Read Western Krahn 2 Timote 2 Bible Online

2 Timote 2 - Western Krahn bible

2 Timote 2

¹Ɛ̍ tìh-ɛ, ǎn jǔ, Nyɔsoa-a blɛ ɛ̀ nɛ-a dě Jusu Klai ja̍a̍-ɛ, bɔ̌ ɛ̍ iě ìn kmu i̍.

²Nɛ̀ dɛ̍ ìn wɔ̌n-a ǐn wɔ̍ɔ̍n ǐn bla̍-a dǒ sàànsi̍i̍h dɔu jlǐhwai-ɛ, nyɔ̍ ùh nu̍-a wlì tè nyɔ̍-ɛ, dě u̍h kwa̍a̍ ìè ɛ̍ po̍ ùh-a mu̍-a nyɔ̍ duuh nǎ po̍-ɛ bɛ̌ɛ ke-ɛ.

³Gbɛ̍n nàɛ̀ jua̍i̍ sàɛ̀-ɛ i̍, wɛ̀ ìè Jusu Klai-a fledlǔ chɛ̀ wɔ̀.

⁴Fledlǔ ɔ̀ nɛ-a dbo̍ kɛ̍n-ɛ, nɛ̀ ɔ̍ pɔ̀n ɔ̍ iě ɔ̍ nyɔ̍ klaa-a pɔluh i̍ pɛ̌n-ɛ. Ɛ̍ tìh-ɛ, nɛ̀ ɔ̍-ɔ gbǎ dǒ juh nu̍-a wlɔ̀ nyɔ̍-ɛ u̍h-a nu̍-dɛ̍ᵻ de̍e̍ dɛ.

⁵Nɛ̀ ple̍-nyɔ̍ ɔ̀ ke ɔ̍ ba̍ᵻá blaɛ-a dlǔᵻ wɔ̍i̍n-ɛ, pò ɔ̍ iě pà la̍ jě-ɛ, nɛ̀ ɔ̍ jě ɛ̍ telě kli̍hgbɛ̍ dɛ̍ɛ̍ sasǎ.

⁶Nyɔ̍ ɔ̀ po̍-ae gbǐh dǒ fòɔ̀ nu̍ la̍-ɛ, nɛ̀ ɔ̍-ɔ sàǐtòò ɔ̀ chlèè ɔ̍ klè ke.

⁷Dɛ̍ ǎn sà-aɛ, naɛ ɛ̍ wlùh i̍, dɛ̍nu̍ɛ, Joi-a mu̍ ɛ̍ nu̍ ìè ɛ̍ kli̍hgbɛ̍ i̍ wɔ̌n.

⁸Nu̍ Jusu Klai wlùh we̍. Depe-a tloemlai bo, iě ɔ̍ wlǔh-e. Ɛ̍-ɛ bo ɛ̀ nu̍ pɔ̀n chɛ̀ ǎn bla̍.

⁹Pɔ̀n chɛ̀-a tìh-a chɛ̀ bo ǎn sàɛ̀-a jua̍i̍, wɛ̀ ǐn nɛ-a dě jɔɔdbǔᵻ ka telě wa̍ nyɔ̍-ɛ. Jɛ Nyɔsoa-a wlu̍ nɔ̀ɔ̍, ɛ̍ se̍ dě jɔɔdbǔᵻ nɛ.

¹⁰Ɛ̍ kɔn wɛ̀ ǎn ku̍-e klì i̍ dǒ dɛ̍ᵻ kli̍hgbɛ̍ we̍ Nyɔsoa-a chèɛ̀ tba̍ nyɔ̍-a tìh. Wɛ̀ u̍h iě pǔh-ɛ nɛ-a dě Jusu Klai ja̍a̍-ɛ jě ke, ɛ̍ ke kmɔ̌ sie tìh-a i̍ bɛ̌-ɛ ke.

¹¹Wlu̍ la tìh-a taǐn bo. Ɛ̍ la̍a̍, “Pò à mɛ̌-ɛ ɔ̍ we̍-ɛ, nɛ̀ à mu̍ ɔ̍ we̍ tǐn ke.

¹²Pò à ku̍-e klì i̍ ma̍u̍-ɛ, nɛ̀ ɔ̍ ke à mu̍ kmɔ̌ wlu̍ i̍ kɔn. Pò à sà ɔ̍ dɛ kwa̍ i̍-ɛ, nɛ̀ ɔ̍ mu̍ à dɛ kwa̍ i̍ sà ke.

¹³Pò à se̍ wlu̍ kɛ̍n i̍ gbɛ̍n dǒ ɔ̍ we̍-ɛ, ɔ̍ nɔ̀ɔ̍, ɔ̍ se̍ wlu̍ kɛ̍n gblìh mu̍.” Dɛ̍nu̍ɛ, ɔ̍ se̍ ɔ̍ chɛ̀ tù mu̍.

¹⁴Sǐ-i àn nyɔ̍ɔ ìh la wlì i̍, ìè u̍h-a dounᵻ chlì dǒ Nyɔsoa jǔ. U̍h bɔ̌ wlu̍ kɛ̍n i̍ tòlo dɛ nu̍-ɛ. Ɛ̍-ɛ po̍-o nyɔ̍ dɛ̍. Nɛ̀ nyɔ̍ po̍-a i̍h dounᵻ we̍-ɛ, ɛ̍ nyni i̍ u̍h-a dlǔ jii̍.

¹⁵Fɔ̀n dɛ̍ we̍ wɛ̀ Nyɔsoa iě àn chèɛ̀ ja̍i̍ po̍, ìè dbo̍ nu̍ nyɔ̍ ɔ̀ se̍-a ɔ̍ dbo̍ nu̍-ɛa tɛ̀n ple̍-ɛ wɔ̀. Ɔ̍-ɔ laa̍ bo ɔ̀ sèàɛ̍ tìh-a taǐn wlu̍ we̍ i̍ chɛ̀ gbɛɛ.

¹⁶Pàɔ̀n tmɔ̌-ɛ ɛ̀ se̍-a Nyɔsoa dɛ i̍ bǎ-ɛ, sà ɛ̍ sɔ̍n di̍i̍. Dɛ̍nu̍ɛ, ɛ̍ ti̍ɛ̍ɛn nyɔ̍ Nyɔsoa we̍ i̍ kaa̍ka.

¹⁷Nǎ po̍-ɛ kaɛn laa̍ i̍h wɔ̀ chɛn-ɛ chìè ɛ̀ di̍-a nyɔ̍-a ku̍-ɛ. Ìh laa̍, Amɛnia ke Faɛlitɔ nɛ dě i̍h di̍i̍.

¹⁸U̍h blu̍ tìh-a taǐn wìè kɛ̍n, iě u̍h la̍ à-e wlǔh-ɛ sì i̍ wɛ̀ se̍e̍. Sɔ ɛ̍ nyni i̍ nyɔ̍ duuh-a wlùh gbaɛ jii̍.

¹⁹Jɛ Nyɔsoa-a gbo̍tu ɔ̍ po̍-a wlù-ɛ, ɛ̍ nyna i̍ gba̍i̍ngba̍i̍n. Iě wlu̍ la i̍h chlǐh-ɛ dǒ ɛ̍ kɛ̍n. I̍h la̍a̍, “Joi juo ùh nu̍-a ɔ̍ nyɔ̍-ɛ.” Nɛ̀ɛ̍, “Nyɔ̍-o-nyɔ̍ ɔ̀ po̍-a ɔ̍ chɛ̀ dǒ Joi-a nynɛ̌ kɛ̍n-ɛ, nɛ̀ ɔ̍ poe dɛ̍ sɔ̀n nu̍-ɛ kɛ̍n i̍.”

²⁰Blewi̍h nɛ-a dě gbò klaa di̍i̍-ɛ, u̍h nui diih kòo̍ ke sebla̍, wɛ̀ u̍h nui diih tu̍ᵻ ke mɛ̍. Diih nu̍ seǐju blewi̍h, wɛ̀ diih nu̍ plǒai blewi̍h.

²¹Pò nyɔ̍ nu̍ ɔ̍ chɛ̀-a wlaǎwla dǒ nǎ po̍-ɛ kaɛn la we̍-ɛ, nɛ̀ ɔ̍ bo ɔ̀ nu̍ seǐju blewe̍ɛ̍. Nɛ̀ ɔ̍ tè-ɛ tɛ̌n, wɛ̀ ɔ̍ Joi iě ɔ̍ sùo̍o̍ nu̍, iě ɔ̍ gbàɛ̀ ɔ̍ iě dbo̍ chɛ̀ kli̍hgbɛ̍ nu̍.

²²Sà gbale̍e̍ gbǎ nyɔ̍-a wlùh dɛ̍ᵻ sɔ̍n di̍i̍. Jɛ i̍-i slɛ̌-ɛ ke, wlùh gbaɛ ke, jbɛɛ ke wlùh-a i̍ tè-ɛa chììn ìè po̍ dǒ nyɔ̍ ùh-a dǎ-a Joi dǒ wlùh wlǎ we̍-ɛ pùn.

²³Nɛ̀ ìn sà sa̍a̍sa̍ ke bo-o tòlo-ɛ sɔ̍n di̍i̍. Àn chɛ̀ juo ɛ̍-ɛ, wɔ̍ɔ̍n i̍ sà-a bo ɛ̀ bɔ̌ɛ dě i̍h mlǎ-i.

²⁴Joi-a pòi̍ju se̍ kɔn ɔ̍ iě wɔ̍ɔ̍n i̍ sà nyɔ̍ nu̍. Ɔ̍ kɔn ɔ̍ iě gblɛ̍n-ɛ nmɔ dǒ nyɔ̍ kli̍hgbɛ̍ we̍. Ɔ̍ kɔn ɔ̍ iě nǎ po̍ nyɔ̍ chɛ̀ ke wlùh i̍ gbɛ̍n nyɔ̍ nu̍.

²⁵Nɛ̀ ɔ̍ po̍ nyɔ̍ ùh-a tbaɛ-a ɔ̍ bu̍hᵻ i̍-ɛ wìè-e gba̍n gbɛ̍n ka. Nyɔ̍-se̍-juo dǒ Nyɔsoa-a mu̍ u̍h flɔn la̍ nyǐ-i, wɛ̀ u̍h iě i̍ bǐi u̍h iě tìh-a taǐn juo la̍ ji̍.

²⁶Nɛ̀ pò u̍h ji̍ u̍h-a chɛ̀ we̍-ɛ, Kǔ ɛ̀ gbɛ̍n-a u̍h de u̍h iě-a ɛ̍ wlùh nu̍-ɛ, nɛ̀ u̍h-a mu̍ dě ɛ̍ kǎn wɔ̍ɔ̍n sɔ.