Read Western Krahn Faɛlimɔ 1 Bible Online

Faɛlimɔ 1 - Western Krahn bible

Faɛlimɔ 1

¹Mɔ̍ Pɔɔ ɔ̀ nu̍-a gbɛ̍n-nyɔ̍ Jusu Klai-a tìh-ɛ, nɔ̌ ǐn ke à de̍di̍i̍ Timote we̍ bo chlǐh-dɛ̍ la ɛ̍ sɔ-ɔ. À tìh kma nyɔ̍ Faɛlimɔ, mɔ̀ nu̍-a ǐn ba̍ dbo̍ nu̍ nyɔ̍-ɛ, dě ìn we̍ ɛ̍ ji̍.

²Nɛ̀ ɛ̍ mu̍ à de̍di̍i̍ nynɔ̌gbaɔ Afia ke à ba̍ Klai-a tìh we̍ fɔ̀n nyɔ̍ Achipo we̍, ɛ̍ ke nyɔ̍ ùh-a pa̍-a chɔchi̍h-i dě ìn blǐ gbò-ɛ we̍.

³Ǎn sà nǐ wɔ̍n, à Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

⁴Faɛlimɔ, ka ǎn ba̍le-aɛ kǎ ǎn po̍ àn tìh-a Nyɔsoa tlɔ̌ ma̍u̍.

⁵Dɛ̍nu̍ɛ, àn Nyɔsoa nyɔ̍ kli̍hgbɛ̍-a tìh kma-a ke, Joi Jusu wlùh gbaɛ kɔn pɔ̀n bo ǎn wɔ̌n.

⁶Ǎn ba̍le-eɛ wɛ̀ àn wlùh gbaɛ laa̍ ìè ɛ̍ nyɔ̍ duuh-u po̍ ke. Wɛ̀ pɔ̀ìě ìn ke à blě-a dě Klai ja̍a̍-ɛ, ìè dě ɛ̍ di̍i̍ i̍ wɔ̌n.

⁷Ǐn de̍di̍i̍, àn nyɔ̍ tìh kma-a ja ǐn nmɔ-ɛ dɔu we̍, iě ɛ̍ po̍ ǐn gbǐh kɛ̍n. Dɛ̍nu̍ɛ, àn pɛ̌n-ɛ Nyɔsoa nyɔ̍ kli̍hgbɛ̍-a pɔluh i̍.

⁸Ɛ̍ tìh-ɛ, ka ìn ke ǐn ke à gbaɛ-a Klai wlùh-ɛ, ǐn bɛ̌ɛ iě faɔn wɛ̀ de iě ìn wlu̍ poe dɛ̍ ǐn dǎ-aɛ ìè ɛ̍ nu̍.

⁹Jɛ we̍ jbɛɛ tìh-ɛ, ǐn gbɛ̍n àn bu̍hᵻ i̍. Mɔ̍ Pɔɔ la ǐn nu̍ nyɔ̍ klaa wɛ̀, iě ǐn nu̍ ka gbɛ̍n-nyɔ̍ Jusu Klai-a tìh.

¹⁰Nɛ̀ɛ̍, ǐn gbɛ̍n àn bu̍hᵻ i̍ dǒ ǎn jǔ Onɛsemɔ-a tìh we̍. Ti̍ ǐn nɛ-a dě kasoo-ɛ, dǒ ɔ̍ ke ǐn ke à nui jǔ ke baa dɛ.

¹¹Ɔ̍ se̍ dɛ̍kɛ̍n gbǎ dǒ ìn we̍ dɛ de. Jɛ kaka la̍ ɔ̍ gbǎ dɛ̍kɛ̍n wɛ̀ dǒ à gbɔ̍ᵻ nɛ-a sɔɔ̌n-ɛ we̍.

¹²Nɛ̀ɛ̍, de̍ ǎn dbo̍-a ɔ̍ dě ìn we̍-ɛ, ǎn wlùh nɛ ɔ̍ kɛ̍n o.

¹³Ǎn pɔ̀n iě ɔ̍ kɛ̍n i̍ gbɛ̍n de, ka ǐn nɛ-a nɔ̌ kasoo pɔ̀n chɛ̀ tìh-ɛ, wɛ̀ ɔ̍ iě ǐn sɔ̍n-ɔ sà dǒ ìn wɔ̀ɔ̀.

¹⁴Jɛ ǐn se̍ ìn ti̍-i sie mu̍, wɛ̀ àn kloǒ je̍e dɛ̍ chɛ̀ nu̍. Jɛ ìè ɛ̍ nu̍ dǒ àn chɛ̀-a wlùh-a i̍ pɛ̍n-ɛ we̍.

¹⁵Nyɔ̍-se̍-juo ɛ̍ kɔn ɔ̍ sɔ dǒ ìn pùn dǒ ti̍ gbɔ̍ di̍i̍ wɛ̀ pò ɔ̍ ji̍ de̍-ɛ, ìè ɔ̍ blě la̍ sǔh kleǐnklein.

¹⁶Kaka la̍ ɔ̍ se̍ kèi̍ wɔ̀ dɛ, dɛ̍nu̍ɛ, ɔ̍ gbǎ dɛ̍kɛ̍n ɔ̍ sìì kèi̍. À tìh kma de̍di̍i̍ bo wɛ̀. Ɔ̍ tìh kma-ɛ dǒ ǐn we̍, jɛ ɔ̍ tìh kma-ɛ dǒ ìn we̍ kaa̍ ɛ̍ sìì m̀. Dɛ̍nu̍ɛ, ɔ̍ nu̍ àn kèi̍ iě ɔ̍ nu̍ ìn de̍di̍i̍ dɛ dě Joi ja̍a̍.

¹⁷Ɛ̍ tìh-ɛ, ka ìn juo ɛ̍-ɛ ìn ke ǐn ke à nɛ-a dě dɛ̍ due di̍i̍-ɛ, ka àn mu̍-a ǎn tìh i̍ gbɛ̍n-ɛ nu̍-ɛ, nɛ̀ kǎ ìè ɔ̍ tìh i̍ gbɛ̍n-ɛ nu̍ ke.

¹⁸Pò ɔ̍ nu̍ ìn dɛ̍ sɔ̀n pùn o, iě pò ɔ̍ blě àn dɛ̍-o-dɛ̍-ɛ, nɛ̀ dǒ ǐn dlǔ ìè i̍h po̍.

¹⁹Mɔ̍ Pɔɔ, ǎn chlǐh ɛ̀ la dǒ ǎn chɛ̀-a sɔ̍n we̍. Na̍a̍, “Dɛ̍ àn mu̍-a ǐn dlǔ po̍-ɛ, ǎn mu̍ ɛ̍ de̍ pɛ̌ɛ.” (Ɛ̍ chɛ̀ nɔ̀ɔ̍, ɛ̍ se̍ dɛ̍-ɛ wɛ̀ iě ìn wlùh sèàɛ̍, ka àn chɛ̀ bo ɔ̀ nu̍-a gba̍ ìn blě-a dǒ ǐn we̍-ɛ ìn juo i̍h.)

²⁰Ǐn de̍di̍i̍, ǎn pɔ̀n ìè ǎn wlùh-a fɔ̀ɛ̀ɛ̀n nu̍ dě Joi ja̍a̍. Pɛ̌n-ɛ ǎn pɔluh i̍ dě Klai ja̍a̍.

²¹Ǐn tè ɛ̍ wlì dɛ̍ kɔn tìh ǎn chlǐh-a ìn we̍-ɛ, àn mu̍ ɛ̍ nu̍. Ǐn juo ɛ̍-ɛ àn mu̍ ɛ̍ nu̍ ìè ɛ̍ kɛ̍n sì-a chɛ̀.

²²Ɛ̍ se̍-o siee, nɛ̀ ìn nma̍le ǎn pɛ̌na̍ ke dě ìn blǐ gbò. Ǐn tè ɛ̍ wlùh kɛ̍n Nyɔsoa-a mu̍ mɔ̀-a ba̍le wlu̍ i̍ wɔ̌n iě dě mɔ̀ we̍ ji̍ dode̍.

²³Ipafla ɔ̀ nu̍-a ǐn ba̍ gbɛ̍n-nyɔ̍ Jusu Klai-a tìh-ɛ, ɔ̍ la̍ ɔ̍ sà ìn nyinɔ̍ i̍.

²⁴Nɛ̀ ǐn ba̍ᵻ dbo̍ nu̍ nyɔ̍, Maɛ ke, Awleslakɔ ke, Dima ke Luu la̍ u̍h sà ìn nyinɔ̍ i̍ ke.

²⁵Ǎn sà nǐ wɔ̍n Joi Jusu Klai-a blɛ iě mɔ̀ we̍ nɛ.