Read Western Krahn 1 Timote 2 Bible Online

1 Timote 2 - Western Krahn bible

1 Timote 2

¹Sàǐtòò dɛ̍-ɛ, ǐn gbɛ̍n àn bu̍h i̍, ìè Nyɔsoa ba̍le. Jbǎ-ɛ ɔ̍ dɛ̍, po̍ nyɔ̍ duuh-a wlu̍ chɛ̀, ìè ɔ̍ tlɔ̌ po̍ dǒ nyɔ̍ kli̍hgbɛ̍ we̍.

²Mɔ̀ ba̍le dǒ blǔh baaᵻ ke tùn blě nyɔ̍ kli̍hgbɛ̍-a tàà. Wɛ̀ à iě dě wlùh-a i̍ tè-ɛ ɛ̀ jě-ea nyɔ̍ feɛ i̍-ɛ ke, Nyɔsoa dɛ-ɛ nɛ-ɛ ke nyɔ̍ dɛ̍ɛ jě kmɔ̌ di̍i̍ nɛ.

³Ɛ̍ bo ɛ̀ nmɔ jii̍, wɛ̀ Nyɔsoa ɔ̀ sèìe àɔ̀-ɛ, iě ɛ̍ tè-e ɔ̍ wlùh i̍.

⁴Ɔ̍-ɔ laa̍ bo ɔ̀ pɔ̀n nyɔ̍ kli̍hgbɛ̍ iě pǔh, wɛ̀ u̍h iě tìh-a taǐn juo la̍ ji̍.

⁵Dɛ̍nu̍ɛ, Nyɔsoa nɛ due, iě wlu̍ tàdùè po̍ nyɔ̍ nɛ due dǒ wlɔ̀ nyi̍ɔ̍ ke Nyɔsoa nynɛ̌. Jɔ̍gbau ɔ̀ nu̍-a Jusu Klai-ɛ bo.

⁶Ɔ̍ sà ɔ̍ chɛ̀ kwlǎ ɔ̍ iě kmɔ̌ nyɔ̍ kli̍hgbɛ̍ kɛ̍ɛ̍n pùhbɔ. Ka Nyɔsoa-a pɔ̀n-a nyɔ̍ kli̍hgbɛ̍ iě-a pǔh-ɛ, ɛ̍ bo ɛ̀ flɔn-ɛ ɛ̍ we̍i̍ dǒ ti̍ ɔ̍ tba̍-a di̍i̍.

⁷Ɛ̍ tìh bo Nyɔsoa tba̍ ǐn chèɛ̀ iě tìh bla̍ nyɔ̍ ke gba̍tòà nu̍. Wɛ̀ ǐn nu̍ ùh se̍-a Juu nyɔ̍-ɛ nǎ po̍ nyɔ̍ dǒ wlùh gbaɛ ke tìh-a taǐn we̍. (Tìh-a taǐn bo ǎn sà-a, ǐn se̍ si̍h tmɔ̌.)

⁸Ǎn pɔ̀n tà-o-tà nyɔ̍gbei-a mu̍-a tàdùè gbǎ-ɛɛ, jɔ̍gbauᵻ iě ba̍le. Nɛ̀ u̍h sà wlùh kwlǎ u̍h iě sɔ̍nᵻ ja̍i̍ to. Jɛ nɛ̀ jlu̍h, àe̍e̍ wɔ̍ɔ̍n i̍ sà-a bɔ̌ dǒ u̍h nynɛ̌ nɛ-ɛ.

⁹Nɛ̀ ǎn pɔ̀n nynɔ̌gbaɔᵻ iě dɛ̍-ɛ pa̍ ka̍ juo. U̍h bɔ̌ nyɔ̍-a jlǐh gbɛ̍n-ɛ dǒ mǐ dba̍-a ke, kòo̍ ke, dɔ̍-po̍-dɛ̍ᵻ ke, jlii̍ ìh kɔn wlǐ tìè-a i̍-ɛ we̍.

¹⁰Jɛ nynɔ̌gbaɔᵻ ùh-a pɔ̀n-a Nyɔsoa nyɔ̍ nu̍-ɛ i̍-ɛ, nɛ̀ nu̍-dɛ̍ᵻ chɛ̀ bo ìh wɛɛn dǒ u̍h pùn i̍.

¹¹Nynɔ̌gbaɔᵻ kɔn u̍h iě dɛ̍ cheǎn dě klìi̍ nɛ-ɛ ke u̍h-a chɛ̀ wlù ja-a di̍i̍.

¹²Nɛ̌ sàɛ̀ nynɔ̌gbaɔᵻ bu̍h i̍ u̍h iě nǎ po̍ àe̍e̍ u̍h iě gbǐh blě dǒ jɔ̍gbauᵻ kɛ̍n. U̍h kɔn u̍h iě klìi̍ nɛ.

¹³Dɛ̍nu̍ɛ, Adaun bo Nyɔsoa nu̍ sàǐtòò iě Ii dǔ-o i̍ tba̍-a.

¹⁴Ɛ̍ se̍-o siee, ɛ̍ se̍ Adaun Kǔ se̍ i̍ boe, nynɔ̌gbaɔ bo Kǔ boe i̍, iě ɔ̍ wa̍ Nyɔsoa-a telě.

¹⁵Jɛ nynɔ̌gbaɔ ɔ̀ mu̍-a wlùh gbaɛ ke, nyɔ̍ tìh kma-a ke, Nyɔsoa wlùh kwlǎ sà-ɛ dɛ kɛ̍n sie dǒ tìh i̍ ple̍-ɛ we̍-ɛ, nɛ̀ ɔ̍ mu̍ pǔh dǒ ɔ̍ gbàɔ̀n sà la̍.