Read Western Krahn Felepai 4 Bible Online

Felepai 4 - Western Krahn bible

Felepai 4

¹Ɛ̍ tìh-ɛ, ǎn tìh kma de̍di̍i̍ᵻ, mɔ̀ nyna kǎn i̍ dě Joi ja̍a̍. Ǐn jbɛɛ mɔ̀-ɔ, iě mɔ̀-a tɔ̌n-a nu̍ m. Mɔ̀-a nui ǐn mɔna̍, iě ǎn po̍ bu̍hᵻ wlù i̍ mɔ̀-a tìh.

²Uodia ke Sɛnteki, ǎn ba̍le-e, ǐn gbɛ̍n mɔ̀-a bu̍hᵻ i̍ mɔ̀ iě kɛ̍n i̍ gbe̍ɛ̍ɛn dě Joi ja̍a̍.

³Nɛ̀ɛ̍, mɔ̀ ɔ̀ ke ǐn ke à nu̍-a dbo̍ tu̍ due ǐn tè-a wlì-ɛ, ǎn ba̍le-e, naɛ nynɔ̌gbaɔᵻ la sɔ̍nᵻ we̍ i̍. Dɛ̍nu̍ɛ, u̍h gbǎ ǐn ke Klɛmɛ ke dbo̍ nu̍ nyɔ̍ duuh sie-a dǒ de̍-ɛ we̍ kaa̍, wɛ̀ pɔ̀n chɛ̀ sɛ̍ ka i̍. Klɛmɛ ke dbo̍ nu̍ nyɔ̍ duuh bo ùh kɔn nynɛ̌ nɛ dě feɛ chlǐh-dɛ̍ di̍i̍ wɛ̀.

⁴Mɔ̀ nmɔ ti̍ kli̍hgbɛ̍ we̍, dɛ̍nu̍ɛ, mɔ̀ kɔn dǒ Joi we̍ wɛ̀. Ǎn mu̍ ɛ̍-ɛ sà dɛ, na̍a̍, mɔ̀ nmɔ.

⁵Mɔ̀-a gba̍n gbɛ̍n-ɛ bo ɛ̀ iě mɔ̀-a sàànsi̍i̍h nu̍ dǒ nyɔ̍ kli̍hgbɛ̍ we̍. Joi nɛ à i̍ wɛ̀.

⁶Dɛ̍-o-dɛ̍-a sèò bɔ̌ mɔ̀ nu̍-ɛ. Dɛ̍ᵻ kli̍hgbɛ̍ mɔ̀ nɛ-a blě ka̍-ɛ, mɔ̀ tèle Nyɔsoa i̍ i̍h-a tìh mɔ̀ iě i̍h ɔ̍ jbǎ-ɛ dǒ tlɔ̌ po̍ pɔluh we̍.

⁷Nɛ̀ Nyɔsoa-a wlùh-a i̍ tè-ɛ ɛ̀ sìì-a nyi̍ɔ̍ naɛ flɔ̍nwlùh kli̍hgbɛ̍-ɛ, ɛ̍ mu̍ mɔ̀-a wlùh ke mɔ̀-a pɔluh i̍ pɛ̌n-ɛ dě Jusu Klai ja̍a̍.

⁸Ǐn de̍di̍i̍ᵻ, iě chlà-ɛ, nɛ̀ dɛ̍-o-dɛ̍ ɛ̀ nu̍-a tìh-a taǐn-ɛ ke, ɛ̀ nyɔ̍-a jě-a dɛ̍ɛ̍-ɛ ke, ɛ̀ slɛ̌-a i̍-ɛ ke, ɛ̀ nɛ-a wlaǎwla-a ke, ɛ̀ nyɔ̍ jbɛɛ-a ke, ɛ̀ nyɔ̍-a tè-a ja̍-ɛ ke, ɛ̀ gbǎ-a dɛ̍kɛ̍n-ɛ ke dɛ̍ ɛ̀ nɛ-a tìhwe̍ po̍ ka-ɛ, mɔ̀ blě i̍h kli̍hgbɛ̍-a wlùh.

⁹Dɛ̍ᵻ mɔ̀ wɔ̌n-a iě mɔ̀ jě-a ǐn kwa̍a̍, wɛ̀ mɔ̀ cheǎn-ɛa ǐn we̍-ɛ, i̍h bo mɔ̀ iě nu̍, nɛ̀ Nyɔsoa ɔ̀ nyǐ-a nyɔ̍ wlùh-a i̍ tè-ɛ, ɔ̍ mu̍ mɔ̀ we̍ nɛ.

¹⁰Ka mɔ̀-a nu̍-a ǎn tìh-a wlùh i̍ naɛ kaka dɛ-ɛ, ɛ̍ nmɔ-ɛ m kaa̍ dě Joi ja̍a̍. Mɔ̀-a naɛ ǎn tìh-a wlùh i̍-a chɛ̀ se̍e̍ sǔh, jɛ nɛ̀ mɔ̀ se̍ ɛ̍ nu̍ ka̍ kɔn.

¹¹Ǐn se̍ la̍ ǐn se̍ dɛ̍ ǐn nɛ-a blě ka̍-ɛ blě. Ǎn nu̍ ɛ̍-ɛ wɛ̀ dɛ̍-o-dɛ̍ ǎn mu̍-a jě-ɛ, ǎn pɔluh iě i̍ pɛ̌n dǒ ɛ̍ we̍.

¹²Ǐn juo se̍ dɛ̍ blě-a wlùh wɔ̍n, iě ǐn juo dɛ̍ dɔu blě-ɛa wlùh wɔ̍n ke. I̍h nɔ̀ɔ̍, ǐn sɔ dě i̍h-a plɔ̀n wìè-i wɛ̀. Ɛ̍ kɔn pò ǎn jɛ dbo̍ o, iě mɔ̌ ja ǐn nu̍ o, pò ǎn jɛ blě dɛ̍ dɔu o, iě pò ǎn jɛ se̍ dɛ̍ blě-ɛ, wɛ̀ ǎn nu̍ ɛ̍ ti̍ kli̍hgbɛ̍ we̍ ka jɛ ɛ̍ nu̍ nɛ-ɛ chɛ̀-ɛ, ǎn pɔluh iě i̍ pɛ̌n.

¹³Ǐn bɛ̌ɛ dɛ̍ᵻ kli̍hgbɛ̍ nu̍-ɛ dǒ gbǐh Klai nyǐ-a m-ɛ we̍.

¹⁴Jɛ ka mɔ̀ po̍-a ǐn sɔ̍n we̍ dǒ ǎn tìh jě la̍-ɛ, nɛ̀ dɛ̍ chɛ̀ bo mɔ̀ nu̍.

¹⁵Mɔ̀ɔ̍ Felepai nyɔ̍, mɔ̀-a chɛ̀ juo ɛ̍-ɛ, sɔ dǒ ti̍ iě-a pɔ̀n chɛ̀ la bla̍-a gbɔ̀ tè ti̍ ǐn sɔ-a dě mɔ̀ we̍ Mɛsedonia bloa̍ kɛ̍n-ɛ, chɔchi̍h nyɔ̍ duuh se̍a ǐn sɔ̍n we̍ po̍. Mɔ̀ nɛ due gbài̍ bo ùh gbǎ ǐn we̍, wɛ̀ mɔ̀ nyǐ ǐn dɛ̍.

¹⁶Ti̍ ǐn nɛ-a dǒ Tɛsolonaika wlɔ̀ di̍i̍-ɛ, dɛ̍ᵻ ǐn nɛ-a blě ka̍-ɛ mɔ̀ dbo̍ i̍h ǐn we̍. Mɔ̀ se̍ ɛ̍ nu̍-ɛa gbɔ̍ due gbài̍ nu̍.

¹⁷Ɛ̍ se̍ nyǐ-dɛ̍ᵻ ǐn se̍ i̍ pɔ̀n sǔh, jɛ ǎn pɔ̀n dɛ̍ mɔ̀ nu̍-aɛ, wɛ̀ mɔ̀ iě ɛ̍ dɛ̍ kɛ̍n jě.

¹⁸Kaka la̍, mɔ̀ nyǐ ǐn dɛ̍ᵻ dɔu ìh sìì-a ìh ǐn kɔn iě-a blě-ɛ. Nyǐ-dɛ̍ᵻ mɔ̀ dbo̍-a ǐn we̍ ìh Ipaflodaitɔ ja-aɛ, ǎn wlùh tè i̍ dǒ i̍h we̍ kaa̍. I̍h wɔ̀ nyǐ-dɛ̍ ɛ̀ nmɔ-a nɔ̌ dǒ Nyɔsoa we̍-ɛ, ɛ̍ ke slaǎ sà dɛ̍ ɛ̀ po̍-a ɔ̍ gbǐh iě ɔ̍ gbɛ̍n-a i̍-ɛ.

¹⁹Nɛ̀ ǎn Nyɔsoa-a mu̍ mɔ̀ dɛ̍ᵻ kli̍hgbɛ̍ mɔ̀ nɛ-a blě ka̍-ɛ nyǐ dě ɔ̍ pàn-dɛ̍ᵻ dɔu ɔ̍ jaɛ-a dě Jusu Klai ja̍a̍-ɛ di̍i̍.

²⁰Dǒ à Baa Nyɔsoa we̍ bo tìh-a i̍ bɛ̌-ɛ iě kɔn nɔ̌ kmɔ̌-a kmɔ̌. Kǎ ɛ̍-ɛ nɛ.

²¹Mɔ̍ sà Nyɔsoa nyɔ̍ kli̍hgbɛ̍ nɛ-a dě Jusu Klai ja̍a̍-ɛ nyinɔ̍ i̍. De̍di̍i̍ᵻ nɛ-a nɔ̌ ǐn we̍-ɛ, u̍h la̍ u̍h sà mɔ̀ nyinɔ̍ i̍ ke.

²²Nyɔsoa nyɔ̍ kli̍hgbɛ̍ nɛ-a nɔ̍ɔ̀-ɛ, u̍h la̍ u̍h sà mɔ̀ nyinɔ̍ i̍. Ùh nɛ-a dě à Bloa̍ Joi blǐ gbò-ɛ bo ǎn dǎ gbe̍i̍n.

²³Ǎn sà nǐ wɔ̍n Joi Jusu Klai-a blɛ iě mɔ̀ we̍ nɛ.