Read Western Krahn Iblu 1 Bible Online

Iblu 1 - Western Krahn bible

Iblu 1

¹Nyɔsoa jii dě ɔ̍ tu̍owli po̍ nyɔ̍ dɔu ja̍a̍ tɛin iě ɔ̍ wlu dě à baaᵻ we̍ dǒ ti̍ dɔu di̍i̍.

²Jɛ da̍a bɔ̌ɛ-o wǐh la di̍i̍-ɛ, ɔ̍ jii dě ɔ̍ Jǔ ja̍a̍ iě ɔ̍ wlu dě à we̍. Dě ɔ̍ ja̍a̍ bo ɔ̍ nui kmɔ̌ la, iě ɔ̍ tba̍ ɔ̍ chèɛ̀ ɔ̍ iě dɛ̍ᵻ kli̍hgbɛ̍ ìh tè-ea i̍ dǒ ɔ̍ we̍-ɛ kɔn.

³Ɔ̍ blě Nyɔsoa-a tìh-a i̍ bɛ̌-ɛ. Ɔ̍ nɛ dě Nyɔsoa-a tu̍ di̍i̍ te̍kle̍e̍. Ɔ̍ blě kmɔ̌ la kwa̍ dǒ ɔ̍ gbǐh kɔn wlu̍ we̍. Ɔ̍ wɔ̀-a ɛ̍ nu̍-ɛ, wɛ̀ Nyɔsoa tǎli kmɔ̌ nyɔ̍-a gblɛ̍n sɔ̀ɛ̀n-a tìh i̍, wɛ̀ ɔ̍ dǔ i̍ tè-ɛ dě ja̍i̍wlɔ̀ dǒ Tìh-a I̍ Bɛ̌-ɛ Nyɔsoa-a di̍na̍ we̍.

⁴Nyɔsoa-a Jǔ ku̍ wɔ̍n dǒ Nyɔsoa-a ǐnchɔ̀ kɛ̍n, iě nynɛ̌ Nyɔsoa nyǐ-a ɔ̍-ɛ, i̍h ku̍ wɔ̍n dɛ ke dǒ i̍h naɛ kɛ̍n.

⁵Dɛ̍nu̍ɛ, Nyɔsoa-a se̍a ka dǎ dě ɔ̍ ǐnchɔ̀-a nyɔ̍ we̍, “Mɔ̀ ǎn Jǔ, sɔ da̍a sèàn blǐ mɔ̍ ìn Baa wɛ̀.” Iě ɔ̍-ɔ se̍a ka nu̍ jɔ la, “Ǎn mu̍ ɔ̍ Baa nu̍, wɛ̀ ɔ̍ iě ǎn Jǔ nu̍.”

⁶Ɛ̍ se̍-o siee, ti̍ Nyɔsoa-a dbo̍-a ɔ̍ sàì Jǔ nɔ̌ kmɔ̌ we̍-ɛ, ɔ̍ la̍a̍, “Ǎn ǐnchɔ̀ kli̍hgbɛ̍ kɔn i̍h iě ɔ̍ wɛɛ sà.”

⁷Kǎ Nyɔsoa dǎ ka dǒ ɔ̍ ǐnchɔ̀ pùn. Ɔ̍ la̍a̍, “Ǐn nui ǎn ǐnchɔ̀ poɔ we̍i̍, iě ǐn nui i̍h nɛ̍-a pàìbǒ we̍i̍.”

⁸Jɛ dǒ ɔ̍ Jǔ we̍ nɔ̀ɔ̍, ɔ̍ la̍a̍, “Nyɔsoa, nàɛ̀ nynɛ̌ gbalǎ-a mu̍ nɛ nɔ̌ kmɔ̌-a kmɔ̌. I̍ slɛ̌-ɛ bo àn kɔn-ɛ àn kmɔ̌ wlu̍ i̍.

⁹Ìn jbɛɛ dɛ̍ ɛ̀ slɛ̌-a i̍-ɛ, iě ìn faɛn klǐ-dɛ̍. Ɛ̍ kɔn tìh mɔ̍ ɔ̀ nu̍-a àn Nyɔsoa-aɛ, iě ǐn tba̍ ìn chèɛ̀, wɛ̀ ǐn nu̍ ɛ̍ iě ìn nmɔ wɛ̀ ìn tè-ɛ ja̍ ɛ̍ sìì ìn ba̍ᵻ kli̍hgbɛ̍.”

¹⁰Kǎ Nyɔsoa dǎ ka dɛ, ɔ̍ la̍a̍, “Joi, sɔ dě tɔ̀blɔ̍ɔ̍-ɛ, mɔ̀ bo ɔ̀ nu̍ blǔh la, ɛ̍ ke ja̍u̍n ke.

¹¹I̍h-a mu̍ mǎ kli̍hgbɛ̍, jɛ àn mu̍-o sie. I̍h-a mu̍ soa i̍ gbǎ ka jliɛ̍-ɛ.

¹²Àn mu̍ i̍h de̍ po̍ ka nyɔ̍-a po̍ plɛ̀i̍ soa de̍-ɛ, nɛ̀ i̍h-a mu̍ wɔ̀ɔ̀ poe-ɛ ka nyɔ̍-a poe plɛ̀i̍ wɔ̀ɔ̀-ɛ. Jɛ mɔ̀ɔ̍, ka due ìn nɛ-aɛ, kǎ àn mu̍ nɛ, àn sɔ̀nᵻ se̍ gba̍ dlǔ i̍ chlà.”

¹³Nyɔsoa-a se̍a ka dǎ dě ɔ̍ ǐnchɔ̀-a nyɔ̍ we̍, “Tè i̍ da̍a ǐn di̍na̍ we̍ te̍e̍, iě ɛ̍ nu̍ ìè àn nyɛ̌-nyɔ̍ kɛ̍n i̍ na.”

¹⁴Ǐnchɔ̀-a chɛ̀ ka i̍h-a tìh nɛ ɛ? I̍h kli̍hgbɛ̍ bo ìh-a dbee Nyɔsoa jǔ. Iě Nyɔsoa dbo̍ i̍h, i̍h iě nyɔ̍ ɔ̍ mu̍-a pǔh-iɛ we̍ gbǎ.