Read Western Krahn 1 Tɛsoloniɔn 5 Bible Online

1 Tɛsoloniɔn 5 - Western Krahn bible

1 Tɛsoloniɔn 5

¹À de̍di̍i̍ᵻ, nyɔ̍ se̍ kɔn u̍h iě mɔ̀ dɛ̍-o-dɛ̍ we̍ chlǐh dǒ ti̍ ke nɔɔ ìh la i̍h-a mu̍-a nɛ-ɛ we̍.

²Dɛ̍nu̍ɛ, mɔ̀-a chɛ̀ juo ɛ̍ gbàkla̍a̍, ka jlǐ-nyɔ̍-a nu̍-a ji̍-ɛ maɔ̍-ɛ, kǎ Joi-a ji̍-i weɛ̍-a mu̍ nɛ ke.

³Pò nyɔ̍gbei la̍a̍ “À wlùh tè i̍, à wɛ̀ kɛ̍-ɛ wɛ̀-ɛ,” wɛ̀ nyɔ̍-ɔ gbɔ̀lɔ-ɛ iě u̍h kɛ̍n kèè ka kwlǐ gbɛ̍n nynɔ̌ ɔ̍ iě gbàɔ̀n sà-ɛ. Nyɔ̍ se̍-o tàn mu̍.

⁴Jɛ à de̍di̍i̍ᵻ, mɔ̀ɔ̍ nɔ̀ɔ̍, mɔ̀ se̍ dě kwile-e nɛ. Weɛ̍ laa̍ ɛ̍ bɔ̌ mɔ̀ i̍ kèle-ɛ ka jlǐ-nyɔ̍-a kèle nyɔ̍ i̍-ɛ.

⁵Mɔ̀ kli̍hgbɛ̍ mɔ̀ɔ̍ sɔ̀npli ke sɔ̀n-a nynuu̍. À se̍ wlù àe̍e̍ kwile-a nynuu̍.

⁶Nɛ̀ɛ̍, mɔ̀ à bɔ̌ nyɔ̍ duuh we̍ dɛ̍ mɔ̌-ɛ. Jɛ mɔ̀ à sà nyinɔ̍ jlǐh i̍, à iě jlǐh i̍ klihklǐh nɛ.

⁷Nyɔ̍ ùh-a mɔ̌-aɛ, maɔ̍ bo u̍h-a mɔ̌. Nyɔ̍ ùh nmɔ̍-a nu̍-aɛ, maɔ̍ bo nmɔ̍-a nu̍ u̍h.

⁸Jɛ ka à kɔn-a dǒ sɔ̀npli we̍-ɛ, nɛ̀ à kɔn à iě jlǐh i̍ klihklǐh nɛ, wɛ̀ wlùh gbaɛ ke jbɛɛ iě à we̍ gbǎ dɛ̍ᵻ nu̍ dǒ fɔ̀n la̍. Nɛ̀ wlì tè dɛ̍ ɛ̀ pǔh-ia nyɔ̍-ɛ, ɛ̍-ɛ bo ɛ̀ iě à nɛ̍ne̍ɛ̍-ɛ gblà nu̍.

⁹Dɛ̍nu̍ɛ, Nyɔsoa se̍ à chèɛ̀ tba̍ ɔ̍ iě à jlu̍h-u gbǎ-ɛ, jɛ ɔ̍ iě à pǔh-i dě à Joi Jusu Klai ja̍a̍ dɛbo.

¹⁰Ɔ̍ mɛ̌-ɛ dǒ à tàà, pò à nɛ kmɔ̌ àe̍e̍ à mɛ̌-ɛ, wɛ̀ ɔ̍ ke à iě tàdùè tǐn.

¹¹Ɛ̍ tìh-ɛ, jɔ-ɛ, nɛ̀ ɔ̍ fùka ɔ̍ ba̍-a wlùh, nɛ̀ ɔ̍ po̍ ɔ̍ ba̍ gbǐh we̍. Ɛ̀ mɔ̀-a nu̍-a ka-ɛ, ɛ̍-ɛ bo mɔ̀ iě nu̍.

¹²À de̍di̍i̍ᵻ, nyɔ̍ ùh nu̍-a mɔ̀-a dlǔtuᵻ dě Joi ja̍a̍ iě u̍h-a nu̍-a dbo̍ dě mɔ̀ nynɛ̌, wɛ̀ u̍h-a po̍-a mɔ̀ slɛ̌ chèɛ̀ i̍-ɛ, à gbɛ̍n mɔ̀-a bu̍hᵻ i̍ mɔ̀ iě u̍h dɛ̍ɛ̍ jě.

¹³Mɔ̀ gbɛ̍n-ɛ u̍h-a dɛ̍ɛ̍ jě-ɛ gbǐh i̍ dǒ jbɛɛ we̍. Dɛ̍nu̍ɛ, u̍h-a nu̍ dbo̍ dǒ mɔ̀ we̍. Mɔ̀ na-ɛ dě wlùh-a i̍ tè-ɛ di̍i̍ dě mɔ̀-a chɛ̀ nynɛ̌.

¹⁴À de̍di̍i̍ᵻ, à ba̍le mɔ̀-ɛ, mɔ̀ gbòɛ̀ɛ̀ flàn-nyɔ̍, mɔ̀ iě faɛn nyɔ̍ wlì i̍ bɛ̌ɛ. Nɛ̀ mɔ̀ gbǎ gbǐh-a mɛ̌-nyɔ̍ we̍. Mɔ̀ gbɛ̍n wlùh i̍ dǒ u̍h kli̍hgbɛ̍ we̍.

¹⁵Mɔ̀ bɔ̌ wɔ̌n-ɛ nyɔ̍ bɔ̌ dɛ̍ sɔ̀n dɛ̍ sɔ̀n gba̍a̍ sàɛ̀-ɛ. Jɛ mɔ̀ fɔ̀n dɛ̍ we̍ mɔ̀ iě dɛ̍ᵻ chɛ̀ we̍ nui ti̍ kli̍hgbɛ̍ we̍, ɛ̍ ke dǒ nyɔ̍ kli̍hgbɛ̍ we̍ ke.

¹⁶Mɔ̀ nmɔ ti̍ kli̍hgbɛ̍ we̍.

¹⁷Mɔ̀ ba̍le ti̍ kli̍hgbɛ̍ we̍.

¹⁸Ka jɛ ɛ̍ nɛ-ɛ, mɔ̀ po̍ Nyɔsoa tlɔ̌. Ɛ̍-ɛ bo ɛ̀ nu̍ Nyɔsoa-a wlùh dɛ dě Jusu Klai ja̍a̍ dǒ mɔ̀ we̍.

¹⁹Mɔ̀ bɔ̌ Nyɔsoa-a Sùù-a nɛ̍ mɔ̌-ɛɛ.

²⁰Mɔ̀ bɔ̌ Nyɔsoa-a tu̍owli wɔ̍n blaɛ-ɛ.

²¹Mɔ̀ tɛ̀n dɛ̍ᵻ kli̍hgbɛ̍-ɛ, nɛ̀ mɔ̀ gbɛ̍n jii̍ nmɔ naɛ i̍.

²²Mɔ̀ ti̍ɛ̍ɛn dɛ̍ᵻ sɔ̀nᵻ kaɛn kaɛn kli̍hgbɛ̍ we̍ i̍.

²³Ǎn sà nǐ wɔ̍n Nyɔsoa ɔ̀ nyǐ-a nyɔ̍ wlùh-a i̍ tè-ɛ, ɔ̍ iě mɔ̀ flɛ̀n wɔ̀ te̍kle̍e̍. Nɛ̀ ǎn sà nǐ wɔ̍n dɛ ɔ̍ iě mɔ̀-a sùù ke, feɛ ke, mɔ̀-a nyi̍ɔ̍ku nɛi̍ wɔ̀ dǒ à Joi Jusu Klai-a ji̍ la̍.

²⁴Ɔ̍-ɔ ɔ̀ dǎ-a mɔ̀-ɛ, ɔ̍ mu̍ ɛ̍ nu̍. Dɛ̍nu̍ɛ, ɔ̍-ɔ gblìh wlu̍ kɛ̍n.

²⁵À de̍di̍i̍ᵻ, mɔ̀ ba̍le dǒ à tàà.

²⁶Mɔ̀ gblèè de̍di̍i̍ᵻ kli̍hgbɛ̍ dǒ nyinɔ̍ i̍ sèàɛ̍ la̍.

²⁷Ǐn gbɛ̍n mɔ̀-a bu̍hᵻ i̍ dě Joi-a gbǐh di̍i̍, chlǐh-dɛ̍ la ɛ̍ iě slè-ɛ dě de̍di̍i̍ᵻ kli̍hgbɛ̍ we̍.

²⁸Ǎn sà nǐ wɔ̍n, à Joi Jusu Klai-a blɛ iě dǒ mɔ̀ we̍ nɛ o.