Read Western Krahn Kalase 2 Bible Online

Kalase 2 - Western Krahn bible

Kalase 2

¹Kmu-dbo̍ kɔn gbɔ̍igbɔ̍ ǐn po̍-a dǒ mɔ̀ ke Leodesia nyɔ̍ we̍-ɛ, ɛ̍ ke jɛ ǐn nu̍-a dǒ nyɔ̍ duuh ùh-u se̍a ǐn jě-ɛ we̍ ke-ɛ, ɛ̍-ɛ bo ǎn pɔ̀n mɔ̀ iě juo.

²Ǎn nu̍ ɛ̍-ɛ wɛ̀ ɛ̍ iě u̍h-a wlùh fùka, u̍h iě due nɛ dě jbɛɛ di̍i̍. Nɛ̀ u̍h-a mu̍ dɛ̍ɛ̍ i̍ wɔ̌n-ɛa nya̍ pàn-ɛ slèěslè, wɛ̀ u̍h iě Klai ɔ̀ nu̍-a Nyɔsoa-a sìle dɛ̍-ɛ juo.

³Dě ɔ̍ ja̍a̍ bo dɛ̍kɛ̍n gbǎ flɔ̍nwlùh ke tɔɔ kli̍hgbɛ̍ tè-ɛ i̍.

⁴Ǎn sà ìh la-a wɛ̀ nyɔ̍-ɔ je̍e mɔ̀ i̍ boe dǒ u̍h-a wɔ̍n i̍ nmɔ-ɛ we̍.

⁵Kǎ ɛ̍ nɛ gbɛɛ, ǎn nyi̍ɔ̍tu se̍ dě mɔ̀ we̍ nɛ, jɛ ǎn wlùh nɛ dě mɔ̀ we̍. Nɛ̀ dɛ̍ ɛ̀ nmɔ-ɛa dě ǐn di̍i̍ wɔ̍n ǎn jě-aɛ, ɛ̍ nu̍ mɔ̀-a nu̍-dɛ̍ᵻá ti̍ɛ̍ɛn wɔ̍ɔ̍n, iě mɔ̀-a wlùh gbaɛ ku̍ i̍ dě Klai ja̍a̍.

⁶Ka mɔ̀ wɔ̌n-a wɛ̀ Jusu Klai iě-a mɔ̀-a Joi nu̍-ɛ, nɛ̀ mɔ̀ nɛ kmɔ̌ dě ɔ̍ ja̍a̍.

⁷Mɔ̀ po̍ sɛ̌n mɔ̀ iě-o ta̍i̍ gbǎ dě ɔ̍ ja̍a̍. Mɔ̀ tè ɔ̍ wlì. Ka mɔ̀ nu̍-a nǎ poe-ɛɛ, kǎ mɔ̀-a wlùh gbaɛ iě kmu-ɛ nu̍. Nɛ̀ tlɔ̌ po̍-ɛ bo ɛ̀ iě i̍ tìè dě mɔ̀ ku̍sɔ̀n.

⁸Mɔ̀ nu̍ nɛnɛ̌ wɛ̀ nyɔ̍ɔ je̍e mɔ̀ kèi̍ᵻ we̍i̍ nu̍ dǒ wlɔ̀ nyi̍ɔ̍-a pɔ̀ɔ̍pìe̍ flɔ̍nwlùh ɛ̀ boe-a nyɔ̍ i̍-ɛ we̍. I̍h tba̍ dǒ kmɔ̌ nyɔ̍-a nu̍-dɛ̍ᵻ kɛ̍n i̍, i̍h se̍ dǒ Klai naɛ kɛ̍n i̍ tba̍. Gbǐh jih kɔn-a kmɔ̌ la wlu̍ i̍-ɛ bo.

⁹Dě Nyɔsoa-a nɛka kli̍hgbɛ̍ di̍i̍ bo Klai nɛ.

¹⁰Klai ɔ̀ nu̍-a dɛ̍ᵻ wlu̍ i̍ kɔn-ɛ ke gbǐh kli̍hgbɛ̍-a dlǔ-ɛ, dě ɔ̍ ja̍a̍ bo mɔ̀ jě-e feɛ-a gblangbai̍.

¹¹Dě ɔ̍ ja̍a̍ bo mɔ̀ gbǎ-ɛ plɔ̀n, ɛ̍ se̍ nyi̍ɔ̍-a sɔ̍n ɛ̀ se̍ mɔ̀ plɔ̀n po̍. Jɛ Klai naɛ plɔ̀n gbǎ-a sà nyɔ̍ dě gblɛ̍n sɔ̀ɛ̀n ku̍ la di̍i̍.

¹²Ti̍ mɔ̀ po̍-a nǐ dlǔ-ɛ, ka u̍h nu̍-a Klai i̍ tè-ɛ bo u̍h nu̍ mɔ̀. Iě ka ɔ̍ nu̍-ae wlǔh-ɛɛ, wɛ̀ mɔ̀ nu̍ la̍a̍n dě-e wlǔh-ɛ ke dě mɔ̀-a wlùh gbaɛ di̍i̍, dǒ Nyɔsoa-a gbǐh ɛ̀ sà-e Klai-ɛ we̍.

¹³Mɔ̀ mɛ̌ wlɔ̀ i̍ de, dɛ̍nu̍ɛ, mɔ̀ɔ̍ gblɛ̍n sɔ̀ɛ̀n nyɔ̍ iě mɔ̀-a wlùh se̍ Nyɔsoa juo. Jɛ ka Nyɔsoa nu̍-ae Klai sà-aɛ, kǎ ɔ̍ nu̍ mɔ̀ wɛ̀ ke, iě ɔ̍ tǎli à gblɛ̍n sɔ̀ɛ̀n kli̍hgbɛ̍-a tìh i̍.

¹⁴Gba̍ telě po̍-a à dlǔ de-ɛ, ɛ̍ bo ɔ̍ sà wɛ̀, iě ɔ̍ po̍ ɛ̍ de̍ flɔ̀. Ɛ̍ de̍ po̍-ɛ nu̍ ɛ̍ dǒ gbàɛ̍ kɛ̍n i̍ tu̍ wlì kɔ̍-ɛ.

¹⁵Dǒ ɔ̍ sà-ɛ dɛ̍ᵻ wlu̍ i̍ kɔn-ɛ ke tùn blě-ɛ gbǐh kɛ̍n, iě ɔ̍ to ɛ̍ te̍gbe̍i̍n dǒ gbaɛ̍we̍ ka ɔ̍ sà-a i̍h klà dě Klai ja̍a̍-ɛ.

¹⁶Ɛ̍ tìh-ɛ, mɔ̀ bɔ̌ wɔ̌n-ɛ nyɔ̍ bɔ̌ mɔ̀ gbànᵻ tù-iɛ. Bɔ̌ di̍-dɛ̍ᵻ ke, nǎ-dɛ̍ᵻ ke, weɛ̍ ke, chǔh delee ke, wlè-weɛ̍ blě-ɛ dǒ gbàn we̍.

¹⁷Jih laa̍ nɔ̀ɔ̍, ìh-a mu̍-a ji̍ dě nya̍-a i̍h-a sùù bo. Jɛ Klai ji̍ wɛ̀, dɛ̍ᵻá sùù la i̍h se̍ dɛ̍kɛ̍n gbǎ.

¹⁸Nyɔ̍ duuh-a ja u̍h-a chɛ̀ wlù fɔɔ ka iě u̍h-a sà Nyɔsoa-a ǐnchɔ̀ wɛɛ. Mɔ̀ bɔ̌ wɔ̌n-ɛ u̍h bɔ̌ mɔ̀-a wɔ̍n klèɛ̍-ɛ sà-a. Nyɔ̍ kaɛn laa̍ u̍h-a se̍ mɔ̌ ja̍ᵻ u̍h-a ja̍-a bo u̍h tè wlì. Wlɔ̀ nyi̍ɔ̍-a flɔ̍nwlùh bo u̍h-a blɔ̌-ɛ i̍ bu̍ɛ̍i̍.

¹⁹Dɛ̍nu̍ɛ, nɛ̀ Klai jɔ nu̍-a chɔchi̍h-a dlǔ, ɔ̍ jɔ gbɛ̀n-a dǒ ku̍ kli̍hgbɛ̍ we̍ i̍ wɛ̀ ɛ̍ di̍-a dɛ̍, iě ɛ̍ tùi-a i̍, wɛ̀ ɛ̍ ku̍-a Nyɔsoa-a wlùh dɛ̍-ɛ, nɛ̀ ɔ̍ bo u̍h tǎli i̍ wɛ̀.

²⁰Ka mɔ̀ mɛ̌-ɛa Klai we̍ wɛ̀-ɛ, nɛ̀ mɔ̀ se̍ dǒ gbǐh jih kɔn-a kmɔ̌ la wlu̍ i̍-ɛ we̍ kɔn dɛ. Dɛ̍nu̍ mɔ̀-a nu̍ dě kmɔ̌ we̍ nɛ nyɔ̍-a dɛ̍ᵻ ke̍ gbɔ̀ɔ-ɛ, iě mɔ̀-a tè-o i̍h-a gbànᵻ i̍ ke̍ ɛ?

²¹Gbànᵻ la bo ìh nu̍-a bɔ̌ jɛla̍ i̍ gbɛ̍n-ɛ ke, bɔ̌ jɛla̍ wɔ̍n tɛ̀n-ɛ ke, bɔ̌ dɛɛ la i̍ tǔh-ɛ.

²²Ìh la nɔ̀ɔ̍, pò nyɔ̍ nui i̍h dɛ̍-ɛ, nɛ̀ i̍h se̍ nɛ dɛ. Nyi̍ɔ̍ naɛ gbànᵻ bo sǔh wɛ̀ u̍h-a tù-i i̍h nyɔ̍.

²³Gbànᵻ kaɛn la i̍h wɔ̀ flɔ̍nwlùh chɛ̀. Ɛ̍ kɔn i̍h-a nu̍ nyɔ̍-a kloǒ u̍h iě Nyɔsoa-a ǐnchɔ̀ wɛɛ sà. Ìh la i̍h-a ja nyɔ̍ wlù fɔɔ ka. Jɛ kǎ i̍h-a nu̍ nyɔ̍ɔ tìh jě-ɛ. I̍h nɔ̀ɔ̍, i̍h-i po̍-o nyɔ̍ dɛ̍ dǒ nyɔ̍-a wlùh dɛ̍ᵻ bɔ̌ i̍ po̍-ɛ we̍.