Read Western Krahn Taitɔ 2 Bible Online

Taitɔ 2 - Western Krahn bible

Taitɔ 2

¹Jɛ mɔ̀ɔ̍-ɛ Taitɔ, dɛ̍ ɛ̀ ke nǎ chɛ̀ gba̍-a wìè due-ɛ, ɛ̍ bo ìè nyɔ̍ nǎ poe.

²Sèàɛ̍ nyɔ̍ klaaᵻ wlùh u̍h iě u̍h-a chɛ̀ i̍ gbɛ̍n, u̍h nu̍ tìh-a i̍ gbɛ̍n nyɔ̍, u̍h iě dlǔ kɔn. U̍h kɔn u̍h iě nyɔ̍ chɛ̀ nu̍ dě u̍h-a wlùh gbaɛ-ɛ ke, jbɛɛ-ɛ ke klì i̍ ku̍-ɛ di̍i̍.

³Nɛ̀ ìn sèàɛ̍ nynɔ̌gbaɔᵻ klaaᵻ wlùh ke u̍h iě tìh i̍ ple̍ ka Nyɔsoa we̍ fòè nyɔ̍-a nɛ-aɛ. U̍h bɔ̌ nyɔ̍-a wlu̍ wɔ̍i̍n nyni-ɛ, iě u̍h wɔ̍ bɔ̌ nmɔ̍-a kèi̍ nu̍-ɛ ke. Jɛ ɛ̀ nu̍-a dɛ̍ chɛ̀-ɛ, ɛ̍ bo u̍h iě nyɔ̍ nǎ poe.

⁴Pò ɛ̍ nɛ laan-ɛ, nɛ̀ u̍h-a mu̍ nynɔ̌gbauᵻ gbèè dɛ̍ toe, u̍h iě u̍h-a kɔanᵻ ke u̍h-a nynuu̍-u jbɛɛ.

⁵U̍h gbɛ̍n u̍h-a chɛ̀ i̍, u̍h iě wlaǎwla nɛ, u̍h iě dě gbò i̍ gbɛ̍n, u̍h iě gblɛ̍n-ɛ nmɔ, wɛ̀ u̍h iě u̍h-a chɛ̀ wlù ja dǒ u̍h-a kɔanᵻ we̍. Nɛ̀ nyɔ̍ɔ se̍ Nyɔsoa-a wlu̍ pàwe̍i̍ po̍ mu̍.

⁶Kǎ ìè nynuu̍gbèè wɔ̍i̍n gbɛ̍n-ɛ nu̍ ke, u̍h iě u̍h-a chɛ̀ i̍ gbɛ̍n.

⁷Dǒ dɛ̍ᵻ kli̍hgbɛ̍ we̍-ɛ, mɔ̀ bo u̍h iě dɛ̍ i̍ blaɛ dǒ dɛ̍ chɛ̀ nu̍-ɛ we̍. Wɛ̀ nɛi̍ ìè tìh-a i̍ gbɛ̍n-ɛ nyɔ̍ nu̍ dǒ àn nyɔ̍ nǎ po̍ la̍.

⁸Nmɔ wlu̍ wɔ̍ɔ̍n i̍, nɛ̀ nyɔ̍ se̍ ɛ̍ pàwe̍i̍ po̍-ɛ bɛ̌ɛ. Wɛ̀ ɛ̍ iě àn nyɛ̌-nyɔ̍ tɛ̀n nui, nɛ̀ dɛ̍ sɔ̀n u̍h iě-a sà dǒ àɔ̀ pùn-ɛ, ɛ̍ se̍ nɛ mu̍.

⁹Gbɛ̍n-ɛ kèi̍ᵻ wɔ̍i̍n u̍h iě u̍h-a chɛ̀ wlù ja dǒ u̍h-a dlǔtuᵻ we̍, u̍h iě u̍h-a wlùh i̍ tè-e tà kli̍hgbɛ̍. U̍h bɔ̌ u̍h wɔ̍i̍n gbɛ̍n-ɛ.

¹⁰Nɛ̀ u̍h bɔ̌ u̍h we̍ jlǐ-ɛ. Jɛ u̍h-a nyɔ̍ chɛ̀ nu̍-ɛ ke wlu̍ kɛ̍n i̍ gbɛ̍n-ɛ bo u̍h iě to ti̍ kli̍hgbɛ̍ we̍. Nɛ̀ɛ̍, Nyɔsoa ɔ̀ sèìe-a àɔ̀-ɛ, nǎ po̍-ɛ ɛ̀ tba̍-a dǒ ɔ̍ pùn i̍-ɛ, nɛ̀ u̍h-a mu̍ ɛ̍ nynɛ̌ kɛ̍n po̍ dǒ u̍h-a nu̍-dɛ̍ᵻ kli̍hgbɛ̍ we̍.

¹¹Dɛ̍nu̍ɛ, Nyɔsoa-a blɛ ɛ̀ pǔh-ia nyɔ̍-ɛ, ɛ̍ wlǔh tà wɛ̀ dǒ nyɔ̍ kli̍hgbɛ̍ we̍.

¹²Iě ɛ̍ toe àɔ̀ dɛ̍, à iě se̍ Nyɔsoa dɛ-ɛ nɛ ke kmɔ̌-a pɔ̀n-dɛ̍ᵻ sɔ̍n we̍ sà. Wɛ̀ à iě à chɛ̀ i̍ gbɛ̍n, à iě i̍ slɛ̌, wɛ̀ à iě Nyɔsoa dɛ-ɛ nɛ da̍a kmɔ̌ la we̍.

¹³À wlùh i̍ kɔ̍ dɛ̍ ɛ̀ nmɔ-ɛ àɔ̀ i̍-ɛ nu̍ Jusu Klai. Ɔ̍ à kɛ̍n wlǔh-iɛ dě tìh-a i̍ bɛ̌-ɛ di̍i̍ bo à fuo-e kɛ̍ɛ̍n. Ɔ̍ bo ɔ̀ nu̍ à wɔ̍n ku̍ Nyɔsoa ke à Sèìe Nyɔ̍.

¹⁴Jusu sà ɔ̍ chɛ̀ kwlǎ à tìh, ɔ̍ iě àɔ̀ kɛ̍ɛ̍n pùhbɔ dě kà gblɛ̍n kli̍hgbɛ̍ di̍i̍. Wɛ̀ ɔ̍ nu̍ à wlaǎwla à iě dǒ ɔ̍ chɛ̀ we̍ kɔn kleǐn. Wɛ̀ à wlùh iě jàjà nu̍ dǒ dɛ̍ chɛ̀ nu̍-ɛ we̍.

¹⁵Ìh laa̍ bo ìè nyɔ̍ nǎ poe, gbɛ̍n-ɛ u̍h wɔ̍i̍n, ìè u̍h-a wlùh fùka dǒ tùn ɛ̀ nyǐ i̍-a m̀-ɛ we̍. Bɔ̌ wɔ̌n-ɛ nyɔ̍ bɔ̌ ìn jlǐhɛ̍ dlǔ bla̍-a.