǐn we̍. Ǐn tǎli dɛ̍ᵻ kli̍hgbɛ̍ i̍, iě ǎn dǎɛ ka ìh la dɛ̍ᵻ flu̍hᵻ, wɛ̀ iě Klai gba̍.

⁹Wɛ̀ ɔ̍ ke ǐn ke à iě due nɛ. Nɛ̀ ǐn se̍ naɛ̍ i̍ slɛ̌-ɛ jɛ tba̍-a telě dɛɛ jě-ɛ gbɔ̀ i̍-ɛ blě dɛ, jɛ nɛ̀ jɛ tba̍-a Klai wlùh gbaɛ gbɔ̀ i̍-ɛ bo ǐn blě wɛ̀. I̍ slɛ̌-ɛ sɔ-a dě Nyɔsoa we̍ ɛ̀ tba̍-a wlùh gbaɛ blě-ɛ gbɔ̀ i̍-ɛ bo ǎn dǎ.

¹⁰Dɛ̍ ǎn pɔ̀n-a i̍ kleǐn-ɛ, ɛ̍ nu̍ iě Klai juo, ɛ̍ ke gbǐh ìh sà-a ɔ̍-eɛ ke. Iě ɔ̍ we̍ dɛ jua̍i̍ sàɛ̀, wɛ̀ iě ɔ̍ we̍ dɛ mɛ̌

¹¹wɛ̀ iě ɛ̍ wlì tè ka ǎn chɛ̀-a mu̍-ae wlǔh ke-ɛ.

¹²Ɛ̍ se̍ nɛ̀ ǐn jɛɛ sìla̍ wɛ̀, iě mɔ̍ɔ-ɛ, ǐn wɛ̀ nɛi̍ wɛ̀ kai. Jɛ ǎn fɔ̀n dɛ̍ we̍ wɛ̀ iě sìla̍ jɛɛ, ɛ̀ kɔn tìh Jusu Klai chlì-a m dě ɔ̍ fɔ̌ we̍-ɛ, wɛ̀ iě ɛ̍ jě.

¹³Ǐn de̍di̍i̍ᵻ, ǐn se̍ la̍ nɛ̀ ǐn gba̍ dɛ̍-a chɛ̀ wɛ̀. Jɛ dɛ̍ due bo ǎn nu̍, jih nɛ-a dě ǐn de̍e̍-ɛ, i̍h kɔn tìh bo ǐn tǎli i̍ wɛ̀. Ǎn fɔ̀n dɛ̍ we̍ iě ǐn slɛ̌ i̍ ǎn mu̍ jɛ nɛ-a dě ǐn jǔ-ɛ we̍.

¹⁴Ɛ̍ kɔn ǎn fɔ̀n dɛ̍ we̍ iě sìla̍ ɛ̀ nɛ-a dě ja̍i̍wlɔ̀ ɛ̀ kɔn tìh Nyɔsoa dǎ-a m dě Jusu Klai ja̍a̍-ɛ jɛɛ.

¹⁵Nɛ̀ɛ̍, àɔ̀ juh-a wɔ̌n-a ka dɛ̍ᵻ kli̍hgbɛ̍-ɛ i̍-ɛ, nɛ̀ sìla̍ jɛɛ-a wlùh laa̍ bo à iě blě la̍ sǔh. Jɛ pò dɛ̍ dɛɛ nu̍ ɛ̍ wɛ̀ mɔ̀ iě wlùh dɛɛ blě-ɛ, nɛ̀ Nyɔsoa-a mu̍ ɛ̍ we̍i̍ flɔn-ɛ dě mɔ̀ we̍.

¹⁶Dɛ̍ à iě-a nu̍-ɛ, ɛ̍ nu̍ wìè due à nɛ-a kɛ̍n se̍e̍-ɛ ɛ̍ bo à iě kɛ̍n nɛ.

¹⁷Ǐn de̍di̍i̍ᵻ, ǎn wɔ̀ɔ̀ bo mɔ̀ iě-e i̍ sà ma̍u̍. À sà wìè wɛ̀ dǒ mɔ̀ we̍. Nyɔ̍ ùh-a mu̍-a ɛ̍ gba̍-ɛ bo mɔ̀ iě dɛ̍ we̍ cheǎn-ɛ.

¹⁸Ɛ̀ la ǐn dǔ ɛ̍ mɔ̀ wlùh sèàɛ̍ se̍e̍, iě ǎn gba̍ la̍ ɛ̍ kɛ̍n i̍ dɛ dǒ mǐtɛɛn we̍. Nyɔ̍ dɔu-a chɛ̀-a gblɛ̍n bo ɛ̀ to ɛ̍ ka u̍h faɛn-a Klai-a dǒ gbàɛ̍ kɛ̍n i̍ tu̍ wlì mɛ̌-ɛ tìh-ɛ.

¹⁹U̍h-a mu̍-u gbɔ̀lɔ-ɛ, dɛ̍nu̍ɛ, kwlǐ tè-ɛ bo u̍h-a dǎɛ Nyɔsoa dɛ. Dɛ̍ ɛ̀ iě-a u̍h tɛ̀n-ɛ po̍-ɛ, ɛ̍ kɔn tìh bo u̍h-a blɔ̌. Dɛ̍ᵻ nɛ-a nɔ̌ kmɔ̌ we̍-ɛ, i̍h kɔn tìh u̍h-a naɛ wlùh i̍.

²⁰Jɛ àɔ̀ nɔ̀ɔ̍-ɛ, dě ja̍i̍wlɔ̀ bo ɛ̀ nu̍ à blǐ. Ɛ̍ kɔn à po̍-e gbǐh, iě à chlì à Sèìe Nyɔ̍ we̍ i̍ ɔ̍ iě dě ja̍i̍wlɔ̀ sɔ ɔ̍ iě ji̍, ɔ̀ nu̍-a Joi Jusu Klai-ɛ.

²¹Ɔ̍ blě gbǐh dǒ dɛ̍ᵻ kli̍hgbɛ̍ wlu̍ i̍ kɔn-ɛ we̍. I̍h bo ɔ̍ mu̍ nu̍ wɛ̀ à ku̍ ìh-a mu̍-a mɛ̌-ɛ i̍h iě ɔ̍ chɛ̀-a ku̍ ɛ̀ kɔn tìh bɛ̌-ɛa i̍-ɛ wɔ̀.