Read Western Krahn 1 Timote 4 Bible Online

1 Timote 4 - Western Krahn bible

1 Timote 4

¹Nyɔsoa-a Sùù sà ɛ̍-ɛ te̍gbe̍i̍n ka nyɔ̍ duuh-a mu̍-a wlùh gbaɛ kɛ̍n i̍ poe dě nya̍-ɛ, wɛ̀ u̍h iě kǔ sùù ìh-a boe-a nyɔ̍ i̍-ɛ dounᵻ we̍ po̍, u̍h iě i̍h-a nǎ po̍ wlu̍ de̍e̍ gbǎ.

²Nǎ po̍-ɛ kaɛn la ɛ̍ sɔ dě mɛɔ sɔɔ̌n wɔ̍ɔ̍n nɛ nyɔ̍ we̍. Dɛ̍nu̍ɛ, u̍h se̍-e kmɔ̌ we̍ kɔn, u̍h-a wlùh gbǎ gbǎ i̍. Ɛ̍ kɔn u̍h-a tmɔ̌ si̍h.

³U̍h bo ùh la̍ nyɔ̍ bɔ̌ nynɔ̌ blě-ɛ, nɛ̀ di̍-dɛ̍ᵻ diih nɛ-o nyɔ̍ bɔ̌ i̍h di̍-ɛ. Jɛ Nyɔsoa nu̍ i̍h wɛ̀ wlùh gbaɛ blě nyɔ̍ ùh juo-a tìh-a taǐn-ɛ, u̍h wɔ̀ tlɔ̌ po̍-ɛɛ, u̍h iě i̍h di̍.

⁴Dɛ̍ᵻ kli̍hgbɛ̍ Nyɔsoa nu̍-aɛ, i̍h nmɔ jii̍. Chla tba̍ dɛ̍ se̍ dě i̍h nynɛ̌ nɛ. Jɛ pò nyɔ̍ jě i̍h-a dɛ̍-ɛ, nɛ̀ ɔ̍ po̍ Nyɔsoa tlɔ̌ tìh kma.

⁵Dɛ̍nu̍ɛ, Nyɔsoa-a wlu̍ ke ba̍le-ɛ bo ìh-a nmɔ-ɛ i̍h dě Nyɔsoa jlǐh i̍.

⁶Pò ìn po̍ de̍di̍i̍ᵻ slɛ̌ la chèɛ̀ i̍-ɛ, nɛ̀ àn mu̍ Jusu Klai-a pòi̍ju chɛ̀ nu̍. Wɛ̀ ìè ku̍ dě wlùh gbaɛ ke nǎ po̍ wlu̍ chɛ̀ ìn wɔ̀-a dǒ de̍e̍-ɛ di̍i̍.

⁷Se̍ Nyɔsoa dɛ-ɛ nɛ ke se̍o̍nɛ laa̍ sà dě i̍h we̍ dounᵻ. Jɛ toe àn chɛ̀ Nyɔsoa dɛ.

⁸Nyi̍ɔ̍tu-a kmu-ɛ cheǎn-a blě dɛ̍kɛ̍n gbǎ naɛ. Jɛ Nyɔsoa dɛ cheǎn-a nɔ̀ɔ̍, ɛ̍ gbǎ dɛ̍kɛ̍n tà kli̍hgbɛ̍. Dɛ̍nu̍ɛ, ɛ̍ po̍ wlu̍ tɔ̀ma̍a̍ dǒ feɛ à blě-a kaka-ɛ ke jɛ mu̍-a ji̍ dě nya̍-a we̍.

⁹Wlu̍ la tìh-a taǐn bo, ɛ̍ nɛ i̍ gbɛ̍n ka̍ klìmàtàìn.

¹⁰À po̍ gbɔ̍igbɔ̍ iě à po̍-e dbo̍ nu̍-ɛa gbǐh. Dɛ̍nu̍ɛ, kmɔ̌ nɛ Nyɔsoa bo à kɔ̍ wlùh i̍, ɔ̀ nu̍-a nyɔ̍ kli̍hgbɛ̍-a Sèìe Nyɔ̍-ɛ. Wlùh gbaɛ blě nyɔ̍ bo ǎn dǎ gbe̍i̍n.

¹¹Poe i̍h nyɔ̍ slǔh ìè i̍h nǎ poe.

¹²Bɔ̌ wɔ̌n-ɛ nyɔ̍ bɔ̌ àn jǔgbèlà dɛ jlǐhɛ̍ dlǔ bla̍-a. Jɛ àn wlu-ɛ ke, àn na ka̍ ke, àn nyɔ̍-ɔ jbɛɛ-ɛ ke, àn wlùh gbaɛ blě-ɛ ke wlaǎwla nɛ-ɛ bo wlùh gbaɛ blě nyɔ̍ iě dɛ̍ i̍ blaɛ.

¹³Nyɔsoa-a wlu̍ wlɔ̀ i̍ slè-ɛ ke, ɛ̍ bla̍-a ke, ɛ̍ nǎ poe-ɛ kɔn gbǐh bo ìè-e po̍ te̍e̍ wɛ̀ iě ìn jɛɛ.

¹⁴Sùù-a nyǐ-dɛ̍ ɛ̀ Nyɔsoa nyǐ-a m̀ dǒ ɔ̍ tu̍owli po̍ nyɔ̍-a wlu̍ kɛ̍n ti̍ chɔchi̍h-a nyɔ̍ klaaᵻ tè-a ìn sɔ̍n dlǔ-ɛ, bɔ̌ ɛ̍ gbɔ̀jlɔ̍kɔ̍ɔ̍ i̍ po̍-ɛ.

¹⁵Ìh la bo ìè cheǎn wɛ̀ ìè i̍h we̍ fòè. Nɛ̀ ka àn sà-a bu̍h de̍-ɛ, nyɔ̍ kli̍hgbɛ̍-a mu̍ ɛ̍ jě.

¹⁶Tù àn chɛ̀ ke àn nyɔ̍ nǎ po̍-ɛ jlǐhɛ̍. Ɛ̍ kɔn wlùh bo ìn bɔ̌ sà-a. Pò ìn ja laan nu̍-ɛ, nɛ̀ àn mu̍ àn chɛ̀ ke nyɔ̍ ùh-a tù-a àn wlu̍ dounᵻɛ́ pǔh-i.