Read Western Krahn Taitɔ 1 Bible Online

Taitɔ 1 - Western Krahn bible

Taitɔ 1

¹Mɔ̍ Pɔɔ, ɔ̀ nu̍-a Nyɔsoa-a pòi̍ju ke Jusu Klai-a gba̍tòà-ɛ, nɔ̌ ǐn we̍ bo chlǐh-dɛ̍ la ɛ̍ sɔ-ɔ. Nyɔsoa kàn m iě ɔ̍ chèɛ̀ tba̍ nyɔ̍-a wlùh gbaɛ-ɛ dǒ nya̍ na-ɛ, wɛ̀ tìh-a taǐn ɛ̀ tba̍-a dǒ Nyɔsoa dɛ pùn i̍-ɛ, u̍h iě ɛ̍ tɔɔ blě.

²Kmɔ̌ sie feɛ à kɔ̍-a wlùh i̍-ɛ, dǒ ɛ̍ kɛ̍n bo i̍h tba̍ i̍. Nyɔsoa ɔ̀-ɔ tmɔ̌-a si̍h-ɛ, ɔ̍ bo ɔ̀ po̍ ɛ̍ wlu̍ tɔ̀ma̍a̍ sasǎ wɛ̀ kmɔ̌ la ɛ̍ dǔ nui-ɛ.

³Dǒ ti̍ Nyɔsoa tba̍-ɛ di̍i̍ bo ɔ̍ sà-ɛ tɔ̀ma̍a̍ wlu̍-a chɛ̀ tà dě tu̍owli po̍-ɛ ɔ̍ nyǐ-a m-ɛ di̍i̍. Nyɔsoa ɔ̀ nu̍-a à Sèìe Nyɔ̍-ɛ, ɔ̍ bo ɔ̀ po̍ ǐn slǔh iě tu̍owli laa̍ po̍.

⁴Taitɔ, dě ìn we̍ bo wlu̍ la ɛ̍ ji̍. Mɔ̀ ǎn gblangbai̍ jǔ dě wlùh gbaɛ à klɛ̀ɛ̀n-a kwa̍a̍ i̍-ɛ di̍i̍. Ǎn sà nǐ wɔ̍n Baa Nyɔsoa ke Jusu Klai ɔ̀ nu̍-a à Sèìe Nyɔ̍-ɛ, u̍h iě ìn blɛ ke wlùh-a i̍ tè-ɛ nyǐ.

⁵Ɛ̀ kɔn tìh ǐn sie-a m̀ dě Kli bloa̍ kɛ̍n-ɛ, ɛ̍ nu̍ ìè dɛ̍ᵻ ìh se̍-a nɛ ke̍-ɛ nu̍. Ìè chɔchi̍h-a nyɔ̍ klaaᵻ chèɛ̀ tba̍ wlɔ̀ᵻ di̍i̍ i̍ dǒ ka ǐn nu̍-a ìn slɛ̌ chèɛ̀ i̍ po̍-ɛ we̍.

⁶Chɔchi̍h-a nyɔ̍ klaa bɔ̌ kǐh bu̍hᵻ i̍ nɛ-ɛ, nɛ̀ ɔ̍ blě nynɔ̌ due gbài̍. U̍h-a nynuu̍ blě wlùh gbaɛ, u̍h bɔ̌ nynɛ̌ sɔ̀nᵻ blě nyɔ̍ ke nyɔ̍ wɔ̍n blaɛ nyɔ̍ nu̍-ɛ.

⁷Ka ɔ̍ nu̍-a fààmlà iě Nyɔsoa-a kɔan nɛ-a dě ɔ̍ kwa̍-ɛ, ɔ̍ bɔ̌ kǐh bu̍hᵻ i̍ nɛ-ɛ. Ɔ̍ bɔ̌ ɔ̍ chɛ̀ i̍ bɛ̌-ɛ, dǒ ɔ̍ wlì bɔ̌ i̍ kɔǎn-a, nmɔ̍ bɔ̌ ɔ̍ wlì sìèè-ɛ. Ɔ̍ bɔ̌ dɛ̍ᵻ klàn kɛ̍ɛ̍n gba̍ nyɔ̍ nu̍-ɛ, ɔ̍ bɔ̌ wlǐ klǎn kɔn-ɛ.

⁸Ɔ̍ kɔn ɔ̍ iě nyɔ̍ wlì gbà, ɔ̍ iě dɛ̍ chɛ̀-ɛ jbɛɛ, ɔ̍ iě ɔ̍ chɛ̀ i̍ gbɛ̍n, ɔ̍ iě i̍ slɛ̌, ɔ̍ gblɛ̍n iě gbǎ, ɔ̍ iě dě Nyɔsoa jlǐh i̍ nmɔ.

⁹Nɛ̀ ka u̍h nu̍-a gblangbai̍ tu̍owli la nǎ poe-ɛɛ, kǎ ɔ̍ iě ɛ̍ sɔ̍nᵻ sɔɔ̌n i̍ gbɛ̍n-ɛ nu̍. Wɛ̀ ɔ̍ iě nyɔ̍ duuh-a wlùh fùka-a bɛ̌ɛ dǒ nǎ po̍-ɛ chɛ̀ we̍, ɛ̍ ke nyɔ̍ ùh-a tbaɛ-a ɛ̍ bu̍hᵻ i̍-ɛ, u̍h-a dlǔ plɔ̀-ɛ ke.

¹⁰Dɛ̍nu̍ɛ, nyɔ̍ wɔ̍n blaɛ nyɔ̍ ke, se̍o̍nɛ-ɛ sà nyɔ̍ ke, nyɔ̍ i̍ boe nyɔ̍ dɔu nɛ-e. Juu nyɔ̍ ùh sɔ-a dě plɔ̀n gbǎ gbɔ̀ù di̍i̍ ùh ji̍-a u̍h we̍-ɛ, u̍h bo ǎn dǎ gbe̍i̍n.

¹¹Ìn kɔn ìè u̍h bɔ̌ i̍ po̍. Dɛ̍nu̍ɛ, wlǐ klǎn kɔn tìh-ɛ, u̍h-a nyni-i chɛ̌tu gbài̍ laa̍ u̍h-a dlǔᵻ jii̍ dǒ dɛ̍ᵻ u̍h se̍-a kɔn u̍h iě-a nǎ poe de-ɛ we̍.

¹²U̍h-a chɛ̀-a nyɔ̍ ɔ̀ nu̍-a gbànwli po̍ nyɔ̍-ɛ bo ɔ̀ la̍a̍, “Kli nyɔ̍-a tmɔ̌ si̍h ma̍u̍, u̍h wɔ̀ kà kɔn nmi̍i̍, u̍h flàn-ɛ, iě u̍h nyni wɔ̍i̍n.”

¹³Ɔ̍ wlu̍ la tìh-a taǐn bo. Ɛ̍ tìh-ɛ, gbɛ̍n-ɛ u̍h wɔ̍i̍n, wɛ̀ u̍h iě wlùh gbaɛ-ɛ chɛ̀ blě.

¹⁴Pò ɛ̍ nɛ laan-ɛ, nɛ̀ u̍h se̍ Juu nyɔ̍-a se̍o̍nɛ ke, tìh-a taǐn chla tba̍ nyɔ̍-a telě-e dǔ mu̍ dɛ.

¹⁵Nyɔ̍ ùh nɛ-a wlaǎwla-ɛ, nɛ̀ dɛ̍ᵻ kli̍hgbɛ̍ nɛ wlaǎwla dǒ u̍h we̍. Jɛ dǒ wlùh sɔ̀n blě nyɔ̍ ke se̍ wlùh gbaɛ blě nyɔ̍ we̍ nɔ̀ɔ̍, dɛ̍ᵻ se̍ wlaǎwla nɛ. Dɛ̍nu̍ɛ, u̍h-a gblɛ̍n ke u̍h-a wlùh-a nyni i̍ dɛ̍ jii̍.

¹⁶U̍h la̍ u̍h juo Nyɔsoa, jɛ u̍h-a nu̍-dɛ̍ᵻ to ɛ̍-ɛ ka u̍h se̍-a ɔ̍ juo-ɛ. U̍h nu̍ nyɔ̍ sɔ̀nᵻ nyɔ̍. U̍h-u nu̍ Nyɔsoa-a wlu̍ iě u̍h se̍ dɛ̍ chɛ̀ nu̍-ɛ bɛ̌ɛ.