Read Western Krahn 1 Tɛsoloniɔn 3 Bible Online

1 Tɛsoloniɔn 3 - Western Krahn bible

1 Tɛsoloniɔn 3

¹Sɔ ti̍ à se̍-a ɛ̍ i̍ nyna-a bɛ̌ɛ dɛ-ɛ, wɛ̀ à po̍ ɛ̍ gbɔ̀ iě à nɛ due sie dǒ Atɛn wlɔ̀ di̍i̍,

²wɛ̀ à dbo̍ à de̍di̍i̍ Timote nya̍, ɔ̀ nu̍-a Nyɔsoa-a pòi̍ju dǒ Klai-a pɔ̀n chɛ̀ bla̍-a we̍-ɛ. À dbo̍ ɔ̍-ɛ, ɔ̍ iě mɔ̀ gbǐh nyǐ, wɛ̀ ɔ̍ iě mɔ̀ i̍ kui dě mɔ̀-a wlùh gbaɛ di̍i̍.

³Wɛ̀ klě jě-ɛ ɛ̀ ji̍-aɛ, ɛ̍-ɛ je̍e mɔ̀ i̍ kà. Mɔ̀-a chɛ̀ juo ka klě jě-ɛ kaɛn la ɛ̍ kɔn ɛ̍ iě-a à we̍ ji̍-ɛ.

⁴Ti̍ à nɛ-a dě mɔ̀ we̍-ɛ, à sie ti̍ nya̍ iě à sèàɛ̍ mɔ̀ wlùh ka à mu̍-a klě jě-ɛ. Ɛ̍ kɔn taǐn bo ɛ̀ nɛ-a mɔ̀-a jě-a.

⁵Ɛ̍ kɔn ti̍ ǐn se̍-a ɛ̍ i̍ nyna-a bɛ̌ɛ dɛ-ɛ, wɛ̀ ǐn dbo̍ Timote ɔ̍ iě mɔ̀-a wlùh gbaɛ jě. Ǎn ple̍ faɔn nyɔ̍-se̍-juo Kǔ po̍ mɔ̀ blu̍ja̍a̍ wɛ̀, iě à dbo̍ la ɛ̍-ɛ je̍e bu̍ɛ̍i̍ nu̍.

⁶Jɛ Timote sɔ-a dě mɔ̀ we̍ wɛ̀ ɔ̍ ji̍-a nɔ̌ à we̍-ɛ, ɔ̍ ja à pɔ̀n chɛ̀ dǒ mɔ̀-a wlùh gbaɛ ke jbɛɛ blě-ɛ we̍. Ɔ̍ sèàɛ̍ à wlùh ka pò à tìh sǐ dǒ mɔ̀ wlì i̍-ɛ, wɛ̀ mɔ̀-a nu̍-a mɔna̍ ti̍ kli̍hgbɛ̍ we̍-ɛ. Ɔ̍ la̍ ka mɔ̀-a tɔ̌n-a nu̍-a à nu̍-ɛ à iě-a mɔ̀ jě-ɛ, kǎ à tɔ̌n-a nu̍ mɔ̀ nu̍-ɛ ke.

⁷Ɛ̍ tìh-ɛ, à de̍di̍i̍ᵻ, dě à jua̍i̍ sàɛ̀-ɛ ke klě jě-ɛ kli̍hgbɛ̍ di̍i̍-ɛ, i̍h fùka à wlùh dǒ mɔ̀ we̍. Mɔ̀-a wlùh gbaɛ bo ɛ̀ nu̍ ɛ̍.

⁸Ka mɔ̀ ku̍-ae klì i̍ wɛ̀ dě Joi ja̍a̍-ɛ, nɛ̀ jɛwɛ̀ ǐn juo ɛ̍ ka à nɛ-a kmɔ̌-ɛ.

⁹Dɛ̍ à nu̍-a Nyɔsoa tlɔ̌ po̍-ɛ mɔ̀-a tìh-ɛ, ɛ̍ se̍ dɛ̍ka nɛ. À nu̍ mɔna̍ mɔ̀-a tìh dǒ Nyɔsoa jǔ, ɛ̍ kɔn tlɔ̌ bo à po̍ ɔ̍.

¹⁰Wlù ke sɔ̀n-ɛ, à tèle ɔ̍ i̍ dǒ à pɔluh kli̍hgbɛ̍ we̍ mɔ̀ ke à iě jlǐhɛ̍ tba̍-ɛ, wɛ̀ tà mɔ̀-a wlùh gbaɛ se̍-a nyni̍-ɛ, à iě ɛ̍ doǒ nyni̍-i.

¹¹Ǎn sà nǐ wɔ̍n, à Baa Nyɔsoa-a chɛ̀ ke à Joi Jusu iě à wìè wɔ̍n flɔn-ɛ, wɛ̀ à iě dě mɔ̀ we̍ ji̍.

¹²Ǎn sà nǐ wɔ̍n dɛ ke, Joi iě mɔ̀-a we̍ jbɛɛ kɛ̍n poe, ɛ̍ ke dǒ nyɔ̍ kli̍hgbɛ̍ we̍ ke, ɛ̀ kɔn ba̍ à nu̍-a mɔ̀ɔ̍ jbɛɛ-ɛ.

¹³Wɛ̀ ɔ̍ iě mɔ̀ gbǐh nyǐ, mɔ̀ iě gblɛ̍ja̍i̍ wɛ̀, mɔ̀ iě dǒ à Baa Nyɔsoa nɛ due we̍ kɔn dǒ à Joi Jusu ke ɔ̍ nu̍ nyɔ̍ kli̍hgbɛ̍-a ji̍ la̍-a.