Read Western Krahn Kalase 3 Bible Online

Kalase 3 - Western Krahn bible

Kalase 3

¹Ka Nyɔsoa nu̍-a ɛ̍ iě mɔ̀ wlǔh-ae wɛ̀ dǒ Klai we̍-ɛ, dɛ̍ᵻ ìh nɛ-a dě ja̍i̍wlɔ̀ tà Klai tè-a i̍ dǒ Nyɔsoa-a di̍na̍ we̍-ɛ, dě i̍h we̍ bo mɔ̀-a pɔluh iě nɛ.

²Dɛ̍ᵻ ìh nɛ-a dě ja̍i̍wlɔ̀-ɛ, dě i̍h we̍ bo mɔ̀ iě wlùh po̍. Mɔ̀ bɔ̌ ɛ̍ nɔ̌ bloɔ̍ naɛ we̍ po̍-ɛ.

³Kaka la̍ mɔ̀ mɛ̌ wɛ̀, iě mɔ̀-a kmɔ̌ sìle ka dě Klai we̍ dě Nyɔsoa ja̍a̍.

⁴Klai ɔ̀ nu̍-a mɔ̀-a kmɔ̌ nɛ-ɛɛ, ti̍ ɔ̍ mu̍-a tà wlǔh-ɛ, nɛ̀ mɔ̀ ke ɔ̍ mu̍ tà wlǔh dě tìh-a i̍ bɛ̌-ɛ di̍i̍.

⁵Ka ɛ̍ nɛ-a ka-ɛ, gbǎn nu̍-ɛ ke, sììjii̍ nu̍-ɛ ke, wlùh sɔ̀n blě-ɛ ke, dɛ̍ᵻ sɔ̀nᵻ nu̍ pɔluh ke, klǎn kɔn-ɛ la (ɛ̀ bǎ-a kwɛ̍i̍n gbo̍ᵻ wɛɛ sà dɛ i̍-ɛ), kmɔ̌-a nu̍-dɛ̍ᵻ bo. I̍h nɔ̀ɔ̍, sà i̍h sɔ̀n we̍ la̍ sǔh kleǐnklein.

⁶Ìh la bo ìh-a ja Nyɔsoa-a jlu̍h dǒ nyɔ̍ ùh-u jě-a ɔ̍ dɛ̍ɛ̍-ɛ we̍.

⁷Ìh la ti̍ i̍h nɛ-a dǒ gbɔ̀ǐn dě mɔ̀ ku̍sɔ̀n-ɛ, nɛ̀ i̍h bo mɔ̀-a nu̍ kwa̍a̍ i̍ ke de.

⁸Jɛ sà ìh kli̍hgbɛ̍ la sɔ̍n we̍ la̍ sǔh. I̍h bo ìh nu̍-a jlu̍h ke, nyɔ̍ faɛn ke, kà kɔn-ɛ ke, nyɔ̍-a wlu̍ wɔ̍i̍n nyni-ɛ ke chlèwli̍ po̍-ɛ.

⁹Ka mɔ̀ sɔ-a dě mɔ̀-a tu̍ soa ke ɛ̍ nu̍-dɛ̍ᵻ di̍i̍ wɛ̀-ɛ, nɛ̀ mɔ̀ bɔ̌ si̍h we̍ tmɔ̌-ɛ dɛ.

¹⁰Mɔ̀ gbǎ-e tu̍ delee di̍i̍ wɛ̀, wɛ̀ Nyɔsoa ɔ̀ nu̍-a ɛ̍ nu̍ nyɔ̍-ɛ, ɛ̍ iě ɔ̍ dɛ̍ i̍ juo. Ɛ̍ kɔn ɔ̍ po̍ ɛ̍ delee i̍ dě ɔ̍ chɛ̀-a tu̍ di̍i̍.

¹¹Ɛ̍ tìh-ɛ, ùh se̍-a Juu nyɔ̍-ɛ u̍h se̍-o dɔɔ̌ nɛ, wɛ̀ Juu nyɔ̍ se̍-o dɔɔ̌ nɛ. Plɔ̀n gbǎ nyɔ̍ se̍-o dɔɔ̌ nɛ, wɛ̀ se̍ plɔ̀n gbǎ nyɔ̍ se̍-o dɔɔ̌ nɛ. Nyɔ̍ ùh se̍-a Klii nyɔ̍-ɛ se̍-o dɔɔ̌ nɛ, wɛ̀ nyɔ̍ ùh-a nu̍-a dɛ̍ᵻ ka gbɛ̍n-ɛ nmi̍i̍-ɛ u̍h se̍-o dɔɔ̌ nɛ. Nɛ̀ kèi̍ se̍-o dɔɔ̌ nɛ, wɛ̀ nyɔ̍ ùh flɔn-a i̍-ɛ se̍-o dɔɔ̌ nɛ. Jɛ Klai bo ɔ̀ gbǎ dɛ̍kɛ̍n dǒ dɛ̍ᵻ kli̍hgbɛ̍ we̍, iě ɔ̍ nɛ mɔ̀ɔ̍ kli̍hgbɛ̍.

¹²Nɛ̀ɛ̍, ka mɔ̀ nu̍-a Nyɔsoa-a tìh kma nyɔ̍, iě ɔ̍ tba̍-a mɔ̀ chèɛ̀, wɛ̀ ɔ̍ nu̍-a mɔ̀ ɔ̍ chɛ̀-a nyɔ̍ we̍i̍-ɛ, nɛ̀ mɔ̀-a chɛ̀ wlù ja-a ke, gba̍n gbɛ̍n-ɛ ke, wlùh i̍ gbɛ̍n-ɛ ke, wɔɛ kɔn-ɛ ke, gblɛ̍n-ɛ nmɔ-ɛ bo mɔ̀ iě dǒ pùn tù la̍ sǔh.

¹³Mɔ̀ bɔ̌ feǎn wlì we̍ kɔn-ɛɛ, mɔ̀ iě gblɛ̍n sɔ̀ɛ̀n-a tìh we̍ i̍ tǎli-ɛ. Pò jɔ kɔn ba̍ nu̍ ɔ̍ dɛ̍ pùn-ɛ, ɛ̀ kɔn ba̍ Joi nu̍-a mɔ̀-a gblɛ̍n sɔ̀ɛ̀n-a tìh i̍ tǎli-ɛɛ, kǎ mɔ̀ iě nu̍ ke dǒ mɔ̀ ba̍ᵻ we̍.

¹⁴Nɛ̀ dǒ ìh kli̍hgbɛ̍ la kɛ̍n-ɛ, jbɛɛ bo mɔ̀ iě-o po̍. Dɛ̍nu̍ɛ, ɛ̍ bo ɛ̀ ja kɛ̍n i̍ gbe̍ɛ̍ɛn dǒ tà, iě ɛ̍ wɛ̀ kwlǎ.

¹⁵Nɛ̀ wlùh-a i̍ tè-ɛ ɛ̀ sɔ-a dě Klai we̍-ɛ bo ɛ̀ iě mɔ̀-a pɔluh wlu̍ i̍ kɔn. Ɛ̍ kɔn Nyɔsoa dǎ mɔ̀ iě mɔ̀ nu̍ ku̍ due-a nyɔ̍. Mɔ̀ po̍ Nyɔsoa tlɔ̌.

¹⁶Mɔ̀ nu̍ ɛ̍ wlu̍ Klai bla̍-a ɛ̍ iě mɔ̀ nya̍ pàn-ɛ. Mɔ̀ po̍ nǎ mɔ̀ iě slɛ̌ chèɛ̀ we̍ i̍ poe dǒ flɔ̍nwlùh kli̍hgbɛ̍ we̍. Mɔ̀ ble̍ duǐh ìh sɔ-a dě Duǐh Chlǐh-dɛ̍ di̍i̍-ɛ. Nɛ̀ mɔ̀ ble̍ Nyɔsoa-a tìhwe̍ po̍ duǐh ke ɔ̍ Sùù duǐh, wɛ̀ mɔ̀ iě ɔ̍ tlɔ̌ po̍ dǒ mɔ̀ wlùh kɛ̍n.

¹⁷Dǒ wlu-ɛ ke nu̍-dɛ̍ᵻ we̍ o, dɛ̍-o-dɛ̍ mɔ̀-a mu̍-a nu̍-ɛ, mɔ̀ nu̍ ɛ̍ dǒ Joi Jusu-a nynɛ̌ kɛ̍n. Nɛ̀ mɔ̀ jii ɔ̍-ɔ mɔ̀ iě Baa Nyɔsoa tlɔ̌ po̍.

¹⁸Nynɔ̌gbaɔᵻ, mɔ̀ ja mɔ̀-a chɛ̀ wlù dǒ mɔ̀-a kɔanᵻ we̍. Dɛ̍nu̍ɛ, ɛ̍ bo ɛ̀ nmɔ dě Joi jlǐh i̍.

¹⁹Kɔanᵻ, mɔ̀ jbɛɛ mɔ̀-a nynɔ̌gbaɔᵻ, nɛ̀ mɔ̀ bɔ̌ u̍h jua̍i̍ sàɛ̀.

²⁰Nynuu̍, mɔ̀ nu̍ nyɔ̍ ùh wlǔh-ia mɔ̀-ɛ u̍h-a wlu̍ dǒ dɛ̍-o-dɛ̍ we̍. Dɛ̍nu̍ɛ, ɛ̍ bo ɛ̀ tè-e Joi-a wlùh i̍.

²¹Baaᵻ, mɔ̀ bɔ̌ dǒ mɔ̀-a nynuu̍ wlì feǎn-a, wɛ̀ u̍h-a wlùh-u je̍e dě de̍ i̍ gbǎ.

²²Kèi̍ᵻ, mɔ̀ nu̍ nyɔ̍ ùh kɔn-a mɔ̀-ɛ u̍h-a wlu̍ dǒ dɛ̍-o-dɛ̍ we̍. Mɔ̀ bɔ̌ u̍h-a jlǐh jě-ɛ wɛ̀ mɔ̀ bɔ̌ dɛ̍ nu̍-ɛ dǒ u̍h we̍. Jɛ mɔ̀ ple̍ Joi Jusu-a faɔn mɔ̀ iě dɛ̍ nu̍ dǒ wlùh-a i̍ pɛ̌n-ɛ we̍.

²³Dɛ̍-o-dɛ̍ mɔ̀-a mu̍-a nu̍-ɛ, mɔ̀ wɔ̀-e wlùh i̍, ka mɔ̀-a nu̍-a Joi-a dbo̍ iě mɔ̀ se̍-a nyi̍ɔ̍-a dbo̍ nu̍-ɛ.

²⁴Mɔ̀ juo ɛ̍ ka dɛ̍ Joi tè-a i̍ dǒ mɔ̀ we̍-ɛ, ɔ̍ mu̍-a ɛ̍ mɔ̀ nyǐ-ɛ, dɛ̍nu̍ɛ, Klai bo ɔ̀ nu̍ Joi mɔ̀-a dbee jǔ.

²⁵Jɛ dɛ̍ sɔ̀n nu̍ nyɔ̍-a mu̍ ɔ̍ dɛ̍ sɔ̀n-a pɛ̌ɛ la-a jě. Dɛ̍nu̍ɛ, Nyɔsoa-a sà wìè fɔ̌ due.