Read Western Krahn 1 Timote 3 Bible Online

1 Timote 3 - Western Krahn bible

1 Timote 3

¹Wlu̍ la tìh-a taǐn bo. Pò nyɔ̍ ja chɔchi̍h-a fààmlà nu̍-ɛ i̍ pɔ̀n-ɛ, nɛ̀ dbo̍ chɛ̀ bo ɔ̍ klɛ̀ɛ̀n.

²Nɛ̀ fààmlà bɔ̌ mlɔ̌ dɛ̍ᵻ nu̍-ɛ. Ɔ̍ kɔn ɔ̍ iě nynɔ̌ due gbài̍ blě. Nɛ̀ ɔ̍ tù ɔ̍ chɛ̀ jlǐhɛ̍, ɔ̍ iě dlǔ kɔn. Ɔ̍ jě ɔ̍ chɛ̀ dɛ̍ɛ̍, ɔ̍ iě nyɔ̍ wlì gbà. Ɔ̍ kɔn ɔ̍ iě nyɔ̍ nǎ po̍-ɛ bɛ̌ɛ.

³Nmɔ̍ bɔ̌ ɔ̍ wlì sìèè-ɛ. Ɔ̍ bɔ̌ dɛ̍ᵻ klàn kɛ̍ɛ̍n gba̍ nyɔ̍ nu̍-ɛ, jɛ ɔ̍ gbɛ̍n gba̍n, ɔ̍ iě kmɔ̌ i̍ gbe̍ɛ̍ɛn nyɔ̍ nu̍. Ɔ̍ bɔ̌ wlǐ klǎn kɔn-ɛ.

⁴Ɔ̍ kɔn ɔ̍ iě dǒ ɔ̍ chɛ̀-a gbò we̍ i̍ gbɛ̀n tlɛnkɛɛ̍n. Nɛ̀ ɔ̍ nu̍ ɛ̍ ɔ̍ nynuu̍ iě dlǔ wlù po̍ dě ɔ̍ dɛ̍ɛ̍ jě-ɛ di̍i̍ dǒ dɛ̍ᵻ kli̍hgbɛ̍ we̍.

⁵Jɛ pò nyɔ̍ se̍ dǒ ɔ̍ chɛ̀-a gbò we̍ i̍ gbɛ̀n-ɛ bɛ̌ɛ-ɛ, nɛ̀ ɔ̍ se̍ dǒ Nyɔsoa-a chɔchi̍h we̍ i̍ gbɛ̀n-ɛ bɛ̌ɛ mu̍ ke.

⁶Ɛ̍ bɔ̌ nyɔ̍ ɔ̀ gbǎ-a dě chɔchi̍h delee bla-a nu̍-ɛ, ɔ̍-ɔ je̍e blɔ̌. Wɛ̀ ka Nyɔsoa nu̍-a Kǔ kɛ̀n sà-aɛ, ɔ̍-ɔ je̍e laan nɛ ke.

⁷Ɔ̍ kɔn ɔ̍ iě kǔkɛ̍n nɛ dě nyɔ̍ ùh se̍-a chɔchi̍h nyɔ̍-ɛ jlǐh, nɛ̀ ɔ̍ se̍ ja̍a̍i̍ poe-ɛ mu̍. Nɛ̀ ɔ̍ wɔ̍ se̍ Kǔ-a gbɛ̀ɛ̀ gbǎ mu̍ ke.

⁸Chɔchi̍h-a jǔ dbee nyɔ̍ kɔn u̍h iě tìh-a i̍ gbɛ̍n nyɔ̍ nu̍, u̍h bɔ̌ mɛɔ sɔɔ̌n wɔ̍ɔ̍n nɛ-ɛ. U̍h bɔ̌ nmɔ̍ dɔu nǎ nyɔ̍ nu̍-ɛ, u̍h bɔ̌ wlǐ klǎn kɔn-ɛ.

⁹Nɛ̀ wlùh gbaɛ la ɛ̀ wlǔh-a tà, ɛ̀ nu̍-a tìh-a taǐn-ɛ, u̍h gbɛ̍n ɛ̍ i̍ dǒ kɛ̍-ɛ wɛ̀ wlùh we̍.

¹⁰Nɛ̀ nyɔ̍ tɛ̀n u̍h ke̍ sàǐtòò. Pò u̍h se̍ kǐh bu̍hᵻ i̍ nɛ-ɛ, nɛ̀ u̍h nu̍ dbo̍.

¹¹Ɛ̍ we̍ nynɔ̌gbaɔᵻ kɔn u̍h iě tìh-a i̍ gbɛ̍n nyɔ̍ nu̍ ke. U̍h bɔ̌ nyɔ̍-a wlu̍ wɔ̍i̍n nyni-ɛ, u̍h tù u̍h-a chɛ̀ jlǐhɛ̍, nyɔ̍ iě u̍h wlì tè dǒ dɛ̍ᵻ kli̍hgbɛ̍ we̍.

¹²Chɔchi̍h-a jǔ dbee nyɔ̍ kɔn u̍h iě nynɔ̌ due gbài̍ blě. Nɛ̀ u̍h kɔn u̍h iě dǒ u̍h-a nynuu̍ ke u̍h-a gbòᵻ we̍ i̍ gbɛ̀n-ɛ bɛ̌ɛ tlɛnkɛɛ̍n.

¹³Ùh-a nu̍-a chɔchi̍h jǔ dbee dbo̍ tliin tliin-ɛ, nɛ̀ u̍h-a nmɔ-ɛ u̍h-a chɛ̀ tè la̍-a, wɛ̀ u̍h-a wlùh gbaɛ nɛ-a dě Jusu Klai ja̍a̍-ɛ, u̍h iě ɛ̍ tìh bla̍ gbài̍gbài̍.

¹⁴Ǎn chlǐh mɔ̀ chlǐh-dɛ̍ la we̍ sǔh, jɛ ǐn tè ɛ̍ wlì iě dě mɔ̀ we̍ ji̍ suei̍.

¹⁵Jɛ pò ǎn ji̍-ɛ ja gba̍n-ɛ, nɛ̀ chlǐh-dɛ̍ la bo ɛ̀ mu̍ ɛ̍ nu̍ wɛ̀ ka nyɔ̍ kɔn u̍h iě-a na-a nu̍ dě Nyɔsoa-a chɛ̌ nynɛ̌-ɛ, wɛ̀ mɔ̀ iě ɛ̍ juo. Ɛ̍-ɛ bo ɛ̀ nu̍-a kmɔ̌ nɛ Nyɔsoa-a chɔchi̍h, iě ɛ̍ nu̍ sìtù ke tìh-a taǐn-a gbɔ̀lùh.

¹⁶À Nyɔsoa dɛ-ɛ nɛ-ɛ la nyɔ̍ se̍-a juo-ɛ, ɛ̍ ku̍ wɔ̍n, nyɔ̍ se̍ ɛ̍-ɛ tòlo-ɛ bɛ̌ɛ. Ɔ̍ wlǔh-i dě nyi̍ɔ̍tu di̍i̍, iě Sùù to ɛ̍ ka ɔ̍ slɛ̌-a i̍-ɛ, wɛ̀ Nyɔsoa-a ǐnchɔ̀ jě ɔ̍. Wɛ̀ ɔ̍ tìh bla̍-ɛ dě bloa̍ we̍. Nyɔ̍ɔ gbaɛ ɔ̍ wlùh nɔ̌ kmɔ̌ we̍, iě ɔ̍ gba̍-ɛ dě ja̍i̍wlɔ̀.