Read Western Krahn 2 Timote 3 Bible Online

2 Timote 3 - Western Krahn bible

2 Timote 3

¹Tù ɛ̀ la dounᵻ, tìh jě-ɛa mu̍ dě bɔ̌ɛ-o wǐh di̍i̍ nɛ.

²Nyɔ̍ɔ-a mu̍ u̍h-a chɛ̀-a tìh sì, u̍h iě klǎn kɔn, u̍h iě wɔ̍i̍n po̍, u̍h iě nyɔ̍ kɛ̍n i̍ blɔ̌-ɛ, u̍h iě chlèwli̍ po̍. Nɛ̀ u̍h se̍ de̍ᵻ ke baaᵻá wlu̍ nu̍ mu̍. U̍h-a pɔluh se̍ i̍ tè mu̍, u̍h-a mu̍ kà kɔn.

³U̍h-a mu̍ gblɛ̍n-ɛ nyni. U̍h se̍ wɔɛ kɔn mu̍, u̍h-a mu̍ nyɔ̍-a wlu̍ wɔ̍i̍n nyni. U̍h se̍ dlǔ kɔn mu̍, u̍h iě dɛ̍ᵻá kloǒ nu̍. U̍h-a mu̍ dɛ̍ chɛ̀-ɛ faɛn.

⁴U̍h-a mu̍ nyɔ̍ ple̍ nyɔ̍ nu̍, u̍h se̍-e kmɔ̌ we̍ kɔn mu̍. U̍h-a mu̍ ko̍o̍ chɛ̍n u̍h iě tabɛjuɛ po̍ tìh kma, wɛ̀ Nyɔsoa iě-o i̍ sie.

⁵U̍h-a mu̍ Nyɔsoa wɛɛ sà nyɔ̍ nu̍ fli̍h kɛ̍n i̍, wɛ̀ u̍h iě ɔ̍ gbǐh nɔ̀ɔ̍ chla tba̍. Bɔ̌ dǒ nyɔ̍ kaɛn laa̍ de̍e̍ gbǎ-a.

⁶U̍h-a duuh-a pa̍ dě nynɔ̌gbaɔᵻ kɔn Nyɔsoa dɛ se̍-a kmu-ɛ blǐ gbòᵻ, ùh gblɛ̍n sɔ̀ɛ̀n-a nyɛ̌-a kɛ̍n i̍, wɛ̀ pɔ̀n-dɛ̍ᵻ sɔ̀nᵻ kaɛn kaɛn-a sàɛ̀-a u̍h-a dlǔ wìè-eɛ, wɛ̀ u̍h-a fèàɛ̀ u̍h-a wlùh.

⁷Nynɔ̌gbaɔᵻ laa̍ u̍h-a cheǎn dɛ̍ de, jɛ u̍h se̍ tìh-a taǐn juo-ɛ bɛ̌ɛ.

⁸Ka Chɛnɛ ke Janblɛ nu̍-a Mose bu̍hᵻ i̍ tbaɛ-ɛ, kǎ nyɔ̍ la u̍h nu̍ tìh-a taǐn bu̍hᵻ i̍ tbaɛ ke. Nyɔ̍ laa̍ u̍h-a wlùh nyni wɔ̍n, iě u̍h-a wlùh gbaɛ nu̍ fɔ̍ɔ̍.

⁹Jɛ u̍h se̍ nya̍ mu̍ mu̍. Dɛ̍nu̍ɛ, ka u̍h-a pla̍-a bo-ɛ, ɛ̍ mu̍ we̍ i̍ flɔn dǒ nyɔ̍ kli̍hgbɛ̍ we̍, ka nyɔ̍ jě Chɛnɛ ke Janblɛ-ɛ.

¹⁰Ìn juo ǎn nyɔ̍ nǎ po̍-ɛ ke, ǎn na ka̍ ke dɛ̍ ǐn nɛ-ɛa kmɔ̌-ɛ. Ìn juo ǎn wlùh gbaɛ blě-ɛ, ǎn wlùh i̍ gbɛ̍n-ɛ, ǎn nyɔ̍-ɔ jbɛɛ-ɛ, ɛ̍ ke ǎn dě klì i̍ ku̍-ɛ ke.

¹¹Ìn juo ǎn klě jě-ɛ ke jua̍i̍ sàɛ̀-ɛ ke dɛ̍ᵻ kli̍hgbɛ̍ ìh nɛ-a ǐn pùn dǒ Antiɔ ke Akɔniɔ ke Lesla wlɔ̀ᵻ di̍i̍ i̍-ɛ. I̍h-i laa̍ bo ǐn nyna i̍. Jɛ Joi sèìe m dě i̍h kli̍hgbɛ̍ di̍i̍.

¹²Ɛ̍ se̍ pàɔ̀n, nyɔ̍-o-nyɔ̍ ɔ̀ pɔ̀n-a dě Nyɔsoa-a kmɔ̌ di̍i̍ nɛ-ɛ i̍ dě Jusu Klai ja̍a̍-ɛ, u̍h-a mu̍ ɔ̍ klě jě-e gbɔ̀gbɔ̀.

¹³Nɛ̀ dɛ̍ᵻ sɔ̀nᵻ nyɔ̍ ke de̍ sì nyɔ̍-a mu̍ dě de̍i̍ gbǎ. U̍h-a boe nyɔ̍ɔ i̍, iě u̍h-a boe u̍h-a chɛ̀ i̍ ke.

¹⁴Jɛ mɔ̀ɔ̍-ɛ, dɛ̍ ìn cheǎn-a, iě ìn gbaɛ-a wlùh gba̍i̍ngba̍i̍n-ɛ, ɛ̍ bo ìè dluwe̍ i̍ gba̍. Dɛ̍nu̍ɛ, ìn juo nyɔ̍ ìn cheǎn-a dɛ̍ we̍-ɛ.

¹⁵Nu̍ wlùh, sɔ dě àn jǔwɛ blǐ-ɛ, ìn juo Nyɔsoa-a wlu̍. Ɛ̍ bo ɛ̀ bɛ̌ɛ ìn nǎ po̍-ɛ, ìè Jusu Klai wlùh gbaɛ wɛ̀ ìè pǔh.

¹⁶Chlǐh-ɛ kli̍hgbɛ̍ nɛ-a dě Nyɔsoa wlu̍ di̍i̍-ɛ, i̍h jii dě ɔ̍ Sùù. Ɛ̍ po̍-o dɛ̍ dǒ ɛ̍ nyɔ̍ nǎ poe la̍ ke dɛ̍ sɔ̀n dlǔ i̍ wǐi-ɛ ke, nyɔ̍ wìè-e po̍-ɛ ke toe nyɔ̍ dɛ̍ ɔ̍ iě i̍ slɛ̌ we̍.

¹⁷Wɛ̀ Nyɔsoa-a nyɔ̍ iě kɛ̍n chlìì, ɔ̍ iě dbo̍ chɛ̀ kli̍hgbɛ̍ nu̍-ɛ bɛ̌ɛ.