Read Western Krahn 1 Timote 1 Bible Online

1 Timote 1 - Western Krahn bible

1 Timote 1

¹Wlu̍ la ɛ̍ sɔ nɔ̌ mɔ̍ Pɔɔ ɔ̀ nu̍-a Jusu Klai-a gba̍tòà-a we̍. Nyɔsoa ɔ̀ sèìe-a àɔ̀-ɛ ke Jusu Klai à kɔ̍-a wlùh i̍-ɛ, dǒ u̍h-a wlu̍ kɛ̍n bo ǐn nui gba̍tòà.

²Wlu̍ la ɛ̍ mu̍ Timote we̍, ǎn gblangbai̍ jǔ bo dě wlùh gbaɛ di̍i̍. Ǎn sà nǐ wɔ̍n Baa Nyɔsoa ke à Joi Jusu Klai-a blɛ ke, wɔɛ ke wlùh-a i̍ tè-ɛ iě dǒ ìn we̍ nɛ.

³Ti̍ iě-a dě Mɛsedonia fɔɔ mu̍-ɛ, dɛ̍ kɔn tìh ǐn nɛ̌ɛ-a ìn wlu̍ dounᵻɛ́, ɛ̍ bo ìè nu̍. Na̍ nɛ dǒ Ɛfɛsɔ, wɛ̀ nyɔ̍ ùh-a po̍-a nǎ ìh se̍-a Nyɔsoa-a wìè gba̍-ɛ, ìè u̍h bɔ̌ i̍ po̍.

⁴Sèàɛ̍ u̍h wlùh, se̍o̍nɛ-ɛ sà-a ke baaᵻá baaᵻ slè-ɛ se̍ siee la̍ kɔn laa̍, u̍h bɔ̌ i̍h we̍ fòè-ɛ. Dɛ̍nu̍ɛ, Nyɔsoa-a di̍i̍chì à juo-a dě wlùh gbaɛ di̍i̍-ɛ, ɛ̍ ke i̍h se̍ wìè due gba̍. Jɛ i̍h blě wɔ̍ɔ̍n i̍ sà-a sǔh.

⁵Jbɛɛ ɛ̀ sɔ-a dě pɔluh wlaǎwla we̍-ɛ ke wlùh ɛ̀ se̍-a kɛ̍ i̍ nɛ-ɛ ke wlùh gbaɛ ɛ̀ wɛ̀-a nɛi̍-ɛ, ɛ̍ kɔn tìh ǎn po̍ ìn slɛ̌ chèɛ̀ i̍.

⁶Dǒ ìh la de̍e̍ bo nyɔ̍ duuh blu̍, iě se̍ dɛ̍ kɛ̍n gbǎ sɔ̀nwli si̍e̍ u̍h kwlǎ.

⁷U̍h-a pɔ̀n Nyɔsoa-a telě nǎ poe nyɔ̍ nu̍-ɛ i̍ de. Jɛ dɛ̍ u̍h-a sà-aɛ ke dɛ̍ wlu-ia u̍h gbài̍gbài̍-ɛ, u̍h se̍ i̍h we̍ i̍ ju̍o̍e.

⁸À juo ɛ̍-ɛ ka telě nmɔ-a jii̍-ɛ, jɛ tà ɛ̍ kɔn-a pò nyɔ̍ po̍ ɛ̍ doǒ-ɛ, wɛ̀ ɛ̍ nmɔ jii̍.

⁹Dɛ̍ à iě-a dounᵻ tù-ɛ, ɛ̍ nu̍, ɛ̍ se̍ nyɔ̍ chɛ̀-a tìh telě se̍ poe-ɛ. Jɛ ɛ̍ poe-ɛ dǒ dɛ̍ᵻ sɔ̀nᵻ nu̍ nyɔ̍ we̍, ɛ̍ ke se̍ nyɔ̍ dɛ̍ɛ̍ jě nyɔ̍ ke. Ɛ̍ poe-ɛ dǒ se̍ Nyɔsoa dɛ-ɛ nɛ nyɔ̍ ke gblɛ̍n sɔ̀ɛ̀n nyɔ̍ we̍. Ɛ̍ poe-ɛ dǒ kà kɔn nyɔ̍ ke ùh faɛn-a Nyɔsoa-a we̍. Ɛ̍ poe-ɛ dǒ de̍ᵻ ke baaᵻ dbǎ nyɔ̍ we̍, ɛ̍ ke ùh-a poe-a nyɔ̍ gbe̍ja̍a̍ ke.

¹⁰Ɛ̍ poe-ɛ dǒ gbǎn nu̍ nyɔ̍ ke tba̍ɛ kɛ̍n i̍ nu̍ nyɔ̍ we̍. Ɛ̍ poe-ɛ dǒ bɔ̍lɔ nyɔ̍ di̍ wli̍ ke si̍h tmɔ̌ nyɔ̍ we̍. Ɛ̍ poe-ɛ dǒ po̍ wlu̍ tɔ̀ma̍a̍ nɛ̀ nɛ̀ nu̍ ɛ̍ nyɔ̍ we̍, ɛ̍ ke nǎ po̍-ɛ kli̍hgbɛ̍ ìh se̍-a Nyɔsoa-a wìè gba̍-a ke.

¹¹Pɔ̀ìě Nyɔsoa ɔ̀ kɔn nynɛ̌ bɛ̌-a i̍-ɛ, pɔ̀n chɛ̀ ɔ̍ nyǐ-a m iě-a bla̍-ɛ, dě ɛ̍ di̍i̍ bo nǎ po̍ wlu̍ la ɛ̍ sɔ-ɔ.

¹²Ǐn po̍ à Joi Jusu Klai tlɔ̌, dɛ̍nu̍ɛ, ɔ̍ wlǎ ǐn wlùh dlǔ i̍ iě ɔ̍ tba̍ ǐn chèɛ̀. Wɛ̀ ɔ̍ nyǐ ǐn gbǐh iě ɔ̍ dbo̍ nu̍.

¹³Kǎ ɛ̍ nɛ gbɛɛ, tɛin laa̍ nɛ̀ ǐn nyni ɔ̍ wlu̍ wɔ̍i̍n, iě ǎn chlèe ɔ̍, wɛ̀ ǎn jě-e ɔ̍ nyɔ̍ klě. Wɛ̀ Nyɔsoa jě ǐn wɔɛ, dɛ̍nu̍ɛ, ǎn se̍ wlùh gbaɛ blě bo ɛ̀ nu̍ ɛ̍ wɛ̀ ǐn se̍ dɛ̍ sɔ̀n ǎn nu̍-aɛ juo.

¹⁴Wɛ̀ à Joi-a blɛ-a wlǎ-ɛ sɔ̀n i̍ dǒ ǐn we̍. Wɛ̀ ɔ̍ nyǐ ǐn wlùh gbaɛ ke nyɔ̍ tìh kma-a nɛ-a dě Jusu Klai ja̍a̍-ɛ.

¹⁵Jusu Klai ji̍ da̍a kmɔ̌ la we̍ ɔ̍ iě gblɛ̍n sɔ̀ɛ̀n nyɔ̍ sèìe. Wlu̍ la tìh-a taǐn bo, ɛ̍ nɛ i̍ gbɛ̍n ka̍ klìmàtàìn. Jɛ gblɛ̍n sɔ̀ɛ̀n nyɔ̍-a chɛ̀, mɔ̍ bo ɔ̀ nu̍ u̍h-a gblìmia.

¹⁶Jɛ ɛ̍ kɔn tìh bo Nyɔsoa jě ǐn wɔɛ. Wɛ̀ ka Jusu Klai-a gbɛ̍n-a wlùh i̍ kaa̍ dǒ gblɛ̍n sɔ̀ɛ̀n nyɔ̍-a gblìmia we̍-ɛ, wɛ̀ nyɔ̍ sie-a dǒ de̍-ɛ, u̍h iě ɛ̍ dɛ̍ i̍ blaɛ dǒ ǐn pùn. Wɛ̀ u̍h iě ɔ̍ wlùh gbaɛ, nɛ̀ u̍h-a mu̍ kmɔ̌ sie feɛ blě.

¹⁷Nyɔsoa nɛ due gbài̍, ɔ̀ nu̍-a kmɔ̌ sie Blǔh Baa, ɔ̀ se̍-a mɛ̌ la̍ kɔn, ɔ̀ nɛ-a dě slè-ɛ, mɔ̀ tè ɔ̍ ja̍, mɔ̀ iě ɔ̍ nynɛ̌ i̍ bɛ̌-ɛ nɔ̌ kmɔ̌-a kmɔ̌. Kǎ ɛ̍-ɛ nɛ.

¹⁸Ǎn jǔ Timote, Nyɔsoa-a tu̍owli ìh poe-a dǒ ìn pùn-ɛ, ka i̍h nu̍-a nɛ-ɛɛ, i̍h bo ǎn poe la̍ ìn slǔh ìè dǒ i̍h de̍e̍ sì. Wɛ̀ i̍h iě àn fɔ̀n-dɛ̍ᵻ chɛ̀ nu̍.

¹⁹Nɛ̀ wlùh gbaɛ ke kɛ̍ wlùh chɛ̀ bo ìè blě. Nyɔ̍ duuh se̍ kɛ̍-ɛ nɛ, sɔ ɛ̍ nu̍ ɛ̍ u̍h-a wlùh gbaɛ gbɔ̀lɔ-ɔ.

²⁰U̍h-a duuh bo ùh nu̍-a Amɛnia ke Ɛlesana ǐn sà-ɛa Setɔn kwlǎ, wɛ̀ u̍h iě dɛ̍ cheǎn, wɛ̀ u̍h-u je̍e Nyɔsoa-a wlu̍ wɔ̍i̍n nyni dɛ.